Luke 15
15
1တနေ့မောင် အခွမ်ကွောဂ်ဆူမျောနောင့် အပှဂ်ဒုစရောဂ်ဆမောအပွေါင်းတွို့ဟော် ကွိုယ်တော်ယေရှုယယ့် တရောတိုမျောကွို ကျောနော်ဖွို့ ဆူ့နောင်းကွို ကောဂ်လော်ကျော့ရယ်။ 2အယ်းအခေါ် ဖာရိရှဲမျောနောင့်ကျောင်းတတ်ဆရော်မျောခေါ့ “ဟော်လူဟော် အပှဂ်ဒုစရောဂ်ဆမောမျောနောင့်မိင့်ဆွေဖွနေယုန်မကော့ ဆူတွို့နောင့်အတူတူစောဆွောဂ်နေကျော့ဆီးရယ်” လွို့ပှဂ်တန်ဝီဖန်ကျော့လေရယ်။ 3အယ်းအခေါ် ကွိုယ်တော်ခေါ့ ဆူတွို့ကွို ပုန်ဥဖမော်တခုနောင့် မိင့်တိုမူတော်ခေါ့ 4“နန်တွို့မောင် သိုးအကွောင်တရော်ဆိပွီး အယ်းသိုးအုတ်ထားခေါ့ တကွောင်ပျွောဂ်ဆိုးယန် နန်ဟော် သိုးကွိုးဆာ့ကွိုးကွောင်ကွို ကှစောယော်နေယော်မောင်ခှင်ထောပွီး ပျွောဂ်နေရယ့်သိုးတကွောင်ကွို မတွိမခှန်း လောဂ်ချော်ကျော့မောင် မဟွိလော။ 5ပှန်တွိရယ့်အခေါ်မောင်လယ်း အယ်းသိုးကွို ပခုန်းပိုမောင် ထောင်းပွီး ဝုန်းမွှောဂ်ဝုန်းဆော်နောင့် အိင်ကွိုပှန်လော်ပွီ 6အိင်နီးနောခှန်းရယ်ကွိုခိုပွီး ‘ငေါ့ယယ့် ပျွောဂ်နေရယ့်သိုးကွို ပှန်ချော်တွိပီဖှဂ်လွို့ ငေါ်နောင့်အတူတူ ဝုန်းဆော်ကျော့ပေါ်’ လွို့ ဟိုးမယ်။ 7အယ်းလွိုပယ်း နန်တွို့ကွို ငေါ် ဆွိုမောင်ကော ကွိုယ့်ကွိုကွိုဖွှောင့်မတ်မင်ကန်ရယ့် လူကွိုးဆာ့ကွိုးယွောဂ်ထဂ် ဖရောဆန်ဖဂ်ကွို ပှန်ခှယ့်လော်ရယ့် အပှဂ်ဒုစရောဂ်မျောပှုခှန်းခေါ့နေ နွောင်တော့ယော့ရယ့်လူတယွောဂ်အတွကျွောင့် နိဗာန်ဆွယ်မွှို့တိုမောင်ဆိရယ့် ဖရောဆန်နောင့် ဆူ့ယယ့်နတ်ဒေဝါမျောဟော် ကော်တရော်ကွို ဝုန်းမွှောဂ်ဝုန်းဆော်ကျော့လောဂ်မယ်” လွို့ မိင့်တိုမူလေရယ်။ 8အယ်းနွေ့ာဂ်မောင် ကွိုယ်တော်ခေါ့ လူထုပရိတ်ဆတ်ကွို နွေ့ာဂ်ထောဂ်ပုန်ဥဖမောင်နောင့် မိင့်ဆွိုတော်ခေါ့ “ငွယ်ဒန်းကော ဆာပှောဆိရယ့် အမျွိုးဆမီးတဦးမောင် ငွယ်ဒန်းကောတပှော ပျွောဂ်ဆုန်းဆိုးယန် ဆူဟော် မီးအိင်ကွိုထွမ်းပွီး၊ အိင်ကွို မျဂ်စယ်းခှယ်းပွီး မတွိမခှန်းချော်မယ်မဟွိလော။ 9ပှန်ချောတွိရယ့်အခေါ်မောင်လယ်း ဆူဟော် မိင့်ဆွေရယ်နောင့် အိင်နီးခှန်းရယ်ကွို ခိုပွီး ‘ပျွောဂ်ဟော့ရယ့် ငွယ်ဒန်းကောကွို ပှန်တွိပီဖှဂ်လွို့ ဝုန်းဆော်ကျော့ပေါ်’ လွို့ဟိုးလောဂ်မယ်။ 10ကွိုယ်တော်ယေရှုခေါ့ အယ်းနည်းအတောင်း ဖရောဆန်နောင့် ဆူ့ယယ့်နတ်ဒေဝါမျောဟော် နွောင်တော့ဆောင်ဝီကော့ယော့ပွီး ဖရောဆန်နောင်းပှန်ခှယ့်လော်ရယ့် အပှဂ်ဒုစရောဂ်ဆောတဦးအတွ ကော်တရောဝုန်းဆော်ယော့မယ်” လွို့ မိင့်တိုမူရယ်။ 11တဖန်ကွိုယ်တော်ခေါ့ နွေ့ာဂ်ထောဂ်ပုန်ဥဖမောင်နောင့် မိင့်ကျောတိုမူတော်ခေါ့ “တခေါ်ကော့ လူတယွောဂ်မောင် ဆောနေယွောဂ်ဆိလေရယ်။ 12တနေ့မောင် ဆောငါခေါ့ ဆူ့ယယ့်ဖော့ကွို ‘ဖော့၊ တွို့ဖော့မဆေခှင် ငေါ် ယော့ထောဂ်ရယ့် အမွီရယ်ကွို ချခှန်းခွားဝီပေးပေါ်’ လွို့တွောင်းဆွိုကျော့ရယ်။ အယ်းယော်ကျွောင့် ဖော့ဖှဂ်ဆူခေါ့လယ်း သဖိုးတူလောဂ်ပွီး ဆောနေယွောဂ်ကွို ပစ္စည်းဥစ္စော်ရယ်ကွို အမွီခွားဝီပေးခယ့်ရယ်။ 13ရတ်အနည်းငါအကျော်မောင် ဆောငါဖှဂ်ဆူဟော် ဆူ့ယယ့်ယော့ဆိရယ့်အမွီပစ္စည်းမျောကွို ယွောင်းခှော့ပွီးယန် ရှိသမျော့ပိဆင်နောင့် အချောအယော်တွို့ကွိုယူပွီး ဝီးပနန်းရယ့်တင်းပှယ်နောင်း ထွဆိုးလေရယ်။ အယ်းတင်းပှယ်နောင်းယွောဂ်ရယ့်အခေါ် ဖဝို့ကွို အလွာတကူဖှဂ်သန်းပွီး စောဆွောဂ်ပျိုပေါ ဆိသမျော့ပိင်ဆင်တွို့ကွို ဖွှိင်းပေါဂ်လေရယ်။ 14အယ်းနွောဂ်မောင် ဆူ့ယယ့်ဆိသမျော့ပိင်ဆင်တွို့ကွို ဆုန်းပွီးကွိင်ရယ့်အခေါ် အယ်းတိုင်းပှယ်တခုလုန်းမောင် အစော်ယေစော်ငတ်မွဂ်ခွောင်းပေါရယ့်ဘေး ကှော့ယွောဂ်ရယ့်အတွကျွောင့် ဆူဟော် ဆားရားငတ်မွဂ်ဆိုးလေရယ်။ 15အယ်းယော်ကျွောင့် ဆူဟော် အယ်းတန်းပှယ်ခေါ့ လူတယွောဂ်နောင်းကွို ဆိုးပွီး အလုတ်ပေးဖွို့ တွောင်းဆွိုရယ့်အတွကျွောင့် အယ်းလူခေါ့ ဆူ့ယယ့်ချောင်ထားခေါ့ ဝ မျောကွို ထိင်းကွှောင်းဖွို့ စေခေါင်းလောဂ်ရယ်။ 16အယ်းအခေါ် ဆော်ငါဟော် ကော်တရော် ငတ်မွဂ်လော်ရယ့်အတွကျွောင့် ဝဂ်ရယ်ကွိုကျွယ်းရယ့် ပါးတွောင့်ကွိုတအွောင် စောခှန်စိဖှဂ်လော်လေရယ်။ ဟော်ပေမယ့် ဆူ့ကွို စောစရော်ကျွယ်းမယ့်လူ တယွောဂ်မောင့်မဆိပေါ်။ 17အယ်းအခိင်မောင် ဆူဟော် နွောင်တော့ယော့ပွီး ‘ငေါ့ဖော့ယယ့် အိင်မောင် အလုတ်ဆမောရယ် အမျောကျွီးဆိပေမယ့်လယ်း ဆူတွို့ဟော် စောစရော်ဝို့ဝို့လန်လန်စောကျော့ယော့ရယ်။ ငေါ့မောင်ကော ဟော်နေယော်မောင် စောစရော်မဆိပယ်း ငတ်နေယော့ရယ်။ 18ငေါ်ယော် အခုပယ်း ဟော်အရောဂ်ခေါ့ထွခိုပွီး တွို့ဖော့နောင်းကွို ပှန်ပွီး ဖော့၊ ငေါ်ဟော် ဖရောဆန်ကွိုယော တွို့ဖော့ကွိုပေါ် ပှဂ်မောမိခယ့်ပေါ်ပီ။ 19အယ်းယော်ကျွောင့် တွို့ဖော့ယယ့်ဆောလွို့ အခိုခေါင်ဖွို့မတန်တို့ပေါ်။ အယ်းအစော တွို့ဖော့ယယ့်အလုတ်ဆမောတယွောဂ်လွိုပယ်း ငေါ့ကွိုဆဆန်ပေါ်လော’ လွို့ ဟိုးမယ်လွို့တွယ်းလေရယ်။ 20အယ်းယော်ကျွောင့် ဆောငါဟော် ထော့ပွီး ဆူ့ဖော့နောင်းကွို ပှန်လော်လေရယ်။ ဖော့ဖှဂ်ဆူဟော် ဆောငါ ပှန်လော်နေတော်ကွို အဝီးခေါ့နေ လောင်းမျိုရယ့်အခေါ် ဆနောဂရုနော်စိနောင့် ပှေးဆိုးပွီး ဆောငါကွို ဖဂ်ပွီးနောင်းလေရယ်။ 21ဆောငါခေါ့ ‘ဖော့၊ ငေါ်ဟော် ဖရောဆန်နောင့် တွို့ဖော့ကွိုပေါ် ပှဂ်မောမိပေါ်ပီ။ အယ်းယော်ကျွောင့် ငေါ်ဟော် တွို့ဖော့ယယ့်ဆောလွို့တအွောင် မခိုထောဂ်တို့ပေါ်’ လွို့ ဟိုးလေရယ်။ 22ဟော်ပေမယ့် ဖော့ဖှဂ်ဆူခေါ့ အစေခေါင်တွို့ကွို ‘အကွောင်းဆုန်းအဝဂ်အစောကွို အမှန်ယူလော်ပွီး ဆူ့ကွိုဝဂ်ပေးကျော့ပေါ်။ ဆူ့လဂ်ကွိုလယ်း လဂ်စွပ်ကွို ဝဂ်ပေးပွီး ဆူ့ခှေထွောဂ်မောင်လယ်း ဖနောဂ်ကွို စီးပေးကျော့ပေါ်။ 23ပွီးယန် နိုးငါအဝို့တကွောင်ကွိုယူလော်ပွီးယန် ဆဂ်ပွီးခှပွှိကျော့ပေါ်။ ငေါ်တွို့ စောဆွောဂ်ပွီး ပျိုပွားဆွမ်ပွားပှုလုတ်ကျော့ပေါ်စွို့။ 24အကျွောင်းမောင်ကော ငေါ့ယယ့်ဆောငါဟော် ဆေဆိုးပွီလွို့ထန်ခယ့်ပေမယ့် အခုအဆချန်ပွီး ငေါ့ဆီပှန်လော်ပီ၊ ပျွောဂ်ဆုန်းဆိုးပွီလွို့ထန်ခယ့်ပေမယ့် အခုဆူယော်ပှန်ယွောဂ်လော်ပွီဖှဂ်ရယ်’ လွို့ ဆွိုပွီး ဆူတွို့ဟော် အတူတူ ပျိုဆွမ်ကျော့လေရယ်။ 25အယ်းအခှိင်မောင် လာထားမောင် အလုတ်လုတ်နေရယ့်ဆောကျွီးဖှဂ်ဆူယော် ညော့နေစွောင်းလွို့ ပှန်လော်ရယ့်အခေါ် အိင်ယယ့်အနီးနောအယွောဂ်မောင် ထဂ်ချန်းဆောင်မျောနောင့် ကော့ခွိင်နေရယ့်အဆောင်မျောကွို ကျောယော့လေရယ်။ 26အယ်းအခေါ် ဆူဟော် အစေခေါင်တယွောဂ်ကွို ခိုလောဂ်ပွီး ‘စော်လွိုအကျွောင်း ကိစော့ရယ်ဖှဂ်နေကျော့သလော’ လွို့မေးလောဂ်ရယ်။ 27အစေခေါင်ခေါ့လယ်း ‘နန့်ယယ့်တေဟော် ကျောင်းကျောင်းမောင်မောင်နောင့် အိင်ကွို ပှန်ယွောဂ်လော်လွို့ နန့်ယယ့်ဖော့ခေါ့ ဆူဖွိုးရယ့်နိုးပျွိုတကွောင်ကွိုဆဂ်စေပွီး ခှပွှိပွီး ပျိုပွားဆွမ်ပွားလုတ်နေခွမ်ဖှဂ်ရယ်’ လွို့ပှန်ဖှေလေရယ်။ 28အယ်းအခေါ်မောင် ဆောကျွီးဟော် ကော်တရော်စိဆွိုးပွီး အိင်ထားကွို မဝမ်ပယ်း နေရယ့်အတွ ဖော့ဖှဂ်ဆူခေါ့ အပှင်ကွို ထွလော်ပွီး ဆူ့ကွိုအိင်ထားဝမ်ဖွို့ ဖျွောင်းဖျော့လေရယ်။ 29ဟော်ပေမယ့် ဆောကျွီးဖှဂ်ဆူခေါ့လယ်း ‘နောထွောင်ပေါ်အုန်း ငေါ်ဟော် တွို့ဖော့စေခေါင်သမျောကွို လောဂ်နော်ခယ့်ပွီး နဂ်ပွောင်းမျောကျော်အွောင် တွို့ဖော့အတွ အစေခေါင်တယွောဂ်လွို အလုတ်အကျွယ်းပှုခယ့်ပေမယ့်လယ်း တွို့ဖော့ဟော် ငေါ့အတွ မိင့်ဆွေမျောနောင့်အတူတူ စောဆွောဂ်ဖွို့ ဆိတကွောင်ကွိုတအွောင် မပေးခယ့်ဖူးပေါ်။ 30ဟော်ပေမယ့်လယ်း အယ်းဆောငါဟော် တွို့ဖော့ယယ့် ပစ္စည်းဥစ္စော်ရယ်ကွို မိင်းမော့ပျဂ်ရယ်နောင့်ပယ်း ဖွှိင်းခယ့်ပွီးပှန်လော်ရယ့်အခေါ်မောင် တွို့ဖော့ခေါ့ နိုးပျွိုတကွောင်ကွို ဆဂ်ပွီး ပျိုပွားဆန်ပွားလုတ်ပေးလေရယ်’ လွို့ပှန်ဟိုးလေရယ်။ 31ဖော့ဖှဂ်ဆူခေါ့လယ်း ‘ငေါ့ဆော၊ နန်ဟော် ငေါ်နောင့်အတူ အမှားဆိနေတော်ဖှဂ်လွို့ ငေါ်ပေါင်ဆောင်သမျော့ ပစ္စည်းဥစ္စော်ရယ်ဟော်လယ်း နန့်အတွပယ်း ဖှဂ်ရယ်။ 32အယ်းနန်လွို့ နန့်ယယ့်တေငါဟော် ဆေဆိုးပွီလွို့ထန်ခယ့်ပေမယ့် အခုအဆဂ်ချန်ပွီး ငေါ့တွို့ဆီပှန်လော်ပီ၊ ပျွောဂ်ဆုန်းဆိုးပွီလွို့ထန်ခယ့်ပေမယ့် အခုဆူယော်ပှန်ယွောဂ်လော်ပွီဖှဂ်လွို့ အခုငေါ်တွို့ ဝုန်းမွှောဂ်ပျိုဆွမ်ဆန့်ရယ်’ လွို့ဟိုးလောဂ်လေရယ်” ဆွိုပွီးဖှဂ်လေရယ်။
Dewis Presennol:
Luke 15: ttpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.