LUCAS 24
24
Ne wban Jesus
(Mt. 28:1-10; Mr. 16:1‑8; Jn. 20:1-10)
1Dxe ne rzelo xman, rsilgue wa yra wnaa guin ruxbaa Jesus. Weey men perfum ne wzhexkwaa men, no wanal stebëd wnaa men. 2Chene wdxiin men, wii men le gye ne zemzëë rubaa che zu tebkoo. 3Lex wdee men lenbaa, per wzëldet Jesus lo men. 4Axtegue nandet men pe nlaa men. Tebegue wii men le txup mgyeey ne nak lërrkabnii zuli koo men. 5Por tant rdxe men, wlitlo men wii men lyu. Lex re mgyeey guin lo men:
―¿Penak rye de menmbán lad mengut? 6Yëtre men nee; le men che wban. Gunileedx ne na men lo de chene benak ka men Galilea. 7Na men lo de ne Men ne wdxiid wak Mén, sdekwent mén men lo mendol chen ykaa men men lo kruz, per chene gyon gbiz, yban ke men.
8Orguin wnileedx men diiz ne re Jesus lo men. 9Chene wberee men ne wa men rubaa, wuu men diizo lo yra chibteb poxter no le lo stebëd xpén Ne. 10Laa Mli Matlen no le Xwan no le Mli xnaa Jacob no le stebëd wnaa nak ne wa wuu diiz guin lo yra poxter. 11Per wlaleedxdet men logne re yra wnaa guin, nuu lextoo men pazer noze le men rnii.
12Per wruu Bëd, noze rzhoon Bëd za Bëd rubaa; chene wii Bëd lenbaa, nonchee saben zhoobtee. Orguin wberee Bëd, rzee rzak Bëd ne wii Bëd neguin ne wak.
Wlalo Jesus lo txup xpén Ne
(Mr. 16:12-13)
13Dxe ke guin, za txup xpén Jesus te gyëz ne la Emaús, zeg chibteb kilometro ryano kwlo Jerusalén. 14Za men ruu men diiz yra neguin ne wak. 15Laatee ne kayuu men diizo, wbig Jesus lo men yrup men, za Jesus yra Jesus men. 16Per mase rwii men Ne, per zegnak te ne rsoow lo men, wnebeeydetgue men Ne. 17Lex wnabdiiz Ne lo men, re Ne:
―¿Pagox gwa ruu de diiz ne zëëd de nëz? ¿Penak nles nuu lextoo de?
18Wke te men ne la Cleofas, re men:
―Yrandxee mén nan ne wak Jerusalén che padxe guin. ¿Pe nonchee laa de ka Jerusalén ne nandeto?
19Lex re Ne lo men:
―¿Pagox wak?
Orguin re men:
―Ne wzak Jesus zhan-Nazaret, ne nak te profet ne kesentyent rap poder nes lo Dëdyuzh no le nes lo yra mén, nigle por yra ne rlaa zhaa, nigle por yra diiz ne rnii zhaa. 20Wdekwent xextis be zhaa yra xextis be fxuz ne rnebééy lo yra fxuz chen ykaa mén zhaa lo kruz; zenga guet zhaa. 21Le noo yra noo nuu lextoo ne laa zhaa nak ne yselaa men-Israel, per orrenaa nedxeree wyon gbiz ne wak yra neree. 22Le nersilree, wa txup tson wnaa ne nuu lad noo rubaa, lex legue wneche men noo, 23porke wzëldet zhaa lo men, lex na men lo noo yra noo ne wlalo txup angel lo men, re angel ne mbán zhaa. 24Zhich guin wague txup tson xkompanyer noo rubaa, no nli ne zenga wak zegne na yra wnaa guin, per wiidet xkompanyer noo zhaa.
25Orguin re Jesus lo men:
―¿Penak rdeedet de kwent, no pa axtegue or ylaleedx de ne re profet? 26¿Pe let rapdet Crist ne sak Ne yra neree antes ne gya Ne ledne nzoon?
27Lex wzelo Ne wzëët Ne lo men yrup men yra ne zëëd lo xgyiich Dëdyuzh por laa Ne. Primer wzëët Ne ne zëëd lo liber ne wkaa Moises, zhich guin wzëët Ne ne wkaa yra profet.
28Ne wdxiin men gyëz ne za men, wlaa Jesus zeg rlaa men ne tesu. 29Per wkyenfwers men Ne ne yzëën Ne yra ne men, re men lo Ne:
―Guzëën, porke che rzëë no che zëdnit lyu.
Orguin wdee Ne lenyuu chen yzëën Ne yra Ne men. 30Chene che zob Ne lo mezh yra Ne men, wgoob Ne gyëtxtil, lex wdee Ne dexkyizhtee lo Dëdyuzh; wluzh nga wla No, wdee No lo men yrup men. 31Orguin nak bzalo men zegnak ne wyenii, wnebeey men Ne; per orgueguin nonchee wnitlo Ne. 32Lex rulsaa men diiz, re men:
―Kon rrazón ne nzoon nuu lextoo be chene zëëd be nëz ne zëdyuu zhaa diiz lo be no chene rzëët zhaa gan pe rna ne re lo xgyiich Dëdyuzh.
33Orguin wyuli men nëz, wbë́zdetre men nga. Wberee ke men Jerusalén ledne ndxin yra chibteb xpoxter Ne no le stebëd xkompanyer men 34ne re lo men:
―Nli ne wban Jesus, wlalo Ne lo Simon.
35Lex wuu men diiz lo yra poxter logne wzak men nëz no ne gan pezee wnebeey men Jesus chene wla Ne gyëtxtil.
Wlalo Jesus lo yra xpén Ne
(Mt. 28:16-20; Mr. 16:14‑18; Jn. 20:19-23)
36Benak kayuu men diiz guin, tebegue wlalo Jesus gwrooltee lad men yra men. Wgabtyuzh Ne men, re Ne:
―Dëdyuzh yseleedx gyelendxi lo de yra de.
37Kesentyent wdxe men yra men, nuu lextoo men pazer te anem rwii men. 38Per re Jesus lo men:
―¿Penak rdxe de? ¿Penak nutxup lextoo de? 39Gukwii nya noo, gukwii nii noo gante, noo ke ne. Gunëëz led noo gante, porke te anem neeydeto bëël, ni nuudeto dxit zegne rwii de nak noo.
40Wluzhse re Ne zenga, wluu nya Ne lo men no wluu nii Ne. 41Per kom wlaleedxdetgue meno por tant rzhiilen men no por tant gyelgwzee ne nuu men, lex re Jesus lo men:
―¿Pe nuu pe rap de gu be?
42Orguin wdee men tebla mël wgye lo Ne no le stebla mkuudx ne nuu dxin. 43Lex wnëëz No, wu No nes lo men yra men. 44Zhich guin re Ne lo men:
―Neree ne wzak noo, laa we nga na noo lo de yra de chene benak zu noo lad de: ne rap degne gak xkwent noo ne zëëd lo liber ne wkaa Moises no le ne zëëd lo yra liber ne wkaa yra profet no le lo liber Salmos.
45Orguin wlaa Ne ne wdee bnii xgyeryen men yra men chen ydee men kwent ne zëëd lo xgyiich Dëdyuzh. 46Re Ne lo men:
―Zeree zëëd lo xgyiich Dëdyuzh, ne rap Crist degne sakzi Ne no guet Ne; per chene gyon gbiz, yban ke Ne. 47No por la Ne yzëët mén xdiiz Dëdyuzh lo yrandxee mén ne nuu ydendxee gyëzlyu, selo men axtegue Jerusalén gue men lo mén ne rap mén degne ysaan xgyelmal mén, ylaleedx men Ne chen gun Dëdyuzh perdon xdol men. 48Laa de yra de nak ne yzëët yra neree lo mén. 49Lex noo yxaal ne re Xuz noo ne yxaal me por laa de yra de. Per nee Jerusalén gukaa axtegue ne ykakwent de poder ne yruu gyeybaa.
Le Jesus wyeep gyeybaa
(Mr. 16:19-20)
50Zhich guin wruno Jesus men lenlgyëz-Jerusalén, wano Ne men yra men guex Betania, lex wlisgya nya Ne wneleey Ne men. 51Or ne kaneleey Ne men, wyas Ne lad men sya Ne gyeybaa. 52Ne wluzhse wzaknon men Ne, wberee ke men Jerusalén, kesentyent rzhiilen men. 53No yzhe yzhendxee nuu men lenxeydoo Dëdyuzh rzaknon men Dëdyuzh. Zengaw.
Dewis Presennol:
LUCAS 24: zpi
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2010, Wycliffe Bible Translators, Inc. All rights reserved.