Lc 21
21
Yofrenda jun ix meba' camnakxa yichamil
(Mc 12.41-44)
1A yet junel, ayic' Jesús bay yul templo Dios. Max yiloni, tzetbilc'al max yut yaon aytok eb beyom is tumin yul jun chabal ofrenda. 2Max yilon c'apax jayoc jun xal meba' ix, tol camnakxa yichamil. Max yaon aytok xal cab ch'en tumin caw wal yaliẍ yofrendaok. 3Xan max yal Jesús bay eb ajun yetok axca ti':
—Wal yel chi wal ayex, a jun xal camnakxa yichamil ti', caw wal meba' xal, palta a yofrenda xal max yak' tu', ec'ban yintak yet masanil eb max yak'c'al yet. 4Yujtol junjun eb, a ch'en max yak'can sobra max yaytok eb yofrendaok. Palta pax jun xal ti xin, caw wal meba' ton xal, palta echc'al max yaytok xal is tumin yin ofrendail, ẍi bay eb.
Yalnaktek Jesús tol ok lajwok ay templo
(Mt 24.1-2; Mc 13.1-2)
5Ay juntzan eb lanan yalontek yuj templo Dios tu', tol manxa watx'ilok yili, caw wal watx' cawxi yuj ch'en ch'en ayoc yin, yetok yuj tzet sabil yuj anima ayoc yin, xan max yaltek Jesús bay eb axca ti':
6—A juntzan lanan e yilon ti', ok ec' bulnaj masanil yet jun tiempoal ok jayok. C'am junok juntzan ch'en latz'bil aj ti' ok can yiban yet ch'enal, ẍi bay eb.
Juntzan yechelej ok tx'ox Dios yet toxa chi jay lajub tiempo
(Mt 24.3-28; Mc 13.3-23)
7Axa k'anlen eb bay tu' axca ti':
—Mamin, ¿bak'in ok jay jun chal tu'? ¿Tzet yechelej ok tx'ox Dios yet jabxanej yuji? ẍi eb bay. 8Axa yalon bay eb axca ti': Caw wal aj nabal che yut e ba, yet watx' c'am mac ok ex etk'anenenok, yujtol xiwil mac ok jayok, ok banoc in bi yiban. Ayin ton Cristo in, ẍi eb, ok tz'ak yalon eb. Mayal wal jay lajub tiempo, ẍi eb, ok yalon c'apax eb. Palta manchak e yaoc yin e c'ul tzet ok yal eb tu'. 9Ok e yab yabixal juntzan mimek owal, ok aj wan eb comon anima yin owal yin is yajawil. Manchak ex xiwajok, yujtol yowalil a juntzan ti' ok babjok yeq'uelok. Palta manto ok lajwok ec' yulyibank'inal ti' yet tu', ẍi bay eb. Max yalon c'apaxok:
10Ok mitx'lej aj ba mimek nación yin owal. 11Xiwil bay ow ok yun yec' mimek quixcab. Xiwil bay ok ec' mimek ilya', ok jay c'apax mimek wajil yiban anima. Ay juntzan tzet yetal ok uj satcan, caw wal ok xiw anima yuj. Axa tx'oxon aj ba juntzan yechelej bay satcan tol caw miman yelapnok tu'.
12Palta a yet c'amto chi jay juntzan tu', ay mac ok ex mitx'onok, cax ok yak'on eb yobc'ulalil e yin. Ok ex yitok eb yuj quex beyc'ulnej bay nail wajayil eb yin culto, cax ok ex yaon oc eb preso. Ok ex yitok eb satak eb rey, c'al satak juntzanxa eb yajaw, yujc'al che yaoc e c'ul win. 13Palta axca ton tu' ok yun jeon e yaloncan el wabixal bay eb. 14Yowalilokab che yojtaknej el yin babelal, tol maj je' e sayon tzet ok e yut e colon e ba yet ok ex apnok oc satak eb tu'. 15Yujtol ayin ok ex wak' k'anjab octok, cax ok wak'on e jelanil. Yuj tu' xan c'am junok eb chi chichon oc c'ul e yin tu' ok ex ak'on ayc'ayok. C'am junok eb chi apni jelanil axca jun ok wak' ayex. 16Ay ex, a e mam c'al e txutx, e yuẍtak, e yican, e yamigo, a eb ok meltzoj oc e yin. Toltax ay ex ok ex mak'lay cam yuj eb. 17A pax masanil anima xin, ok chichon oc c'ul e yin, yujtol che yaoc e c'ul win. 18Palta c'am junok ex ok ex c'ayilok, tamwal junok xil e jolom. 19Ta tec'anc'al ok e yut waay e ba, ok ex colchajok.
20A yet ok e yiloni tol mayal oymanelay Jerusalén ti' yuj eb soldado, nachajokab el e yuj, tol axa lajwi el tu'. 21A eb ayic' bay Judea ti', tokokab eb bay tzalanlak. Axa eb ayic' bay Jerusalén ti', elokab c'apax eb. Axa eb aytok ec'jab najatlak elok, manchakxaokab oc eb yul conob ti'. 22Yujtol a yet jun tiempoal tu', ok jay jun miman yailal. A ton yet tu', ok yun jantak tzet tz'ibbilcan yul tx'an Un Tz'ibbilcanok. 23A wal eb ix yobix yet jun tiempoal tu', c'al eb ix ayto yune' chi txutxwi, ok'bal wal c'ul eb. Yujtol caw wal miman yailal ok jay yiban eb anima bay juntzan lugar ti', yujtol ok tit yowal c'ul Dios yiban eb jet israelal. 24Nan eb ok cam xol owal tu'. Nan eb ok tokcan preso, ok saklemcantok eb bay conoblak. Ok etaxcan ay Jerusalén ti' yuj eb man israelok tu', masantac'al yet ok lajwok tiempoal yak'on eb yajawilal, axcatac'a naon Dios.
A tzet ok ujok yet ok jay Jesús yet cayelal
(Mt 24.29-35,42-44; Mc 13.24-37)
25Ay juntzan yechelej ok tx'ox ba yin c'u, c'al yin xajaw, c'al yin waycan. A bay sat tx'otx' ti' xin, ok somchaj el c'ul anima bay junjun conob yuj xiwilal, yujtol ok aj wan a' mar cax ok awjok mak'on ay ba a'. 26Ok pax yip eb anima yuj xiwilal, yet ok naontek eb tzetak yetal ok uj bay yulyibank'inal ti'. A juntzan tzet yetal ay is yipalil bay satcan, ok tzicobtanelayok. 27Ok lajwok tu', axa ok yilon aj eb anima, ok in ayol xol jun asun, ayin Chekbilintek yuj Dios xol eb jet animail ti'. Ok in jay yetok miman wikbej c'al in miman tzekekial. 28A yet lananxa bey jay juntzan tzet yetal max wal ti', tzalojanek, che tec'baj e ba, yujtol toxa ok ex colchajok, ẍi Jesús bay eb.
29Max lajwi tu', max yalontek jun abix ti' bay eb: Naektek, tzetbil chi yun tit xak te higo, c'al juntzanxa te te' chi puk xak. 30A yet chi uninbi xak te', e yojtakxa tol toxa chi jay nabilk'inal.*fn* 31Yetok c'apaxok, a yet ok e yilon jay juntzan max wal ti', nachajokab el e yuj, tol a Dios toxa chi occan Yajawil cayti'.
32Wal yel chi wal ayex, man ok c'ayaj jun makan anima ti', masantac'al ok yun masanil juntzan max wal ti'. 33Ok lajwok el satcan c'al yulyibank'inal ti', a pax in k'anej xin, man ok ec' tzet chi yala'.
34Che yilc'al e ba. Manchak e cha' pitbok e ba yuj pek'al, yuj uq'uem anil, ma yuj junokxa tzet yetal chex oc il yuj bay yulyibank'inal ti'. Ta c'amak, axa ok jay jun c'ual tu', cax man watx'ok e yayji. 35Axca wal junok tx'an yal, cay wal tu' jun ok jay yiban masanil anima bay yulyibank'inal ti', 36xan makwajanekc'al. Txajlanekc'al yet watx' tec'anokab ex, xan ok je' e yel bay juntzan tzet t'inan jayi, man ok ex q'uixwok e yoc in satak, ayin Chekbilintek yuj Dios xol eb jet animail ti', ẍi Jesús bay eb.
37A yet c'ualil max cuywaj Jesús yul templo Dios. Axa yet ak'balil, chi betic' way bay tzalan Olivo. 38Junjun c'u, chi pet jay eb anima yet k'inibalil bay templo Dios, yuj yulic' eb abxalwok bay.
Dewis Presennol:
Lc 21: ATBYK89
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kanjobal (Q’anjob’al) © Sociedad Bíblica de Guatemala 1989