Lk 19
19
Laj Zakeo
1Naq li Jesus kox'okaq Jerikó, kixtikib' nume'k sa' li tenamit. 2Aran wank jun li winq b'ihom, aj Zakeo xk'ab'a', xb'eenileb' laj titz'ol toj. 3Taaraj raj rilb'al ani li Jesus, ab'an ink'a' naruhank xb'aan naq kach'in roq ut naab'aleb' li tenamit. 4Jo'kan naq koho chi uub'ej sa' aanil ut kitaqe'k sa' jun toon li che', sikomoor xk'ab'a', re rilb'al li Jesus xb'aan naq aran toxnume'q.
5Naq kiwulak li Jesus sa' li na'ajej a'an, kixtaqsi li rilob'aal ut kixye re:
—Zakeo, kub'en chaq chi junpaat, xb'aan naq hoon tento tinkanaaq sa' laawochoch.
6Ut a'an kikub'e chaq chi junpaat ut koxk'ul chi sa sa' xch'ool. 7Naq ke'ril a'in, chixjunileb' li poyanam neke'choqoqnak chi xyeeb'al: “Xo'okaq chi hilank sa' rochoch jun li winq aj maak”. 8Toja' naq laj Zakeo kixaqliik ut kixye re li Qaawa':
—Chakuy inmaak, at Qaawa'. Tink'e li xyiijachil linjunkab'lal reheb' li neb'a', ut wi wank junaq xwelq'a k'aru re, kaahib' wa chik xk'ihal a'an naq tinq'ajsi re.
9Kixye li Jesus re:
—Anaqwan xk'ulunk li kolb'a ib' sa' li kab'l a'in, xb'aan naq li winq a'in ralal ajwi' laj Abrahán. 10Xb'aan naq li K'ajolb'ej xk'ulunk chi xsik'b'al ut chi xkolb'al li b'arwan sachenaq.
Li jaljookil ru aatin chirix li tumin
(Mt 25,14-30)
11Naq eb' li tenamit yookeb' chi rab'inkil chixjunil a'in, li Jesus kixye jun li jaljookil ru aatin, xb'aan naq nach' chik wank rik'in Jerusalén, ut sa' xch'ooleb' a'an naq tikto taak'utb'esimanq li xnimajwal awab'ejihom li Yos.
12Kixye: “Jun xnimal ru winq koho sa' jun najtil tenamit re naq taaxaqab'aaq cho'q awab'ej ut chirix chik a'an taasutq'iiq chaq wi' chik. 13Jo'kan naq kixb'oqeb' chaq lajeeb' li xmoos, kixk'e lajeeb' chi tumin re li junjunq ut kixye reheb': «Yakonqex chiru toj reetal tinsutq'iiq chaq». 14Ab'anan eb' li rech tenamitul xik' neke'ril li winq a'an; jo'kan naq ke'xtaqlaheb' xtaql re xyeeb'al sa' li najtil tenamit: «Ink'a' naqaj naq a'an taa'awab'ejinq qe».
15“Moqon, naq ak xk'ul chik li xk'anjel, kisutq'iik chaq, kixtaqla xb'oqb'aleb' li xmoos li kixk'e wi' li tumin, re xnawb'al jo'nimal chik xe'reechani sa' xb'een chi xjunjunqaleb'. 16Kol'elq li xb'een ut kixye: «Wa', laatumin xrala lajeeb' chik». 17«Us, at chaab'il moos -chu'uxk re-. Tiik aach'ool naq xatwank rik'in li b'a'b'ay; chiwanq b'i' aawankil sa' xb'een lajeeb' chi tenamit». 18Kichalk li xkab' ut kixye: «Wa', laatumin xrala oob' chik». 19A'an ajwi' kiyehe'k re: «Laa'at ajwi' chiwanq aawankil sa' xb'een oob' chi tenamit».
20“Kol'elq li rox ut kixye: «Wa', waye' laatumin. Xink'uula sa' jun li t'ikr: 21xinxiwa aawu xb'aan naq josq' aj winqat; nakatxokok b'arwi' ink'a' xathirok ut nakatq'olok b'arwi' ink'a' xat-awk».
22“Toja' naq kixye li awab'ej: «Rik'in xsa' aawe tinraqoq aatin sa' aab'een, at maa'us aj k'anjel. Ak nakanaw naq josq' aj winqin: ninxokok b'arwi' ink'a' xinhirok ut ninq'olok b'arwi' ink'a' xin'awk. 23K'a' naq ink'a' xak'e lintumin sa' yakleb'aal tumin ut laa'in, sa' linsutq'ijik chaq, xwisi raj rochb'een li ral?». 24Ut kixye reheb' li wankeb' aran: «Maq'omaq li tumin chiru ut k'ehomaq sa' ruq' li wank lajeeb' xtumin». 25Ke'xye ut re: «Wa', ak wank lajeeb' xtumin!».
26“Kichaq'ok a'an: «Relik chi yaal ninye eere naq ani wank k'aru re, ruk' chik taak'eemanq re; ut ani maak'a' wank re, a' ajwi' li k'aru re taamaq'manq chiru. 27Ut eb' li xik' neke'ilok we, li ink'a' xe'raj naq laa'in tin'awab'ejinq reheb', k'amomaqeb' chaq arin ut kamsihomaqeb' chiwu»”.
V. LI XK'ANJEL LI JESUS JERUSALÉN (19,28—21,38)
Rokik li Jesus Jerusalén
(Mt 21,1-11; Mk 11,1-11; Jn 12,12-16)
28Naq ak xye a'in li Jesus, k'amol b'e chiruheb' naq yo chi taqe'k Jerusalén. 29Ut naq kinach'ok Betfagé ut Betania, chiru li tzuul Olivos xk'ab'a', kixtaqla wiib'eb' li xtzolom 30ut kixye reheb':
—Ayuqex sa' li k'aleb'aal wank cheru ut, naq toxex'okaq aran, teetaw jun li ch'ina b'uur b'ak'b'o, toj maajun winq b'ehenaq chirix. Hitomaq ut k'amomaq chaq. 31Ut wi ani taapatz'oq eere: «K'a'ut naq nekehit?», jo'ka'in cheyehaq: «Xb'aan naq li Qaawa' taa'ajoq re».
32Koheb' li ke'taqlaak ut koxe'xtaw jo' kiyehe'k reheb' xb'aan li Jesus.
33Ut naq yookeb' chi xhitb'al li ch'ina b'uur, eb' laj eechal re ke'xye reheb':
—K'a'ut naq yookex chi xhitb'al li ch'ina b'uur?
34Ke'chaq'ok eb' a'an:
—Xb'aan naq li Qaawa' taa'ajoq re, chankeb'.
35Ut ke'xk'am li ch'ina b'uur rik'in li Jesus, ke'xk'e li raq'eb' sa' xb'een ut ke'xk'e chi k'ojlaak li Jesus aran. 36Naq yo chi xik, ke'xhelatq li raq'eb' sa' b'e. 37Ak nach' chik rik'in li kub'sink re li tzuul Olivos, chixjunil li xk'ihaleb' li xtzolom ke'ok chi xnimankil ru li Yos chi saheb' sa' xch'ool ut chi kaw xyaab' xkuxeb' xb'aan chixjunil li sachb'ach'oolej ke'ril. 38Ke'xye:
—Usilaatinanb'il li Rey li xchalk sa' xk'ab'a' li Qaawa'! Tuqtuukil usilal sa' choxa ut xnimal loq'al toj taqe'q!#19,38 Sal 118,26; Lk 2,14.
39Wankeb' aj Pariseey sa' xyanqeb' li tenamit ke'xye re:
—At Tzolonel, q'useb' laatzolom.
40Kichaq'ok a'an ut kixye:
—Ninye eere: wi eb' a'in ch'anch'o te'kanaaq, a'eb' chik li pek te'xjap re.
Li Jesus kiyaab'ak chirix Jerusalén
41Naq kinach'ok li Jesus rik'in Jerusalén ut kiril li tenamit, kiyaab'ak chirix ut kixye: 42“Wi laa'at xanaw taxaq xb'ehil li tuqtuukil usilal chiru li kutan a'in! Ab'anan muqmu xkanaak chawu anaqwan. 43Xb'aan naq chalkeb' re li kutan sa' aab'een naq tate'xtz'ap eb' li xik' neke'ilok aawe, tate'xsut ut tate'xpitz'i yalaq b'ar aacha'al; 44tate'xmuch'i chiru ch'och' laa'at ut eb' laawalal aak'ajol li wanqeb' aawik'in, ut ink'a' te'xkanab' pek chi xb'een pek, xb'aan naq ink'a' xak'e reetal li honal xat-ula'aniik wi'”.
Li Jesus kirisiheb' laj k'ay sa' rochoch li Yos
(Mt 21,12-17; Mk 11,15-19; Jn 2,14-16)
45Naq kox'okaq sa' rochoch li Yos, li Jesus kixtikib' risinkileb' laj k'ay, 46ut kixye reheb':
—Tz'iib'anb'il sa' li Santil Hu naq li wochoch a'anaq rochochil li tijok; ut laa'ex xek'e cho'q xna'ajeb' laj elq'.#19,46 Is 56,7; Jr 7,11.
47Rajlal kutan naxtzoleb' sa' rochoch li Yos, ut eb' li xb'eenil aj tij, eb' laj tz'iib' jo'wi' li xninqaleb' ru sa' li tenamit yookeb' chi xsik'b'al chan raj ru naq te'xkamsi. 48Ab'anan ink'a' neke'xtaw chanru te'xb'aanu, xb'aan naq chixjunil li tenamit neke'ab'ink re ut q'es ruheb' rik'in li naxye.
Dewis Presennol:
Lk 19: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.