ᔪᐊᓇᓯᐅᑉ ᐊᒡᓚᖏᑦ 18
18
ᔩᓱᓯᐅᑉ ᑎᒍᔭᐅᓂᖓ
ᒫᑎᐅᓯ 26:47-56; ᒫᑯᓯ 14:43-50; ᓘᑲᓯ 22:47-53
1ᔩᓱᓯ ᑐᒃᓯᐊᕇᕋᒥ, ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕙᓐᖓᑦ ᓅᑉᐳᑦ, ᑰᒃ ᑭᑦᑐᕌᓂ#18:1 ᑰᒐᓚᑉ ᐊᑎᖓ ᐃᑳᕐᐹᑦ, ᑕᕝᕙᓂ ᐱᕈᕐᓰᕕᒃᑕᖃᕐᒪᑦ, ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕗᓐᖓᕐᐳᑦ. 2ᔫᑕᓯᐅᓪᓕ, ᑖᑦᓱᒪ ᐱᔭᐅᑎᑦᓯᔨᖓᑕ, ᑖᓐᓇ ᐱᕈᕐᓰᕕᒃ ᖃᐅᔨᒪᕚ; ᔩᓱᓯ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕙᓂ ᑲᑎᖃᑦᑕᕐᓯᒪᖕᒪᑕ. 3ᑍᒤᒻᒪᑦ, ᔫᑕᓯ ᑕᕝᕗᖓ ᐱᕈᕐᓰᕕᖕᒧᐊᓕᕐᐳᖅ, ᐅᓇᑕᕐᑐᒃᓴᓂᒃ ᑐᒃᓯᐊᕐᕕᒡᔪᐊᓪᓗ ᖃᐅᔨᓴᕐᑎᖏᓐᓂᒃ ᐃᓚᖃᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑕ ᐹᕆᓯᓪᓗ ᑎᓕᓯᒪᔭᖏᓐᓂᒃ, ᓇᓂᕉᑎᖃᕐᓗᑎᒃ ᓇᓂᕈᐊᓕᔭᕐᓗᑎᒡᓗ ᓱᒋᐅᑦᓯᔭᕐᓗᑎᒡᓗ. 4ᔩᓱᓯᓕ, ᑕᒤᓐᓂᒃ ᖃᐅᔨᒪᒐᒥ ᐱᓂᐊᕐᕕᐅᓂᐊᕐᓂᕐᒥᓂᒃ, ᐸᕐᕆᐊᕐᓗᒋᑦ ᐅᖃᐅᑎᕔᑦ, “ᑭᓇᒦᒃ ᕿᓂᕐᐱᓯ?”
5ᑖᒃᑯᐊ ᑭᐅᕚᑦ, “ᔩᓱᓯ ᓈᓴᕇᑎᒥᐅᖅ.”
ᔩᓱᓯᐅᑉ ᐅᖃᐅᑎᕔᑦ, “ᑖᓐᓇᐅᕗᖓ.”
ᔫᑕᓯᐅᑉ ᐱᔭᐅᑎᑦᓯᔫᑉ ᐃᓄᐃᑦ ᑖᒃᑯᐊ ᓇᖏᖃᑎᒋᕔᑦ. 6ᔩᓱᓯᐅᓪᓕ ᐅᖃᐅᑎᖕᒪᒋᑦ, “ᑖᓐᓇᐅᕗᖓ,” ᑭᖑᑉᐱᐊᕋᒥᒃ ᓂᕕᕐᐳᑦ ᓄᓇᒧᑦ. 7ᑕᕝᕙ ᔩᓱᓯᐅᑉ ᐊᐱᕆᒃᑲᓐᓂᕐᐰᑦ, “ᑭᓇᒦᒃ ᕿᓂᕐᐱᓯ?”
ᑖᒃᑯᐊ ᐅᖃᕐᐳᑦ, “ᔩᓱᓯ ᓈᓴᕇᑎᒥᐅᖅ.”
8ᔩᓱᓯᐅᑉ ᑭᐅᕔᑦ, “ᐅᖃᐅᑎᔭᕇᕐᐸᑦᓯ ᑖᓐᓇᐅᕗᖓ; ᐅᕙᖓᑐᐊᖅ ᕿᓂᕈᑦᓯᓐᖓ, ᐅᑯᐊ ᐃᓚᒋᔭᒃᑲ ᑲᒪᒋᓇᒋᑦ ᐊᐅᓪᓚᕐᓕᑦ.” 9ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᐅᕙᓐᓄᑦ ᑐᓂᓚᐅᕐᑕᕐᓂᒃ ᐊᑕᐅᓯᕐᒥᒡᓘᓐᓃᑦ ᐊᓯᐅᔪᖃᓐᖏᓚᖅ.”
10ᑕᕝᕙ ᓮᒨᓂ ᐲᑦᑐᕉᓯ, ᓴᕕᒡᔪᐊᖃᕋᒥ, ᐊᒧᓪᓗᓂᐅᒃ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᖓ ᐅᓕᒪᕐᓗᒍ ᓯᐅᑎᖓᑕ ᑕᓕᕐᐱᐊ ᓇᑲᑉᐹ. ᑖᓐᓇᓗ ᐱᔨ ᐊᑎᖃᕐᐳᖅ ᒪᐅᓪᑲᔅᒥᒃ. 11#ᒫᑎᐅᓯ 26:39; ᒫᑯᓯ 14:36; ᓘᑲᓯ 22:42.ᔩᓱᓯᐅᑉ ᐲᑦᑐᕉᓯ ᐅᖃᐅᑎᕚ, “ᓴᕕᒡᔪᐊᑦ ᑮᓁᓕᑕᖓᓄᑦ ᐴᓕᕈᒃ; ᑏᑐᑎᐅᑉ ᐃᒪᖓ ᐊᑖᑕᒪ ᐅᕙᓐᓄᑦ ᕾᑕᖓ ᐃᒥᕆᐊᖃᓐᖏᓚᕌ?”
ᔩᓱᓯᐅᑉ ᐋᓇᓯᒧᐊᕈᑦᔭᐅᓂᖓ
12ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᔫᑎᓪᓗ ᑐᒃᓯᐊᕐᕕᒡᔪᐊᕐᒥ ᖃᐅᔨᓴᕐᑎᖏᑕ ᔩᓱᓯ ᑎᒍᕚᑦ ᕿᓚᒃᓱᕐᓗᒍ. 13ᓯᕗᓪᓕᕐᒥᒡᓗ ᐋᓇᓯᒧᐊᕈᑎᕚᑦ; ᑬᐊᐹᓯᐅᑉ ᓴᑭᖓᓄᑦ, ᐊᕐᕌᒍᒥ ᑕᒪᑐᒪᓂ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᔫᑉ. 14#ᔪᐊᓇᓯ 11:49,50.ᑬᐊᐹᓯ ᑖᓐᓇᐅᕗᖅ ᔫᑎᑦ ᐊᖓᔪᖅᑳᖏᓐᓂᒃ ᐃᓱᒪᑖᕐᑎᑦᓯᓚᐅᕐᑐᖅ ᐃᓄᒃ ᐊᑕᐅᓯᖅ ᑐᖁᑕᐅᒃᐸᑦ ᐱᐅᓂᕐᓴᐅᒐᔭᕐᓂᕋᕐᓗᓂᐅᒃ ᐃᓅᖃᑎᒌᓕᒫᑦ ᐱᑦᔪᑎᒋᓗᒋᑦ.
ᐲᑦᑐᕉᓯᐅᑉ ᒥᓯᐊᕈᑎᖃᕐᓂᖓ ᔩᓱᓯᒥᒃ
ᒫᑎᐅᓯ 26:69-70; ᒫᑯᓯ 14:66-68; ᓘᑲᓯ 22:55-57
15ᓮᒨᓂᓕ ᐲᑦᑐᕉᓯ ᐃᓕᓐᓂᐊᕐᑎᐅᖃᑎᖓᓗ ᔩᓱᓯᒥᒃ ᒪᓕᒃᐴᒃ. ᐃᓕᓐᓂᐊᕐᑎᓗ ᐲᑦᑐᕉᓯᐅᑉ ᐊᓯᐊ ᖃᐅᔨᒪᔭᐅᒐᒥ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᑕ ᓯᓚᑖᓄᑦ ᐊᕙᓗᓕᐅᕐᓯᒪᔫᒧᑦ ᐃᑎᖃᑕᐅᕗᖅ ᔩᓱᓯ ᐃᓚᒋᓪᓗᒍ, 16ᐲᑦᑐᕉᓯᓕ ᐃᑎᕐᑕᕐᕕᐅᑉ ᐅᒃᑯᐊᖓᑕ ᓯᓚᑖᓂ ᓇᖏᕐᐳᖅ. ᐃᓕᓐᓂᐊᕐᑎᓗ ᐊᓯᐊ ᖃᐅᔨᒪᔭᐅᔪᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ, ᐊᓂᒐᒥ ᐊᕐᓇᒥᒃ ᐃᑎᕐᑕᕐᕕᐅᑉ ᐅᒃᑯᐊᖓᓂ ᑲᒪᔨᒥᒃ ᐅᖃᖃᑎᖃᓚᐅᕐᓗᓂ, ᐲᑦᑐᕉᓯ ᐃᑎᕐᑎᑉᐹ. 17ᑕᕝᕙ ᐊᕐᓇᖅ ᐃᑎᕐᑕᕐᕕᐅᑉ ᐅᒃᑯᐊᖓᓂ ᑲᒪᔨ ᐲᑦᑐᕉᓯᒧᑦ ᐅᖃᕐᐳᖅ, “ᑖᑦᓱᒪ ᐃᓕᓐᓂᐊᕐᑎᖏᓐᓄᑦ ᐃᓚᒋᔭᐅᓐᖏᓚᑏᑦ?”
ᐲᑦᑐᕉᓯᐅᑉ ᑭᐅᕚ, “ᐃᓚᒋᔭᐅᓐᖏᓚᖓ.”
18ᓯᓚ ᓂᒡᓚᓱᓕᕐᒪᑦ, ᐱᔩᑦ ᑐᒃᓯᐊᕐᕕᒡᔪᐊᕐᒥᓗ ᖃᐅᔨᓴᕐᑏᑦ ᕿᔪᒃᓴᓂᒃ ᐃᑭᑦᓯᓚᐅᕐᐳᑦ ᐊᕙᑖᓂᓗ ᓇᖏᕐᓗᑎᒃ, ᐅᖅᑰᓯᑦᑎᕋᓱᐊᕐᐳᑦ; ᑕᕝᕙ ᐲᑦᑐᕉᓯ ᓇᖏᖃᑕᐅᓕᕆᕗᖅ, ᐃᑯᒪᔫᑉ ᓴᓂᐊᓂ ᐃᒻᒥᓂᒃ ᐅᖅᑰᓯᑦᑎᕋᓱᐊᕆᓪᓗᓂ.
ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᐱᕐᓱᕐᓂᖓ ᔩᓱᓯᒥᒃ
ᒫᑎᐅᓯ 26:59-66; ᒫᑯᓯ 14:55-64; ᓘᑲᓯ 22:66-71
19ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦᑕ ᔩᓱᓯ ᐊᐱᕐᓱᕐᐹ ᐃᓕᓐᓂᐊᕐᑎᖏᑕ ᒥᒃᓵᓄᑦ ᐊᔪᕆᕐᑐᐃᖃᑦᑕᕐᓂᖓᓂᒡᓗ. 20ᔩᓱᓯᐅᑉ ᑭᐅᕚ, “ᑍᒪᓐᖓᑦ ᐃᔨᕐᓯᒪᓇᖓ ᐃᓄᓕᒫᓄᑦ ᐅᖃᓪᓚᖃᑦᑕᓚᐅᕐᐳᖓ; ᐊᔪᕆᕐᑐᐃᖃᑦᑕᓚᐅᕐᐳᖓᓗ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᑐᒃᓯᐊᕐᕕᒡᔪᐊᒥᓗ, ᔫᑎᓕᒫᑦ ᑲᑎᕕᒋᕙᒃᑕᖏᓐᓂ; ᐃᔨᕋᕐᑐᕐᓗᖓ ᐅᖃᓪᓚᓚᐅᕐᓯᒪᓇᖓ. 21ᓱᓇᒥᒃ ᑐᑭᓯᕕᒋᔪᒪᕕᖔ? ᐃᓄᐃᑦ ᐊᐱᕐᓱᓚᐅᒃᑭᑦ ᐅᕙᓐᓂᒃ ᑐᓵᖃᕐᑕᓚᐅᕐᑐᑦ ᐅᖃᐅᓯᕆᖃᑦᑕᓚᐅᕐᑕᓐᓂᒃ; ᖃᐅᔨᒪᖕᒪᑕ ᖃᓄᖅ ᐅᖃᐅᓯᖃᖃᑦᑕᓚᐅᕐᒪᖔᕐᒪ.”
22ᔩᓱᓯ ᑍᒫᒃ ᐅᖃᕐᒪᑦ, ᖃᐅᔨᓴᕐᑏᑦ ᐃᓚᖓᑦᑕ ᐅᓗᐊᖓᒍᑦ ᐸᑎᒃᓗᓂᐅᒃ ᐅᖃᐅᑎᕚ, “ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᑍᒫᒃ ᑭᐅᒪᔭᒃᓴᕆᕕᐅᒃ?”
23ᔩᓱᓯᐅᑉ ᑭᐅᕚ, “ᓈᒻᒪᖏᑦᑐᒥᒃ ᐅᖃᕈᒪ, ᓇᓗᓁᕐᓯᔪᖃᓚᐅᕐᓕ ᖃᓄᖅ ᓱᓕᖏᒻᒪᖔᕐᒪ; ᓱᓕᒍᒪᓕ ᐅᖃᐅᓯᕆᔭᓐᓂᒃ, ᓱᖕᒪᑦ ᐸᑎᒃᐱᖔ?”
24ᑕᕝᕙ ᐋᓇᓯᐅᑉ ᐊᓂᖁᓕᕐᐹ ᕿᓚᒃᑕᐅᓯᒪᑎᓪᓗᒍ ᑬᐊᐹᓯᒧᑦ ᐋᑕᐅᖁᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ.
ᐲᑦᑐᕉᓯᐅᑉ ᓴᒡᓗᑎᖃᒃᑲᓐᓂᕐᓂᖓ ᔩᓱᓯᒥᒃ
ᒫᑎᐅᓯ 26:71-75; ᒫᑯᓯ 14:69-72; ᓘᑲᓯ 22:58-62
25ᓮᒨᓂ ᐲᑦᑐᕉᓯ ᓱᓕ ᐃᑯᐊᓚᑎᑕᐅᔫᑉ ᓴᓂᐊᓂ ᓇᖏᕐᐳᖅ ᐅᖅᑰᓯᑦᑎᕋᓱᐊᕐᓗᓂ. ᑕᕝᕙ ᐅᖃᐅᑎᕚᑦ, “ᑖᑦᓱᒪ ᐃᓕᓐᓂᐊᕐᑎᖏᑕ ᐃᓚᒋᓐᖏᓛᑏᑦ?”
ᐲᑦᑐᕉᓯ ᓱᓕᒐᓂ ᐅᖃᕐᐳᖅ, “ᐃᓚᒋᔭᐅᓐᖏᓚᖓ.”
26ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦᑕ ᐱᔨᖏᑕ ᐃᓚᖓᑦ, ᐱᕈᕐᓰᕕᖕᒥ ᐲᑦᑐᕉᓯᐅᑉ ᓯᐅᑎᖓᒍᑦ ᓇᑲᖅᑲᐅᔭᖓᑕ ᐃᓚᖓᑦ, ᐅᖃᕐᐳᖅ. “ᑕᑯᖅᑲᐅᓐᖏᓚᒌᑦ ᑖᑦᓱᒥᖓ ᐃᓚᖃᕐᑎᓪᓗᑎᑦ ᐱᕈᕐᓰᕕᖕᒥ?”
27ᑕᕝᕙ ᐲᑦᑐᕉᓯ ᓱᓕᒐᓂ ᑭᐅᒋᕗᖅ; ᑕᕝᕔᓐᓇᕐᓗ ᐊᖑᑎᕕᐊᖅ ᓂᓪᓕᕐᐳᖅ.
ᔩᓱᓯᐅᑉ ᐋᑕᐅᓂᖓ ᐰᓛᑑᓯᒧᑦ
ᒫᑎᐅᓯ 27:1-2,11-14; ᒫᑯᓯ 15:1-5; ᓘᑲᓯ 23:1-5
28ᑕᕝᕙ ᔩᓱᓯ ᑬᐊᐹᓯᐅᑉ ᐃᒡᓗᖓᓂᑦ ᐋᑕᐅᓕᕆᕗᖅ ᕉᒪᒥᐅᑦ ᐊᐅᓚᑦᓯᔨᖓᑦᑕ ᐃᒡᓗᕐᔪᐊᖓᓄᑦ. ᐅᓪᓛᒻᒪᕆᐅᓕᕐᑎᓪᓗᒍ. ᔫᑎᓪᓕ ᐊᖓᔪᖅᑳᖏᑦ ᑕᕝᕗᖓ ᐃᑎᖃᑕᐅᓐᖏᓚᑦ, ᐅᒃᐱᕐᕈᓯᕆᔭᑎᒃ ᒪᓕᓗᒋᑦ ᓴᓗᒤᓕᑎᕈᒪᖏᓐᓇᒥᒃ, ᖄᖏᕐᑕᐅᕕᒃᓯᐅᕈᑎᐅᑉ ᓇᓪᓕᐅᓐᓂᓯᐅᕐᑕᐅᓂᖓᓂᒃ ᓂᕆᔪᓐᓇᖃᑕᐅᔪᒪᒐᒥᒃ. 29ᑕᕝᕙ ᐰᓛᑑᓯᐅᑉ ᐊᓂᕕᒋᓪᓗᒋᑦ ᐅᖃᐅᑎᕔᑦ, “ᓱᓇᒥᒃ ᐸᓯᒃᓯᕈᑎᖃᕐᐱᓰ ᐊᖑᒻᒧᑦ ᐆᒧᖓ?”
30ᑖᒃᑯᐊ ᑭᐅᕗᑦ, “ᐅᓇ ᐱᐅᖏᑦᑐᓕᔨᐅᖏᑉᐸᑦ, ᐃᓕᖕᓄᐊᕈᑎᒐᔭᓐᖏᑕᕗᑦ.”
31ᐰᓛᑑᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᑎᒍᓕᕐᓯᐅᒃ ᐃᖅᑲᕐᑐᕐᓗᒍ ᓇᖕᒥᓂᖅ ᐱᖁᔭᓯ ᒪᓕᒡᓗᒋᑦ.”
ᑕᕝᕙ ᔫᑎᑦ ᐅᖃᐅᑎᕚᑦ, “ᑐᖁᑦᓯᔪᒃᓴᐅᓐᖏᓚᒍᑦ ᑭᓇᒥᒡᓘᓐᓃᑦ.” 32#ᔪᐊᓇᓯ 3:14; 12:32.ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᔩᓱᓯᐅᑉ ᐅᖃᐅᓯᕆᓚᐅᕐᑕᖏᑕ ᓇᓚᐅᑦᓯᓂᖏᑦ ᓴᖅᑭᑎᑕᐅᖁᓪᓗᒋᑦ ᖃᓄᐃᓕᐅᕐᑕᐅᓗᓂ ᑐᖁᑎᑕᐅᓛᕐᒪᖔᕐᒥ.
33ᐰᓛᑑᓯᓕ ᐃᒡᓗᕐᔪᐊᕐᒧᑦ ᐃᑎᕐᒥᒐᒥ ᔩᓱᓯ ᕾᖁᕚ, ᐅᖃᐅᑎᓪᓗᒍᓗ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
34ᔩᓱᓯᐅᑉ ᑭᐅᕚ, “ᐃᒻᒥᓂᒃ ᑍᒫᒃ ᑕᒪᑐᒥᖓ ᐅᖃᕐᐲᑦ ᐅᕝᕙᓗ ᐊᓯᖕᓂᑦ ᑕᒪᑐᒥᖓ ᐅᖃᐅᑦᔭᐅᓐᓂᕐᐱᑦ ᖃᓄᐃᑦᑑᖕᒪᖔᕐᒪ?”
35ᐰᓛᑑᓯᐅᑉ ᑭᐅᕚ, “ᔫᑎᐅᓇᓱᒋᕕᖔ? ᓇᖕᒥᓂᖅ ᐃᓅᖃᑎᖕᓄᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓄᑦ ᑎᒍᔭᐅᓪᓗᑎᑦ ᐅᕙᓐᓄᐊᕐᑕᐅᕗᑎᑦ; ᖃᓄᐃᓕᐅᓚᐅᕋᕕᑦ?”
36ᔩᓱᓯ ᑭᐅᕗᖅ, “ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᓐᖏᓚᖅ; ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᒃᐸᑦ, ᒪᓕᒃᑎᓐᓂᑦ ᐅᓇᑕᕈᑦᔭᐅᒐᔭᕐᐳᖅ, ᑎᒍᔭᐅᖁᓇᖓ ᔫᑎᑦ ᐊᖓᔪᖅᑳᖏᓐᓄᑦ; ᑍᒤᒻᒪᑦ, ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᓐᖏᓚᖅ.”
37ᑕᕝᕙ ᐰᓛᑑᓯᐅᑉ ᐊᐱᕆᕚ, “ᑕᕝᕚ ᐊᖓᔪᖅᑳᕐᔪᐊᖑᕕᑦ?”
ᔩᓱᓯᐅᑉ ᑭᐅᕚ, “ᐃᕝᕕᑦ ᐊᖓᔪᖅᑳᕐᔪᐊᖑᓂᕋᕐᐸᕐᒪ. ᑕᒪᓐᓇ ᐱᑦᔪᑎᒋᓪᓗᒍ ᐃᓅᓚᐅᕐᐳᖓ, ᓯᓚᕐᔪᐊᕐᒧᓪᓗ ᑎᑭᓪᓗᖓ, ᓱᓕᔪᒥᒃ ᓇᓗᓁᕐᓯᔭᕐᑐᕐᓗᖓ. ᓱᓕᔪᒦᑦᑐᓕᒫᑦ ᑐᓴᕐᐹᖓ.”
38aᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᓱᓇᐅᕚ ᓱᓕᔪᖅ?”
ᔩᓱᓯᐅᑉ ᑐᖁᑕᒃᓴᕈᕐᑎᑕᐅᓂᖓ
ᒫᑎᐅᓯ 27:15-31; ᒫᑯᓯ 15:6-20; ᓘᑲᓯ 23:13-25
38bᐰᓛᑑᓯ ᑍᒫᒃ ᐅᖃᕇᕋᒥ, ᐊᓂᓪᓗᓂ ᔫᑎᓄᑦ ᐅᖃᕐᐳᖅ, “ᓱᒋᐊᕐᑕᐅᑦᔪᑎᒃᓴᖓᓂᒃ ᑖᑦᓱᒪ ᓇᓂᓯᓐᖏᓚᖓ. 39ᐱᐅᓯᓯᓕ ᒪᓕᒡᓗᒋᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐱᔪᒪᔭᑦᓯᓐᓂᒃ ᐊᑕᐅᓯᕐᒥᒃ ᐊᓂᑎᑦᓯᓲᖑᕗᖓ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᓕᕌᖓᑦᓯ; ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᐊᓂᑎᑦᓯᖁᕕᓯᓐᖔ?”
40ᑕᕝᕙ ᕾᒐᓛᓕᕐᐳᑦ, “ᑖᑦᓱᒥᖓᐅᖏᑦᑐᖅ, ᐸᕋᐹᓯᒥᒡᓕ!”
(ᐸᕋᐹᓯᓕ ᐱᕋᔭᐅᕗᖅ.)
Dewis Presennol:
ᔪᐊᓇᓯᐅᑉ ᐊᒡᓚᖏᑦ 18: EAIB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible © Canadian Bible Society, 2012, 2021-2023.