Gḭ-Néje 34
34
Ŋgalə Jakob dal ba̰ kɔnan dee gə́ Dina
1Ndɔ kára bèe, Dina gə́ to ŋgolə Lea gə́ dené gə́ yeḛ ojee gə Jakob lé teḛ raga mba koo denéje gə́ mee ɓee’g neelé. 2Ndá Sikem gə́ to ŋgolə Hamɔr, mbai gə́ ɓee’g neelé ée. Ndá yeḛ wá aw to səa tujee tɔ. 3Yeḛ ɔm mée dɔ Dina gə́ ŋgolə Jakob’g lé. Yeḛ unda ŋgoma̰də neelé dan kəmee’g ndá yeḛ ulá ta gə́ kul gə mba gɔl ne mée. 4Sikem ula bɔbeeje Hamɔr pana: Taa ŋgoma̰də neelé am gə́ dené ləm.
5Jakob oo to gə́ Sikem lé tuji ŋgonee gə́ Dina lé ya. Nɛ to gə́ ŋganeeje gə́ diŋgam nai wala gə koso-nékulje ləa ɓəi ndá Jakob pata el saar loo gə́ deḛ tel ree ɓa.
6Hamɔr, bɔ Sikemje lé aw rɔ Jakob’g gə mba kwɔji səa ta. 7Ŋgalə Jakobje d’ḭ wala ree ɓa d’oo ta neelé ɓəi. Diŋgamje neelé oŋg ḭ sə dee pu, tuji ne meḛ dee pugudu mbata Sikem lé ula sul dɔ Israɛl’g mbata to gə́ yeḛ to gə ŋgolə Jakob lé to né gə́ kəm ra el. 8Hamɔr un ta togə́bè ula deḛ pana: Ŋgon sí gə́ dené lé taa kəm ŋgonəm gə́ Sikem lé rəgm mba̰. Ma m’ra ndòo rɔ sí’g, gə mba kar sí areeje təa gə dené ləa ya. 9Maji kar sí ɔmje sə sí na̰’d ndá seḭ a kar síje ŋgan síje gə́ dené ləm, seḭ a taaje ka̰ síjeḛje togə́bè ləm tɔ. 10Seḭ a síje sə sí ləm, ɓee neelé a raje né keneŋ to gə́ meḛ sí ndigi ləm tɔ. Sije keneŋ mba telje kəm néje ləm, gə mba kiŋgaje dɔ naŋgje gə́ d’a to ka̰ sí-seḭ keneŋ ləm tɔ.
11Sikem ula bɔ Dinaje gə ŋgakea̰je pana: Ɓó lé ma m’taa kəm sí rəgm ndá né gə́ ban-ban gə́ seḭ a dəjimje lé m’a kar sí ya. 12Maji kar sí wɔjije səm lar dené lé yaa̰ ləm, gə nénojije bula yaa̰ ləm tɔ ndá m’a kar sí né gə́ seḭ ulamje lé ya. Nɛ amje ŋgoma̰də neelé gə́ dené ləm ɓa.
13Ŋgalə Jakob ndigi ta Sikem’g gə bɔbeeje’g Hamɔr lé d’ula dee ta gə goso mbata Sikem lé tuji ŋgoko̰ dee gə́ dené lé mba̰. 14Deḛ d’ula dee pana: Kar kɔnan sí taa dəw gə́ lal kinja tamɔdee lé to né gə́ j’askəm ra el. Mbata né neelé a to né kula sul dɔ sí’g. 15Rəbee gə́ j’a ndigi sə sí dɔ’g ɓa nee: to mba kar sí telje rɔ sí tanaje sə síjeḛ, kar diŋgam gə́ rara kara mbuna sí’g inja tamɔdee ɓa. 16Yee ɓa j’a kar sí ŋgan síjeḛje gə́ dené ləm, j’a taa ka̰ sí-seḭje ləm tɔ. J’a si sə sí na̰’d mba to ne dəwje gə́ kára ba. 17Nɛ ɓó lé seḭ ooje ta lə sí gə mba kinja tamɔd sí el ndá j’a kɔr ŋgon sí gə́ dené ndá j’a kuba naŋg kḭ kaw tɔ.
18Hamɔr gə ŋgonee gə́ Sikem ndigi sə dee dɔ tapa dee’g neelé. 19Basa neelé ḭ rad ra née ɓó ŋgina el mbata yeḛ unda ŋgolə Jakob lé dan kəmee’g. Yeḛ lé dəwje lai gə́ d’isi kəi lə bɔbeeje lé d’ila riɓar dəa’g ya. 20Hamɔr gə ŋgonee gə́ Sikem lé sa rɔ dee d’aw tarəwkɔg’d lə ɓee-boo ndá deḛ pa taree togə́bè d’ula dəwje gə́ mee ɓee-boo’g neelé pana: 21Dəwje neelé meḛ dee to lɔm dɔ sí’g. Maji kar sí j’ar dee d’isi dɔ naŋg ɓee’g lə sí gə mba tel kəm néje keneŋ. Ɓee neelé boi as kar dee d’isi keneŋ ya. J’a taa ŋgan deeje gə́ dené gə́ denéje lə sí ləm, jeḛ j’a kar dee taa ŋgan síjeḛje gə́ dené gə́ denéje lə dee ləm tɔ. 22Nɛ rəbee gə mba kar dəwje neelé ndigi kisi ne sə sí kar sí n’toje ne dəwje gə́ kára ba lé to mba kar diŋgam gə́ rara kara mbuna sí’g inja tamɔdee to gə́ deḛ d’inja ne tamɔd dee bèe ɓa gə́ kuma̰. 23Koso-nékulje lə dee ləm, némajije lə dee ləma, boo-nékulje lə deḛ lai ləm tɔ lé see d’a tel to ka̰ síjeḛ el wa. Ndá maji kar sí ndigije sə dee dɔ né gə́ kára ba gə́ deḛ d’wɔji sə sí lé ya mba kar dee d’isi ne sə sí tɔ.
24Deḛ lai gə́ ree tarəwkɔg’d lə ɓee-boo lé d’oo ta lə Hamɔr gə ŋgonee gə́ Sikem lé. Ndá diŋgamje lai d’ar dee d’inja tamɔd dee, deḛ lai gə́ ree tarəwkɔg’d lə ɓee-boo lé. 25Ndɔ gə́ njekɔm’g munda, loo gə́ doo lə dee ra dee yaa̰ ɓəi ndá ŋgalə Jakobje joo, Simeo̰ gə Ləbi, ŋgako̰ Dinaje lé d’un kiambasje lə dee d’ur dɔ dee gə́ mee ɓee-boo gə́ dəwje d’oo to gə́ d’isi lɔm ɓəi ndá deḛ tɔl diŋgamje mbad-mbad ya. 26Deḛ gaŋg Hamɔr gə ŋgonee Sikem gə kiambas tɔ. Ndá deḛ d’ɔr Dina mee kəi’g lə Sikem ɓa teḛ d’aw ɓəi.
27Ŋgalə Jakob lé d’ur dɔ yoo-dəwje’g ndá d’odo némajije mee ɓee’g neelé mbata tuji gə́ deḛ tuji ŋgoko̰ dee gə́ dené lé. 28Deḛ d’wa koso-nékulje lə dee, maŋgje gə mulayḛ̀je-je lə dee gə́ d’aar mee ɓee’g ləm, gə deḛ gə́ d’aar wala ləm tɔ. 29Deḛ d’odo nébaoje lə deḛ lai ləm, gə ŋgan deeje gə denéje lə dee ləma, gə néje lai gə́ d’iŋga mee kəije’g lé ləm tɔ d’wa néje lə dee d’ila ɓaŋg mbata kɔnan dee lé.
30Yen ŋga Jakob ula Simeo̰ gə Ləbi pana: Seḭ ɓa arje məəm to kəgəgə, amje m’tel to né gə́ ə̰də majel əm njéɓeeje gə́ nee, gə əm Kana̰je’g ləm, gə əm Peresje’g ləm tɔ. Ma lé m’aw gə dəwje bula el ndá deḛ lé d’a mbo̰ na̰ dɔm’g kɔsm rəw kundam tɔlm, ma gə njémeekəije ləm lai ya.
31Deḛ d’ilá keneŋ pana: See to maji kar dee ra gə ŋgoko̰ sí gə́ dené né to gə́ kaiya-dené bèe wa.
Dewis Presennol:
Gḭ-Néje 34: SBA2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngambai Bible © Alliance Biblique du Tchad 1989, 2015.