Néra Njékaḭkulaje 12
12
Herɔdə tɔl Jak ləm, ila Piɛrə daŋgai’g ləm tɔ
1Mee ləb’g neelé Herɔdə, mbai lé ḭ ula kəm barkəm Eglisəje gə́ na̰je ndòo. 2Yeḛ ar dee tɔl Jak, ŋgoko̰ Ja̰je gə kiambas. 3Tɔɓəi loo gə́ yeḛ oo to gə́ né neelé taa kəm Jibje rəgm ndá yeḛ ar dee d’wa Piɛrə. To ndɔ naḭ gə́ wɔji dɔ muru gə́ nétiee godo keneŋ lé. 4Loo gə́ yeḛ wá mba̰ ndá yeḛ ulá daŋgai’g ar kudu-njérɔje sɔ-sɔ gə́ wɔji dɔ njérɔje sɔ-sɔ lé ŋgəm təa. Yeḛ wɔji gə mba kar naḭ Pag godo mba̰ ɓa a teḛ səa kəm koso-dəwje’g ɓəi#Tr 12.1-27. 5Piɛrə lé ŋgəmee daŋgai’g ya pèrèrè nɛ Eglisəje d’wa tamaji lə dee kɔgərɔ mbata ləa ɓó d’ya̰ gée yɔgɔ el.
Kura lə Mbaidɔmbaije gə́ dara ɔr Piɛrə kəi-daŋgai’g
6Mee til gə́ bèlè d’a gə teḛ səa raga kəm koso-dəwje’g lé Piɛrə to dan njérɔje gə́ joo gə́ tɔ kúla gə́ rəa’g rɔ dee’g lé ndá yeḛ toɓi. Njérɔje joo d’aar takəi’g raga d’aar ŋgəm takəi daŋgai lé tɔ. 7Aa oo, kura lə Mbaidɔmbaije gə́ dara teḛ təsərə ar loo ndogó jol-jol mee kəi-daŋgai’g. Kura gə́ dara lé ndel Piɛrə ulá yəgə-yəgə pana: Uba naŋg rad ḭta!
Yen ŋga kúla larje gə́ tɔ ne jia lé jura naŋg wururu. 8Kura gə́ dara lé ulá pana: Tɔ ta ndar ləi maji, tɔɓəi ula Négɔl gɔli’g tɔ.
Ndá Piɛrə lé ra togə́bè tɔ. Kura gə́ dara lé tel ulá pana: Un kubu ləi gə́ boi yul dəb rɔi’g ndá ɔd gə́ goom’g nee.
9Yen ŋga Piɛrə unda loo teḛ un rəw gée’g tɔ. Né gə́ kura gə́ dara ra səa lé yeḛ oo gə́ némḭdi ɓó inja kəmee’g aree oo gə́ né gə́ gəd el. 10Loo gə́ d’uru njerɔ gə́ njeŋgəmloo gə́ dɔtar lé teḛ, tɔɓəi d’uru yeḛ gə́ njekɔm’g joo lé teḛ ree tarəw kəi-kɔg gə́ d’udu gə lar gə́ aw par gə́ rəw gə́ mee ɓee’g ndá tarəw kəi-kɔg neelé teḛ təa gə dɔrea nja no̰ dee’g ya̰ rəw ar dee teḛ ndá deḛ taa mban-rəw. Léegəneeya kura gə́ dara lé uba Piɛrə yá̰ ŋga.
11Loo gə́ kəm Piɛrə inja dɔ rəa’g ndá yeḛ pana: Ɓasinè ma m’gər gao, Mbaidɔmbaije ya ula kura ləa gə́ dara aree ɔrm ji Herɔdə’g ləm, gə ji Jibje gə́ d’isi to yoom ləm lé tɔ.
12Yeḛ tel aar gèŋ ə̰ji ta mée’g ɓa ɔd si aw kəi lə Mari, ko̰ Ja̰je gə́ d’unda ria lə Mark lé to loo gə́ dəwje bula d’wa dɔ na̰ keneŋ d’isi ra tamaji. 13Yeḛ unda tabidi-rəwkəi gə́ to ta maree’g lé ndá kura gə́ dené gə́ ria lə Rodə ree pər gə́ keneŋ mba koo. 14Yeḛ gər ndu Piɛrə lé ndá rəa lelee yaa̰ aree ya̰ rəw gə́ a gə kɔr lé ɔd aḭ aw ula dee pana: Piɛrə aar takəi’g raga’n. 15Deḛ d’ulá pana: See kɔr rai wa.
Nɛ yeḛ tel ula dee pana: To darəa-yeḛ nja. Nɛ d’ilá keneŋ pana: Bèe ndá to ndilee.
16Nɛ Piɛrə lé unda takəi gə́ kédé-kédé. D’ɔr takəi d’aa loo ɓèd d’ée ndá kaar dee wa dee paḭ. 17Piɛrə yə jia ta dee gə mba kar dee d’əw rɔ dee pata ndá yeḛ ɔr sor né gə́ Mbaidɔmbaije ra ɔree ne daŋgai’g lé ar dee d’oo. Yeḛ ula dee pana: Ɔrje soree arje Jak gə ŋgako̰ síjeḛ lé ar deeje d’oo tɔ. Tɔɓəi yeḛ unda loo teḛ ɔd aw loo gə́ raŋg.
18Loo gə́ loo àr ndá njérɔje d’aw dɔ na̰’g wur-wur gə mba koo loo gə́ Piɛrə unda dɔ naŋg igi keneŋ. 19Herɔdə kara saŋgee tasəra, iŋgá el ndá yeḛ dəji njérɔje gə́ njéŋgəmlooje gée ɓa yeḛ un ndia gə mba kar dee d’ula kəm njéŋgəmlooje lé ndòo ɓəi. Gée gə́ gogo yeḛ ḭ Jude aw Sejare gə mba si keneŋ bəl ɓa.
Kwəi lə Herɔdə
20Herɔdə ar mée adee dɔ njé gə́ Tir gə Sido̰’g. Nɛ deḛ lé tɔs dɔ na̰ ndo̰-ndo̰ ree gə mba kiŋgá, d’aw d’iŋga Blastə gə́ to njeŋgəm kəi-to ləa lé dəjee gə mba karee ra rəw kɔm na̰’d lə dee mbata ɓee lə mbai Herɔdə lé to ɓee kuba maji lə dee.
21Herɔdə wɔji ndɔ kiŋga na̰ lə dee ndá yeḛ ula kubu ka̰ mbai rəa’g si ne dɔ kalimbai’g ləa, si ndəji dee ne bər-bər. 22Yen ŋga koso-dəwje neelé d’unda ndu dee na̰’d bɔrɔm pana: To ndu magə ɓó to ndu dəw gə́ kari el.
23Léegəneeya kura lə Mbaidɔmbaije gə́ dara daree bus mbata yeḛ ula rɔnduba dɔ Ala’g el. Ndá kuruje d’o̰ ne mée aree oso ne gə̰gərə wəi.
24Lé bèe kara ta lə Ala taa ne loo yal-yal ar bula lə njétaamee-Kristije ḭ dɔ maree’g gə́ kédé-kédé.
25Barnabas gə Sool lé loo gə́ kula gə́ deḛ d’ula dee gə mbəa lé godo mba̰ ndá deḛ d’ḭ Jerusalem d’ɔs tel d’aw Antiɔs. Deḛ d’ɔr Ja̰ gə́ d’unda ria lə Mark lé d’aree aw sə dee na̰’d tɔ.
Dewis Presennol:
Néra Njékaḭkulaje 12: SBA2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngambai Bible © Alliance Biblique du Tchad 1989, 2015.