Jn 13
13
Li Jesus kixch'aj li roqeb' li xtzolom
1Rub'elaj chaq xninq'ehinkil li Paswa naxnaw li Jesus naq xwulak xhonal naq taa'elq sa' li ruuchich'och' a'in ut taaq'axonq rik'in li Yuwa'b'ej. Jo' naq kixraheb' li xtzolom li wankeb' sa' ruuchich'och', kixraheb' chi tz'aqal re ru toj sa' roso'jik.
2Yookeb' chi wa'ak ewu, ut laj Tza ak xk'e sa' xk'a'uxl laj Judas Iskariote, ralal laj Simón, naq tixq'axtesi li Jesus. 3Naxnaw li Jesus naq k'eeb'il chixjunil sa' ruq' xb'aan li Yuwa'b'ej, rik'in li Yos elenaq chaq ut rik'in li Yos xik re. 4Jo'kan naq kixaqliik naq yo li wa'ak, kirisi li xb'atb'al rib', kixchap jun li t'ikr ut kixb'ak' chi xsa'. 5Chirix chik a'in kixk'e ha' sa' jun li emel ut ki'ok chi xch'ajb'al li roqeb' li xtzolom ut kixchaqihob'resiheb' chiru li t'ikr b'ak'b'o chi xsa'.
6Naq kiwulak wan wi' laj Simón Pedro, a'an kixye re:
—Qaawa', ma laa'at tatch'ajoq re li woq?
7Kichaq'ok li Jesus ut kixye:
—Li yookin chi xb'aanunkil ink'a' nakataw ru anaqwan. Toj moqon toxaataw ru.
8Ut laj Pedro kixye re:
—Maajoq'e taach'aj li woq.
Kisumeek xb'aan li Jesus:
—Wi ink'a' tinch'aj laawoq, ink'a' tattz'aqonq wik'in.
9Kixye laj Simón Pedro:
—Qaawa', moko ka'aj ta wi' li woq taach'aj, taach'aj aj b'an wi' eb' li wuq' ut linjolom.
10Li Jesus kixye re:
—Ani ak x'atink ink'a' chik naraj ch'aje'k xb'aan naq ak saq ru li xjunxaqalil. Ut laa'ex ak ch'ajb'ilex, ab'an moko chejunilex ta.
11Naxnaw chi us ani taaq'axtesinq re; jo'kan naq kixye: “Moko chejunil ta ch'ajb'ilex”.
12Moqon, naq ak xch'ajeb' li roq ut xk'e wi' chik li raq' chirix, kihilank wi' chik sa' meex ut kixye reheb':
—Ma neketaw ru li xinb'aanu eere? 13Laa'ex, Tzolonel ut Qaawa' nekeye we, ut yaal nekeye xb'aan naq laa'in ajwi'. 14Wi laa'in, li Qaawa' ut laj Tzolonel, xinch'aj leeroq, laa'ex ajwi' tento teech'aj leeroq cherib'il eerib'. 15Xk'amb'al eeb'e xinb'aanu, re naq teeb'aanu ajwi' laa'ex jo' xinb'aanu eere. 16Relik chi yaal ninye eere: laj k'anjel moko nim ta xwankil chiru laj eechal re, chi moko li taql nim xwankil chiru li xtaqlank chaq re. 17Wi nekenaw a'in, us xaq eere wi teeb'aanu chi jo'kan.
18“Ink'a' nin'aatinak cherix chejunilex. Laa'in ninnaw chi us ani li kinsik'eb' chaq ru; ab'anan tento taatz'aqloq ru li Santil Hu: «Li nawa'ok re linwa xtaqsi li roq ruq' sa' inb'een».#13,18 Sal 41,10. 19Ak ninye eere anaqwan, naq toj maji' nak'ulmank, re naq, jo'q'e taak'ulmanq, teepaab' naq Laa'inin. 20Relik chi yaal ninye eere: ani nak'uluk re li nintaqla laa'in, laa'in nikinxk'ul, ut li nak'uluk we, a' Li kitaqlank chaq we naxk'ul”.
Li Jesus kixye ani taaq'axtesinq re
(Mt 26,21-25; Mk 14,18-21; Lk 22,21-23)
21Naq ak xye a'in, li Jesus sachaamil xch'ool kikanaak, ut ki'aatinak chi yaal:
—Relik chi yaal ninye eere naq jun eere taaq'axtesinq we, chan.
22Eb' li xtzolom ke'xka'ya rib' chirib'ileb' rib', xb'aan naq ink'a' neke'xnaw ani li naxye. 23Jun reheb' li xtzolom, a' li q'axal raaro xb'aan li Jesus,#13,23 A'an li apóstol San Jwan. wank chi xk'atq sa' meex. 24Laj Simón Pedro rik'in eetalil kixye re: “Patz' ani li naxye”. 25Ut a'an kix'anab' rib' chire xch'ool li Jesus:
—Qaawa', ani a'an? chan re.
26Kichaq'ok li Jesus ut kixye:
—A' li tink'e wi' jun hab'ok chi tz'ab'il wa.
Kixchap ut li wa, kixtz'a ut kixk'e re laj Judas, ralal laj Simón Iskariote. 27Ut chirix li jun hab'ok chi wa ki'ok laj tza rik'in. Toja' naq li Jesus kixye re:
—Li k'aru taab'aanu, b'aanu chi junpaat.
28Ab'anan maajun reheb' li wankeb' sa' meex kixtaw ru k'a'ut naq kixye re chi jo'kan. 29Wan ke'k'oxlank re naq li Jesus yo chi xyeeb'al re: “Toxaaloq' li k'aru nak'anjelak qe re li ninq'e”, malaj: “K'e b'ayaq xtenq'ankileb' li neb'a'”, xb'aan naq rik'in laj Judas wank li k'uuleb'aal tumin.
30Ka'ajwi' kixk'ul laj Judas li jun hab'ok chi wa, ki'elk chi junpaat. Ak q'oqyink chik.
31Naq ak x'elk laj Judas, kixye li Jesus:
—Anaqwan xnimaak xloq'al li K'ajolb'ej ut li Yos xnimaak xloq'al rik'in. 32Wi li Yos xnimaak xloq'al rik'in li K'ajolb'ej, jo'kan ajwi' li Yos tixnima xloq'al li K'ajolb'ej rik'in, ut tixnima chi junpaat.
Li ak' chaq'rab'
33“Ex walal ink'ajol, yal jun k'amok aj chik tinwanq eerik'in. Laa'ex tineesik'. Jo' xinye reheb' laj Judiiy, jo'kan ajwi' tinye eere anaqwan: B'arwi' xik we laa'in, ink'a' texruuq chi xik laa'ex. 34Jun ak' chaq'rab' nink'e eere: naq chera eerib' cherib'il eerib'. Jo' naq xexinra laa'in, jo'kan ajwi' naq chera eerib' cherib'il eerib'. 35Rik'in a'in chixjunileb' te'nawoq re naq laa'ex intzolom: wi nekera eerib' cherib'il eerib'”.
Chi junxilaj kixye li xmaak laj Pedro
(Mt 26,31-35; Mk 14,27-31; Lk 22,31-34)
36Laj Simón Pedro kixpatz' re li Jesus:
—Qaawa', b'ar xik aawe? chan re.
Kichaq'ok li Jesus ut kixye:
—B'arwi' xik we laa'in, ink'a' tatruuq chintaaqenkil anaqwan; toj moqon chik tinaataaqe.
37Kiyehe'k re xb'aan laj Pedro:
—At Qaawa', k'a'ut naq ink'a' truuq tatintaaqe anaqwan? Laa'in tinq'axtesi linyu'am sa' aak'ab'a'.
38Kichaq'ok li Jesus ut kixye:
—Ma taaq'axtesi laayu'am sa' ink'ab'a'? Relik chi yaal ninye aawe: toj maji'aq nayaab'ak li tzo' kaxlan, akaq xaye ox sut naq ink'a' nakanaw wu.
Dewis Presennol:
Jn 13: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.