ᔪᐊᓇᓯᐅᑉ ᐊᒡᓚᖏᑦ 16
16
1“ᑕᒪᒃᑯᓂᖓ ᐅᖃᐅᑎᕙᑦᓯ ᐹᓪᓚᖁᓇᓯ. 2ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂᑦ ᐊᓂᑎᑕᐅᔪᒫᕐᐳᓯ; ᓇᓪᓕᐅᑎᔪᒫᕐᐳᖅ ᓇᓪᓕᐊᑦ ᐃᓕᑦᓯᓐᓂᒃ ᑐᖁᑦᓯᓗᑎᒃ ᒎᑎᒥᒃ ᐱᔨᑦᓯᕋᓱᒋᔪᒫᕐᓂᖓᑦ. 3ᑍᒤᓕᐅᕐᕕᐅᔪᒫᕐᐳᓯ ᐊᑖᑕᒐᓗ ᐅᕙᒍᒃ ᖃᐅᔨᒪᖏᓐᓇᒥᑎᒃᑯᒃ. 4aᑕᒪᒃᑯᓂᖓᓕ ᐅᖃᐅᑎᓚᐅᕐᐸᑦᓯ, ᑕᒪᓐᓇ ᐱᕕᒃᓴᖓᑦ ᓇᓪᓕᐅᑎᒃᐸᑦ ᐃᖅᑬᓕᖁᓪᓗᓯ ᑖᒃᑯᓂᖓ ᐅᖃᐅᓯᖃᓚᐅᕐᓂᓐᓂᒃ ᐃᓕᑦᓯᓐᓄᑦ.”
ᐊᓂᕐᓂᐅᑉ ᐃᑦᔪᕐᓁᑦᑑᑉ ᐱᓇᓱᐊᕐᓂᖓ
4b“ᑕᒪᒃᑯᓂᖓ ᐱᒋᐊᕐᓂᖓᓂᑦ ᐅᖃᐅᑎᓚᐅᓐᖏᓚᑦᓯ, ᓇᔪᓚᐅᕋᑦᓯ. 5ᒫᓐᓇᓕ ᑎᓕᔨᓐᓄᑦ ᐂᓂᐊᕐᐳᖓ; ᐊᐱᕆᔪᖃᓐᖏᓚᓯᓕ ᓇᒧᖓᕐᓂᐊᕐᒪᖔᕐᒪ. 6ᑕᒪᒃᑯᓂᖓᓕ ᐅᖃᐅᑎᒐᑦᓯ, ᐆᒻᒪᑎᑦᓯᒍᑦ ᕿᒃᓵᓕᕐᐳᓯ. 7ᓱᓕᔪᒥᒃ ᐅᖃᐅᑎᕙᑦᓯ: ᐃᓕᑦᓯᓐᓄᑦ ᐱᕙᓪᓕᕐᓇᕐᓂᕐᓴᐅᕗᖅ ᐊᐅᓪᓚᕈᒪ, ᐊᐅᓪᓚᖏᒃᑯᒪ, ᐃᑲᔪᕐᑎᐅᑉ ᑎᑭᓐᓂᐊᖏᒻᒪᓯ; ᐊᐅᓪᓚᕈᒪᓕ, ᐃᓕᑦᓯᓐᓄᑦ ᑎᓕᓛᕐᐸᕋ. 8ᑎᑭᒍᓂᓗ, ᓯᓚᕐᔪᐊᕐᒥᐅᑦ ᑐᑭᓯᑎᓛᕐᐰᑦ ᐊᔪᕐᓂᕐᒥᒃ ᓇᓛᒎᕐᓂᕐᒥᒡᓗ ᐃᖅᑲᕐᑐᕐᑕᐅᓂᕐᒥᒡᓗ. 9ᐊᔪᕐᓂᖅ ᐱᑦᔪᑎᒋᓪᓗᒍ, ᐅᕙᓐᓄᑦ ᐅᒃᐱᖏᒻᒪᑕ; 10ᓇᓛᒎᕐᓂᖅ ᐱᑦᔪᑎᒋᓪᓗᒍ, ᐊᑖᑕᒧᐊᕐᓂᐊᕐᐳᖓ, ᑕᑯᓂᐊᕈᓐᓃᕐᐸᑦᓯᓐᖓᓗ; 11ᐃᖅᑲᕐᑐᐃᓂᖅ ᐱᑦᔪᑎᒋᓪᓗᒍ, ᓯᓚᕐᔪᐊᑉ ᒪᑐᒪ ᐊᐅᓚᑦᓯᔨᖓ ᐃᖅᑲᕐᑐᕐᑕᐅᖕᒪᑦ.
12“ᓱᓕ ᐊᒥᓱᓂᒃ ᐅᖃᐅᓯᒃᓴᖃᕋᓗᐊᕐᐳᖓ ᐃᓕᑦᓯᓐᓄᑦ, ᒫᓐᓇᓕ ᑐᓴᕈᑦᓯᐅᒃ ᓇᓗᓇᓗᐊᕐᐳᑦ ᐃᓕᑦᓯᓐᓄᑦ. 13ᓱᓕᔫᓪᓕ ᐊᓂᕐᓂᖓ ᑎᑭᒃᑯᓂ, ᓱᓕᓂᕐᓄᑦ ᑕᒤᓐᓄᑦ ᑕᓯᐅᓛᕐᐹᓯ; ᓇᖕᒥᓂᖅ ᐱᔪᓐᓇᕐᓂᓂ ᒪᓕᒡᓗᒍ ᐅᖃᓪᓚᓛᖏᒻᒪᑦ, ᑐᓴᕐᑕᒥᓂᒡᓕ ᐅᖃᐅᑦᔨᔪᒫᕐᐳᖅ, ᓇᓪᓕᐅᑎᔪᒫᕐᑐᓂᒡᓗ ᐅᖃᐅᑎᔪᒫᕐᐹᓯ. 14ᑖᑦᓱᒪ ᓂᕐᑐᕐᓇᕐᑎᑦᑐᒫᕐᐹᖓ, ᑖᓐᓇ ᐅᖃᐅᓯᓐᓂᒃ ᐅᖃᐅᓯᖃᕐᓂᐊᕐᒪᑦ ᐃᓕᑦᓯᓐᓄᑦ. 15ᐊᑖᑕᒪ ᐱᖏᑦ ᐱᒋᕙᒃᑲ; ᑍᒤᒻᒪᑦ ᐅᖃᕐᐳᖓ ᑖᓐᓇ ᐅᖃᐅᓯᓐᓂᒃ ᐅᖃᐅᓯᖃᕈᒫᕐᐳᖅ ᐃᓕᑦᓯᓐᓄᑦ.”
ᕿᒃᓵᒃᑎᑕᐅᓂᖅ ᖁᕕᐊᓱᒃᑎᑕᐅᓂᕐᓗ
16“ᐊᑯᓂᐅᖏᑦᑐᖅ ᑕᑯᖃᑦᑕᕐᓂᐊᕈᓐᓃᕐᐸᑦᓯᓐᖓ; ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ.”
17ᑕᕝᕙ ᐃᓕᓐᓂᐊᕐᑎᖏᑕ ᐃᓚᖏᑦ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᖃᓄᕐᖑᓇ ᑐᑭᓕᖕᓂᒃ ᐅᖃᓪᓚᓕᕐᑐᖅ, ᐅᖃᐅᑎᖕᒪᑎᒍᑦ, ‘ᐊᑯᓂᐅᖏᑦᑐᖅ ᑕᑯᖃᑦᑕᕐᓂᐊᕈᓐᓃᕐᐸᑦᓯᓐᖓ ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ’; ᐅᖃᕆᓪᓗᓂᓗ, ‘ᐊᑖᑕᒧᑦ ᐂᓂᐊᕋᒪ.’ 18ᖃᓄᕐᖑᓈ ᑐᑭᓕᒃ ‘ᐊᑯᓂᐅᖏᑦᑐᖅ’? ᖃᓄᖅ ᐅᖃᕋᓱᐊᕐᒪᖔᑦ ᑐᑭᓯᓐᖏᓚᕗᑦ.”
19ᔩᓱᓯᐅᓪᓕ ᖃᐅᔨᒪᒐᒥᒋᑦ ᐊᐱᕐᓱᕈᒪᓂᖏᑦ; ᐅᖃᐅᑎᕔᑦ, “ᐅᖃᕋᒪ, ‘ᐊᑯᓂᐅᖏᑦᑐᖅ ᑕᑯᖃᑦᑕᕐᓂᐊᕈᓐᓃᕐᐸᑦᓯᓐᖓ, ᐊᑯᓂᐅᖏᑦᑐᕐᓗ ᑕᑯᓂᐊᕆᕙᑦᓯᓐᖓ’ ᑕᒪᓐᓇ ᑕᕝᕙ ᐃᓕᑦᓯᓐᓄᑦ ᐊᐱᕐᓲᑎᒋᔭᓰ? 20ᓱᓕᔪᒥᒃ ᐅᖃᐅᑎᕙᑦᓯ, ᕿᐊᓗᓯᓗ ᐅᒡᒍᐊᓛᕐᐳᓯ, ᓯᓚᕐᔪᐊᕐᒥᐅᓪᓕ ᖁᕕᐊᓱᓛᕐᐳᑦ; ᐃᓕᑦᓯᓕ ᕿᒃᓵᒍᒫᕐᐳᓯ, ᕿᒃᓵᖕᓂᓯᓕ ᖁᕕᐊᓱᓂᖑᕐᑎᑕᐅᓛᕆᕗᖅ. 21ᐊᕐᓇᖅ ᓄᑕᕋᕐᑖᕋᓱᒃᑯᓂ ᕿᒃᓵᓕᕐᐳᖅ, ᓇᓪᓕᐅᓐᓂᖓ ᓇᓪᓕᐅᑎᖕᒪᑦ; ᓄᑕᕋᑯᓗᒡᓕ ᐃᕐᓂᐊᕆᔭᕇᕈᓂᐅᒃ, ᐃᓗᖏᕐᓱᕐᓂᕆᖅᑲᐅᔭᓂ ᐳᐃᒍᕐᐹ, ᖁᕕᐊᓱᓕᕐᐳᖅ ᓄᑕᕋᑯᓗᒃ ᐃᕐᓂᐊᖑᖕᒪᑦ ᓯᓚᕐᔪᐊᕐᒧᑦ. 22ᑍᒤᓐᓂᕗᓯᑦᑕᐅᖅ ᒫᓐᓇ ᕿᒃᓵᒃᐳᓯ, ᑕᑯᓛᕆᕙᑦᓯᓕ ᐆᒻᒪᑎᑦᓯᒍᑦ ᖁᕕᐊᓱᒻᒪᕆᓕᓛᕐᐳᓯ, ᖁᕕᐊᓱᖕᓂᕆᔭᓯᓗ ᑭᓇᒧᓪᓘᓐᓃᑦ ᐲᕐᑕᐅᓂᐊᓐᖏᓚᖅ ᐃᓕᑦᓯᓐᓂᑦ.
23“ᐅᓪᓗᖅ ᓇᓪᓕᐅᑎᒃᐸᑦ ᐅᕙᓐᓂᒃ ᐊᐱᕐᓲᕈᓐᓃᕈᒫᕐᐳᓯ. ᓱᓕᔪᒥᒃ ᐅᖃᐅᑎᕙᑦᓯ, ᐊᑖᑕ ᑐᒃᓯᐊᕐᕕᒋᒍᑦᓯᐅᒃ ᓱᓇᑐᐃᓐᓇᕐᒥᒃ, ᑖᑦᓱᒪ ᑐᓂᓯᕕᒋᓂᐊᕐᐹᓯ ᐊᑎᓐᓂ. 24ᒫᓐᓇᒧᑦ ᑎᑭᓪᓗᒍ ᑐᒃᓯᐊᓚᐅᓐᖏᓚᓯ ᓱᓇᑐᐃᓐᓇᕐᒥᒃ ᐊᑎᓐᓂ; ᑐᒃᓯᐊᕆᑦᓯ, ᑐᓂᓯᕕᐅᓂᐊᕐᐳᓯ ᑕᕝᕙ, ᖁᕕᐊᓱᖕᓂᓯ ᓈᒻᒪᒃᓯᑦᓯᐊᖁᓪᓗᒍ.”
ᓯᓚᕐᔪᐊᕐᒥᒃ ᓵᓚᖃᕐᓂᖅ
25“ᐊᑦᔨᐅᔪᓂᒃ ᐊᑐᕐᓗᖓ ᑕᒪᒃᑯᓂᖓ ᐅᖃᐅᑎᖃᑦᑕᓚᐅᕐᐸᑦᓯ; ᓇᓪᓕᐅᑎᔪᒫᕐᐳᕐᓕ ᐊᑦᔨᐅᔪᓂᒃ ᐊᑐᕐᓗᖓ ᐃᓕᑦᓯᓐᓄᑦ ᐅᖃᖃᑦᑕᕈᓐᓃᕐᕕᒃᓴᕋ ᑐᑭᓯᓇᑦᓯᐊᕐᑐᓂᒡᓕ ᐅᖃᕐᕕᒋᖃᑦᑕᓛᕐᐸᑦᓯ ᐊᑖᑕᒥᒃ. 26ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᑐᒃᓯᐊᕈᒫᕐᐳᓯ ᐊᑎᓐᓂ; ᐅᖃᓐᖏᓚᖓᓕ ᐊᑖᑕ ᑐᒃᓯᐊᕐᕕᒋᔪᒪᓂᕋᕐᓗᒍ ᐱᑦᔪᑎᒋᓗᓯ; 27ᐊᑖᑕᐅᑉ ᓇᖕᒥᓂᖅ ᓇᒡᓕᒋᖕᒪᓯ, ᓇᒡᓕᒋᒐᑦᓯᓐᖓ ᐅᒃᐱᕐᓗᓯᓗ ᒎᑎᒥᑦ ᐱᓚᐅᕋᒪ. 28ᐊᑖᑕᒥᑦ ᐱᓯᒪᕗᖓ ᓯᓚᕐᔪᐊᕐᒧᐊᕐᓗᖓᓗ; ᒫᓐᓇᓕ ᓯᓚᕐᔪᐊᖅ ᕿᒪᖕᓂᐊᕐᐸᕋ ᐊᑖᑕᒧᑦ ᐂᓗᖓ.”
29ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᒫᓐᓇ ᑐᑭᓯᓇᑦᓯᐊᕐᑐᓂᒃ ᐅᖃᐅᓯᖃᓕᕐᐳᑎᑦ, ᐊᑦᔨᐅᔪᓂᒡᓗ ᐅᖃᐅᓯᖃᕐᓇᒃ. 30ᒫᓐᓇ ᑐᑭᓯᕗᒍᑦ ᓱᓇᓕᒫᑦ ᖃᐅᔨᒪᒐᕕᒋᑦ, ᐊᐱᕆᔭᐅᔭᕆᐊᖃᓐᖏᓚᑎᓪᓗ; ᑕᒪᓐᓇ ᐱᑦᔪᑎᒋᓪᓗᒍ ᐅᒃᐱᕈᓱᒃᐳᒍᑦ ᒎᑎᒥᑦ ᐱᓯᒪᓂᕐᓂᒃ.”
31ᔩᓱᓯᐅᑉ ᑭᐅᕔᑦ, “ᒫᓐᓈ ᐅᒃᐱᓕᕐᐱᓰ? 32ᓇᓪᓕᐅᑦᑐᒃᓴᖅ ᓇᓪᓕᐅᑎᔪᒫᕐᐳᖅ, ᒫᓐᓇᓗ ᐊᑐᓕᕐᐸᕗᑦ, ᓇᒧᑐᐃᓐᓇᖅ ᓯᐊᒻᒪᕐᑎᑕᐅᕕᒃᓴᓯ, ᐊᑐᓂᑦ ᐊᖏᕐᕋᑦᓯᓐᓄᐊᕐᓗᓯ, ᐅᕙᖓᓗ ᐃᓄᑑᑎᓪᓗᖓ ᕿᒪᒃᑕᐅᓛᕐᐳᖓ; ᑭᓯᐊᓂᓕ ᐃᓄᑑᓐᖏᓚᖓ, ᐊᑖᑕᐅᑉ ᓇᔪᕐᒪᖓ. 33ᑕᒪᒃᑯᓂᖓ ᐅᖃᐅᑎᓚᐅᕐᐸᑦᓯ, ᐅᕙᓐᓃᓪᓗᓯ ᐃᓱᒪᔮᖁᓇᓯ. ᓯᓚᕐᔪᐊᕐᒥ ᐅᖁᒤᒃᓴᕐᓇᕐᑐᒦᑉᐳᓯ; ᓯᕘᕋᓇᓯᓕ, ᓯᓚᕐᔪᐊᖅ ᓵᓚᒋᓯᒪᒐᒃᑯ.”
Dewis Presennol:
ᔪᐊᓇᓯᐅᑉ ᐊᒡᓚᖏᑦ 16: EAIB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible © Canadian Bible Society, 2012, 2021-2023.