ᒨᓯᓯ ᓯᕗᓪᓖᑦ 3
3
ᐃᓅᑉ ᓈᓚᖏᓐᓂᖓ ᒎᑎᒥᒃ
1 #
ᑕᑯᑎ 12:9; 20:2. ᖁᒡᓗᒋᐊᕐᓕ ᓯᓔᕐᕆᒃᓯᒃᑲᐅᓂᕐᐸᐅᓚᐅᕐᐳᖅ ᐆᒪᔪᓕᒫᓂᑦ ᓄᔪᐊᕐᑐᓂᑦ ᐊᑕᓂᐅᑉ ᒎᑎᐅᑉ ᐱᓐᖑᕐᑎᓯᒪᔭᖏᓐᓂᑦ. ᖁᒡᓗᒋᐊᓪᓗ ᐊᕐᓇᖅ ᐊᐱᕆᕚ, “ᒎᑎ ᐅᖃᓚᐅᕐᐹ, ᓇᐹᕐᑐᓂᑦ ᓇᓪᓕᐊᓐᓂᑐᐃᓐᓇᖅ ᓂᕆᔪᒃᓴᐅᓐᖏᓚᓯᒃ ᐱᕈᕐᓰᕕᖕᒦᑦᑐᓂᒃ?”
2ᐊᕐᓇᐅᑉ ᑭᐅᕚ, “ᓇᐹᕐᑐᑦ ᐸᐅᕐᖓᖏᓐᓂᒃ ᓂᕆᔪᓐᓇᕐᑐᒍᑦ ᐱᕈᕐᓰᕕᖕᒦᑦᑐᓂᒃ; 3ᒎᑎᓕ ᐅᖃᓚᐅᕐᐳᖅ, ‘ᓇᐹᕐᑑᑉ ᐸᐅᕐᖓᖏᓐᓂᒃ ᐱᕈᕐᓰᕕᐅᑉ ᕿᑎᖓᓃᑦᑐᒥᒃ ᓂᕆᔪᒃᓴᐅᓐᖏᓚᓯᒃ, ᐊᒃᑐᕐᓂᐊᕐᓇᒍᓘᓐᓃᑦ, ᑐᖁᖁᓇᓯᒃ.’”
4ᖁᒡᓗᒋᐊᕐᓕ ᐊᕐᓇᒧᑦ ᐅᖃᕐᐳᖅ, “ᑐᖁᓂᐊᓐᖏᓚᓯᒃ. 5ᒎᑎ ᖃᐅᔨᒪᖕᒪᑦ ᑕᕝᕙᓐᖓᑦ ᓂᕆᒍᑦᓯᒃ ᐃᔨᓯᒃ ᐅᐃᓐᓂᐊᕐᒪᑎᒃ, ᒎᑎᑐᑦ ᑍᒤᓕᕐᓗᓯᒃ, ᖃᐅᔨᒪᓕᕐᓗᓯᒃ ᐱᐅᔪᒥᒃ ᐱᐅᖏᑦᑐᒥᒡᓗ.”
6ᐊᕐᓇᐅᓪᓗ ᐅᑦᔨᕆᑦᓯᐊᓕᕐᐹ ᓇᐹᕐᑑᑉ ᐸᐅᕐᖓᖏᑕ ᓂᕆᔪᒥᓇᕐᓂᖏᑦ, ᑕᑯᒥᓇᕐᓂᖓᓗ, ᓯᓚᑐᓂᕐᑖᕈᒪᓐᓇᕐᓗᓂᓗ, ᑕᕝᕙ ᐸᐅᕐᖓᖏᑕ ᐃᓚᖓᓐᓂᒃ ᑎᒍᓯᓪᓗᓂ ᓂᕆᕗᖅ; ᐅᐃᒥᓄᓪᓗ ᐃᓚᖓ ᑐᓂᓪᓗᒍ, ᑖᑦᓱᒪᓗ ᓂᕆᒋᕚ. 7ᑕᕝᕙ ᐃᔨᖏᒃ ᐅᐃᑎᑕᐅᓕᕐᐴᒃ, ᖃᐅᔨᓕᕐᓗᑎᒡᓗ ᐊᓐᓄᕌᖃᖏᓐᓂᕐᒥᖕᓂᒃ; ᐱᒋᓖᓪᓗ ᐅᖃᐅᔭᖏᓐᓂᒃ ᒥᕐᓱᕐᓗᑎᒃ ᓵᓕᓴᓕᐅᕐᐴᒃ.
8ᐊᑕᓂᐅᓪᓗ ᒎᑎᐅᑉ ᕿᑭᕐᕋᖓ ᐱᕈᕐᓰᕕᒃᑯᑦ ᐱᓱᒃᑐᖅ ᑐᓴᕋᒥᒃᑯᒃ ᐅᓪᓗᖅ ᐅᖅᑰᓗᐊᕈᓐᓃᕐᑎᓪᓗᒍ, ᑖᒃᑯᐊᒃ ᓄᓕᐊᕇᒃ ᐃᔨᕐᐴᒃ ᐊᑕᓂᐅᑉ ᒎᑎᐅᑉ ᓇᔪᕐᓂᖓᓂᑦ, ᐱᕈᕐᓰᕕᖕᒥ ᓇᐹᕐᑐᐃᑦ ᐊᑯᕐᖓᓐᓄᑦ. 9ᐊᑕᓂᐅᓪᓕ ᒎᑎᐅᑉ ᐊᖑᑦ ᓂᓪᓕᐅᑎᕚ, ᐅᖃᕐᓗᓂ, “ᓇᓃᑉᐲᑦ?”
10ᐊᖑᓪᓗ ᑭᐅᕗᖅ, “ᑐᓴᕋᒪ ᐱᕈᕐᓰᕕᖕᒦᓐᓂᕐᓂᒃ, ᑲᑉᐱᐊᓱᒧᑦ ᐊᓐᓄᕌᖃᖏᓐᓂᓐᓂᒃ; ᐃᔨᕐᓯᒪᕗᖓ.”
11ᑖᑦᓱᒪ ᐊᐱᕆᕚ, “ᑭᐊ ᐊᓐᓅᕋᖃᖏᓐᓂᕋᕐᓗᑎᑦ ᐅᖃᐅᑎᖕᒪᑎᑦ, ᓂᕆᓚᐅᕋᕖᑦ ᓇᐹᕐᑐᒥᑦ ᓂᕆᖁᓇᒃ ᐃᓂᕐᑎᕈᑎᒋᓚᐅᕐᑕᓐᓂᒃ?”
12ᐊᖑᓪᓗ ᐅᖃᕐᐳᖅ, “ᐊᕐᓇᐅᑉ ᐂᑉᐸᕐᑖᕆᑎᓚᐅᕐᑕᕕᑦ ᐂᑦᑐᕐᒪᖓ ᓇᐹᕐᑑᑉ ᐸᐅᕐᖓᖓᓂᒃ, ᓂᕆᓚᐅᕐᐳᖓ.”
13 #
2 ᑯᕆᓐᑎ 11:3; 1 ᑎᒧᑎ 2:14. ᐊᑕᓂᐅᓪᓗ ᒎᑎᐅᑉ ᐊᕐᓇᖅ ᐊᐱᕆᕚ, “ᓱᖕᒪᑦ ᑍᒤᓕᐅᓚᐅᕐᐲᑦ?”
ᐊᕐᓇ ᐅᖃᕐᐳᖅ, “ᖁᒡᓗᒋᐊᑉ ᓯᓔᕐᕆᖕᒪᖓ, ᓂᕆᓚᐅᕐᐳᖓ.”
ᒎᑎᐅᑉ ᓇᓗᓁᕐᓯᓂᖓ ᓱᒋᐊᕐᓯᓂᕐᒥᓂᒃ
14ᐊᑕᓂᕐᓗ ᒎᑎ ᐅᖃᕐᐳᖅ ᖁᒡᓗᒋᐊᒧᑦ, “ᑍᒤᑎᑦᓯᓂᕐᓄᑦ, ᓇᕐᕈᓇᕐᓂᕐᐹᖑᓕᕐᐳᑎᑦ ᓂᕐᔪᑎᓕᒫᓂᑦ ᓄᔪᐃᑦᑐᓂᑦ ᓄᔪᐊᕐᑐᓂᓪᓗ; ᓈᕐᓄᑦ ᐹᕐᖑᕐᐸᖕᓂᐊᓕᕐᐳᑎᑦ, ᐃᑦᔪᕐᒥᒡᓗ ᓂᕿᖃᕐᓂᐊᓕᕐᓗᑎᑦ ᐃᓅᓂᓕᒫᕐᓂ. 15#ᑕᑯᑎ 12:17.ᐊᕐᓇᕐᓗ ᐊᑭᕋᕇᒃᑎᓐᓂᐊᓕᕐᐸᑦᓯᒃ, ᑭᖑᕚᑎᓪᓗ ᑭᖑᕚᖏᓪᓗ ᐊᑭᕋᕇᒃᓗᑎᒃ; ᑖᑦᓱᒪ ᑭᖑᕚᖓᑕ ᓂᐊᖁᐃᑦ ᑎᒡᓘᔭᕐᑎᑦᓱᒫᕐᐹ, ᐃᕝᕕᓪᓕ ᑭᖑᕚᖓ ᑭᖕᒥᖓᒍᑦ ᑎᒡᓘᔭᕐᑎᑦᓱᒫᕐᐸᑦ.”
16ᐊᕐᓇᒧᓪᓗ ᐅᖃᕐᐳᖅ, “ᐋᓐᓂᐊᕐᔪᐊᖃᑦᑕᕈᒫᓕᕐᐳᑎᑦ ᐃᕐᓂᓱᓕᕌᖓᕕᑦ; ᐋᓐᓂᐊᕐᓗᑎᑦ ᕿᑐᕐᖓᕐᑖᖃᑦᑕᕈᒫᓕᕐᐳᑎᑦ, ᑍᒤᒃᑲᓗᐊᕐᑎᓪᓗᒍ ᐅᐃᖕᓄᑦ ᐱᔪᒪᓂᕾᓐᓇᕐᓂᐊᕐᐳᑎᑦ, ᐅᐃᓪᓗ ᐊᖓᔪᖅᑳᖑᓂᐊᕐᐳᖅ ᐃᓕᖕᓄᑦ.”
17 #
ᐄᑉᕈᐃᓄᑦ 6:8. ᐊᖑᒻᒧᓪᓗ ᐅᖃᕆᕗᖅ, “ᓄᓕᐊᕐᓂᒃ ᓈᓚᓚᐅᕋᕕᑦ, ᓇᐹᕐᑐᒥᓪᓗ ᓂᕆᓪᓗᑎᑦ ᐃᓂᕐᑎᕈᑎᒋᓚᐅᕐᑕᓐᓂᒃ ᐃᒫᒃ, ‘ᑖᓐᓇ ᓂᕆᕕᒋᑦᑍᓕᓯᐅᒃ,’ ᓄᓇᑦᑕᐅᖅ ᓇᕐᕈᓇᕐᓯᑎᑕᐅᓂᐊᓕᕐᐳᖅ ᐱᑦᔪᑎᒋᓪᓗᑎᑦ; ᐊᒃᓱᕈᕐᓗᑎᑦ ᓂᕿᒃᓴᕐᓯᐅᕐᐸᖕᓂᐊᓕᕐᐳᑎᑦ ᓄᓇᒥ ᐃᓅᓯᓕᒫᕐᓂ. 18ᑲᑭᓪᓚᕐᓇᕐᑐᑦ ᐅᕐᐱᒊᑦ ᐊᓯᖏᓪᓗ ᑲᑭᓪᓚᕐᓇᕐᑐᑦ ᓄᓇᖕᓂ ᐱᕈᖃᑦᑕᕈᒫᓕᕐᐳᑦ; ᓇᑎᕐᓇᒥᑦ ᐱᕈᕐᑐᓂᒃ ᓂᕿᖃᕐᐸᖕᓂᐊᓕᕐᐳᑎᑦ. 19ᐊᐅᒃᑲᕐᓂᖓᕙᖕᓂᐊᓕᕐᐳᑎᑦ ᓂᕿᒃᓴᒥᒃ ᐱᓇᓱᐊᕐᓗᑎᑦ ᐅᑎᓚᐅᖏᓐᓂᕐᓂ ᓄᓇᒧᑦ, ᑕᒫᓐᖓᑦ ᓴᓇᔭᐅᕕᒋᓚᐅᕐᑕᕐᓄᑦ; ᐃᑦᔪᒥᑦ ᐱᓯᒪᒐᕕᑦ ᐃᑦᔪᒧᑦᑕᐅᖅ ᐅᑎᕈᒫᕆᕗᑎᑦ.”
20ᐊᖑᑎᐅᓪᓗ ᓄᓕᐊᓂ ᐊᑦᓯᕐᐹ ᐄᕕᒥᒃ; ᐊᓈᓇᒋᔭᐅᓕᕐᒪᑦ ᐃᓅᔪᓕᒫᓄᑦ. 21ᐊᑕᓂᐅᓪᓗ ᒎᑎᐅᑉ ᐊᑕᒥᒃᑯᒃ ᓄᓕᐊᕇᒃ ᐊᓐᓄᕌᓕᐅᕐᐹᒃ ᐆᒪᔫᑉ ᐊᒥᕕᓂᖏᓐᓂᒃ ᐊᓐᓄᕌᕐᑎᓪᓗᒋᒡᓗ ᑖᒃᑯᓂᖓ.
ᐋᑕᒥᐅᓪᓗ ᐄᕕᐅᓪᓗ ᐱᕈᕐᓰᕕᖕᒥᑦ ᐊᐅᓪᓚᕐᑎᑕᐅᓂᖓᒃ
22 #
ᑕᑯᑎ 22:14. ᐊᑕᓂᕐᓗ ᒎᑎ ᐅᖃᕐᐳᖅ, “ᑕᑯᒋᑦ, ᐊᖑᒃ ᐅᕙᑦᑎᑐᑦ ᑍᒤᓕᕐᒪᑦ, ᖃᐅᔨᒪᓕᕐᓗᓂᓗ ᐱᐅᔪᒥᒃ ᐱᐅᖏᑦᑐᒥᒡᓗ; ᑎᒍᓯᑐᐃᓐᓇᕆᐊᖃᓕᕐᒪᑦ ᓇᐹᕐᑑᑉ ᐃᓅᓯᖃᕐᓇᕐᑑᑉ ᐸᐅᕐᖓᖓᓂᒃ ᓂᕆᓗᒍᓗ, ᐃᓅᓕᕐᓗᓂᓗ ᐃᓱᖃᖏᑦᑐᒧᑦ.” 23ᑍᒤᒻᒪᑦ ᐊᑕᓂᐅᑉ ᒎᑎᐅᑉ ᐱᕈᕐᓰᕕᖕᒥᑦ ᐄᑕᓂᒥᒃ ᐊᐅᓪᓚᕐᑎᑉᐹᒃ, ᓄᓇᒥᑦ ᓂᕿᒃᓴᓂᒃ ᐱᕈᕐᓰᖁᓪᓗᒍ ᐱᓐᖑᕐᑎᑕᐅᕕᒋᓚᐅᕐᑕᒥᓂᑦ. 24ᐊᖑᓪᓗ ᐊᓂᑎᑉᐹ ᑕᕝᕙᓐᖓᑦ; ᐂᖏᓕᓗ ᓯᕈᐱᒻ ᑕᕝᕗᓐᖓᕐᑎᑉᐹ ᐱᕈᕐᓰᕕᐅᑉ ᐄᑕᓂᐅᑉ ᖃᐅᓕᕐᕕᐊᑕ ᓇᓛᓄᑦ, ᓴᕕᒡᔪᐊᕐᒥᒡᓗ ᐃᑯᐊᓚᔪᒥᒃ ᓇᒧᑐᐃᓐᓇᖅ ᓵᖃᑦᑕᕐᑐᒥᒃ ᑕᕝᕗᓐᖓᕐᓯᒋᓪᓗᓂ, ᐊᖅᑯᑦ ᓴᐳᒻᒥᓪᓗᒍ ᓇᐹᕐᑐᒧᐊᖓᔪᖅ ᐃᓅᓯᖃᕐᓇᕐᑐᒧᑦ ᐃᓱᖃᖏᑦᑐᒧᑦ.
Dewis Presennol:
ᒨᓯᓯ ᓯᕗᓪᓖᑦ 3: EAIB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible © Canadian Bible Society, 2012, 2021-2023.