Gḭ-Néje 32
32
1Laba̰ ḭta gə ndɔ rad ndá il ɓɔl ŋganeeje gə́ diŋgam gə njé gə́ dené ləm, tɔr ndia dɔ dee’g ləm tɔ. Tɔɓəi yeḛ ɔd mba tel kaw loo-siée’g gogo.
Jakob wa dɔ gɔl rəa mba tila kəm Esawu
2Jakob aw kəmee gə́ kédé ɓəi. Ndá kuraje lə Ala gə́ dara teḛ d’iŋgá. 3Loo gə́ Jakob oo dee ndá yeḛ pana: Loo neelé to loo-si njérɔje lə Ala! Ndá yeḛ unda ri loo neelé lə Mahanayim.
4Jakob ula njékaḭkulaje ləa nea̰’g rɔ ŋgokea̰ Esawu’g mee ɓee gə́ Seir, ɓeeko̰ gə́ Edɔm. 5Yeḛ un ndia ar dee pana: Aa ooje, seḭ a kulaje Esawu gə́ to mbai ləm lé ta nee togə́bè pana: Jakob kura ləi lé pana: Ma m’isi rɔ Laba̰’g ndá m’nai keneŋ saar teḛ ɓasinè ɓəi tɔ. 6Maŋgje ləm, gə mulayḛ̀je-je ləm, gə badje ləma, gə kuraje ləm gə́ diŋgam gə njé gə́ dené ləm tɔ lé to keneŋ ndá m’ula kula m’ar mbai ləm oo kédé ɓad ɓa gə mba taa ne kəmi ɓəi.
7Njékaḭkulaje lé tel ree rɔ Jakob’g d’ulá pana: Jeḛ j’awje rɔ ŋgokɔḭ Esawu’g lé ndá yeḛ si njaa gə́ rɔi’g nee gə dəwje tɔl-sɔ gə mba kiŋgai ne.
8Ɓəl unda Jakob badə gaŋgee ar ndilee teḛ jan. Yeḛ kai dəwje gə́ d’aw səa lé kudu joo ləm, gə badje, gə maŋgje, gə jambalje kara kudu joo ləm tɔ 9ndá yeḛ pana: Ɓó lé Esawu ree dum dɔ kudu dəwje gə́ kára ndá kudu dəwje gə́ nai lé d’a kaskəm taa rɔ dee. 10Jakob pana: Ala lə bɔmje gə́ Abrakam ləm, Ala lə bɔmje gə́ Isaak ləma, i Njesigənea̰ gə́ ulam pana: M’tel mee ɓee’g ləm, gə mee ɓee-kojim’g ndá i a ra səm meemaji ɓəi! 11Ma lé m’to dəw gə́ əḭ el gə́ m’askəm kari wa səm nojije ɓəd-ɓəd əsé mba ra səm meemajije ɓəd-ɓəd to gə́ i ra gə kura ləi lé el. Mbata ma m’gaŋg Jurdɛ̰ neelé gə kag-tɔs ba jim’g nɛ ɓasinè dəwje ləm bula as kam m’kai dee kudu dee joo ŋga. 12Ma m’ra ndòo rɔi’g, maji kari ree taam ji ŋgokɔm’g, ji Esawu’g. Mbata ma m’ɓəl nà banelə yeḛ a ree tujim-ma gə ko̰ ŋganje gə ŋganje na̰’d. 13Nɛ i nja pana: I a ra səm maji ləm, i a kar ŋgakamje bula to gə́ nagəra gə́ baa-boo-kad’g bèe ləm, d’a bula kar dəw askəm tura dee el ləm tɔ#Gn 22.17.
14Lée gə́ neelé ɓa Jakob to keneŋ loondul’g. Ndá yeḛ unda kəm néje gə́ to jia’g mba kula ne kar Esawu gə́ to ŋgokea̰ lé gə́ nénoji to togə́bè: 15Ko̰ bya̰je tɔl joo gə bàl bya̰je rɔ-joo ləm, ko̰ badje tɔl joo gə bàl badje rɔ-joo ləm, 16ko̰ jambalje rɔ-munda gə ŋgan deeje gə́ d’aw d’il mbà dee ləm, ko̰ maŋgje rɔ-sɔ gə bɔ maŋgje dɔg ləma, ko̰-mulayḛ̀je-je rɔ-joo gə bɔ mulayḛ̀je-je dɔg ləm tɔ. 17Yeḛ ɔm koso-nékulje neelé lai ji ŋganjélookisije’g ləa gə gel dee gel dee ndá yeḛ ula ŋganjélookisije ləa pana: Awje nɔm’g kédé nɛ arje mbuna koso-nékulje gaŋg gə kudu dee kudu dee ɓa.
18Yeḛ un ndia ar yeḛ gə́ to gə́ doŋgɔr lə dee lé pana: Loo gə́ ŋgokɔm Esawu, mbai ləm, ḭgai ɓa dəjii pana: See i lé to ka̰ nawa. See aw gə́ ra wa. See koso-nékulje neelé to ka̰ nawa. 19Ndá i a kilá keneŋ pana: To gə́ ka̰ kura ləi gə́ Jakob. To nénoji gə́ yeḛ ula ne ar mbai ləm Esawu ndá aa oo, yeḛ nja kara aw ree goo sí’g nee ya tɔ.
20Yeḛ un ndia togə́bè ar yeḛ gə́ njekɔm’g joo ləm, gə yeḛ gə́ njekɔm’g munda ləm tɔ ula dee-deḛ lai gə́ d’aw goo koso-nékulje’g neelé pana: Ta gə́ nee ɓa seḭ a kulaje mbai ləm Esawu, loo gə́ seḭ a kiŋgaje kəmee lé. 21Seḭ a pajena: Aa oo, kura ləi Jakob kara si ree goo sí gən tɔ.
Mbata Jakob pana: M’a gɔl mée gə nénoji neelé gə́ m’ula ne kédé nɔm’g. Gée gə́ gogo ɓa m’a koo kəmee ɓəi ndá banelə yeḛ a kwam gə́ rəa’g gə́ majee ya. 22Nénoji neelé aw nea̰’g kédé nɛ mee til’g neelé yeḛ nja nai loo-siée’g.
Jakob uba mula gə Ala
23Yeḛ uba naŋg ḭ mee tilee’g nee ya sa rəa gə denéje ləa gə́ joo ləm, gə ŋganjélookisije ləa gə́ dené gə́ joo ləma, gə ŋganeeje gə́ dɔg-gir-dee-kára ləm tɔ ndá ar dee d’uru loo-kuru-mán gə́ Jabok teḛ. 24Yeḛ ar dee d’uru loo-kuru-mán lé ləm, ar dee d’odo néje ləa lai d’uru ne mán ləm tɔ. 25Jakob lé nai gə karee ba. Yen ŋga dəw kára uba səa mula saar nai lam bèe loo a gə kàr#Oje 12.3-4. 26Loo gə́ dəw neelé oo to gə́ yeḛ askəm dumee el ndá yeḛ unda bəgəree. Bèe ɓa bəgərə Jakob al loo gə́ yeḛ si uba səa mula lé. 27Ndá yeḛ pana: Ya̰’m am m’aw mbata loo-si àr.
Jakob tel ilá keneŋ pana: M’a kya̰ loo kari aw el saar i tɔr ndui dɔm’g ɓa.
28Yeḛ dəjee pana: See rii lə nawa.
Jakob ilá keneŋ pana: Rim lə Jakob.
29Dəw lé pa ya tɔɓəi pana: Rii lé a to Jakob el ŋga nɛ d’a ɓari Israɛl. Mbata i oma̰ gə Ala ləm, gə dəwje ləm tɔ ndá i dum dee ya#Gn 35.10.
30Jakob dəjee tɔɓəi pana: M’ra ndòo rɔi’g, ulam rii am m’gər, kɔgərɔ kari#NR 13.17-18.
Yeḛ ilá keneŋ pana: See ban ɓa i dəjim rim wa.
Ndá yeḛ tɔr ndia dəa’g lé gə́ neelé ya.
31Jakob unda ri loo neelé lə Penuel. Mbata yeḛ pana: Ma m’oo Ala gə kəm ya ndá m’aji ya ɓəi. 32Kàr uba mba̰ ɓa yeḛ unda Penuel gaŋg ɓəi. Ndá Jakob lé njaa məd bəgəree’g.
33Gelee gə́ nee ɓa saar teḛ ɓogənè kara ŋgan Israɛlje d’usɔ ne ŋgira da gə́ to dɔ bəgəree’g lé el. Mbata Ala unda ŋgira bəgərə Jakob.
Dewis Presennol:
Gḭ-Néje 32: SBA2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngambai Bible © Alliance Biblique du Tchad 1989, 2015.