Gn 26
26
2. LAJ ISAHAK (26,1-35)
Laj Isahak aran Kerar
1Kiwank we'ej sa' xteepal Kanahán (jalan wi' chiru li kiwank naq toj yo'yo laj Abrahán). Jo'kan naq laj Isahak kixk'oxla xik Ejiipt. 2Ab'an li Qaawa' kixk'ut rib' chiru ut kixye re: “Matkub'ek Ejiipt, ayu b'an Kerar, sa' xtenamit laj Abimélek, awab'ej re Filistea. 3Wanqat jo' aj numel sa' li ch'och' a'in ut laa'in tatintenq'a ut tatwosob'tesi, xb'aan naq aawe ut reheb' laawalal aak'ajol tink'e chixjunil li na'ajej a'in, ut wank sa' inch'ool li jurament li kinb'aanu rik'in laj Abrahán laayuwa'. 4Tink'ihob'resi eb' laawalal aak'ajol, kama'aqeb' li chahim sa' choxa, ut tink'e chixjunil li ch'och' a'in reheb' laawi aamam, ut sa' xk'ab'a'eb' a'an osob'tesinb'ilaqeb' chixjunil li tenamit sa' ruuchich'och',#26,3-4 Gn 22,16-18. 5xb'aan naq laj Abrahán xinxpaab' ut xk'uula sa' xch'ool eb' li waatin, linchaq'rab', lintaqlahom ut chixjunil li xink'ut chiru”.
6Toja' naq laj Isahak koho sa' li tenamit Kerar re aatinak rik'in laj Abimélek, ut kina'ajunk aran. 7Ut naq eb' li wankeb' aran ke'patz'ok chirix li rixaqil, laj Isahak kixye: “A'an li wanab'”,#26,7 Gn 12,13; 20,2. chan. Xb'aan naq naxiwak chi xyeeb'al naq lix Rebeka a'an rixaqil; mare anchal taakamsiiq xb'aaneb' li wankeb' aran, xb'aan naq ch'ina'usil ixq lix Rebeka.
8Ak junxilaj rokikeb' aran naq laj Abimélek, awab'ej re Filistea, ki'ilok sa' b'entaan ut kixk'e reetal naq laj Isahak yo chi xq'alunkil lix Rebeka li rixaqil. 9Toja' naq laj Abimélek kixtaqla xb'oqb'al laj Isahak ut kixye re: “Ch'olch'o naq a'an aawixaqil! K'a' put naq xaye: «Wanab' a'an»?”. Kichaq'ok laj Isahak: “Xinye sa' inch'ool: Mare anchal tine'xkamsi xb'aan a'an”. 10Kixye laj Abimélek: “K'a'ut naq xab'aanu qe chi jo'ka'in? Wi ta junaq sa' qatenamit x'ok chi wark rik'in laawixaqil, laa'at xateneb' raj maak sa' qab'een”. 11Toja' naq laj Abimélek kixye re chixjunileb' li tenamit: “Li taach'i'ch'i'inq re li winq a'in malaj li rixaqil taakamsiiq”, chan.
12Sa' li chihab' a'an laj Isahak ki'awk sa' li na'ajej a'an ut kixxok o'taqk'aal sa' xb'een li junjunq, xb'aan naq ki'osob'tesiik xb'aan li Qaawa'. 13Ki'ok chi b'ihomo'k, kitamk li k'aru re toj kib'ihomo'k chi q'axal yo'oon. 14Wankeb' xkarneer, xwakax ut naab'aleb' laj k'anjel chiru. Ut eb' laj Filistea ke'ok chi xkaqalinkil.
Eb' li xjulel li ha' sa' xyanq Kerar rik'in Berseba
15Chixjunileb' li xjulel li ha' li ke'xb'ek laj k'anjel chiru laj Abrahán li xyuwa' naq toj yo'yo, kilaje'b'ut'e'k chi ch'och' xb'aaneb' laj Filistea. 16Toja' naq laj Abimélek kixye re laj Isahak: “Elen sa' qayanq xb'aan naq xnimank laawankil chiqu laa'o”.
17Laj Isahak ki'elk aran, kox'okaq sa' xtaq'ahil Kerar, ut aran kikanaak. 18Kixb'ek wi' chik eb' li xjulel li ha' li xb'ekomeb' junxil laj k'anjel chiru laj Abrahán li xyuwa', a'eb' li ke'b'ut'e'k xb'aaneb' laj Filistea chirix xkamik laj Abrahán; ut kixk'e wi' chik xk'ab'a'eb' li ak xk'ehom laj Abrahán junxil. 19Sa' jun kutan eb' laj k'anjel chiru laj Isahak ke'ok ut chi b'ekok sa' li taq'a ut ke'xtaw aran jun yu'amha'. 20Ab'anan eb' laj ilol ketomq re Kerar ke'pleetik rik'ineb' laj ilol xketomq laj Isahak: “Qe li ha'”, chankeb'. Jo'kan naq laj Isahak kixk'e Eseq cho'q xk'ab'a' li ha' a'an xb'aan naq ke'pleetik chirix. 21Jun chik xjulel li ha' ke'xb'ek, ut kiwank wi' chik pleet chirix a'an: jo'kan naq Sitná kixk'ab'a'in.
22Naq laj Isahak ki'elk aran, kixb'ek jun chik xjulel li ha', ab'an ink'a' chik ke'xpleeti rib' chirix a'an: jo'kan naq Rehobot kixk'e cho'q xk'ab'a'. Ut kixye: “Anaqwan li Qaawa' xk'e qanimla na'aj; sa chik toowanq sa' li ch'och' a'in”, chan.
23Chirix a'an laj Isahak kiq'axonk Berseba. 24Sa' ajwi' li q'oqyink a'an li Qaawa' kixk'ut rib' chiru ut kixye re:
“Laa'in li xYos laj Abrahán laayuwa'.
Matxiwak xb'aan naq laa'in wankin aawik'in.
Tatwosob'tesi ut tink'ihob'resi eb' laawalal aak'ajol
sa' xk'ab'a' laj Abrahán, laj k'anjel chiwu”.
25Toja' naq laj Isahak kixyiib' aran jun li artal ut kixyaab'a xk'ab'a' li Qaawa'. Sa' li na'ajej a'an kixyiib' li xmuheb'aal, ut eb' laj k'anjel ke'xb'ek jun xjulel li ha'.
Ke'xk'am rib' sa' sum'aatin laj Isahak ut laj Abimélek
26Toja' naq laj Abimélek#26,26 Gn 21,22. koho wan wi' laj Isahak. Toj Kerar ki'elk chaq rochb'een laj Ajusat, a'an jun ramiiw, rochb'een ajwi' laj Pikol, li najolomink reheb' laj puub'. 27Laj Isahak kixye reheb': “K'a'ut naq xexchalk wik'in laa'ex li xik' nekex'ilok we ut xineerisi chaq sa' eeyanq?”, chan. 28Ke'chaq'ok eb' a'an ut ke'xye: “Xqak'e reetal naq li Qaawa' wank aawik'in. Jo'kan naq xqaye: «Chiwanq junaq jurament sa' qayanq ut choowanq sa' sum'aatin chiqib'il qib'». 29Laa'at ink'a' taab'aanu qe li ink'a' us xb'aan naq laa'o ink'a' xqab'aanu aawe: junes chaab'ilal xqab'aanu aawe ut xatqachaq'rab'i sa' tuqtuukilal, at rosob'tesihom li Qaawa'”, chankeb'.
30Toja' naq laj Isahak kixk'e jun ninq'e; ke'wa'ak ut ke'uk'ak. 31Naq kisaqewk, ke'wakliik ut ke'xk'e li jurament chirib'ileb' rib'. Chirix chik a'an laj Isahak kixchaq'rab'iheb' ut koheb' sa' tuqtuukilal.
32Sa' ajwi' li kutan a'an eb' laj k'anjel chiru laj Isahak ke'wulak rik'in ut ke'xye resil naq xe'xb'ek li ha': “Xqataw chaq li ha'”, chankeb' re. 33Laj Isahak kixk'e Sebá cho'q xk'ab'a' li ha' a'an: jo'kan naq Berseba naxk'ab'a'in li tenamit a'an chalen toj anaqwan.
Eb' li rixaqil laj Esaú
34Ka'k'aal chihab' wank re laj Esaú naq kixk'ameb' cho'q rixaqil lix Judit, xrab'in laj Beherí aj Hit, ut lix Basmat, xrab'in laj Elón aj Hit. 35Ab'anan k'ajo' li rahilal ke'xk'ul laj Isahak ut lix Rebeka xb'aaneb' li ixq a'an!
Dewis Presennol:
Gn 26: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.