Gn 19
19
Max c'aylay el Sodoma c'al Gomorra yuj Dios
1Yet wal lananxa yay numumok, max apni oc eb cawan ángel tu' bay conob Sodoma, axa Lot chotan ay bay is puertail conob. Max yilon Lot xin, max aj wanok, cax max chalay eb yuj. Max ay nojnaj satak eb sat tx'otx'. 2Max yalon bay eb:
—Ex mamin, yuj wal dios ayex, tonek wetok bay in na, ay a' aej ok e k'ana', cax watx' ok ex way yet jun ak'bal ti', axa yet yecal chex pet toji, ẍi Lot tu' bay eb.
Max tak'wi eb bay:
—Yuj wal dios ayach, palta ayon ti' ok on cancan bay parque ti', a cayti' ok on wayok, ẍi eb.
3Palta a pax Lot xin, max occ'al tean yin eb. C'ojanc'ulal max toj eb bay yatut tu', axa yet max apni oc eb, max watx'nej is pan eb tol c'am yich, loj caw wal watx' max yak' bay eb, cax watx' max yun low eb.
4Yet c'amto chi way eb, max wajon ba masanil eb winak aj conob Sodoma tu' yinlak na, eb ach'ej c'al eb icham winak. 5Chi c'oli yawji octok eb yin Lot, cax chi yalon eb axca ti':
—¿Baytal ay juntzan winak max jaycan oc etok bay atut ti' yet jun ak'bal ti'? I eltek eb nak ayon yet chi jetnej eb, ẍi eb.
6Axa yet max yaben Lot juntzan k'anej tu', max eltek bay eb. Watx' max yun makchencan eltek puerta tu' yintak. 7Max yaloni:
—Ex wamigo, ta ay wal tzet yetal yob che yochej che yunej, 8ay cawan in cutz'in caw wal k'opoj, c'amto winak chi k'umej, chi je' chi wieltek ayex, yet watx' che yun tzet che yochej yetok eb ix. Axa eb nak ti', c'amak; yujtol ayin chin ul yil eb nak, xan yowalil chin col eb, ẍi Lot tu' bay eb.
9Max yalon eb bay:
—Elan co satak. ¿Tom ach tx'ok conobal ach ti', chochejxac'al chala'? A tinani' yelxac'al ok ec' yiban ach jetnen yintak eb, ẍi eb.
Max lajwi tu', max occ'al ijan eb tenontok Lot yuj jitzontok ba eb cawilal puerta, yet chi mak' poj eb puerta tu' yaloni. 10Axa eb nak ayic' bay Lot tu', max yaon eltek eb nak is k'ab, cax max ilay octok yuj eb yul na, cax max makchen eb puerta tu'. 11Max yak'on eb ángel tu' c'ay c'ual sat eb nak, yuj tu xin, masanil eb nak ayic' yina tu', c'amxa chi je' yilwan eb. Masanil eb ach'ej c'al eb icham, c'amxa junok chi je' yilwi. Max c'umbi aj eb sayon ec' puertail na tu'. 12Lajwi tu xin, max yalon eb cawan tu' bay Lot:
—Ta ayto mac ay oj a ba yetok cayti', a c'ajol, ma a cutz'in, ma a ni', ma junokxa mactxel, itok eb etok najat. 13Yujtol ok co c'ayil jun conob ti'. Caw wal mimanxa is yobtakil satak Jehová, xan max on yatek yet chi co c'ayil juntzan anima ti', ẍi eb ángel tu'.
14Lajwi tu' max toj Lot yalon bay eb nak t'inan chi ion is cutz'in tu', max yaloni:
—Lim, ajanek wanok, elokonek, yujtol ok c'aylay el jun conob ti' yuj Jehová, ẍi bay eb.
Palta maj cha yab eb tzet max yal Lot tu'. Toc'al chi yal cham yalon eb. 15Toxa chi sakbi elok, yuj tu' max yal eb ángel bay Lot:
—Lim, ajanwan, ta c'am chi yochej a c'ul chach c'ayil yetok jun conob ti', itok xal etbi, c'al eb ix a cutz'in cawanil ayic' etok, ẍi eb bay.
16Axa Lot xin, c'amc'al chi eli. Axa cawan ángel tu' max mitx'on is k'ab eb, cax max ilay el eb, yujtol chi ok' c'ul Jehová yin eb. Axca tu' max yun yion el eb cham Lot tu' yetok xal yistzil tu', c'al eb ix is cutz'in. Caytu' max yun yeltok eb yul conob tu'. 17Axa yet mayal el eb tiel conob tu xin, max yal junok eb ángel tu' bay:
—Yelc'ulal chex toji, c'amc'al chex toj t'anan e yintak. C'am wal jabok chex oc waan bay jun ac'al ti', asek jolomlak witz ta c'am chi yochej e c'ul chex c'ayilok, ẍi bay.
18Max tak'wi Lot bay eb:
—C'amak ex mamin, yuj wal dios ayex. 19Caw wal mimanxa e watx'c'ulal che tx'ox ayin, ilab tol max in e colcan elok, yet c'am chin cami. C'am chi je' in toj bay jolomlak witz tu', tekan chin michchaj yuj jun yailal tu', cax chin cami. 20A cawilal ti' ay jun yaliẍ conob. A bay tu' chi je' in toji, matawal chin e chatok bay tu' yet chin col in ba. Wal yel, caw wal yaliẍ conob ch'an, ẍi Lot tu'.
21Max yalon jun ángel tu' bay:
—Mayal wabej, yunokab axca chal tu'. Man ok in c'ayil jun conob max al tu'. 22Asek yin aymanil xin, chex tojcan bay tu', yujtol c'am tzet chi je' wuneni yet c'amto chex apni bay jun lugar tu', ẍi jun ángel tu'.
Yuj tu' xan Zoar*fn* max yikcan jun conob tu'.
23A yet max sakbi elok, max apni oc Lot bay jun conob tu'. 24A bay satcan max yatek Jehová k'ak'ej yetok azufre yiban conob Sodoma c'al Gomorra. 25Max c'ayil juntzan conob tu' yetok masanil tzet ay bay, yuj Jehová, c'al masanil tzet max ch'ibaj bay is jobeal jun lugar tu'. 26Axa pax xal yistzil cham Lot tu xin, najat tzunanc'al chi yut ba, cax max tojcan t'anan yintak. A bay tu' max occan axca junok txutxal atz'am.
27Axa yet k'inibalil, max toj cham Abraham bay max k'anjab yetok Jehová yet ewi. 28Axa max yiloni tol a bay Sodoma c'al bay Gomorra c'al yetok masanil jobe, c'al bay masanil jun lugar tu', wacaquixac'al yaj mubal, axca is mubal junok miman horno. 29A yet max yak'on lajwok Dios juntzan mimek conob bay ac'al bay max ec' cajan cham Lot, max nalaytek cham Abraham yuj Jehová, xan max col-lay el Lot xol jun miman yailal tu' yuj.
Yinatil eb moabita c'al eb amonita
30Max lajwi tu xin, chi xiw Lot cajay bay conob Zoar tu', xan max tojcan bay jolomlak witz yetok eb ix is cutz'in cawanil, max cajay ec' eb bay yul junok nach'en. 31Ay jun c'ual max yal ix babel ix bay ix tzunan:
—A co mam ti' caw wal ichamxa, c'am junok winak bay jun lugar ti' ok je' jioni, axca ta' beybalej. 32Yuj tu xin, ok jak' uc'wok an co mam ti' cax chon way yetok, yet watx' ay yuninal jetok, ẍi ix.
33A yet jun ak'bal tu', max yak'on uc'wok an eb is mam tu', max c'ayil c'ul cham yuj an, axa ix babel ix max way yetok is mam tu'. Maj yab cham janic' max ay telan ix way yetok, tamwal max yabej janic' max aj wan ix. 34Axa yet junxa c'ual max yalon ix babel ix tu' bay ix tzunan:
—Ilabi, a yet ma'i ak'balil, max in way yetok co mam ti'; a tinani xin jak' pax uc'wok an, yet watx' chach way yetok ach ti'. Axca tu' ok el yuninal ayon co cawanil, ẍi ix. 35Axa yet ak'balil tu xin, max yak'on pax uc'wok an eb is mam tu' junelxa, axa ix tzunan tu' max way yetok cham. Palta Lot tu' maj wal yabej janic' max way ix yetok, tamwal janic' max aj wan ix. 36Caytu' max yun yoccan eb ix is cutz'in tu' cawanil yobixal yuj. 37A ix babel max jay yune' ix, cax max yak'on yik Moab, a ton is mam icham eb moabita tinani'. 38Max jay c'apax yune' ix tzunan ix tu', cax max yak'on eb yik Ben-ami, a ton is mam icham eb amonita tinani'.
Dewis Presennol:
Gn 19: ATBYK89
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kanjobal (Q’anjob’al) © Sociedad Bíblica de Guatemala 1989