Jn 1
1
A is k'anej Dios max oc yin animail
1A yet c'amto yulyibank'inal ti', ayxac'alta' ec' Cham chi yik K'anej Dios. A Cham tu', ayxa ec' yetok Dios, cax Dios toni. 2A yet c'amto chi chail Dios yich yesnen aj yulyibank'inal ti', ayxac'altac'a ec' Cham yetok. 3A Cham max yak'balnej Dios yesnen aj masanil tzet yetal; xan ta manak yuj Cham, c'am mi tzet max esnelay ajok. 4A yuj Cham chi ji k'inalej co masanil. A Cham chi ak'on co k'inal tu', chi yak' c'apax sakk'inal bay janimail. 5A jun sakk'inal tu', sakk'inalc'al yayji nan xol k'ekk'inal. Palta c'am chi tan yuj k'ekk'inal tu'.
6Ay jun winak chekbiltek yuj Dios chi yik Juan. 7A ul yak'nak ba testigoal yin jun sakk'inal tu', yet watx' tzanc'al mactxel chi yaoc c'ul yin. 8Manak Juan tu' jun sakk'inal tu'. Toc'al ul yak'nak ba testigoal yin. 9A jun acaw yel sakk'inal yet Dios max jayoc bay yulyibank'inal ti', a' chi yak' sakk'inal yin janimail co masanil.
10A Cham chi yik K'anej Dios tu', a ton ulnak ec' yulyibank'inal ti'. Watx'nebil c'apax yulyibank'inal ti' yuj, palta a yet ulnak aytek tu', maj nachaj el yuj eb anima tatol a'. 11Ulnak ec' xol masanil tzet watx'nebil yuj, palta maj chalay Cham yuj eb yet conob. 12Palta tzanc'al mac max chaoni, a ton eb max yaoc c'ul yin, a' chi aloni tol ay yalon yet eb yoc yuninalok Dios. 13A yet chi oc eb yuninalok Dios, axca tol chi alji eb junelxa. Palta man axcaok chi yun yalji junok anima, man winakok chi cha c'ul xan chi alji eb, palta a Dios chi ion oc eb yuninalok.
14A Cham chi yik K'anej Dios tu', max oc yin animail. Ulnak ec' co xol ti' jun tiempoal. A Cham caw wal yel, miman watx'c'ulal Dios max ul tx'ox ayon. Max jil yin, caw wal miman yelapnok, yujtol asan ch'an jun c'otan C'ajol Dios tu', chekbiltek yuj is Mam. 15A Juan max alontek yabixal Cham, max yalon axca ti': A Cham tzunan wintak, axcata' walon ayex, tol ec'ban yopiso wintak, yujtol a yet c'amto chin alji, ayxac'alta' ec'ok, ẍi Juan.
16A Cham tu', caw wal watx' is c'ul, yuj tu', tz'akakic'al chi tx'ox is watx'c'ulal ti' ayon. 17A Moisés ak'nejcan ley Dios ayon; axa pax Jesucristo xin, a is watx'c'ulal Dios max tx'ox ayon, max yak'on c'apax jun cuybanilej caw wal yel. 18C'am junok mactxel max ilon yin Dios junelok, palta a jun c'otan is C'ajol tu', tol Dios toni, a' max ul tx'oxon elok. A jun is C'ajol tu', junnejc'alta' ayic' yetok is Mam.
Yalnaktek Juan cham ak'om bautismo, yabixal Jesucristo
(Mt 3.11-12; Mc 1.7-8; Lc 3.15-17)
19A yet junel, ay juntzan eb israel aj conob Jerusalén, max chektok eb jaywan eb sacerdote yetok jaywanxa eb yinatil Leví bay Juan. Max bet k'anlen eb chekbej tu' axca ti':
—¿Mac ach txel? ẍi eb.
20Axa yalon Juan tu' yin bayc'al ijanil; watx'c'al max yut yalon bay eb axca ti':
—Ayin ti', mayinnak Cristo in, ẍi bay eb.
21Axa k'anlen eb bay junelxa tu':
—¿Mac ach wal txel xin? ¿Ma ach Elías ach? ẍi eb bay.
—C'amak, mayinnak, ẍi bay eb.
—¿Ma ach chekbej ach Dios, echbanebil jay juj? ẍi eb bay.
—C'amak, ẍi bay eb.
22Max k'anlen eb bay junelxa:
—¿Mac ach wal txel xin? Al ayon mac ach txel, yujtol yowalil ok jal japni bay eb cheknejontek. Al ayon, ¿tzet ayji? ẍi eb bay.
23Yuj tu' xan max yal bay eb axca ti':
—Ayin ton albilcan wabixal yuj jun chekbej Dios chi yik Isaías payxa, yet max yalon axca ti': Ay jun mactxel bay tz'inan tx'otx' chi awji, cax chi yalon axca ti': T'inek junok is be Cham Yajaw, ẍicanok, ẍi Juan.
24A eb ulnak ec' bay Juan tu', a eb fariseo cheknej eb. 25Max k'anlen c'apax el eb axca ti':
—¿Tzet yuj xan chak' bautizar anima, ta mayachnak Cristo ach, tamwal Elías ach, tamwal chekbej ach Dios, jun echbanebil jay juj? ẍi eb bay.
26Xan max yal Juan tu' bay eb axca ti':
—Ayin ti', chi wak' bautizar eb anima yul a', palta ay jun co xol, man e yojtakok. 27A jun tu', tzunan jay wintak, palta caw wal miman yelapnok wintak. Yuj tu', man in mojok wak'on serbil, tamwal in xuyon el tx'anil xanab yin yakan, ẍi Juan tu' bay eb.
28A bay k'axepal ec' a' miman Jordán, bay jun lugar chi yik Betania, a tu' lanan yak'on bautizar Juan eb anima. A bay tu' max bet k'anlej el eb juntzan ti' bay.
Axca yopiso junok calnel, caytu' yopiso Jesús
29A yet junxa c'ual, max yilon Juan jay Jesús bay, xan max yal axca ti':
—Ilek wali. A Cham lanan jay ti', axca yopiso junok calnel chi ak'lay yin xajanbal, caytu' yopiso yuj Dios, yujtol a' chi ul ion el co yobtakil co masanil bay yulyibank'inal ti'.*fn* 30A ton Cham max wal yet max walon axca ti': A Cham tzunan jay wintak, palta ec'ban yopiso wintak, yujtol a yet c'amto chin alji, ayxac'alta' ec'ok, quin chi, max waloni. 31Maj wojtaknej elok mactxel Cham tu', palta max quin jay ak'oj bautizar eb anima yul a', yet watx' ok ojtaknelay el Cham juj ayon israel on ti', ẍi Juan.
32Max yalon c'apax Juan tu' axca ti': Max wil yayol Cham Espíritu yiban axca junok paloma, axa yoccan yin tu'. 33Mantota' wojtakok mactxel Cham chekbiltek yuj Dios tu', palta a Cham cheknej in wak'on bautizar eb anima yul a', a' max alon ayin axca ti': Ach ok el yayol Espíritu yiban jun mactxel, cax ok cancan yetok. A ton jun tu', a' ok aon oc Espíritu Santo yin anima, axca tol ok ak'lay bautizar eb yuj, ẍi ayin. 34Ayin ti', max wil Cham tu'. Yuj tu' xan chi wak' testigoal in ba yin, tol C'ajol ton Dios Cham, ẍi Juan tu'.
A eb babel cuywom Jesús
35A wal yet yewial tu', ayic' Juan junelxa yetok cawan eb is cuywom. 36Axa yilontok, lanan yec'jab Jesús, xan max yal axca ti':
—Ilabi. A Cham chi ec' tu', axca yopiso junok calnel chi ak'lay yin xajanbal yuj anima, caytu' yopiso yuj Dios, ẍi.
37A yet max yaben eb is cuywom Juan jun tu', max tzakloj eb yintak Jesús. 38Axa meltzojtok acan Jesús yintak tu', max yiloni, tzakan oc eb yintak.
—¿Tzet che saya'? ẍi Cham bay eb.
—Meẍtol, ¿baytal cajan ach? ẍi eb bay.
39—Sebaxek, ul ilek, ẍi bay eb.
Axa toj eb yetok tu', max bet yilon eb bay cajan, cax max can eb yetok yet jun yayc'ualil tu', yujtol a las cuatroxa mi yet max apni eb yetok.
40A cawan eb tu', max yab eb tzet max yal Juan. Yuj tu' xan max oc eb cuywomok Jesús. Ay jun chi yik Andrés xol eb, yuẍtak ba yetok Simón Pedro. 41Lajwic'al k'anjab Andrés tu' yetok Jesús, max toj sayon ec' jun yuẍtak tu'. Axa yet max ilchaj yuj, max yalon bay axca ti':
—Max ilchaj oc Cham Mesías juj, ẍi bay. (Mesías chi yal elapnok Cristo, Cham Ak'bil Yopiso yuj Dios.)
42Yet-xac'al jun bek tu', a' max iontok jun yuẍtak tu' bay Jesús. Max oc t'anan Jesús yin Simón tu', max yalon bay:
—Simón, c'ajol Jonás, Cefasxa ok ekcan ajok, ẍi Jesús bay. (A Cefas chi yal elapnok, Pedro, ma ch'en.)
Awtebiltek Felipe yetok Natanael yuj Jesús
43Axa yet junxa c'ual, max na Jesús toj bay Galilea, max chalen ba yetok jun mac chi yik Felipe, cax max yalon bay:
—Ec'anc'al cuywok wintak, ẍi bay.
44A Felipe tu', aj conob Betsaida. Cay c'apax tu' Andrés yetok Pedro, junnejc'al conob eb. 45Axa Felipe max bet sayon ec' jun chi yik Natanael. Maxc'al ilchaj yuj, max yalon bay axca ti':
—Ay jun max ilchaj juj, a ton Cham tz'ibejnakcan Moisés yabixal yul ley. Tz'ibbil c'apax can yuj eb chekbej Dios yet payxa. A ton Jesús, c'ajol José, aj conob Nazaret, ẍi.
46Axa yalon Natanael tu' bay axca ti':
—¿Tom ay junok watx'takil chi tit bay Nazaret xin? ẍi bay.
—Sebach, ton jila', ẍi Felipe tu' bay.
47Max yilontok Jesús, lanan jayoc Natanael bay, axa yalon yuj Natanael tu' axca ti':
—A jun chi jay ti', caw wal israel ton yul sat Dios, c'am chi iwi aytek sat anima, ẍi Jesús.
48Yuj tu' xan max k'anlej Natanael tu' bay axca ti':
—¿Tzet max quin ot ojtaknen el xin? ẍi.
—Wojtak achxa yet c'amto chach yawtej jay Felipe, yet ay ach ec' yich jun te higo, ẍi Jesús bay.
49—Meẍtol, yel ton wali C'ajol ach Dios. Co Reyal ach ayon conob Israel on ti', ẍi bay.
50—¿Asannej mi yuj max wala' tol max ach wil yich te higo, yuj tu' xan chaoc a c'ul win? Palta ay juntzanxa tzet yetal ok wunej ok ela', tol yelxac'al miman yelapnok, ẍi bay.
51Max yalon c'apax Jesús bay eb ayic' yetok tu' axca ti':
—Wal yel chi wal ayex, ok e yila', tol jakan satcan, axa eb yángel Dios*fn* ok e yil paxaj eb c'al yayol eb wiban, ayin tol Chekbilintek yuj Dios xol eb jet animail ti', ẍi Jesús.
Dewis Presennol:
Jn 1: ATBYK89
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kanjobal (Q’anjob’al) © Sociedad Bíblica de Guatemala 1989