ᔪᐊᓇᓯᐅᑉ ᐊᒡᓚᖏᑦ 4
4
ᔩᓱᓯᐅᑉ ᐅᖃᖃᑎᖃᕐᓂᖓ ᐊᕐᓇᒥᒃ ᓴᒥᐊᕆᐊᕐᒥᐅᑕᕐᒥᒃ
1ᔩᓱᓯᓕ ᖃᐅᔨᓕᕐᐳᖅ ᐹᕆᓯᑦ ᑐᓴᐅᒪᓕᕐᒪᑕ ᔩᓱᓯᐅᑉ ᐃᓕᓐᓂᐊᕐᑎᑖᖃᑦᑕᓕᕐᓂᖓᓂᒃ ᐹᑉᑎᑦᓯᖃᑦᑕᓂᖓᓂᒃᓗ ᐅᓄᕐᓂᕐᓴᓂᒃ ᔪᐊᓇᓯᒥᑦ. 2ᔩᓱᓯᓕ ᓇᖕᒥᓂᖅ ᐹᑉᑎᑦᓯᓚᐅᖏᑦᑑᒐᓗᐊᖅ, ᐃᓕᓐᓂᐊᕐᑎᖏᓪᓕ ᑭᓯᒥ ᐹᑉᑎᑦᓯᖃᑦᑕᓚᐅᕐᐳᑦ, 3ᑕᕝᕙ ᔩᓱᓯ ᔫᑎᐊᒥᑦ ᐊᐅᓪᓚᕐᐳᖅ ᒐᓕᓕᐊᒧᓪᓗ ᐅᑎᓕᕐᓗᓂ. 4ᐊᖅᑯᑖᓂᓕ ᐊᖅᑯᓵᕐᓯᔭᕆᐊᖃᕐᐳᖅ ᓴᒥᐊᕆᐊᒥᒃ.
5 #
ᒨᓯᓯ ᓯᕗᓪᓖᑦ 33:19; ᔮᓱᐊ 24:32. ᓄᓇᓕᖕᓄᑦ ᓴᒥᐊᕆᐊᒦᑦᑐᒧᑦ ᓮᑲᕆᒥᒃ ᐊᑎᓕᖕᒧᑦ ᑎᑭᑉᐳᖅ, ᐱᕈᕐᓰᕕᖕᒧᑦ ᔧᑰᑉ ᐃᕐᓂᕐᒥᓄᑦ ᔫᓯᐱᒧᑦ ᑐᓂᓚᐅᕐᑕᖓᑕ ᖃᓂᒋᔭᖓᓃᑦᑐᒧᑦ. 6ᔧᑰᑉ ᐃᒥᕐᑕᕐᕕᖓ ᑕᕝᕙᓃᑉᐳᖅ, ᔩᓱᓯ ᐱᓱᖕᓂᕐᒥᓄᑦ ᒥᕐᖑᕐᑐᕋᒥ, ᐃᒥᕐᑕᕐᕕᐅᑉ ᓴᓂᐊᓄᑦ ᐃᖏᑉᐳᖅ. ᐅᓪᓗᖅ ᕿᑎᕋᓕᕐᑎᓪᓗᒍ.
7ᓴᒥᐊᕆᐊᒥᐅᑕᖅ ᐊᕐᓇᖅ ᑕᕝᕗᓐᖓᕐᐳᖅ ᐃᒥᕐᑕᕐᓗᓂ. ᔩᓱᓯᐅᑉ ᐅᖃᐅᑎᕚ, “ᐃᒥᕐᑎᓚᐅᓐᖓ.” 8ᐃᓕᓐᓂᐊᕐᑎᖏᓪᓕ ᓄᓇᓕᖕᓄᑦ ᓂᕿᒃᓴᓂᒃ ᓂᐅᕕᕆᐊᕐᓯᒪᕗᑦ.
9 #
ᐄᓱᕋ 4:1-5; ᓂᕼᐃᒤᐊ 4:1,2. ᐊᕐᓇᐅᑉ ᑭᐅᕚ, “ᔫᑎᐅᒐᕕᑦ, ᓴᒥᐊᕆᐊᕐᒥᐅᑕᐅᒐᒪ ᓱᖕᒪᑦ ᐅᕙᓐᓄᑦ ᐃᒥᕐᑎᑕᐅᔪᒪᕖᑦ?” ᔫᑎᑦ ᓴᒥᐊᕆᐊᕐᒥᐅᓂᒃ ᐃᓅᖃᑎᖃᕈᒪᖏᒻᒪᑕ.#4:9 ᐅᕝᕙᓘᓐᓃᑦ ᑐᑭᖃᕐᒥᔪᖅ ᔫᑎᑦ ᖃᓪᓗᑎᒥᒃ ᐴᒍᑕᕐᒥᒡᓗ ᑖᑦᓱᒥᖓᑦᓮᓐᓇᖅ ᐊᑐᕈᓐᓇᖏᒻᒪᑕ ᓴᒥᐊᕆᐊᕐᒥᐅᑦ ᐊᑐᕐᑕᕕᓂᕆᒃᐸᒍ
10ᔩᓱᓯᐅᑉ ᑭᐅᕚ, “ᖃᐅᔨᒪᒍᕕᑦ ᒎᑎᐅᑉ ᑐᓂᕐᕈᑖᓂᒃ, ᑭᓇᐅᖕᒪᖔᓪᓗ ᐃᓕᖕᓄᑦ ᐃᒥᕐᑎᑕᐅᔪᒪᔪᖅ, ᑐᓂᓯᕕᐅᔪᒪᒐᔭᕐᐳᑎᑦ ᑖᑦᓱᒧᖓ, ᑖᑦᓱᒪᓗ ᑐᓂᓯᕕᒋᒐᔭᕐᐹᑎᑦ ᐃᒥᕐᒥᒃ ᐃᓅᓯᖃᕐᓇᕐᑐᒥᒃ.”
11ᐊᕐᓇᐅᑉ ᐅᖃᐅᑎᕚ, “ᖃᓪᓗᑎᖃᓐᖏᓚᑎᓪᓘᓐᓃᑦ, ᐅᓇ ᐃᒥᕐᑕᕐᕕᒃ ᐅᓄᖔᓘᖓᖕᒪᑦ; ᓇᑭᓪᓕ ᐃᒥᕐᒥᒃ ᐃᓅᓯᖃᕐᓇᕐᑐᒥᒃ ᐱᒐᔭᕋᕕᑦ? 12ᐊᖏᓂᕐᓴᐅᕖᑦ ᓯᕗᓕᑦᑎᓐᓂᑦ ᔧᑯᒥᑦ? ᔧᑰᑉ ᐅᓇ ᐃᒥᕐᑕᕐᕕᒃ ᑐᓂᓚᐅᕐᒪᒍ ᐅᕙᑦᑎᓐᓄᑦ, ᓇᖕᒥᓂᕐᓗ ᕿᑐᕐᖓᖏᓪᓗ ᐆᒪᔪᖁᑎᖏᓪᓗ ᑕᕝᕙᓐᖓᑦ ᐃᒥᖃᑦᑕᓚᐅᕐᐳᑦ.”
13ᔩᓱᓯᐅᑉ ᐅᖃᐅᑎᕚ, “ᓇᓪᓕᐊᑦ ᑕᕝᕙᓐᖓᑦ ᐃᒥᕐᒥᑦ ᐃᒥᕐᑐᖅ ᐃᒥᕈᓕᕐᓂᐊᕆᕗᖅ, 14ᓇᓪᓕᐊᓪᓕ ᐃᒥᕐᒥᒃ ᑐᓂᔭᓐᓂᒃ ᐃᒥᕐᓂᐊᕐᑐᖅ ᐃᒥᕈᓕᒃᑲᓐᓂᕐᓂᐊᓐᖏᓚᖅ; ᐃᒥᖅ ᑐᓂᓂᐊᕐᑕᕋ ᑖᑦᓱᒧᖓ ᐃᓗᐊᓂᑦ ᑰᓕᕐᓂᐊᕐᐳᖅ ᐃᓅᓯᖃᕐᓇᕐᑐᒥᒃ ᓄᖑᓱᐃᑦᑐᒥᒃ.”
15ᐊᕐᓇᐅᑉ ᐅᖃᐅᑎᕚ, “ᐃᒥᕐᒥᒃ ᑕᒪᑐᒥᖓ ᑐᓂᓯᕕᒋᓐᖓ, ᐃᒥᕈᒃᑲᓐᓂᕐᓂᐊᕈᓐᓃᕋᒪ, ᐃᒥᕐᑕᕐᕕᖕᒧᓪᓗ ᐅᕗᖓ ᐃᒥᕐᑕᕆᐊᖃᖃᑦᑕᕐᓂᐊᕈᓐᓃᕋᒪ.”
16ᔩᓱᓯᐅᑉ ᐅᖃᐅᑎᕚ, “ᐊᖏᕐᕋᓕᕆᑦ ᐅᐃᑦ ᕾᖁᔭᕐᑐᕐᓗᒍ, ᐅᕗᖓ ᐅᑎᕐᓂᐊᕐᒥᒐᕕᑦ.”
17ᐊᕐᓇᐅᑉ ᑭᐅᕚ, “ᐅᐃᖃᓐᖏᓚᖓ.”
ᔩᓱᓯᐅᑉ ᑭᐅᕚ, “ᓱᓕᕗᑎᑦ ᐅᖃᕋᕕᑦ, ‘ᐅᐃᖃᓐᖏᓚᖓ’; 18ᐅᐃᓂᖃᑦᑕᕐᓯᒪᒐᕕᑦ ᑕᓪᓕᒤᕐᑐᕐᓗᑎᑦ, ᒫᓐᓇᓗ ᐊᖑᑦ ᓇᔪᕐᑎᒋᔧᑦ ᐅᐃᒋᓪᓚᕆᖏᓐᓇᕕᐅᒃ; ᓱᓕᓪᓗᑎᑦ ᑕᒪᑐᒥᖓ ᐅᖃᕐᐳᑎᑦ.”
19ᐊᕐᓇᐅᑉ ᐅᖃᐅᑎᕚ, “ᖃᐅᔨᕗᖓ ᓇᓚᐅᑦᑍᔫᒐᕕᑦ. 20ᓯᕗᓕᕗᑦ ᐅᕙᓂ ᖃᖅᑲᒥ ᒎᑎᒧᑦ ᑐᒃᓯᐊᖃᑦᑕᓚᐅᕐᐳᑦ; ᐃᓕᑦᓯᓕ ᔫᑎᐅᔪᓯ ᐅᖃᕐᐳᓯ ᔨᕉᓴᓕᒻᒥ ᑭᓯᐊᓂ ᒎᑎᒧᑦ ᐃᓄᐃᑦ ᑐᒃᓯᐊᕆᐊᖃᕐᓂᕋᕐᓗᒋᑦ.”
21ᔩᓱᓯᐅᑉ ᐅᖃᐅᑎᕚ, “ᐊᕐᓈᖅ ᐅᒃᐱᕆᓐᖓ, ᓇᓪᓕᐅᑎᔪᒫᕐᐳᖅ ᐃᓄᐃᑦ ᑕᕝᕙᓂ ᖃᖅᑲᒥ ᔨᕉᓴᓕᒻᒥᓘᓐᓃᑦ ᐊᑖᑕᒧᑦ ᑐᒃᓯᐊᖃᑦᑕᕈᓐᓃᕐᕕᒃᓴᖓᑦ. 22ᑐᒃᓯᐊᕐᕕᒋᔭᓯ ᖃᐅᔨᒪᖏᓐᓇᓯᐅᒃ; ᐅᕙᒍᓪᓕ ᖃᐅᔨᒪᕗᒍᑦ ᑐᒃᓯᐊᕐᕕᒋᔭᑦᑎᓐᓂᒃ, ᔫᑎᓂᑦ ᐱᐅᓕᔭᐅᓂᖅ ᐱᖕᒪᑦ. 23ᓇᓪᓕᐅᑎᔪᒫᕐᐳᕐᓕ, ᒫᓐᓇᓗ ᓇᓪᓕᐅᑎᓯᒪᓕᕐᐳᖅ, ᐊᑖᑕᒧᑦ ᑐᒃᓯᐊᕐᑐᑦ ᓱᓕᑦᓯᐊᕐᑐᒥᒃ ᑐᒃᓯᐊᖃᑦᑕᓕᕐᕕᒃᓴᓐᖓᑦ, ᐊᓂᕐᓂᒃᑰᕐᓗᑎᒃ ᓱᓕᑦᓯᐊᕐᑐᒥᒃ, ᐊᑖᑕ ᑍᒪᓐᓇ ᑐᒃᓯᐊᖃᑦᑕᕈᓐᓇᕐᑐᓂᒃ ᕿᓂᕐᒪᑦ. 24ᒎᑎ ᐊᓂᕐᓂᐅᖕᒪᑦ, ᑖᑦᓱᒧᖓ ᑐᒃᓯᐊᕐᑐᑦ ᐊᓂᕐᓂᒃᑰᕐᓗᑎᒃ ᓱᓕᑦᓯᐊᕐᑐᒥᒃ ᑐᒃᓯᐊᖃᑦᑕᕐᑐᒃᓴᐅᖕᒪᑕ.”
25ᑕᕝᕙ ᐊᕐᓇᐅᑉ ᐅᖃᐅᑎᕚ, “ᖃᐅᔨᒪᕗᖓ ᒥᓮᐊ, ᙭ᔅᑑᓯᒥᒃ ᑍᔭᐅᔪᖅ, ᑎᑭᑦᓱᒫᕐᒪᑦ; ᑎᑭᒃᑯᓂᓗ, ᑖᑦᓱᒪ ᑐᑭᓯᑎᑦᓱᒫᕐᐹᑎᒍᑦ ᓱᓇᓕᒫᓂᒃ.”
26ᔩᓱᓯᐅᑉ ᑭᐅᕚ, “ᑖᓐᓇᐅᕗᖓ ᐅᖃᖃᑎᒋᔧᑦ.”
27ᑍᒫᒃ ᓱᓕ ᐅᖃᕐᑎᓪᓗᒍ ᐃᓕᓐᓂᐊᕐᑎᖏᑕ ᑎᑭᑉᐹᑦ. ᑲᒪᒻᒪᕆᒃᐳᓪᓗ ᔩᓱᓯᐅᑉ ᐊᕐᓇᒥᒃ ᐅᖃᖃᑎᖃᕐᓂᖓᓂᒃ, ᓇᓪᓕᐊᓐᓂᒡᓘᓐᓃᑦ ᐊᐱᕆᔪᖃᓐᖏᓚᖅ ᐊᕐᓇᒧᑦ “ᓱᓇᒥᒃ ᐱᔪᒪᕖᑦ?” ᐅᕝᕙᓗ, ᔩᓱᓯᒧᑦ ᐊᐱᕆᔪᖃᓐᖏᓚᖅ, “ᓱᖕᒪᓄᓇ ᐊᕐᓇᖅ ᐅᖃᖃᑎᒋᕕᐅᒃ?”
28ᑕᕝᕙ ᐊᕐᓇᐅᑉ ᐃᒥᕐᑕᐅᑎᓂ ᕿᒪᒃᓗᓂᐅᒃ, ᓄᓇᓕᖕᓄᑦ ᐅᑎᕐᐳᖅ, ᐃᓄᐃᑦ ᑕᕝᕙᓃᑦᑐᑦ ᐅᖃᐅᑎᕔᑦ, 29“ᕾᓗᓯ ᐊᖑᑦ ᑕᑯᔭᕐᑐᕐᓯᐅᒃ ᐱᓂᐊᓚᐅᕐᓯᒪᔭᓕᒫᓐᓂᒃ ᐅᖃᐅᑦᔨᔨᒋᔭᕋ. ᙭ᔅᑑᓯᐅᖏᒻᒪᖔᑦ.” 30ᑕᕝᕙ ᐃᓄᐃᑦ ᓄᓇᓕᖕᓂᑦ ᐱᓪᓗᑎᒃ ᔩᓱᓯᐅᑉ ᓇᔪᕐᑕᖓᓄᐊᕐᐳᑦ.
31ᑎᑭᓚᐅᕐᑎᓐᓇᒋᓪᓕ ᔩᓱᓯ ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᐊᔪᕆᕐᑐᐃᔩ, ᓂᕆᑬᓐᓇᕆᑦ.”
32ᔩᓱᓯᐅᓪᓕ ᑭᐅᕔᑦ, “ᓂᕆᔭᒃᓴᖃᕐᐳᖓ ᖃᐅᔨᒪᓐᖏᑕᑦᓯᓐᓂᒃ.”
33ᑕᕝᕙ ᐃᓕᓐᓂᐊᕐᑎᖏᑦ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᐅᓈ ᓂᕆᓂᐊᕐᑕᖓᓂᒃ ᑐᓂᓯᕕᐅᔪᕕᓃᖅ?”
34ᔩᓱᓯᐅᑉ ᐅᖃᐅᑎᕔᑦ, “ᓂᕆᔭᒃᓴᒃᑲ ᑕᕝᕙ ᑎᓕᔨᒪ ᐱᔪᒪᔭᖓᓂᒃ ᓈᓚᒡᓗᖓ, ᐱᓇᓱᐊᕐᑕᐅᖁᓯᒪᔭᖓᓗ ᐱᔭᕇᕐᓗᒍ. 35ᐅᖃᕐᐸᓐᖏᓚᓰ, ‘ᑕᖅᑮᑦ ᓱᓕ ᓯᑕᒪᐅᕗᑦ, ᑖᒃᑯᐊ ᓈᒃᐸᑕ ᑲᑎᕐᓱᐃᕕᖃᓛᕐᓂᐊᕐᐳᖅ?’ ᐅᖃᐅᑎᕙᑦᓯᓕ, ᐱᕈᕐᓰᕕᒃ ᑕᑯᑦᓯᐊᓚᐅᕐᓯᐅᒃ; ᐱᕈᕐᑐᑦ ᐱᕈᕇᕐᐳᑦ ᖃᑯᕐᓯᓪᓗᑎᒃ ᑲᑎᕐᓱᕐᑕᐅᑐᐃᓐᓇᕆᐊᖃᓕᕐᐳᑦ. 36ᓇᑲᑎᕆᔪᕐᓕ ᐊᑭᓕᕐᑕᐅᓂᐊᕐᐳᖅ, ᑲᑎᕐᓱᐃᓪᓗᓂ ᐱᕈᕐᑐᓂᒃ ᐃᓅᓯᕐᒧᑦ ᓄᖑᓱᐃᑦᑐᒧᑦ; ᑕᕝᕙ ᑲᓐᖓᕐᓱᐃᔪᖅ ᑲᑎᕐᓱᐃᔪᕐᓗ ᑍᒫᒃ ᖁᕕᐊᓱᖃᑎᒌᖕᓂᐊᕐᐳᒃ. 37ᐅᖃᐅᓯᐅᕙᒃᑐᖅ ᓱᓕᕗᖅ ᐃᒤᓕᔪᖅ; ‘ᐃᓄᒃ ᑲᓐᖓᕐᓱᐃᕗᖅ, ᐊᓯᐊᓕ ᑲᑎᕐᓱᐃᕗᖅ.’ 38ᑎᓕᓚᐅᕐᐸᑦᓯ ᐱᕈᕐᓰᕕᖕᒥ ᑲᑎᕐᓱᐃᖁᓪᓗᓯ ᐱᕈᕇᕐᑐᓂᒃ ᐱᓇᓱᐊᓚᐅᓐᖏᑕᑦᓯᓐᓂᑦ; ᐊᓯᓯ ᐊᒃᓱᕈᕐᓗᑎᒃ ᐱᓇᓱᐊᓚᐅᕐᐳᑦ, ᐃᓕᑦᓯᓗ ᐱᓇᓱᐊᕐᓯᒪᔭᖏᓐᓂᒃ ᐱᓇᓱᐊᓕᕐᐳᓯ.”
39ᓴᒥᐊᕆᐊᕐᒥᐅᓪᓕ ᐊᒥᓱᑦ ᓄᓇᓖᑦ ᑕᕝᕙᓂ ᔩᓱᓯᒥᒃ ᐅᒃᐱᕈᓱᒃᐳᑦ ᐊᕐᓇᐅᑉ ᐅᖃᓚᐅᓂᖓ ᐱᓪᓗᒍ, “ᐱᓂᐊᓚᐅᕐᓯᒪᔭᓕᒫᓐᓂᒃ ᐅᖃᐅᑦᔨᔨᒋᔭᕋ.” 40ᑍᒤᒻᒪᑦ ᑖᒃᑯᐊ ᓴᒥᐊᕆᐊᕐᒥᐅᑦ ᔩᓱᓯᒧᑦ ᑎᑭᐅᑎᒐᒥᒃ, ᐊᔪᐃᓐᓈᕆᓕᕐᐹᑦ ᓯᓂᒃᑕᕐᕕᐅᔪᒪᓪᓗᑎᒃ; ᔩᓱᓯ ᐅᓪᓘᖕᓂᒃ ᒪᕐᕉᖕᓂᒃ ᑕᕝᕙᓂ ᐅᓪᓕᕗᖅ.
41ᐅᓄᕐᓂᕐᓮᓪᓕ ᐅᒃᐱᓕᕐᐳᑦ ᐅᖃᐅᓯᖏᑦ ᐱᑦᔪᑎᒋᓪᓗᒋᑦ. 42ᐊᕐᓇᒧᑦ ᐅᖃᕐᐳᑦ, “ᒫᓐᓇ ᐅᒃᐱᓕᕐᐳᒍᑦ ᐅᖃᐅᓯᕐᑎᑦ ᐱᑦᔪᑎᒋᑐᐃᓐᓇᕐᓇᒋᑦ, ᐅᕙᒍᓪᓕ ᓇᖕᒥᓂᖅ ᑐᓴᕋᑦᑎᒍ, ᑐᑭᓯᓪᓗᑕᓗ ᐃᓛᒃ ᑖᓐᓇ ᓱᓕᔪᒥᒃ ᐱᐅᓕᔨᐅᖕᒪᑦ ᓯᓚᕐᔪᐊᕐᒥᐅᓄᑦ.”
ᔩᓱᓯᐅᑉ ᐋᖅᑭᒃᓯᓂᖓ ᐊᖓᔪᖅᑳᑉ ᐃᕐᓂᖓᓂᒃ
43ᐅᓪᓘᒃ ᒪᕐᕈᒃ ᐊᓂᒍᕐᒪᑎᒃ ᒐᓕᓕᐊᒧᑦ ᐊᐅᓪᓚᕐᐳᖅ. 44#ᒫᑎᐅᓯ 13:57; ᒫᑯᓯ 6:4; ᓘᑲᓯ 4:24.ᔩᓱᓯ ᓇᖕᒥᓂᖅ ᐅᖃᓚᐅᕐᒪᑦ, “ᓇᓚᐅᑦᑍᔪᖅ ᓄᓇᑐᖃᕐᒥᓂ ᐅᐱᒋᔭᐅᖏᒻᒪᑦ.” 45#ᔪᐊᓇᓯ 2:23.ᒐᓕᓕᐊᒧᓪᓕ ᑎᑭᒻᒪᑦ, ᒐᓕᓕᐊᒥᐅᑦ ᑐᓐᖓᓱᒃᑎᑉᐹᑦ, ᑕᑯᓚᐅᕋᒥᒃ ᔨᕉᓴᓕᒻᒥ ᓇᓪᓕᐅᓐᓂᕐᓯᐅᕐᑎᓪᓗᒋᑦ ᔩᓱᓯ ᐱᓇᓱᐊᕐᑎᓪᓗᒍ, ᑖᒃᑯᐊᑦᑕᐅᖅ ᑕᕝᕙᓃᓚᐅᕋᒥᒃ.
46 #
ᔪᐊᓇᓯ 2:1-11. ᑭᖑᓂᖓᒍᑦ ᔩᓱᓯ ᑬᓇᒧᑦ ᒐᓕᓕᐊᒦᑦᑐᒧᑦ ᑎᑭᒃᑭᕗᖅ, ᐃᒥᕐᒥᒃ ᐅᐂᓂᓐᖑᕐᑎᑦᓯᕕᒋᓚᐅᕐᑕᒥᓄᑦ. ᑲᐲᕐᓂᐊᒥᓗ ᐊᖓᔪᖅᑳᑉ ᐃᓚᖓᑦᑕ ᐃᕐᓂᖓ ᖃᓂᒪᕗᖅ. 47ᑖᓐᓇ ᑐᓴᕋᒥ ᔩᓱᓯ ᔫᑎᐊᒥᓐᖔᕐᓗᓂ ᒐᓕᓕᐊᒧᑦ ᑎᑭᒻᒪᑦ, ᐅᐸᒃᐹ ᐊᔪᐃᓐᓇᕐᓗᓂᓗ ᑲᐲᕐᓂᐊᒧᐊᖁᕚ ᐃᕐᓂᖓᓂᒃ ᐋᖅᑭᒃᓯᖁᓪᓗᒍ, ᑐᖁᑐᐃᓐᓇᕆᐊᖃᕐᓗᓂ ᖃᓂᒪᖕᒪᑦ. 48ᔩᓱᓯᐅᑉ ᐅᖃᐅᑎᕚ, “ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒡᓗ ᑕᑯᖏᒃᑯᑦᓯ ᐅᒃᐱᕈᒪᓐᖏᓚᓯ.”
49ᐊᖓᔪᖅᑳᑉ ᐅᖃᐅᑎᕚ, “ᐅᕙᑦᑎᓐᓄᐊᓚᐅᕐᓗᒃ ᕿᑐᕐᖓᕋ ᑐᖁᖏᓐᓂᖓᓂ.”
50ᔩᓱᓯᐅᑉ ᐅᖃᐅᑎᕚ, “ᐊᖏᕐᕋᓕᕆᑦ; ᐃᕐᓃᑦ ᐃᓅᓂᐊᕐᐳᖅ.”
ᐊᖑᑦ ᔩᓱᓯᐅᑉ ᐅᖃᐅᓯᖓᓂᒃ ᐅᒃᐱᕈᓱᒃᑲᒥ ᐊᖏᕐᕋᓯᕗᖅ. 51ᐊᖏᕋᐅᓕᕐᑎᓪᓗᒍ ᐱᔨᖏᑕ ᐹᕐᐹᑦ ᐅᖃᐅᑎᓪᓗᒍ, “ᐃᕐᓃᑦ ᖃᓄᐃᑦᓱᓐᓃᕐᐳᖅ.”
52ᑕᕝᕙ ᐊᐱᕆᕔᑦ ᖃᑦᓯᓐᖑᕐᑎᓪᓗᒍ ᐃᕐᓂᖓ ᐱᐅᓯᕙᓪᓕᐊᓯᓚᐅᕐᒪᖔᑦ, ᑖᒃᑯᐊ ᑭᐅᕚᑦ, “ᐃᑉᐸᒃᓴᖅ 1ᒧᐊᕐᑎᓪᓗᒍ ᐆᑎᕐᓇᕈᓐᓃᓚᐅᕐᐳᖅ.” 53ᐊᑖᑕᖓᑕ ᖃᐅᔨᕚ ᑕᕝᕙᓂ ᐃᑲᕐᕋᒥ ᔩᓱᓯᐅᑉ ᐅᖃᐅᑎᓚᐅᕐᒪᒍ, “ᐃᕐᓃᑦ ᐃᓅᓂᐊᕐᐳᖅ”; ᐃᒻᒥᓂᒡᓗ ᐃᒡᓗᒥᐅᖃᑎᓕᒫᖏᓪᓗ ᐅᒃᐱᓕᕐᐳᑦ.
54ᑕᒪᓐᓇ ᑕᕝᕙ ᔩᓱᓯᐅᑉ ᓇᓗᓁᒃᑯᑕᖓᑕ ᐂᑉᐸᖓ ᔫᑎᐊᒥᓐᖔᕐᓗᓂ ᒐᓕᓕᐊᒧᐊᕐᓯᒪᓂᖓᑕ ᑭᖑᓂᖓᓂ.
Dewis Presennol:
ᔪᐊᓇᓯᐅᑉ ᐊᒡᓚᖏᑦ 4: EAIB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible © Canadian Bible Society, 2012, 2021-2023.