မာကု 8
8
ယေဆု ဟျံင်ဘီဖိုန်ဟြဲင်ဟောမ်
(မဿဲ ၁၅.၃၂–၃၉)
1ဘံန်ကာဇီုဝ့် ဖုင်ဘီက်ုရ်စုဒါင် ပ်ုန်ဟံရ်ဂဲ လာ်ႈက်ုရ်စုရူမ်ဒိုည်ႇဒေ။ ကောပ်ကာယိူဝ်ပ်ုန်ဟောမ် တဂဲဒီန်၊ ယေဆု တောႇပွံတ် တဘဲႇဒေဂဲ အ်ုန်ဒါႈ၊ 2“အောက်ုရ်ႎေညှိုႈ ဘီဂဲအီုဝ်၊ ဂဲဟွည်ႇဂွည်ရူမ် ဇောမ်အော ဘိူန်အွည်ဆငီ၊ ပ်ုန်ဟောမ် ဆံင်မှာ်ႈမိူဝ်ႈ ကာယိူဝ်တဂဲ။ 3က်ုန်ကာဟျံင်ဘိူဝ် ဂဲဟောမ်ပ်ုန်ဟောမ် ပ္လေါည်ႎေင်တဂါင် ဘီပ်ုရ်ဒီမိူဝ်ႈ ကောပ်ယိူဝ်ႇ ဒိုရ်တအရာပ်ဆငါည်၊ ဂဲဒီအိူရ် မဝ်ဂေႈဒိုည်ႇဒေ တရဒေင်။”
4တဘဲႇအ်ုန်ဂဲ ႎီရ်ဒါႈတအ်ုန်၊ “တန်ုဘြီအရာပ်အီုဝ် အဆေဒီဘဲဒေလဲမ်မုင် ဟျံင်ဂဲဟောမ် မောဂိူပ်ဟိူဝ့်။”
5ယေဆု ဆ်ုရ်မွံတ်ဂဲ၊ “တပဲယိူဝ်မုင် ဘ်ုရ်မော၊”
ဂဲႎီရ်ဒါႈတအ်ုန်၊ “တယဲ ယိူဝ်ဂိူဝ်မုင်ပူရ်ပံင်။”
6အခိင်ဒီန် အ်ုန်ဆူတ် ဖုင်ဘီက်ုရ်စုဂဲ မာ့်ဒိုည်ႇဒေ တပါင်ကတဲ။ ဟွည်ႇဒီန် အ်ုန်တိူဝ်ႈပွံတ် မုင်ပူရ်ပံင်ဒီန် တာင်ဂုင်ကေစူ တဖြာ၊ အ်ုန်ပ္လဲႈမုင်ဒီန် ဒဲႈပွံတ်တဘဲႇဒေဂဲ က်ုရ်ဆာင်ဒဲႈ တဖုင်ဘီက်ုရ်စုဂဲ၊ ဂဲဒီန်မိူဝ်ႈ လာ်ႈက်ုရ်ဆာင်ဒဲႈပွံတ် ခိူည်ပ်ုန်ဒါႈအ်ုန်။ 7ဘံန်တရန်ုဂဲ ယိူဝ်ပည်ကာဒျံတ်ဒျံတ် တရီတ်၊ ယေဆုဟွည်ႇတာင် ဂုင်ကေစူ အတွဒီန်၊ အ်ုန်ဆူတ်ပွံတ် တဘဲႇဒေဂဲ က်ုရ်ဆာင်ဒဲႈ တဖုင်ဘီက်ုရ်စုဂဲ။ 8ဘီဂဲတွံန်ကူ ဟွည်ႇဟောမ်ဟိူဝ့်ဒိုည်ႇ၊ တဘဲႇအ်ုန်ဂဲ ထွံရ်ပ်ုန်ကီုတ် က်ုရ်ပူက်ုရ်ပိုတ်ဒီန် ဘိူန်ပွံတ်ပူရ်ဂုနာ့်နာ့်။ 9တအရာပ်ဒီန် ယိူဝ်ဘီက်ုရ်ပံတ် ဖိုန်ဟြဲင်။ ယေဆု ပ္လေါည်ႎေင်ပွံတ်ဂဲဒီန်၊ 10အခိင်ဒီန် အ်ုန်ဟာ့်ရူမ် ဇောမ်တဘဲႇဒေဂဲ တပါင်ရိူဝ် အူဒီန်တောအူဒီန် ဂဲလာ်ႈပွံတ် တအရာပ် ဒါလမနုသ။
ဖာရိရှဲဂဲမှာန် နမိလက္ခဏာ
(မဿဲ ၁၆.၁–၄)
11 #
မ ၁၂.၃၈; လု ၁၁.၁၆ အခိင်ဒီန် ဖာရိရှဲဂဲပ်ုရ်ဒီ လာ်ႈရောတ်ဒေ က်ုရ်မိုန်က်ုရ်ထေင် ဇောမ်ယေဆု၊ ကောပ်ဂဲဆ်ုန်စာမ်ဒေ ခြီုမ်အ်ုန် ဂဲမှာန်ဒဲႈအ်ုန်ပျ နမိလက္ခဏာ ယိူဝ်ႇဒိုရ်ပ္လေင်။ 12#မ ၁၂.၃၉; လု ၁၁.၂၉ကောည်လိုည် ယေဆု က်ုန်အိူဝ်ႈဖိူမ်ဒါင်ဒေ ဒါႈတဂဲ၊ “ကောပ်ဆေ ဘီခြိူဝ်မျိုဂဲအီုဝ် နံပ်ဒေမှာန်နမိလက္ခဏာအဲႈ၊ အောဂြည်ညှိုႈတပဲ၊ ဆံင်မှာ်ႈမိူဝ်ႈ အောကာပျဒဲႈစိ နမိလက္ခဏာ တဘီခြိူဝ်မျိုဂဲအီုဝ်။”
13အ်ုန်လေႈပွံတ်ဒေဒိုရ်ဂဲ ႎီရ်ဟာ့်ဒေတပါင်ရိူဝ် ဂဲႎါည်လာ်ႈပွံတ် ဆဲႈပြါအိုမ်ဆက္လုင်လ်ုပ်တည်။
ဆန်ုမ်ဂိူဝ်ႈ ဖာရိရှဲဂဲဂါရ် ဟေရုဒ်
(မဿဲ ၁၆.၅–၁၂)
14ဘံန်တဘဲႇအ်ုန်ဂဲ ဘီရ်တိူဝ်ႈဒေဒိူည် မုင်လုင်လုင်လာ့်လာ့်၊ တရန်ုရိူဝ်ဂဲဒီန် ယိူဝ်ဂိူဝ်မုင်အူပံင်။ 15#လု ၁၂.၁အခိင်ဒီန် ယေဆုဒဲႈဆဒိတဂဲ၊ “ဒဲႈပဲအူန်ဆဒိ၊ ပဲလိုႎဲႈဆန်ုမ်ဂိူဝ်ႈ ဖာရိရှဲဂဲဂါရ် ဆန်ုမ်ဂိူဝ်ႈ ဟေရုဒ်အေ့။”
16ဂဲက်ုရ်မိုန်က်ုရ်ဂြည်တဒေ အူကူတောအူကူ ဂဲဒါႈ၊ “ကောပ်အယ်ကာဒိူည်မုင် အ်ုန်ဒါႈဒေငဲ တအယ်ခိူည်အီုဝ်။”
17ဘံန်ယေဆုနံပ် ဂဲက်ုရ်မိုန်က်ုရ်ဂြည်ခိူည်ဒီန်၊ အ်ုန်ဆ်ုရ်မွံတ်ဂဲ၊ “ဆေညာ ပဲဒါ့်က်ုရ်မိုန်က်ုရ်ဂြည် အကျံင်ပဲ ကာဒိူည်မုင်ဒီန်အဲႈ။ ပဲညှံမ်နံပ်၊ ညှံမ်လှူႈဘိူဝ် တဖိူမ်ဒေ၊ ပ္လေဖိူမ်ပဲဒါ့်ခေါပဲတ် မောအူဒီန်အီုဝ်အဲႈ။ 18#မာ ၄.၁၂ပဲယိူဝ်ဘိူဝ်ဒေပ္လေငါည် ကာယိူဝ်ဒေငိူပ်၊ ပဲယိူဝ်ဘိူဝ်ဒေဟျာ့် ကာယိူဝ်ဒေဆတီုင်၊ ပဲကာတံင်ဘိူဝ်အဲႈ၊ 19ယာမ်အောက်ုရ်ပ္လဲႈဒဲႈ မုင်ဖံန်ပံင် အတွဘီဖံန်ဟြဲင် ဒါင်ဂုပဲဘိူန်ဒေ ထွံရ်တကျြံတ် ပ်ုန်ကီုတ် က်ုရ်ပူက်ုရ်ပိုတ်အ်ုန်ဒီန်” ဘံန်အ်ုန်ဆ်ုရ်မွံတ်ဂဲ ခိူည်ဒီန်။
ဂဲႎီရ်ဒါႈတအ်ုန်၊ “ဘိူန်ကိူရ်အာရ်ဂု။”
20“ယာမ်အောက်ုရ်ပ္လဲႈဒဲႈ မုင်ပူရ်ပံင် အတွဘီဖိုန်ဟြဲင် ဒါင်ဂုပဲဘိူန်ဒေ ထွံရ်တကျြံတ် ပ်ုန်ကီုတ် က်ုရ်ပူက်ုရ်ပိုတ်ဒီန်” ဘံန်ယေဆု ႎီရ်ဆ်ုရ်မွံတ်ဂဲခိူည်ဒီန်။
ဂဲႎီရ်ဒါႈတအ်ုန်၊ “ဘိူန်ပူရ်ဂု။”
21အ်ုန်ႎီရ်ဒါႈတဂဲ၊ “ပဲညှံမ်နံပ်ဘိူဝ် မောအူဒီန်အဲႈ။”
ယေဆု ဒဲႈအီငါည်အံပ်အူကူ ချံမ်ဆာ တရူဗက်ဇဲဒ
22အခိင်ဂဲရောတ်ဒိုည်ႇ တရူဗက်ဇဲဒ၊ ဘီပ်ုရ်ဒီဂဲ တောႇဒေဒိူည် အီငါည်အံပ်အူကူ လာ်ႈရောတ် တယေဆု၊ ဂဲမှာန် ဒဲႈအ်ုန်ထိ အီကူဒီန်။ 23ယေဆု တီုတ်ဒေဘာတီ အီကူငါည်အံပ်ဒီန် တောႇလေႈပွံတ်အ်ုန်ရိူဝ့်ရူ။ ဟွည်ႇဒီန် ယေဆုဘဲ့ပွံတ် အိုမ်ဘဲ့ဒေတပ္လေငါည်အ်ုန်၊ ဂံမ်တီဒေ တပါင်အ်ုန် ဆ်ုရ်မွံတ်ပွံတ်၊ “မီပည်ယိူဝ်ဒေငိူပ် အူနဲအူနဲ။”
24အီကူဒီန် ဆိူန်ဂိူဝ်ႈဒေငိူပ် ဒါႈတအ်ုန်၊ “အောယိူဝ်ယာ့် အောငိူပ်ဘီဂဲ၊ ကောည်လိုည် ဂဲနှေရ်ဒိုည်ႇပဲတ် တီုင်ဟေဂဲ လာ်ႈလာ်ႈႎေင်ႎေင်။”
25ဟွည်ႇဒီန် ယေဆုႎီရ်ဂံမ်တီဒေ တပါင်ပ္လေငါည်အ်ုန်။ အခိင်ဒီန် အ်ုန်ငိူပ်ပွံတ်လလ၊ ပ္လေငါည်အ်ုန် ပ္လါင်ဆာင်လာင် ယိူဝ်ပွံတ်ဒေငိူပ် ကတီကရီ။ 26ယေဆုဒါႈ၊ “မီမာည်ဂွည်ႇလီပ်ယာ့် တရူ” ဟွည်ႇဒါႈခိူည်ဒီန် ပ္လေါည်ႎေင်ပွံတ်အ်ုန် တဂါင်။
ပေတရုဂြည် အကျံင်ယေဆု
(မဿဲ ၁၆.၁၃–၂၀; လုကာ ၉.၁၈–၂၁)
27အခိင်ဒီန် ယေဆု စွလာ်ႈရူမ်ဇောမ် တဘဲႇဒေဂဲ အရာပ်ဒံတ်ရူ တကုင်ကဲသရိဖိလိပ္ပိ။ ယာမ်ဂဲလာ်ႈတဒေင် အ်ုန်ဆ်ုရ်မွံတ်တဘဲႇဒေဂဲ၊ “ဂြည်ဘိူဝ်တအော၊ ဆေဘီဂဲအီုဝ် ဒါႈအောမိူဝ်ႈအဲႈ။”
28 #
မာ ၆.၁၄,၁၅; လု ၉.၇,၈ ဂဲႎီရ်ဒါႈ၊ “ပ်ုရ်ဒီဒါႈ မီမိူဝ်ႈ ဗတ္တိဇံဆရာယောဟန်၊ ပ်ုရ်ဒီဒါႈ မီမိူဝ်ႈ ဧလိယ၊ ပ်ုရ်ဒီဒါႈ မီမိူဝ်ႈ ပရောဖက် အူကူအူကူ။”
29 #
ယော ၆.၆၈,၆၉ ဟွည်ႇဒီန် အ်ုန်ႎီရ်ဆ်ုရ်မွံတ်ဂဲ၊ “က်ုန်မိူဝ်ႈပဲ၊ ဆေပဲ ဒါႈအောမိူဝ်ႈ။”
ပေတရု ႎီရ်ဒါႈတအ်ုန်၊ “မီမိူဝ်ႈ မေရှိယ။”
30အခိင်ဒီန် ယေဆုပိင်ငျှံပ် ဒဲႈဆဒိတဂဲ၊ “ပဲမာည်လာ်ႈဂြည် အကျံင်အော တအဆေအေ့။”
ယေဆုဂြည် အကျံင်ဒေ ဒီဘ်ုပ်က်ုရ်တူႈ ႎိုည်ဒနာဂါရ် ယံမ်
(မဿဲ ၁၆.၂၁–၂၈; လုကာ ၉.၂၂–၂၇)
31ဟွည်ႇဒီန် ယေဆုဆာင်ဆောန် တဘဲႇဒေဂဲ၊ “ကွံန်ဘီအီုဝ် ဒီဘ်ုပ်ဒေက်ုရ်တူႈ ႎိုည်ဒနာဘ္လံမ်ဂါရ် ဘီအဆာႇဒါင်ဝါဒါင်ဂဲ၊ ယဇ်ပုရောဟိတ်ဒါင်ဂဲဂါရ် တာဆရာနံပ်ဘေဲႇကျံမ်ဂဲ ႎဲႈထေင်ပဲတ်ဒေ။ ဒီဘ်ုပ်ဒေက်ုရ်တူႈထဲင် ဂဲပျံမ်ယံမ်ပဲတ်ဒေ၊ ကောည်လိုည် က်ုန်ဟွည်ႇဘိူန်အွည်ဆငီ အ်ုန်ဒီႎီရ်ယိူဝ်ႇအီမ်ဒေ။” 32ဘံန်အ်ုန်ဂြည်ဆာင်လာင် အကျံင်ဒီန်တဂဲ ပေတရု တောႇလာ်ႈအ်ုန်လ်ုပ်ဟံရ် တာင်အပေတ်တအ်ုန်။ 33ကောည်လိုည် ယေဆုက်ုရ်ပံတ်ငါည်ဒေ ငိူပ်ပွံတ်လ်ုပ်တဘဲႇဒေဂဲ၊ အ်ုန်တာင်အပေတ် ဒါႈဒေဆုင်မပွံတ် ပေတရု၊ “အိူဝ် စာတန် လေႈပွံတ်မီဒိုရ်အော၊ ပ်ုန်စေ့ကူမီဒီန် ကာမိူဝ်ႈစိ ယိူဝ်ႇဒိုရ်တဖြာ၊ မိူဝ်ႈယိူဝ်ႇ ဒိုရ်တဘီဂဲ။”
34 #
မ ၁၀.၃၈; လု ၁၄.၂၇ အခိင်ဒီန် ယေဆု တောႇပွံတ် တဘဲႇဒေဂဲဂါရ် ဖုင်ဘီက်ုရ်စု၊ အ်ုန်ဒါႈတဂဲ၊ “အဆေမိူဝ်ႈဟွည်ႇ က်ုန်ဆ်ုန်ဇောမ်ရဘံန်အော ဒီဘ်ုပ်ဒေထေင်တိုဒေ၊ ဒီဘ်ုပ်ဒေကွံတ် တီုင်ဒါ်ႈစံပ်တာႇတီဒေ။ ဟွည်ႇဒီန် တဘိူန်ဒေဇောမ်လာ်ႈ ရဘံန်အော။ 35#မ ၁၀.၃၉; လု ၁၇.၃၃; ယော ၁၂.၂၅ကောပ်ဆေတဒါႈခိူည်ဒီန် အီအ်ုန်ဆ်ုန်ပ်ုန်လောတ် အဆာႇဒေအီုဝ်၊ ဒီဘ်ုပ်ချှူမ် အဆာႇဒေ။ ကောည်လိုည် အီအ်ုန်ခါမ် အဆာႇဒေချှူမ် ကောပ်အောဂါရ် ကောပ်ဆဒါင်ကျအောဒီန် ဒီဘိူန်ဒေပ်ုန်လောတ်။ 36ဘီအီုဝ် ဘိူည်ဘိူန်ဂံတ်ဒေ ဘြောင်ဒိုည်ႇကံမ်ဖာ က်ုန်ချှူမ်အဆာႇႎိငျံန်ဒေ ဆေဒီယိူဝ်အကျိုအဲႈ။ 37က်ုန်ချှူမ် အဆာႇႎိငျံန်အယ်၊ ဒါခံင်နဲမော ဒီဘဲဒေႎီရ်ရံရ်ႈဒဲႈ အဆာႇအယ်အဲႈ။ 38ခိင်ခါဝ်ကာပ်ကာကျ ဘီကာနံပ်ဖြာတရာ၊ အဆေမိူဝ်ႈဟွည်ႇ က်ုန်ကဆေ ကောပ်အောဂါရ် ကောပ်ငဲပ်ုန်ဆာင်ဆောန်အော၊ အခိင်ကွံန်ဘီအီုဝ် ဒါအဖုင်တီုင်ဂို ကူန်ဖြာဒေ စွလေႈရူမ် ဇောမ်တမန်ဇ်ုဆပဲဂဲတပ္လေင် အ်ုန်ဒီဘ်ုပ်ဒေကဆေ အတွဂဲ။”
Dewis Presennol:
မာကု 8: SPBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Word for the World International and The Shwe Palaung Bible Translation Reviewer Committee.