LUCAS 23
23
Le Jesus zu lo Pilato
(Mt. 27:1-2, 11-14; Mr. 15:1‑5; Jn. 18:28-38)
1Lex wzuli men yra men, wano men Jesus lo Pilato. 2Nga wzelo men rkagyii men Ne, re men:
―Wga ménree lo noo kagoots men xtoo menlaz noo, no na men ne ryaldet guezh zeg impwest lo rrey-Roma, no na men ne laa men nak Crist no ne laa men nak te rrey.
3Orguin wnabdiiz Pilato lo Ne, re Pilato:
―¿Pe laa de nak xerrey men-Israel?
Wke Ne re Ne:
―Zegwa we zeg na de.
4Orguin re Pilato lo fxuz ne rnebééy lo yra fxuz no le lo yra mén ne ndxin nga:
―Ryenen noo ne bet ne mal wlaadet ménree, por neguin rzëldeto lo noo.
5Per lel mazre rderëz men, re men:
―Noze rgoots men xtoo men-Judea por yra ne rneluu men. Galilea wzelo men, naaree naa le men che wlenza no nee.
Le Jesus zu lo Herodes
6Ne won Pilato zenga, wnabdiiz Pilato lo men gan pe men-Galilea nak Jesus. 7Chene re men ne men-Galilea nak Ne, wxaal Pilato Ne lo Herodes ne nak rrey Galilea porke no Herodes ka Jerusalén cheguin. 8Or ne wii Herodes Ne, kesentyent wzhiilen men, porke che wakxche rlaan men kwii men Ne, porke won men ruu mén xdiiz Ne no rlaan men ne ylaa Ne te gyelmilaguer kwii men. 9Ndal ne wnabdiiz Herodes lo Ne, per bet wkedet Ne. 10Nga ke ndxin yra fxuz ne rnebééy lo yra fxuz no le yra maxter ley, axtegue rbë́zdet rkagyii men Ne. 11Orguin wzelo Herodes yra Herodes xsoldad Herodes wlaa men Ne zegne rlaantee men, no por ne yzhidxno men Ne, wnegak men Ne te lër ne rak rrey. Zhich guin wxaal ke men Ne lo Pilato. 12Dxe guin wtsowxmig Pilato Herodes, porke rlayalsaa men chekwlodee.
Wkyeen mén guet Jesus
(Mt. 27:15-26; Mr. 15:6‑15; Jn. 18:39–19:16)
13Lex wtop Pilato yra fxuz ne rnebééy lo yra fxuz no le yra men ne rnebééy lo men-Israel no le yra mengyëz. 14Re Pilato lo men:
―Laa de yra de wdxidsan ménree nee; na de ne laa men ka kagoots xtoo mén; per che wnabdizyu noo lo men nes lo de yra de, bet ne mal ne rkagyii de men wzëldet lo noo, 15ni lo Herodes, le men wxaal ke Herodes nee. Che rwii de yra de ne bet ne mal ne rzëël guet men wlaadet men. 16Noze yzakzi noo men, lex yselaa ke noo men.
17Lo lni pask rap Pilato degne rselaa Pilato te mén ne nuu chegyiib. 18Per wzelo men yra men rderëz men, re men:
―¡Guket men gwa! ¡Guselaa Barrabás!
19Wguu mén Barrabás chegyiib por ne wzobnadil Barrabás mén Jerusalén no por ne wket Barrabás mén. 20Wlaan Pilato nselaa Pilato Jesus, lex wnii Pilato lo yra men guin ste. 21Per wzelo men yra men mazre rderëz men, re men:
―¡Lo kruz gukaa men! ¡Lo kruz gukaa men!
22Ne wyon tir re Pilato lo men yra men:
―¿Penako? ¿Pe ne malzhe wlaa men? Noo ryenen noo ne bet ne mal ne rzëël guet men wlaadet men. Noze yzakzi noo men, lex yselaa ke noo men.
23Per lel mazre rderëz yra mén guin, rnab men ne ykaa Ne lo kruz. Por tant ne rderëz men yra men fxuz ne rnebééy lo yra fxuz, wun men gan wak ne wlaan men. 24Orguin wna Pilato wlaa Pilato ne rnab men. 25Wselaa Pilato Barrabás, men ne wlaan yra mén guin ne yláá, no por ne wzobnadil men mén nuu men chegyiib no por ne wket men mén. Lex wdekwent Pilato Jesus lo yra mén chen ylaa men Ne zegne rlaantee men.
Wkaa mén Jesus lo kruz
(Mt. 27:32-44; Mr. 15:21‑32; Jn. 19:17-27)
26Chene zano men Jesus ne ykaa men Ne lo kruz, nëz wtsëlo men te men-Cirene ne la Simon, den wberee men guin; lex wnëëz men men, wnegweey men men xekruz Ne, lex zanal men zhich Ne.
27Ndalyaa mén zanal Ne no ndalyaa wnaa ne roon robtsaatee por ne nles nuu lextoo men por laa Ne. 28Per wii Ne lo men, lex re Ne lo men:
―Wna-Jerusalén, goondet de por noo, sinke gugoon por laake de no le por zhiin de. 29Porke sdxiin dxe ne gue de yra de: “Nzoon wnaa ne che nunla ne gapdet mëëd, nzoon wnaa ne axtegue wkaadet mëëd lextoo no le wnaa ne axtegue wguedxdet mëëd.” 30Cheguin selo mén gue men lo gyeey: “Gugyab led noo”; no gue men lo bles: “Gugyixlaan noo.” 31Porke belne zeree rlaa mén yagyaa, ¿pezee ylaaleg men yagbidx?
32No zano men txup ngbaan chen ykaa men men lo kruz yra men Jesus. 33Chene wdxiin men ledne la Berxtoo Mengut, wkaa men Jesus lo kruz no wkaa ke men yrup ngbaan guin lo kruz: te men wkaa lo kruz ne zob koo Ne ladbëë, le ste men wkaa lo kruz ne zob koo Ne ladbëg. 34Chene le Ne ka lo kruz, re Ne:
―Dëde, gugun men perdon porke nandet men pe rlaa men.
Le yra soldad wa pwest gan txu yganen xab Ne. 35Le yra mén ndxin nga rwii, no axtegue xtis rzhidxno Ne, re men:
―Wselaa ménree ste mén; orrenaa yselaa men men laake men, belne nli laa men nak Crist ne wxaal Dëdyuzh.
36Zenga ke rzhidxno soldad Ne, rbig soldad rdee soldad binaguer goo Ne. 37Re soldad lo Ne:
―Belne laa de nak xerrey men-Israel, guselaa de laake de.
38Lex wkaa men leter xtoo xekruz Ne kon diz-griego, kon diz-latín no le kon diz-hebreo, re leter guin: “Laa xerrey men-Israel nee.”
39No te ngbaan ne ka lo kruz wninyaan lo Ne, re men:
―Belne laa de nak Crist, guselaa de laake de no guselaa noo yrup noo zeree.
40Per wakndux ste mén guin lo men, re men:
―¿Pe rdxedet de Dëdyuzh, no laake kastig ke gwa kadee de? 41Laa be rzëël be ne kayak be sufrir, porke zeree rgyizh be ne wlaa be, per le ménree bet ne mal wlaadet men.
42Lex re men lo Jesus:
―Jesus, ynileedxchee de noo chene ydxiin de ledne ynebééy de.
43Wke Jesus, re Ne:
―Nligue yna noo lo de, ne nedxekeree tsuu de ledne nuu Dëdyuzh yrup de noo.
Le Jesus wet
(Mt. 27:45-56; Mr. 15:33‑41; Jn. 19:28-30)
44Zeg rwen ngbiz wzelo waknkeb ydendxee gyëzlyu axtegue beytson wzëë. 45Noze waknkeb lo ngbiz; wrëznzeli kortin ne ka lenxeydoo Dëdyuzh. 46Orguin wkarëz Jesus, re Ne:
―Dëde, ledxnya de guu xespíritu noo.
Nonchee wluzh re Ne zenga, wetgue Ne.
47Chene wii kapitan neguin ne wak, wzaknon men Dëdyuzh, re men:
―Nli ne bet xdoldet ménree.
48Yrandxee mén ne ndxin nga no ne wii neguin ne wak, wka men nëz sya men, rzelo men rgap laz men por gyelenles. 49Per le yra mén ne rnebeey Jesus no le yra wnaa ne wrunal Ne axtegue Galilea, wyan men axtegue nat rwii men yra neguin ne kayak.
Le Jesus wgueedx
(Mt. 27:57-61; Mr. 15:42‑47; Jn. 19:38-42)
50Cheguin nuu te mgyeey ne la Xeb, men-Arimatea gyëz ne nak lo lyu ne la Judea nak men. Wen men no ryal ne rlaa men no men nak te xtis-Israel. 51Kambë́z men ne gak ne rkyeen Dëdyuzh, no wyandet men byen ne wlaa yra mén guin Jesus. 52Lex wa men lo Pilato wnab men xkwerp Jesus. 53Chene wluzh wlit men Ne lo kruz, wtxël men Ne te saben, lex walu men Ne te lenbaa ne ndeen txugye ledne rutlel gardet tsuu. 54Dxe guin nak ne nulyaaz yra men-Israel gan kox ykyiinen men dxe ne rne men porke che mer selo dxe guin.
55Yra wnaa ne wrunal Jesus axtegue Galilea, no men wanal wii men xbaa Jesus no wii men pezee wguu mén Jesus lenbaa. 56Chene wberee men ruyuu, wzhexkwaa men perfum no le seyt ne rrenex. Lex wne men dxe ne rne men-Israel zegne zëëd lo ley.
Dewis Presennol:
LUCAS 23: zpi
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2010, Wycliffe Bible Translators, Inc. All rights reserved.