Lugu 21
21
Nékar Ala lə njekəisiŋga lé
Mat 12.41-44
1Jeju un kəmee gə́ tar aa ne loo oo baoje gə́ d’ɔm nékar-Alaje lə dee mee sa̰duk-kɔm-lar’g lé. 2Yeḛ oo njekəisiŋga gə́ njendoo kára gə́ ree ɔm ŋgan lar gə́ njigi-njigi bèe keneŋ joo tɔ. 3Yen ɓa yeḛ pana: Ma m’ula sí təsərə, njekəisiŋga gə́ njendoo lé né gə́ yeḛ ila lé ur dɔ né ka̰ dee-deḛ lai gə́ d’ɔm mee sa̰duk-lar’g neelé, 4mbata deḛ lai neelé ta néje lə dee gə́ as dee nag ɓa d’ḭ d’ɔm kən ɓəi, nɛ yeḛ neelé ɓai nékiŋga gə́ a gə ŋgəm ne rəa ya odo lɔd ɔm kən mba̰.
Jeju pata lə kəi-Ala gə́ Jerusalem gə́ a gə tuji lé
Mat 24.1-2, Mar 13.1-2
5To gə́ njé gə́ na̰je pata d’wɔji ne dɔ kɔr mbalje gə́ kura yaa̰ ləm, gə nékarnoji gə́ dəwje d’unda kəi-Ala’g gə mba karee ndaŋg ne mèr lé ndá Jeju ila dee keneŋ pana: 6Néje nee gə́ seḭ ooje lé loo gə́ ndəa a gə teḛ lé ndá mbal kára gə́ to dɔ maree’g gə́ a lal jura naŋg el lé godo.
Kula kəm loo ndòo gə némeekonje lé
Mat 24.3-14, Mar 13.3-13
7Yen ŋga deḛ dəjee pana: Mbai, ula sí, see ndɔ gə́ ra ɓa néje neelé a teḛ ɓəi wa. Esé see loo gə́ a gə teḛ lé see ɗi ɓa d’a kwɔji dee ne lée wa.
8Jeju un ta ula dee pana: Meḛ sí dɔ rɔ sí’g mba kar dəw kára kara su kəm sí el. Njé gə́ na̰je d’a kun rim ree ne d’a pana: To ma nja ndá ndəa nai dəb ya. Nɛ ndolèje goo dee el. 9Loo gə́ seḭ a kooje ta rɔ gə́ dəwje d’a gə rɔ na̰ ləm, gə kḭ gə́ d’a gə kḭ gə na̰ ləm tɔ ndá undaje bala gə mbəa el, mbata lé riri kara néje neelé a teḛ kédé ya. Nɛ ndɔ gə́ rudu lé nai nja dɔrɔ ɓəi.
10Yeḛ ula dee tɔɓəi pana: Ginkoji dəwje gə́ kára d’a kḭ gə ginkoji dəwje gə́ loo gə́ raŋg’d ləm, ɓeeko̰ gə́ kára a kḭ gə ɓeeko̰ gə́ loo gə́ raŋg’d ləm tɔ. 11Naŋg a yə gə loo ɓugu-ɓugu ləm, yoo-ndag a koso dɔ dəwje’g gə ɓee-ɓee ləm, ɓoo-boo a koso gə loo-loo ləm tɔ. Néje gə́ to ɓəl kədm-kədm a teḛ ləm, gə nétɔjije gə́ boo a teḛ dara ləm tɔ. 12D’a ɓugu ji dee dɔ sí’g ləm, d’a kula kəm sí ndòo ləm, d’a kwa sí kaw sə sí kəi-kwa-dɔ-na̰je’g ləm, d’a ɓugu sí daŋgai’g ləma, d’a kon sí kaw sə sí no̰ mbai-ɓeeje’g gə no̰ njéguburuɓeeje’g ləm tɔ gə mba rim, kédé ɓad ɓa néje nee gə́ ma m’ula sí lé a teḛ ɓəi. 13Néje neelé d’a ra sə sí mba kar sí ɔrje ne goo ta ləm ya. 14Ta gə́ seḭ a gə kɔrje mba taa ne dɔ sí lé maji kar sí wɔjije rəbee meḛ sí’g kédé el. 15Mbata ma nja m’a kula ta ta sí’g ləm, m’a kula kəmkàr meḛ sí’g ɓəi ləm tɔ ndá njéba̰je lə sí d’a koo loo kɔs ta sí’g rəw el ləm, d’a dum sí gə tamaḭ el ləm tɔ#Lug 12.11-12. 16Njékoji síje ləm, gə ŋgako̰ síje ləm, gə njénojije lə sí ləma, gə baokuraje lə sí ləm tɔ lé d’a kun dɔ sí, tɔl ne njé gə́ na̰je bula mbuna sí’g. 17Dəwje lai d’a kḛji sí bəḭ-bəḭ gə mbata lə rim ya. 18Nɛ yiŋga dɔ sí kára kara a ti kigi el. 19Meekai sam-sam lə sí ɓa seḭ a kajije ne ya.
Jeju pata tuji gə́ Jerusalem a gə tuji lé
Mat 24.15-21, Mar 13.14-19
20Loo gə́ seḭ a kooje boo-njérɔje d’a taa Jerusalem pəl-pəl ndá seḭ a gərje gao to gə́ ta tuji lə Jerusalem nai dəb ba ŋga. 21Yen ŋga, maji kar deḛ gə́ d’isi Jude lé d’aḭ d’aw dɔ mbalje’g ləm, deḛ gə́ d’isi dan Jerusalem’g kara maji kar dee d’unda loo teḛ gə́ raga ləma, deḛ gə́ d’isi mee ndɔje’g lə dee ndá maji kar dee tel d’ila gɔl dee mee ɓee-boo’g el ləm tɔ. 22Mbata ndəaje neelé a to ndɔ dal ba̰ mba kar ta gə́ ndaŋg mee maktub’g lé aw ne lée’g béréré ya#Oje 9.7. 23Mee ndəaje’g neelé denéje gə́ d’aw gə kèm gə deḛ gə́ d’ar ŋgan deeje d’aw d’il mbà dee lé némeeko̰ a ra dee ya. Mbata néɓəŋgərəti a koso dɔ ɓee’g neelé ləm, oŋg lə Ala a nai dɔ koso-dəwje’g ləm tɔ. 24D’a gaŋg dee gə ta kiambas kɔm dee naŋg ləm, d’a kwa dee ɓər kaw sə dee mbuna ginkoji dəwje gə raŋg’g lai ləma, tɔɓəi ginkoji dəwje d’a tuba Jerusalem gə gɔl dee mbajila-mbajila ləm tɔ saar kar ndəa ka̰ ginkoji dəwje gə raŋg a kun ɗiao.
Ndɔ ree lə Ŋgon-dəw lé
Mat 24.29-31, Mar 13.24-27
25Néje a teḛ dan kəm kàr’g ləm, gə dan kəm naḭ’g ləma, gə dan kéréméje’g ləm tɔ. Dɔ naŋg neelé néɓəŋgərəti a ra ginkoji dəwje gə raŋg loo gə́ baa-boo gə paŋgəm mán d’a no̰ mbiao̰-mbiao̰ ndá deḛ lé d’a gər né gə́ kəm ra lé el#Esa 13.10, Ejk 32.7, Joɛ 3.4, LkJ 6.12-13. 26Dəwje d’a kwəi yoo-ɓəl loo gə́ deḛ d’isi ŋgina ne néje gə́ a gə teḛ dɔ naŋg neelé, mbata nésḭgangə̰gje lə dara d’a yə ɓugu-ɓugu tɔ. 27Yen ŋga d’a koo Ŋgon-dəw gə́ a teḛ dan loo-kil’g lə ndi gə siŋgamoŋ ləm, gə rɔnduba ləm tɔ#LkD 7.13, LkJ 1.7. 28Loo gə́ néje neelé d’a gə kun kudu teḛ ndá ndɔjije rɔ sí ɔrje dɔ sí gə́ tar mbata ndɔ kar sí a gə kɔrje dɔ sí kúla lé sí ree dəb ŋga.
Néndoo gə́ wɔji dɔ kag-kodé
Mat 24.32-35, Mar 13.28-31
29Yeḛ un goso né kára pa wɔji dee ne pana: Aaje kodé gə aaje kagje gə́ raŋg lai ooje. 30Loo gə́ d’idi mba̰ ɓa seḭ ooje ndá seḭ nja gə dɔrɔ sí seḭ gərje gao pajena: Naḭ ɓar to dəb ŋga. 31Asəna kára ba tɔ, loo gə́ seḭ a kooje néje gə́ a teḛ togə́bè lé tɔ ndá seḭ a kooje to gə́ ɓeeko̰ lə Ala lé nai dəb ba ya tɔ. 32Ma m’ula sí təsərə, ginka dəwje neelé gin dee a kɔs bo̰ el nja ɓəi néje neelé lai a teḛ ya. 33Dara gə naŋg nee d’a dəs wuduru gə lèlé ba, nɛ ta ləm a kudu nda̰ el.
Meḛ sí dɔ rɔ sí’g
34Meḛ sí dɔ rɔ sí’g nà banelə meḛ sí a to dɔ nésɔ’g gə dɔ nékai’g ya ɓa bururu ləm, gə dɔ néje lai gə́ dɔ naŋg nee gə́ njékar meḛ sí pélé wəs-wəsje ləm tɔ ɓa ndəa neelé a kuba sí naŋg bus. 35Mbata ndəa neelé a kiri dɔ dəwje lai gə́ d’isi dɔ naŋg neelé rigim asəna gə ba̰də bèe. 36Sije dɔkəji sí’g kəgəgə, raje tamaji lé ta-ta togə́bè ɓa loo gə́ néje neelé a teḛ ndá siŋga sí a kas gə mba kɔrje dɔ sí keneŋ ləm, seḭ a teḛ kaarje ne tar no̰ Ŋgon-dəw’g lé ləm tɔ.
37Dan kàrá ndá Jeju ndoo dee ta mee kəi-Ala’g, nɛ loo gə́ loondul mba̰ ndá yeḛ tel aw to dɔ mbal gə́ ria lə Koiyoje lé. 38Loo gə́ teḛ gə ndɔ rad lé ndá koso-dəwje mbo̰ dɔ na̰ kəmlə-kəmlə ree rəa gə mba koo ta təa’g mee kəi-Ala’g.
Dewis Presennol:
Lugu 21: SBA2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngambai Bible © Alliance Biblique du Tchad 1989, 2015.