Luke 23
23
1Yaqkiyoeng ta'la yunga khoeq khlaung haq awlum loeq Boiyesuqa Yawmaq mang Pilat hma án ciqi pui nauk. 2Yaq khlaung haq loeqkhaw nei khlaung khoeq plei saw haqla laumau ong a'mcok hau haq. Kaeta manga a'khon kán paekai khoeq a'mgayi haq. Yaqa yaq khaw Boikhreitaw taeng án hau khoeq Hnyangphalang poemak ka'phlaet taeng a'hauwi. Yaqhaq khoeq keihniq loeq kán khom laq taeng án cawyi. 3Yaqklongoeng Pilat mang loeqkhaw nang khoeq Yudaq Hnyangpalang a'sik moe? taeng a'hiq. Yaqateq Boiyesuq loeqkhaw mang loeq na'hau khakhut a'sik taeng a'msauki ba. 4Pilat mang loeqkhaw nei khlaunga pi plaet khaw hmuwaq haq taeng Yahaenpaw lang loeq khlaung haqla a'hau haq. 5Yaqhniq loeqkhaw án thai a'lulu toeq mpoq uk loeqteq nei khlaung khoeq Galilae plei ta'koeiq mcaq loeqteq nei dun phawong Yudaq plei omdun ta'kum mcok hau haqloeq teq khlaung haqla a'cilung haq taeng a'nhau. 6Pilat mang loeq yaqkha plau a'yauk loeq nei khlaung khoeq Galilae plei saw a'sik moe? taeng a hiq haq kiyoeng, 7Herouq loeq a'poengi khoeq khlaung taeng a'hmawt tateq Boiyesuq khoeq Herouq hma án thaw hoet. Yaq hnup haqla Herouq khaw Yeruqsalein mloeqa a'moeiq. 8Herouq khaw Boiyesuqa a'hmuq loeq nana a'mlung a'oeqcaq. Piklongoe naka yaq loeq Boi klong haq a'yauk ta'koeiq Boi yoeng khomi waiq loeqteq Boi loeq a'sai khoeq na'maek haq a'hmuqai khoeq a'congi. 9Yaqklongoeng Herouq loeq Boiya cunei nana hiq loeqkhaw Boi loeq pikhaw msauki yaq. 10Yaqkiloeq Yahaenpaw lang haqloeq klam hmotsaw haq tho uk loeqteq Boiya nana a'plaet án coiyi. 11Herouq loeq yaq caeksaw haqloeq Boiya mtaek laek nauk uk loeqteq án mnuiq nauk kiloeq Boiya a'phubau wawt haq mhyoeq poeiq uk loeqteq pilat manga án thaw hoetba. 12Herouq loeq Pilat khaw cukhowa toyiyaq hniq loeqkhaw yaqhnupoeng án toyi ba. 13Pilat mang khaw Yahaenpaw lang haq Yudaq khlaung cang haqloeq khlaung lui haq mcuqi uk loeqteq 14Nei khlaung khoeq la'longoeng a'sai saw taeng hau tuk loeqteq nanghniq loeq kei hma nán lo. Seiloeqkhaw nanghniq hmaungkaumapak yaqa ka'caetcawq kho wa a'plaet a'moeiq khoeq keiloeq khomaq hang. 15Herouq loeqkhaw yaqa a'plaet sui loeq khomaq klongoeng yaqa pi a'plaet khaw paek ta'ong kei hma a'thaw ba. Nei khlaung khoeq tuk laqong yaqa pi a'plaet khaw moeiq yaq. 16Yaqklongoeng yaqa kyingdai paek loeqteq a'hloeqba. 17Pilat mang loeq yaqkha a'hau laq khoeq teq pawi hnupoeng poemaka án hloeq laq khoeq tumcam a'moeiq klongoeng a'phlaet. 18Seiloeqkhaw khlaung haq awlum loeq yaqa tuk tiloeq Barabaq a hloeqe taung taiyaka mpoeq uk loeq án hiqi. 19Barabaq nakkhoeq teq mloeqa la'longong sai saw, khlaung tuksaw a'phlaet klongoeng thonga klawq loeqteq a'plaet paek a'laqi khoeq khlaung a'phlaet. 20Pilat mang loeqkhaw Boiyesuqa a'hloeq waiqya teq khlaung haqloeq a'cang haqla a'la patak a'hniq haq ba. 21Seiloeqkhaw yaqhniq loeq yaqa kutphaw toenga taunge. Yaqa kutpaw toenga taunge taeng daedae án mpoq. 22Yaqateq pilat mang loeqkhaw, nei khlaung loeq pi bong a'plaet a'sai yoe? Nei khlaunga tuk laqong a'plaet a'sai khoeq keiloeq hmuqaq hang. Yaqklongoeng nei khlaunga kyingdai paek hang loeqteq ka'hloeqba lai taeng patthum dunoeng a'hau tuba. 23Seiloeqkhaw khlaung lui loeq Boiyesuqa kutphaw toenga án tukai khoeq noeng mpoq uk loeq án hauwi. 24A'msuma teq khlaung lui loeq án mtongi khakhut Pilat mang loeqkhaw a'sai paek haq kiyoeng, 25Khlaung haqloeq án hloeq waiq khoeq a'plaet sai saw khlaungsei Barabaq a hloeq paek haqloeq teq Boiyesuq khoeq yaqhniq mlungtaq saisauk a'mtoeq haq. 26Caeksaw haqloeq Boiyesuqa án ciqi pui nauk tuna Kuqreniq mloeq saw Siqmou khaw laiya a'plan khoeq án hmuq loeq yaqa man uk loeqteq Boiyesuq hnu woeng kutphawtoeng koet loeqteq toemisauk án mtoeq. 27Boiyesuq hnu woeng án toemi pawq khoeq khlaung haq tau wa kap uk loeq án toemi pawq khoeq hna'taw haq luiyaq khaw án paw. 28Boiyesuq khaw yaqhniq poet hlaengi loeqteq, Yeruqsalein mloeqa khoeq hna'taw haqloe kei tawiq yoeng kapai tuk. Nanghniq loeq nanghniq caw haq tawiq noeng kapoek. 29Pi klongoeng naka a'mlungnu, hoen mawq phuwaq, a'caw loeq khawi ophuwaq khoeqhaq án oeqcaq taeng án hau khoeq hnup haq a'phawai. 30Yaqkhowa khlaung haqloeq tong haq keihniq hona klawqe seq, tonghlung haqloeq keihniqa a'mkawpnauk haq leseq taeng án hau wai. 31Yaqhniq loeq thing haeng a'louqi khoeq keiya nei kha án msai haq nak loeq thingca a'louqi khoeq a'plaet sai saw haqkhoeq pikha án phlaetai yoe? taeng a'hau. 32Yaqhniq loeq khlaungsei poemhneiq a khaw án tukai khoeq án ciqi pui nauk. 33A'lukong dun taeng an hau khoeq an phaw loeq yaqhniq loeq Boiya kutphaw toenga taung uk loeqteq khlaungsei hoeiq poemhneiq a khaw sa'tong pa'toeng poemak saet pa'toeng poemak kutphaw toenga an taung. 34Boiyesuq loeqkhaw oe pawu woe, yaqhniq haqloeq án sai khoeq hmoti ya uk klongoeng a'plaet hloeq haq ba hmeboei taeng a'hau. Yaqhniq loeq Boi wawt haqkhoeq a'mluq yuqi uk loeq án phaiqi. 35Khlaung haq loeqkhaw ya uk loeq án sotnauk. Yudaq khlaung cang haq loeqkhaw Boiya mtaek laek nauk uk loeqteq, nei khlaung loeq a'coe haqla a'klawn haq theiq. Boikhreitaw taeng án hau khoeq Boipaw loeq a'haeq khoeq khlaung a'sikcang nak loeq yaqa yaq klawniye seq taeng án mnuiq nauk. 36Caeksaw haq loeqkhaw Boiya matak laek nauk uk loeqteq a'phla cit uk loeqteq wai án toek. 37Nang khoeq Yudaq khlaung haq mang na'phlaet nak loeq nanga nang klawniye taeng án hau. 38Boi hona taung uk loeq án yok khoeq caw teq, Yudaq khlaungmyoe haq mang a'phlaet taeng, Hebyaelo, Helataq lo, Yawmaq lowoeng yok uk loeqteq Boi lu hona án mkhaiq. 39Kutphaw toenga a'taung án laqi khoeq khlaungsei hoeiq poemhneiq duka khoeq poemak loeq Boiya, nang khoeq Boikhreitaw seiyati moe? Nanga nang klawni tiloeqteq keihniqa khaw a'mklawn hoeiqle taeng a'hau. 40Sei loeqkhaw a'la poemak loeq yaq khlaunga haunauk loeqteq, nang teq yaq hui tu a'plaet paek na'laqi suiyoengpak Boipaw a keiqa ti moe? 41Ma'hniq teq ma'hniq ma'sai khoeq plaetoeng a'tawni nauk khoeq a'plaet paek ma'laqi. Nei Boi teq pi plaet khaw saiyaq taeng a'hau. 42Yaqkiyoeng Boiyesuq oe, Boipaw khomcaenga Boi na'phaw nak loeq keiya sa'diq a'mlaq hma'boei taeng a'hau. 43Boi loeqkhaw, nanga keiloeq a'hmon ka'mhauwai Nang khoeq tohnupa kei hui tu Paratituqboenga na'moeiq yai taeng a'hau. 44Yaq khing khoeq a'hnup dingdaw a'phlaet. Yaq ta'koeiq khoeq khokaeng nayithum phawong somdaek blaiq kho a'hyung poeiq. 45Kha'ni klok loeqteq Boipawa wotpyuq dun kyonga ka'laga khoeq a'laiyoeng boenghneiqa a'boyi toeq. 46Yaqkhowa Boiyesuq khaw a'thai bau woeng mpoq loeqteq, oe pawu Boi yoe, kei muikhlaw khoeq Boipaw kuta ka'mawp taeng a'hau. Yaqkha a'hau kiloeq a'sauk a'soq toeq. 47Yaqkha a'phlaet khoeqhaq a'hmuq saw taphmu loeq Boipaw Phumthaung hmlokthaq loeqteq, nei khlaung khoeq khlaungpawi a'sikcangnoesa taeng a'hau. 48A'phlaet khoeqhaq a'sota lo saw haq loeqkhaw yaqkha a'phlaet khoeqhaq án hmuq loeq án mlung ak waiq uk loeqteq án ciqba. 49Galilae pleiya Boi hnu woeng án toemi khoeq hna'taw haqloeq Boiya a'hmotsaw haq loeqkhaw yaqkha a'phlaet khoeqhaq a'hlaw ta'thoq ya uk loeqteq án sotnauk. 50Yaqkhowa Yaduq pleiya khoeq A'rimatae mloeq saw Yawtaq taeng a'ming a'moeiq khoeq hlataw a'phwaiq poemak a'moeiq. 51Yaq loeq ta'la yunga án sungphlaiq khoeqhaq nawnaukaq. Yawtaq khoeq Yudaq plei A'riqmate mloeq saw phlaet loeqteq Boipaw khomcaeng a'phawai khoeq a'congi khoeq khlaung khaw a'phlaet. 52Yaq khlaung khoeq pilat mang hma cit loeqteq Boiyesuq yok a'hiqi kiyoeng, 53A'yok khoeq kutphaw toenga khoeq khlawq loeqteq, wawtbokoeng laet loeqteq a'ni khaw bum laqhmaq uk khoeq lung kho wa a'bum. 54Yaq hnup khoeq a'klanyang hnup phlaet loeqteq Ubuk hnupoet a'kawqai a'mcouq hni. 55Galilae pleiya khoeq Boiyesuq hui tu án toemi pawq khoeq hna'taw haqloeq mco khaw Boi yok khaw kha án taukoe nakkhoeq a'sota án lo pawq. 56Yaqkiyoeng yaqhniq khaw planba uk loeqteq siot loeq siot haung haq ca'lang poeiq uk loeqteq pinyatawa a'moeiq khakhut ubuk hnupoeng án mdum.
Dewis Presennol:
Luke 23: ctpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.