Y Salmau 88:1-18

O ARGLWYDD, Duw fy iachawdwriaeth, liw dydd galwaf arnat, gyda'r nos deuaf atat. Doed fy ngweddi hyd atat, tro dy glust at fy llef. Yr wyf yn llawn helbulon, ac y mae fy mywyd yn ymyl Sheol. Ystyriwyd fi gyda'r rhai sy'n disgyn i'r pwll, ac euthum fel un heb nerth, fel un wedi ei adael gyda'r meirw, fel y lladdedigion sy'n gorffwys mewn bedd— rhai nad wyt yn eu cofio bellach am eu bod wedi eu torri ymaith o'th afael. Gosodaist fi yn y pwll isod, yn y mannau tywyll a'r dyfnderau. Daeth dy ddigofaint yn drwm arnaf, a llethaist fi â'th holl donnau. Sela Gwnaethost i'm cydnabod bellhau oddi wrthyf, a'm gwneud yn ffiaidd iddynt. Yr wyf wedi fy nghaethiwo ac ni allaf ddianc; y mae fy llygaid yn pylu gan gystudd. Galwaf arnat ti bob dydd, O ARGLWYDD, ac y mae fy nwylo'n ymestyn atat. A wnei di ryfeddodau i'r meirw? A yw'r cysgodion yn codi i'th foliannu? Sela A fynegir dy gariad yn y bedd, a'th wirionedd yn nhir Abadon? A yw dy ryfeddodau'n wybyddus yn y tywyllwch, a'th fuddugoliaethau yn nhir angof? Ond yr wyf fi yn llefain arnat ti am gymorth, O ARGLWYDD, ac yn y bore daw fy ngweddi atat. O ARGLWYDD, pam yr wyt yn fy ngwrthod, ac yn cuddio dy wyneb oddi wrthyf? Anghenus wyf, ac ar drengi o'm hieuenctid; dioddefais dy ddychrynfeydd, ac yr wyf mewn dryswch. Aeth dy ddigofaint drosof, ac y mae dy ymosodiadau yn fy nifetha. Y maent yn f'amgylchu fel llif trwy'r dydd, ac yn cau'n gyfan gwbl amdanaf. Gwnaethost i gâr a chyfaill bellhau oddi wrthyf, a thywyllwch yw fy nghydnabod.