Marcos 14
14
Ri e aj k'amal wach re ri tinamit kakich'a'tib'ej su'anik kakichap ri Jesús
(Mt. 26:1-5; Lc. 22:1-2; Jn. 11:45-53)
1Echiri' keb' q'ij chi kopon wi ri nimaq'ij Pascua y ri nimaq'ij re tijoj pam na jinta levadura che,#14:1 Xew kak'is ri nimaq'ij Pascua, kajeqer ri wuqub' q'ij re ri nimaq'ij echiri' raj Israel na kakitij ta pam k'o levadura che. Éx. 12; Dt. 16:1-17; Lv. 23:5-6 taq ri nimaq e aj chakunel pa Rocho Dios kuk' raj k'utunel re ri tzijpixab', lik kakitzukuj su'anik kakichap ri Jesús ruk' sokoso'nik re kakikamisaj. 2Xkib'i'ij k'ut: «Na kaqa'an ta pa wa nimaq'ij cha' ri tinamit na ketukuk ta ruma wa'» xecha'.
Jun ixoq kuq'ej kunab'al ki' ruxlab' chu'jolom ri Jesús
(Mt. 26:6-13; Jn. 12:1-8)
3K'o k'u ri Jesús pa ri tinamit Betania chirocho ri Simón, ri jun xk'oji' ri yab'il lepra che. Ek'uchiri' tz'ul ri Jesús chwa ri mexa, xopon jun ixoq ruk'a'am jun k'olib'al nojinaq che kunab'al lik ki' ruxlab' y lik k'i rajil, wa' 'anatal ruk' saqil nardo. Rixoq xuteq'ij uchi' ri k'olib'al; tek'uchiri', xuq'ej ri kunab'al chu'jolom ri Jesús.
4E k'o k'u jujun chike ri e k'o chiri' xpe koyowal echiri' xkil wa', y jewa' xkib'i'ij chikiwach:
—¿Su'chak wa kunab'al xtz'ilo'xik? 5Ma ri lik usuk' e ta xk'ayix wa' chi oxib' ciento denarios, y ruk' wa' keto' ri nib'a'ib' —xecha'. Y lik k'u ri' kech'a't chirij rixoq.
6Ek'u ri Jesús xub'i'ij chike:
—Mik'aq b'i uq'ij wi'xoq. ¿Su'b'e kixch'a't chirij ri xu'ano? Ma ri xu'an chwe e jun utzilaj chak. 7Ri nib'a'ib' e la' xaqi e k'o iwuk' yey utz keb'ito'o jampala' kiwaj ri'ix, no'j ri'in na xaqi ta in k'o iwuk'. 8Wi'xoq e xu'ano janipa ri xuch'ij u'anikil; ruk' k'u wa' e xnab'ej pan che uyijb'axik ri nucuerpo che ri muqub'al we.#14:8 Echiri' kakam junoq, raj judi'ab' kakatinisaj ri cuerpo y kakikoj kunab'al ki' ruxlab' che. 9Paqatzij wi kamb'i'ij chiwe: Pa taq katzijox wi wa Utzilaj Tzij che ronoje ruwachulew, kakuxtax k'u wi'xoq ruma ri xu'ano —xcha'.
Ri Judas kuk'ayij ri Jesús
(Mt. 26:14-16; Lc. 22:3-6)
10Ewi ri Judas aj Iscariot, jun chike ri kab'lajuj utijo'n ri Jesús, xe'ek kuk' ri nimaq e aj chakunel pa Rocho Dios re kuya ri Jesús pakiq'ab'. 11Rike, echiri' xkita wa', lik xeki'kot che y xkib'i'tisij nenare' kakiya puaq che. Ek'u ri' ri Judas xujeq utzukuxik su'anik kuya ri Jesús pakiq'ab'.
Ri Jesús kutij ri cena re Pascua kuk' ri kab'lajuj utijo'n
(Mt. 26:17-29; Lc. 22:7-23; Jn. 13:21-30; 1 Co. 11:23-26)
12Chupa k'u ri nab'e q'ij re ri nimaq'ij echiri' katij ri pam na jinta levadura che y kekamisax chwi raltar taq ri q'apoj b'exex re ri Pascua,#Éx. 12:1-13; Lv. 23:5-6 rutijo'n ri Jesús xkitz'onoj che:
—¿Pa ka'aj wi la ke'qayijb'a' wi ri cena re Pascua? —xecha'.
13Ewi xeb'utaq b'i ka'ib' chike rutijo'n y xub'i'ij b'i chike:
—Jix pa ri tinamit y echiri' kik'ul jun achi ruk'a'am jun kura' ya', chixterej b'i chirij. 14Pa k'u kok wub'i wa' wa'chi, chib'i'ij che ri rajaw ja: “Jewa' kub'i'ij ri tijonel qe'oj: ¿Pachawi k'o wi ri luwar pa kantij wi ri cena re Pascua kuk' ri nutijo'n?” kixcha che. 15Ek'u ri ku'an ri rajaw ja e kuk'ut chiwe jun nimalaj luwar chikaj pa ri kale' ja, wa' yijb'ital chik. Chiri' k'u ri' chiyijb'a' wi ri cena re Pascua —xcha'.
16Xeb'ek k'u rutijo'n, xeb'ok pa ri tinamit y xe'kiriqa' jela' pacha' ri xub'i'ij b'i ri Jesús chike. Y xkiyijb'a' k'u ri cena re Pascua.
17Ek'uchiri' xok raq'ab', xopon ri Jesús junam kuk' ri kab'lajuj utijo'n. 18Ek'uchiri' e k'o chwa ri mexa, e ri' kewa'ik, ri Jesús xub'i'ij:
—Paqatzij wi kamb'i'ij chiwe: Jun chiwe wa ix k'o wara wuk' pa wa'im, e kak'ayin we —xcha'.
19Ewi rike xkijeq lik keb'isonik y chikijujunal kakitz'onoj che:
—¿K'axtaj in ri'? —kacha jun.
—¿K'axtaj in ri'? —kacha jun chik.
20Ri Jesús xuk'ul uwach; jewa' xub'i'ij:
—Wa' e jun chiwe wa ix kab'lajuj, e ri kumu' lo ruwa junam wuk' chupa ri laq. 21Paqatzij wi Ralaxel Chikixo'l Tikawex e katajin che rik'owib'exik janipa ri tz'ib'ital kan chupa Ruch'a'tem ri Dios puwi Rire. Pero ¡lik k'u toq'o' uwach rachi kak'ayin re! E ne más utz che wa'chi tamaji xalaxik —xcha'.
22Xaloq' k'u ri' kewa'ik, ri Jesús xuk'am ri pam y xutioxij che ri Dios. Ewi xuwech'o, xujach chike y jek'uwa' xub'i'ij:
—Chitija', ma e nucuerpo wa' —xcha'.
23Xuk'am k'u ri k'olib'al k'o vino chupa, yey echiri' utioxim chi che ri Dios, xuya chike y konoje xkitij chuchi' wa' wa k'olib'al. 24Xub'i'ij k'u chike:
—E nukik'el wa', ri katuruw na kuma uk'iyal tikawex re kuyb'al kimak, yey wa' e kujikib'a' uwach ri k'ak' tzij.#Jer. 31:31-34 25Paqatzij wi kamb'i'ij chiwe: Na kantij ta chi ruwa'al uva, k'ate ki'ntija tanchi chupa ruq'ijol rutaqanik ri Dios —xcha'.
Ri Jesús kuq'alajisaj ri ku'an ri Pedro echiri' karewaj we reta'am uwach
(Mt. 26:30-35; Lc. 22:31-34; Jn. 13:36-38)
26Echiri' xkik'is ub'ixoxik ri b'ix,#14:26 K'isb'al re ri cena re Pascua, ri kaki'an raj judi'ab' e kakib'ixoj ri Salmos 115–118. xeb'ek chwa ri juyub' Olivos. 27Ek'uchiri' ri Jesús xub'i'ij chike:
—Waq'ab' iwonoje ri'ix kiwesaj na iwib' chwij, ma e pacha' kub'i'ij Ruch'a'tem ri Dios:
Kankamisaj raj chajinel
yey taq k'u ri' rub'exex kakikich b'i kib' Zac. 13:7
kacha'.
28No'j ek'uchiri' kink'astaj lo chikixo'l ri ekaminaq, kinnab'ej b'i chiwach k'a Galilea —xcha'.
29Ek'u ri Pedro xub'i'ij:
—Tob' ne konoje kakesaj kib' chi'ij la, ri'in na kan'an ta wa' —xcha'.
30Yey ri Jesús xuk'ul uwach:
—Paqatzij wi kamb'i'ij chawe: Wa jun aq'ab', echiri' k'amaja' ne kab'ixon kalaj ri teren, ri'at oxlaj chik ab'i'im na aweta'am ta nuwach —xcha'.
31No'j ri Pedro lik xujikib'a' ub'i'xikil:
—Tob' ne chirajawaxik kinkam junam uk' la, ri'in na kanwewaj taj we weta'am wach la —xcha'. Jek'ula' ri' xkib'i'ij konoje.
Ri Jesús ku'an orar pa ri werta Getsemaní
(Mt. 26:36-46; Lc. 22:39-46)
32Xeb'opon k'u pa jun luwar Getsemaní rub'i'. Ek'u ri Jesús xub'i'ij chike rutijo'n:
—Chixtz'ula kan wara, no'j ri'in ki'n'ana orar —xcha'.
33Yey xeb'uk'am k'u b'i ri Pedro, ri Jacobo y ri Juan ruk'. Xujeq k'u ri' lik kab'isonik y kak'axk'ob' ri ranima'. 34Xub'i'ij k'u chike:
—K'o jun unimal b'is re kamik chinuk'u'x. Chixk'ola kan wara; mixwarik y lik chi'ana orar —xcha'.
35Tek'uchiri', ri Jesús xqib' chi pana jub'iq' chwach, xuqasaj umejelem k'a chu'lew, y xutz'onoj che ri Dios we ta kuya na che na kik'ow ta chupa ru'orayil ri k'axk'ob'ik, 36jewa' xub'i'ij:
«Tat, Lal Nuqaw, chiwach Rilal na jinta k'ana k'ayew; chinkolob'ej ko la cha' na kinik'ow ta chupa wa' wa k'axk'ob'ik. No'j na e ta k'u chu'ana ri kuaj ri'in, ma e chu'ana' janipa ri ka'aj Rilal» xcha'.
37Tek'uchiri', xtzelej lo pa e k'o wi kan rutijo'n y xeb'o'lu'riqa' kewarik. Xub'i'ij k'u che ri Pedro:
—¿Katwar kami ri'? ¿Na xakuy ta k'ana ri waram cha' ka'an orar wuk', tob' tane xa juna ora? 38Mixwar k'ut, y lik chi'ana orar cha' kich'ij uchuq'ab' ri k'amb'al ipa kapetik. Paqatzij wi, lik kacha ik'u'x che u'anik ri utz, no'j wa' lik k'ayew chiwe ma e ri iti'jil na jinta ukowil —xcha'.
39Ek'u ri Jesús xe'ek tanchik, xu'ana orar, yey e xutz'onoj che ri Dios ri ujeqom chi lo utz'onoxik nab'e. 40Tek'uchiri', xtzelej tanchi lo kuk' rutijo'n y xeb'o'lu'riqa' kewarik; ma ri kiwach lik na kukuy ta chi ri waram y na kakiriq ta chik sa' ri kakib'i'ij che. 41Xtzelej k'u lo churox laj y xub'i'ij chike:
—¿K'a kixwar kami ri' ri'ix? ¿K'a kixuxlanik? ¡Ku'an na k'u la'! Ma e wa' xopon ru'orayil cha' Ralaxel Chikixo'l Tikawex kaya' pakiq'ab' raj makib'. 42¡Chixwa'lijoq! ¡Jo'! Chiwila', ma ri kak'ayin we ri'in e la' xk'unik —xcha'.
Kachap b'i ri Jesús
(Mt. 26:47-56; Lc. 22:47-53; Jn. 18:2-11)
43K'a kach'a't ne ri Jesús echiri' xk'un lo ri Judas, jun chike ri kab'lajuj utijo'n. Ek'u rire erachb'ilam lo uk'iyal winaq kuk'a'am lo espada y che'. Taq wa' etaqom lo kuma ri nimaq e aj chakunel pa Rocho Dios, taq raj k'utunel re ri tzijpixab' y ri nimaq winaq re ri tinamit.
44Ek'u ri Judas, ri kaya'w b'i re pakiq'ab', ub'i'im chi lo chike su'anik kaketa'maj china ri kakichapo, jewa' ub'i'im: «E ri jun kantz'ub' uchi', e ri' rire. Chapa k'u alaq y k'ama b'i alaq, yey chekojo b'i alaq e chajinel re cha' na kanimaj tub'i» xcha'. 45Ek'uchiri' xk'unik, maji chik xqib' ruk' ri Jesús y xub'i'ij che:
—¡Wajawal, Wajawal! —xcha che. Y xutz'ub' uchi'.
46Ek'uchiri', ri winaq xkichap ri Jesús cha' kakik'am b'i pa q'atb'al tzij.
47K'o k'u jun chike rutijo'n e k'o chiri', xresaj lo ru espada y xujochij b'i jun uxikin ri raj chak ri kajawal raj chakunel pa Rocho Dios.
48Xub'i'ij k'u ri Jesús chike:
—¿Su'chak petinaq alaq ruk' espada y che'? ¿Petinaq kami alaq che uk'amik b'i juna eleq'om? 49Wa petinaq loq ronoje q'ij wa' k'ut kink'utun chiwach alaq pa ri Rocho Dios. ¿Su'chak k'u ri' k'a e la' kino'lchapa alaq? No'j jek'uwa' ku'ano cha' e ku'ana janipa ri q'alajisam kan chupa Ruch'a'tem ri Dios —xcha chike.
50Tek'uchiri', konoje rutijo'n xeb'animajik y jela' xkiya kan ri Jesús.
Jun ala kanimajik
51K'o k'u jun ala teran b'i chirij ri Jesús, upisom rib' xa chupa jun sábana; rire xchap kuma ri soldados. 52Pero rala xusolij kan rusábana y e la' ch'analik xanimajik.
Ri Jesús k'o chikiwach raj q'atal tzij e aj judi'ab'
(Mt. 26:57-68; Lc. 22:54-55, 63-71; Jn. 18:12-14, 19-24)
53Xkik'am k'u b'i ri Jesús chwach ri kajawal raj chakunel pa Rocho Dios. Tek'uchiri', xkimol kib' ri nimaq e aj chakunel kuk' ri nimaq winaq re ri tinamit y raj k'utunel re ri tzijpixab'.
54Ek'u ri Pedro xa naj teran pan chirij ri Jesús y xok b'i k'a che ruwa ja re ri rocho ri kajawal raj chakunel pa Rocho Dios. Xe'tz'ula k'u kuk' ri e chajinel, e ri' kumiq'isaj rib' chuchi' ri aq'.
55Ri nimaq e aj chakunel pa Rocho Dios kuk' konoje ri uchapom wi rib' ri q'atb'al tzij, kakitzukuj su'anik kakikoj umak ri Jesús cha' jela' utz kaq'at tzij re kamik puwi', no'j na jinta k'o xkiriq chirij. 56Ma lik e k'i ri winaq xkitz'aq uchi', pero lik junwi taq ri xkib'i'ij. 57Ewi xeyaktaj jujun y xkitz'aq uchi', jewa' xkib'i'ij chirij:
58—Ri'oj xqato echiri' xub'i'ij: “Kanwulij wa Rocho Dios 'anatal xa kuma rachijab', yey xa pa oxib' q'ij kanyak jun chik na 'anatal ta kuma rachijab'” —xecha'. 59Na ruk' ta k'u ri', lik junwi taq ri xkib'i'ij.
60Ewi ri kajawal raj chakunel pa Rocho Dios xyaktaj chikixo'l y xutz'onoj che ri Jesús:
—¿E kami la' na jinta k'ana kab'i'ij ri'at? ¿Sa' k'u ri kak'ulub'ej uwach puwi wa ketajin che ukojik chawij? —xcha'.
61Pero ri Jesús xa xuto y na jinta k'o xub'i'ij. Tek'uchiri', xu'an jun chik tz'onob'al che ri Jesús:
—¿At b'a ri' ri Cristo, Ruk'ajol ri Dios, ri Jun lik nim uq'ij? —xcha che.
62Ri Jesús xuk'ul uwach:
—Qatzij, “In Ri'in.” Kil na k'u alaq Ralaxel Chikixo'l Tikawex tz'ul puwikiq'ab' ri Dios, ri lik k'o unimal uchuq'ab' yey kil k'u alaq ri' echiri' kak'un lo pa sutz' chwa ri kaj#Dn. 7:13; Ap. 1:7 —xcha'.
63Ek'u ri kajawal raj chakunel pa Rocho Dios xurich'ij ruq'u' y xub'i'ij:
—¡Na jinta chi uchak más e aj kojol umak! 64Ma lik e la' xta alaq xmakun chirij ri Dios echiri' xub'i'ij ri lik na taqal ta che. ¿Sa' k'u ri' kab'i'ij ralaq che? —xcha'.
Ewi konoje xkiq'at tzij puwi ri Jesús y xkib'i'ij lik taqal che kakamisaxik.
65Y e k'o jujun xkijeq kakichub'aj; kakich'uq rupalaj, kaki'an pa t'o'y yey kakib'i'ij k'u che:
—Chana'ij pe' china xch'ayaw awe —kecha che. Yey ri e chajinel kakipach' q'ab' chupalaj.
Ri Pedro kub'i'ij na reta'am ta uwach ri Jesús
(Mt. 26:69-75; Lc. 22:55-62; Jn. 18:15-18, 25-27)
66Ek'u ri Pedro k'o ikem che ruwa ja echiri' xk'un lo jun ali raj chak ri kajawal raj chakunel pa Rocho Dios. 67Ek'uchiri' rali xril ri Pedro kumiq'isaj rib' chuchi' ri aq', lik xutzutza' uwach y xub'i'ij che:
—Rilal lal jun chike ri eteran chirij ri Jesús ri aj Nazaret —xcha che.
68Ewi ri Pedro xrewaj, jewa' xuk'ul uwach:
—Ri'in na weta'am ta uwach y na weta'am tane sa' puwi' katch'a't wi —xcha'. Xel k'u b'i chuchi' ri puerta. Tek'uchiri', xch'aw ri teren.
69Ek'u rali aj chak echiri' xril tanchi ri Pedro, xujeq ub'i'xikil chike taq ri e k'o chiri':
—Wa' wa'chi e jun chike rutijo'n ri Jesús —xcha'.
70No'j ri Pedro xrewaj tanchik. Joq'otaj k'u ri', e taq ri e k'o chiri' xkib'i'ij tanchi che ri Pedro:
—Paqatzij wi rilal lal jun chike rutijo'n; lik q'alaj lal aj Galilea, ma ri kach'a't la e junam ruk' ri kech'a't rike —xecha'.
71Ewi ri Pedro xujeq ub'i'xikil itzel taq tzij y lik xujikib'a' uwach, xub'i'ij:
—Ri'in na weta'am ta k'ana uwach wa' wa'chi kab'i'ij alaq —xcha'.
72Ek'u ri teren xch'aw chukalaj. Ewi xk'un lo chuk'u'x ri Pedro ri xb'i'x lo che ruma ri Jesús: «K'amaja' ne kab'ixon ri teren chukalaj, ri'at oxlaj chik ab'i'im na aweta'am ta nuwach.» Ek'u katajin wa' pujolom, xumaj roq'ej.
Dewis Presennol:
Marcos 14: acrN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009, Wycliffe Bible Translators, Inc. All rights reserved.