Gḭ-Néje 23
23
Kwəi lə Sara. Abrakam ndogo loo-dubee
1Sara si kəmba ləbee tɔl dəa rɔ-joo giree-siri (127), yee ɓa to ləb kisi kəmba ləa ya. 2Sara wəi ɓee gə́ Kirjat-Arba gə́ to Ebro̰ dɔ naŋg ɓee gə́ Kana̰. Ndá Abrakam ree mba kwa ndòo yoo Sara ləm, gə mba no̰ neán ləm tɔ. 3Abrakam uba naŋg ḭta dɔ yoo’g ləa ndá pata ar ŋgalə Het pana: 4Ma m’to dəw-dɔ-ɓee gə́ m’isi mbuna sí’g. Amje loo kára gə́ rɔ sí’g nee gə́ dɔɓar mba karm m’dubu yoo-dené ləm keneŋ kam m’oo yée nɔm’g bèe el#Ǝbr 11.9, 13, NNk 7.16.
5Ŋgalə Het lé d’ila Abrakam keneŋ pana: 6Mbai lə sí, oo ta lə sí! I lé to dəw lə Ala gə́ boi mbuna sí’g nee ya. Dubu yoo-dené ləi lé mee dɔɓar gə́ kára mbuna dɔɓarje’g lə sí gə́ i ya a mbər. Dəw kára kara mbuna sí’g a kɔgi dɔɓar ləa gə mba dubu yoo-dené ləi keneŋ el.
7Abrakam ḭta, unda barmba no̰ njéɓeeje’g neelé gə́ to ŋgalə Het lé. 8Yeḛ ula dee ta togə́bè pana: Ɓó lé seḭ ndigije səm mba kam m’dubu yoo-dené ləm, gə mba k’ar yée to tar bèe el ndá, maji kar sí raje ndòo rɔ Epro̰, ŋgolə Sohar’g, 9mba karee ya̰ bolè mbal gə́ Makpéla gə́ to kea̰, gə́ to ŋgaŋ ndɔ’g ləa gə́ raga lé am, mba kam m’ndogo səa gə goo laree gə́ gəd gə mba karee to gə́ dɔɓar ləm-ma ya doŋgɔ doi mbuna sí’g.
10Epro̰ si mbuna ŋgalə Het’g. Ndá Epro̰ gə́ to ginkoji lə Het lé ila Abrakam keneŋ kəm ŋgalə Het’g ləm, gə kəm dəwje lai gə́ d’andə gə tarəwkɔg gə́ ta ɓee-boo’g ləa pana: 11Mbai ləm, bèe el! Oo ndum maji. Ma m’ari loo-ndɔ lé ləm, ma m’ari bolè mbal gə́ to keneŋ ləm tɔ. Ma m’ari kəm dəwje’g ləm diŋgam ya. Maji kari dubu nin dené ləi keneŋ ŋga.
12Abrakam unda barmba no̰ njéɓeeje’g neelé. 13Yeḛ ula Epro̰ kəm njéɓeeje’g neelé pana: Ma m’ra ndòo rɔi’g mba kari oo ta ləm! Ma m’ari lar ndɔ ləi neelé. Maji kari taa jim’g ɓa m’a dubu nin dené ləm keneŋ ɓəi.
14Epro̰ ila Abrakam keneŋ pana: 15Mbai ləm, oo ta ləm! Ndɔ gə́ gadee askəm larnda tɔl-sɔ (400) ba bèe ya, nɛ see yee gə́ nee as ɗi ɓa mbuna sí jeḛ səi’g wa. Dubu yoo ləi keneŋ ya.
16Abrakam oo ta lə Epro̰ maji. Ndá Abrakam wɔji larnda ar Epro̰ to gə́ yeḛ ulá lé kəm ŋgalə Het’g ndá to larnda tɔl-sɔ (400) gə goo kwɔji lar lə njékṵda néndogoje gə́ mee ndəa’g neelé. 17Togə́bè ɓa, loo-ndɔ lə Epro̰ gə́ to Makpéla gə́ wɔji dɔ Mamré njoroŋ lé, loo-ndɔ lé ləm gə bolè mbal gə́ to keneŋ ləm, gə kagje lai gə́ to mee ndɔ’g neelé ləm, gə kəm-rəw-nim’g lai to lé 18tel to ne ka̰ Abrakam ya njaŋg kəm ŋgalə Het’g ləm, gə kəm dee deḛje lai gə́ d’andə gə tarəwkɔg gə́ ta ɓee-boo’g ləa ləm tɔ.
19Gée gə́ gogo ndá Abrakam dubu dené ləa Sara mee bolè mbal’g mee ndɔ gə́ Makpéla gə́ wɔji dɔ Mamré njoroŋ gə́ to Ebro̰ dɔ naŋg ɓee gə́ Kana̰ lé. 20Loo-ndɔ ləm, gə bolè mbal gə́ to keneŋ ləm tɔ lé to ka̰ Abrakam ya doŋgɔ doi gə́ loo-dubu-dəwje ləa gə́ yeḛ ndogo ji ŋgalə Het’g ya.
Dewis Presennol:
Gḭ-Néje 23: SBA2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngambai Bible © Alliance Biblique du Tchad 1989, 2015.