Jn 14
14
Ok je' japni bay Dios yuj Jesús
1Max yal Jesús bay eb is cuywom axca ti': Manchak somchaj el e c'ul. Aek oc e c'ul yin Dios, cax che yaon c'apax oc e c'ul win. 2A bay yatut in Mam, xiwil lugar bay watx' chon cajayi. K'inalok ta c'am bay, mayalxam wal ayex. A tinani xin, toj in watx'nej e lugar bay ok ex apnok ocok. 3Ok lajwok in watx'nen e lugar tu', cax ok in jay pax junelxa, axa ex ul wiontok wetok tu', yet watx' a bay ayin ec' tu', a tu' ok ex ayjok ec' wetok. 4Ayex ti', e yojtakxa bay chin toji, e yojtak c'apax beal bay chin toj tu', ẍi bay eb.
5Axa yalon Tomás bay axca ti':
—Mamin, man jojtakok bay ok ach tok tu', ¿tzet ok jut jojtaknen el jun be tu'? ẍi.
6Max yalon Jesús bay axca ti':
—A jun be chi wal ti', ayin toni. Asan in chi je' ex wiontok bay ayic' co Mam Dios. Ayin ton yelc'al tzet chi wala', cax ayin ton aj k'inalej in. 7Matawal chin e yojtaknej elok. Ta chin e yojtaknej elok, ok e yojtaknej c'apax el in Mam, a pax tinani' xin, e yojtakxa in Mam tu', yujtol toxa max e yil yin, ẍi bay eb.
8Max yalon Felipe bay axca ti':
—Mamin, tx'ox a Mam tu' jila', cax k'okbilc'alnaj tu', ẍi.
9Xan max yal Jesús bay axca ti':
—Felipe, mimanxa tiempo ayin ec' e yetok. ¿Tom c'amto chojtaknej el mac in txel xin? A eb chin iloni, lanan yilon eb yin co Mam Dios. Yuj tu', ¿tzet yuj xan chal ayin: Tx'ox a Mam tu' jila', cachi? 10¿Tom c'am chaoc yin a c'ul, tol ayin oc yin co Mam Dios, cax ay pax oc Cham win? A tzet chi wala', man yulok wet chi waloni, palta tol a co Mam Dios ayoc win tu', a' chi ak'on wunej. 11Aek oc yin e c'ul tol ayin oc yin co Mam Dios, cax ay pax oc win. Ta c'am che yaoc e c'ul win yuj tzet chi wal ti', aek oc e c'ul win yuj juntzan milagro chin tx'oxo'. 12Wal yel chi wal ayex, a mac chin yaoc yin is c'ul, ok yun eb juntzan chi wunej. Toltax ay juntzan tzet ec'ban ok el yunen eb yintak juntzan ti', yujtol ok in paxaj bay ayic' co Mam Dios. 13Tzanc'al tzet ok e k'an bay Dios yujtol wet ex, ok in watx'nej el ayex. Ok in watx'nej el ayin ti', tol C'ajol in Dios, yet watx' ok in tx'oxk'abnej elok, tol caw wal miman yelapnok co Mam Dios. 14Tzanc'al tzet ok e k'an ayin yujtol wet ex, ok in watx'nej el ayex.
Max yal Jesús tol ok chektek Cham Espíritu Santo
15Ta chi camil e c'ul win, ikejek in chekbanil. 16Ayin ti' ok in k'an bay co Mam Dios, cax ok chekontek junxa mac ok colwaj e yetok, a ton Yespíritu tol yel chi yala'. A' ok ayjokc'al ec' e yetok yin tojbalk'inal. 17A eb yet yulyibank'inal ti', maj je' chaon eb jun tu', yujtol c'am chi je' yilon oc eb yin, xan man yojtakok eb. A pax ayex ti xin, e yojtakxa Yespíritu tu', yujtol ayic' e yetok, a' ok ayjok ec' e yin.
18Ayin ti', maj ex in bekcan e tx'oklil, ok in jay pax ayex junelxa. 19Txenxanej tiempo, catatu' bian, manxa ok in yil eb aj yulyibank'inal ti'. A pax ex ayex ti xin, ok in e yila'. Yujtol iquis inc'al yin tojbalk'inal, yuj tu' xan iquis ex c'apax yin tojbalk'inal. 20A yet jun c'ual tu' ok nachaj el e yuj, tol ayin oc yin in Mam, cax ayoc Cham win. Ok nachaj c'apax el e yuj, tol ayex oc win, cax ayin pax oc e yin. 21A mac chi aben in chekbanil, cax chi yiken paxok, a ton eb tu' chi camil c'ul win. A eb chi camil c'ul win, a ton in Mam ok camc'ulnen eb. Yetok c'apaxok, ok in camc'ulnej eb, cax ok in tx'oxon in ba bay eb, ẍi Jesús bay eb.
22Ay junxa mac chi yik c'apax Judas, manak Judas Iscariote, a' max alon bay Cham axca ti':
—Mamin, ¿tzet xan asan ayon ok a tx'ox a ba? ¿Tzet xan man ok a tx'ox a ba bay eb yet yulyibank'inal ti'? ẍi bay Cham.
23Axa yalon Cham axca ti':
—A mac chin camc'ulneni, chi yikej tzet chi wala'. Xan axa in Mam chi camc'ulnen pax eb, cax ok on cajay yetok eb. 24A pax eb c'am chin camc'ulneni, c'am chi yikej eb tzet chi wala'. A juntzan k'anej chi wal ayex ti', man wetok, yet co Mam Dios, Cham cheknejintek.
25Chi walcan juntzan ti' ayex, yak'ban wal tol ayinto ec' e yetok. 26A co Mam Dios ok chekontek Yespíritu ayex in q'uexelok. A' ok colwaj e yetok, ok ex cuy yin masanil tzet yetal. Ok jek e na jantak tzet albilcan ayex wuj.
27A tinani xin, chi wak'can junc'ulal ayex. A caw in junc'ulal chi wak'can ayex. Man axcaok junc'ulal chi yak' eb yet yulyibank'inal ti', man cayoktu' wet chi wak'can ayex. Manchak e yak' somchaj e c'ul, cax c'am chex xiwi. 28Toxa mayal wal e yabej, tol ok in paxok, palta ok in jay pax ayex. Ta yel wali chin e camc'ulnej, ta axca tu', moj wal chex tzaloji yet che yabeni tol ok in paxaj bay co Mam Dios, yujtol ec'ban Cham wintak. 29Ayokto chi waloncan juntzan ti' ayex, yet watx', a yet ok yunen tzet chi wal ti', cax ok in e yaon wal oc yin e c'ul.
30Manxa mimanok tzet chi walcan ayex, yujtol lanan jay nak yajaw yulyibank'inal ti'. A nak tu' c'am yalon yet win. 31Palta axcac'alta' tu' ok yunej, yet watx' ok yojtaknej el eb yet yulyibank'inal ti', tol ay in camc'ulal yin co Mam Dios cax chi wikej masanil is chekbanil max yak' ayin.
A tinani xin, ajanek wanok, tonek, ẍi Jesús bay eb.
Dewis Presennol:
Jn 14: ATBYK89
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kanjobal (Q’anjob’al) © Sociedad Bíblica de Guatemala 1989