Ruti 2
2
Gosori Ruti Boazi
1Naomi kole turangana pa kalin rekmalea ta aia, pa pukun ta Elimeleki. Tinon ngongona beti tinon tatagona,isogon aia Boazi.
2Beti nabe Ruti, rekmagot pa Mohabaiti pan Naomi, <<Elu rai lago pa inuma, beti pudik sage kolhola kiko pa mudin kakeria, ia pa no mata ke vatkale rai,>> Nabe Naomi, <<lago qu tuqu.>>
3Qi pahu kakaha aia, bet' podal' pudik bali aia pa inuma pa mudin ria tinon tatavete. Beti korapan no tinavete, gigile aia, ia aia tatavete pa inuma ta Boazi, ia main pa pukun ta Elimeleki.
4Omea! Kamo mule Boazi kokon Betlihema, beti vakamo aia ria tinon tatavete, <<Zihova ke suver' turangi gamu,>>Olang mule ria, <<Zihova ke manani goi.>>
5Idosi Boazi no koimata pa tinavete, <<sega rekmagot koregan sana?>>
6Olang koimata, <<Aia mohabaiti, ia mule mai kokodi Moabi turangi Naomi. 7Nabe aia, <Elu rai gumi pudiki beti varpohani bali ia tekol mudi ria tinon tatavetedi.> Luge aia inuma bet' podal pa mumurogan tataet aia kamo kopirina, totos' hite ho manari aia pa hokale.>>
8Qi nabe Boazi pan Ruti, <<Qu Tuqu valemon mai pang rai. Dana lago beti tatavete pa inuma ta kake beti dana rizu kaka hai. Suver' turangi goi qu sepelmagota. 9Ome inuma ova kokopot' bali tinon tatavet' hora beti tokmudi goi ria magot. Tode pitoni rai ria tinoni, dana keka ke tinguli goi. Beti kon' kakmasa goi, bei pa pie ia tode utuvi ria tinon.>>
10Todong gore pa melaka aia. Beti idosi Ruti Boazi, <<Osi vaome nau vinarsevi, rai rekmagot karovoqu?>>
11Olang Boazi, <<Tode lemoni rai saga taetvani goi ivamu, mudin minate ta mu rekmalea. Osgu pahu goi tamamu, tinamu bet' mu sau bet' mai suver' turangi goi tinon ia da gile goi. 12Zihova ke behi mu tinavet ia taeti goi. Zihova Bangara ta Izreli ke manani goi, pan aia ke takopugi goi.>>
13Nabe Ruti, <<Qu bangara, kora vaomeni goi pang rai mu vinarsevi.>> Vamanoti goi rai. Toksavan rai dana tavagigala gugu mu rekmagota tatavetedi.
14Pa totoso teteku, nabe lago Boazi Aia, <<Hola mai hai. Teku kake bereti, ponge pa vaini.>> Gogoton mai totu turangi aia ria tinon tatavete, telago Boazi kake bali nakodi pan aia. Teku aia gu boka teku aia, bet' kolhola kake.
15Turu sage gumi pudik bali aia, pitoni Boazi no tinon tatavete, <<Koni pudiki aia bali pa kapatandi ria sasado ta bali, dana vakikizu aia. 16Zou kakahi gamu kake bali pa sasado beti tekoleriria pa melaka, gumi aia ke pudiki ria. Muke hitu aia.>>
17Qi pudik bali Ruti pa inuma tibul vevelu. Beti mas varpikatani aia kiko pa gae ta bali, ia pudiki aia, beti padan manoguhe mamatana. 18Beti pogos mule aia pa no gugusu, ome no ivan saga pogosi aia. Tamin kakahi naho Ruti beti telago aia pan no ivan saga kolhola gotonbeto ngangau aia.
19Idosi no Ivan aia, <<Ova pudik bali goi nipo? Ova tatavet goi? Tamanagi tinon ia omgigalam goi!>> Qi pitoni Ruti no ivana inuma ta sega tatavet aia. <<Isongon ta tinon tatavet turangi rai nipo aia Boazi.>> Gu aia.
20<<Zihova ke manani aia,>>Gu Naomi pan Ruti, <<Dana noso aia gumi vaomeni vinarsevi ria ia toa, beti ria ia mate,>>Hode aia, <<Aia tinon turangada soti; aia Tinoni ia ke boka ome beti tokani gikori.>>
21Qi nabe Ruti mohabaiti, <<Pitoni naho aia rai, suver turangi qu tinon tatavete, tibul hokoti ria pinudikin kiko.>>
22Nabe lago Naomi Ruti no magotroroto, <<Ke leanhola, qu tuqu, gumi lago turangi goi no rekmagot tatavete, na koni pa mutnona inuma ta kakeria, kela vagiti go ria.>>
23Qi suver kapati Ruti sepel magot ta Boazi gumi pudik bali beti viti, Tibul hokot tinavete. Beti suver turangi aia no Ivana.
Dewis Presennol:
Ruti 2: NKE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024, Islands Bible Ministries. All rights reserved.