မာကု 6
6
ကုင်နာဇရက် ကာရံပ် ယေဆု
(မဿဲ ၁၃.၅၃–၅၈; လုကာ ၄.၁၆–၃၀)
1ယေဆု လေႈဒိုရ်အရာပ်ဒီန် ႎီရ်ႎေင်ပွံတ် တကုင်ဇာဒိဒေ၊ တဘဲႇအ်ုန်ဂဲမိူဝ်ႈ ဇောမ်လာ်ႈဒိုည်ႇ ရဘံန်အ်ုန်။ 2ရောတ်ဆငီဆဒါင် အ်ုန်ဆာင်ဆောန် တန်ုကျောင်ရဆောန်ဒဲႈတရာ။ ဘံန်ဘီဘာ့်ဘာ့်ဘိူဝ်ဘိူဝ် ဂဲယိူဝ်ဒေဆတီုင် ဂဲညာအာမ်ဒိုည်ႇ။ ဂဲဒါႈ၊ “ငျံန်ပိင်ငျာအီုဝ် ဟာမောအ်ုန်ဘိူန်ဒေဒိူည်အဲႈ၊ အဖုင်တီုင်ဂို ခံင်မှိူမ်အာမ်အီုဝ် ခိူည်မောအ်ုန်ညာဒေရ်ုရ်။ 3အ်ုန်ကာမိူဝ်ႈ လံက်ဆမာ၊ အ်ုန်ကာမိူဝ်ႈ ကွံန်အီမဲ မာရိ၊ အ်ုန်ကာမိူဝ်ႈ ႎည်ယာကုပ်၊ ယောသေ၊ ယုဒဂါရ် ရှိမုန်ဂဲအဲႈ၊ ကာမိူဝ်ႈႎါရပျာအ်ုန်ဂဲ ဂွည်ရူမ်ဇောမ်အယ် အရာပ်အီုဝ်။” ဟွည်ႇဒီန် ဂဲကာရံပ်အ်ုန်။
4 #
ယော ၄.၄၄
ယေဆုဒါႈတဂဲ၊ “ပရောဖက်အီုဝ် ဆဲႈတကုင်ဇာဒိဒေ၊ တက်ုန်ဒီ ခြိူဝ်မျိုဒေဂဲဂါရ် တဂါင်ဒေ၊ ယိူဝ်ဘီရိုဆေအ်ုန် တအရာပ်တွံန်တီ။”
5ဆဲႈအ်ုန်ဂံမ်တီဒေ တပါင်ဘီ ကာချံမ်ဆာဂဲ ပ်ုရ်ဒီ ဒဲႈရောဂါဂဲဟြာည်၊ ဆံင်မှာ်ႈမိူဝ်ႈ အ်ုန်ကာရ်ုရ်ပျစိ နမိလက္ခဏာ ခံင်မှိူမ်အာမ် တအရာပ်ဒီန်။ 6ကောပ်ဘီဂဲ ကာယိူဝ်ဖိူမ်ညှိုမ်ညာခိူည်ဒီန် အ်ုန်အာမ်ညှိုႈ။
ယေဆုပ္လေါည်လာ်ႈ တဘဲႇဒေကိူရ်အာရ်ကူ
(မဿဲ ၁၀.၅–၁၅; လုကာ ၉.၁–၆)
ဟွည်ႇဒီန် ယေဆု လာ်ႈတကုင်ရူဟံရ် က်ုရ်ႎျံရ်ကုင်ဒီန် အ်ုန်ဆာင်ဆောန်ပွံတ် ဘီဂဲ။ 7အ်ုန်တောႇ တဘဲႇဒေကိူရ်အာရ်ကူ ဒဲႈအခွါင်အာဏာ ဘဲဒေရူပ် ကီုရ်နံမ်ကာကျကာလဂဲ၊ အ်ုန်ပ္လေါည်လာ်ႈပွံတ် အာရ်ကူ အာရ်ကူ။ 8#လု ၁၀.၄–၁၁ဟွည်ႇဒီန် အ်ုန်တံမ်ပွံတ်ဂဲ၊ “ဆဲႈဂြိုန်အူညံင် ဆံင်မှာ်ႈမိူဝ်ႈ ပဲမာည်တိူဝ်ႈဒေဒိူည် အတွဒေင်လာ်ႈပဲ။ မုင်ပ်ုန်ဟောမ်၊ ရပျိုဂါရ် ရိူန်ဒဲင်ဂါမိူဝ်ႈ ပဲမာည်ဆ်ုရ်ဒေဒိူည် တရပျိုႎံရ်ညွည်ဒေ။ 9ချူပ်ချှူစာပ်ပဲ၊ ကောည်လိုည် ပဲမာည်ဒိူည် ဆဒေါလှိူဝ်။” 10အ်ုန်ႎီရ်တံမ်ထဲင်ဂဲ၊ “ဂါင်မောမိူဝ်ႈဟွည်ႇ ဘီက်ုန်ရဲ့ရံပ်က်ုရ်တူႈပဲ၊ ဂွည်ဂိူဝ်တဂါင်ဂဲ မောပဲႎီရ်လေႈဒိုရ်အရာပ်ဒီန်။ 11#တ ၁၃.၅၁ပဲက်ုန်ပေါတကုင် ကာရဲ့ရံပ်ဒေက်ုရ်တူႈပဲ က်ုန်ကာမိူဝ်ႈ က်ုန်ကာဆတီုင်ငဲပဲ လေႈလာ်ႈပွံတ်ပဲ၊ အခိင်ပဲလေႈ ဒိုရ်အရာပ်ရဂွည်ဂဲဒီန် အတွဒဲႈအ်ုန်ပဲန် ဆာ့်ဆေလ်ုပ်ဂဲ တခြ်ုရ်ႈပဲတ် မှုင်က်ုန်ဘူႈ တတာႇဇိူင်ပဲအေ့။”
12ဘံန်ညာခိူည်ဒီန် တဘဲႇအ်ုန်ဂဲ လာ်ႈဟောဂြည်ပွံတ် တဘီဂဲ ဒဲႈဂဲလှောႇဖိူမ် ဒိုရ်အပေတ်ဒေ။ 13#ယာ ၅.၁၄ဂဲရူပ်လေႈပဲတ် ကီုရ်နံမ်ချှိုဘ္လံမ်၊ ဖွံန်ဒဲႈအိုမ်နံမ်ငါတာန်လူန် တဘီဆူကာချံမ်ဆာဂဲ ဒဲႈရောဂါဂဲဟြာည်ဒိုည်ႇဒေ။
ဗတ္တိဇံဆရာယောဟန် ယံမ်
(မဿဲ ၁၄.၁–၁၂; လုကာ ၉.၇–၉)
14 #
မ ၁၆.၁၄; မာ ၈.၂၈; လု ၉.၁၉ ဟွည်ႇဒီန် ဆဒါင်ယေဆု ဂံရ်ႈဟိုဟို လာ်ႈရောတ်ပွံတ်တဟျာ့် တာပ်ုရ်မာင်ဟေရုဒ်#၆.၁၄ တာပ်ုရ်မာင်ဟေရုဒ်၊ ဟေရုဒ်အန်တီပါတ်၊ အ်ုန်အူပ်ဘြောင်ကုင်ဂါလိလဲ။ ဘီဂဲပ်ုရ်ဒီဒါႈ၊ “ဗတ္တိဇံဆရာယောဟန်အီုဝ် အ်ုန်ႎီရ်ယိူဝ်ႇအီမ်ဒိုရ်ယံမ်။ ကောပ်ခိူည်ဒီန် အ်ုန်ဘဲဒေရ်ုရ်ပျ အဖုင်တီုင်ဂို နမိလက္ခဏာ။”
15ပ်ုရ်ဒီဂဲဒါႈ၊ “အ်ုန်အီုဝ် မိူဝ်ႈဧလိယ။”
ပ်ုရ်ဒီဂဲဒါႈ၊ “အ်ုန်အီုဝ် မိူဝ်ႈပရောဖက် ခိူည်ပရောဖက်အူဟိူဝ် အူကူကူ။”
16ဘံန်တာပ်ုရ်မာင်ဟေရုဒ် ယိူဝ်ဒေဆတီုင်၊ အ်ုန်ဒါႈ၊ “အီအီုဝ်မိူဝ်ႈ ပ်ုန်က္လက်ုရ်တ်ုတ်ကိင် ပျံမ်ယံမ်ပဲတ်အော ဗတ္တိဇံဆရာယောဟန် ႎီရ်ယိူဝ်ႇအီမ်ဒေယာ့်။” 17အာတ်ဒီန် တာပ်ုရ်မာင်ဟေရုဒ်အီုဝ် ကောပ်အ်ုန်တိူဝ်ႈဆီမ် ပ်ုန်လဲႎါဒေဖိလိပ္ပု ဟေရောဒိ၊ မိူဝ်ႈတိုအ်ုန် ပ္လေါည်လာ်ႈဘီဒေဂဲ တိုည်ယောဟန် ချပဲတ်တန်ုထံင်။ ကောပ်မိူဝ်ႈအ်ုန် တိူဝ်ႈဆီမ်ပ်ုန်လဲႎါဒေ အ်ုန်တရ်ုရ်ခိူည်ဒီန်။ 18ဗတ္တိဇံဆရာယောဟန်ဒါႈ တတာပ်ုရ်မာင်ဟေရုဒ်၊ “မီတိူဝ်ႈဆီမ်ပဲတ် ပ်ုန်လဲႎါဒေဒီန် ကာက်ုရ်ဖြေင်စိဒေ ဇောမ်ထုင်။”
19ဘံန်ညာခိူည်ဒီန် ဟေရောဒိ အူန်ဖိူမ်ရာန်တယောဟန်၊ ဘိူည်ဆ်ုန်ပျံမ်ဂံတ်အ်ုန် ကောပ်တာပ်ုရ်မာင်ဟေရုဒ် အ်ုန်ကာဘိူန်ပဲတ်အခွါင်။ 20ကောပ်တာပ်ုရ်မာင်ဟေရုဒ် နံပ်ယောဟန်မိူဝ်ႈ ဘီရိုဆီုဝ်အူကူ၊ အ်ုန်ယောရိုဆေ ယောဟန် ငိူပ်မေန်အူန်လလပွံတ်အ်ုန်၊ တွံန်အ်ုန်ယိူဝ်ဒေဆတီုင် ငဲပ်ုန်ဂြည် ယောဟန် ဘိူည်ပဲန်ဂံတ် ဖိူမ်ဆျှုဆာႇညှိုႈ အ်ုန်အုင်ဒေဆတီုင် ငဲပ်ုန်ဂြည်အ်ုန်။
21ဘံန်လာ ဟေရောဒိ ဘိူန်ပွံတ်အခွါင်ကျ။ တာပ်ုရ်မာင်ဟေရုဒ်အီုဝ် ဘံန်ရောတ်ဆငီကိူတ်ဒေ အ်ုန်ရ်ုရ်ပ္လေါည်၊ ဖီတ်ပါင် တာဒါင်အစိုယဂဲ၊ တာဒါင်အူပ်ဆီုဝ့်ဂါရ် ဘီအွံရ်ကိင်ဂါလိလဲဂဲ အတွဟောမ်ပ္လေါည်ဒီန်။ 22ဘံန်ကွံန်ရပျာ ဟေရောဒိ#၆.၂၂ ကွံန်ရပျာ ဟေရောဒိ၊ ယိူဝ်တပံပ်ဘေဲႇပ်ုရ်ဒီ အ်ုန်မိူဝ်ႈ ကွံန်အီပ်ုန် ဟေရောဒိ။ လီပ်ကာပျ တပ္လေါည်ဂဲ၊ ဒဲႈဟေရုဒ်ဂါရ် ခဲႇအ်ုန်ဂဲ ပဲန်နွံရ်ႈဖိူမ်ပျော။ ကောပ်ခိူည်ဒီန် တာပ်ုရ်မာင်ဒါႈ တကွံန်ရပျာဒီန်၊ “ဆေမီဆ်ုန်ဘိူန်၊ ဘ်ုရ်ပ်ုန်ဆ်ုန်ဘိူန်မီ အောဒီဒဲႈတမီ။” 23ပည်ငဲကီန်တိူင် ႎီရ်ဒါႈထဲင် တအ်ုန်၊ “ဘ်ုရ်ပ်ုန်မှာန်မီ အောဒီဒဲႈ မောတကပီုန်ကုင်အော အူက်ုန်ဒါႇ။”
24ဘံန်ညာခိူည်ဒီန် ကွံန်ရပျာပီ လာ်ႈဆမွံတ်ပွံတ် မာဒေ၊ “ဆေအောဒီမှာန်အဲႈ။”
မာအ်ုန်ႎီရ်ဒါႈတအ်ုန်၊ “မှာန်ပွံတ်ကိင် ဗတ္တိဇံဆရာယောဟန်။”
25ကွံန်ရပျာဒီန် ႎီရ်လီပ်ဖါည်ဖါည် မှာန်ပွံတ်တတာပ်ုရ်မာင် အူဒီန်တောအူဒီန်၊ “အောဆ်ုန်ဘိူန် ဒဲႈမီတိူဝ်ႈကိင် ဗတ္တိဇံဆရာယောဟန် ဂံမ်တပါင်ဘာန်အီုဝ်။”
26တတာပ်ုရ်မာင်အီုဝ် ဘိူည်ပဲန်ဂံတ် နွံရ်ႈဖိူမ်ကာပျော၊ ကောပ်အ်ုန်အူန်ပဲတ် ငဲကဒိဆေတ်စာ တရအာတ်ခဲႇဒေ၊ အ်ုန်ကာပဲန်ဒေ ႎဲႈထေင် ငဲကွံန်ရပျာဒီန်။ 27ဘံန်ညာခိူည်ဒီန် အ်ုန်ပ္လေါည်လာ်ႈပွံတ် ဘီရဲ့အူကူ တန်ုထံင် အတွတိူဝ်ႈဒေဒိူည် ကိင်ယောဟန် အူဒီန်တောအူဒီန်။ ဘီရဲ့ဒီန်မိူဝ်ႈ လာ်ႈက္လက်ုရ်တ်ုတ်ပွံတ် ကိင်ယောဟန် တန်ုထံင် တိူဝ်ႈပွံတ်ဒေဒိူည်။ 28ဟွည်ႇဒီန် အ်ုန်ဂံမ်ကိင်ဒီန် တပါင်ဘာန် ဒဲႈပွံတ်တကွံန်ရပျာ။ ကွံန်ရပျာဒီန်မိူဝ်ႈ လာ်ႈဒဲႈပွံတ် တမာဒေ။ 29ဘံန်တဘဲႇယောဟန်ဂဲ ယိူဝ်ဒေဆတီုင်အကျံင်ဒီန် ဂဲလာ်ႈ တိူဝ်ႈဒေဒိူည် တိုဘီယံမ် ဆာင်ဂျိုပွံတ် တဘီုင်ဆာင်ခဲင်။
ယေဆု ဟျံင်ဘီဖံန်ဟြဲင်ဟောမ်
(မဿဲ ၁၄.၁၃–၂၁; လုကာ ၉.၁၀–၁၇; ယောဟန် ၆.၁–၁၄)
30တမန်ဇ်ုဂဲ ႎီရ်လာ်ႈက်ုရ်စုဒိုည်ႇဒေ တရအာတ်ယေဆု၊ ဘ်ုရ်မောဂဲဆာင်ဆောန် ရ်ုရ်ဒေဒိူည် ဂဲဂြည်ဒိုည်ႇ အ်ုန်ဆတီုင်။ 31အကျံင်ဒီန်မိူဝ်ႈ ဘံန်ဘီလီပ်လီပ်လေႈလေႈ ကီုန်လူတ်လာည် ယေဆုဂါရ် တဘဲႇအ်ုန်ဂဲ ဂိူပ်ကာတံန်ဒေဟောမ် ပ်ုန်ဟောမ်၊ ဘံန်ညာခိူည်ဒီန် အ်ုန်ဒါႈတဂဲ၊ “အယ်လာ်ႈရလူဘိူဝ် ရာင်ကောည် တအရာပ်ကာယိူဝ်ဘီ။” 32ကောပ်ခိူည်ဒီန် ဂဲဘရိူဝ် ရာင်ကောည်ဒေ လာ်ႈပွံတ် တအရာပ်ယေန်ညီမ်။
33ဘံန်ဘီဘာ့်ဘာ့်ဘိူဝ်ဘိူဝ်ဂဲ ယိူဝ်ဒေငိူပ် ဂဲလေႈလာ်ႈပွံတ်ဒိုည်ႇဒေ ညာခိူည်ဒီန်၊ ဂဲနံပ်ပွံတ် အဆေဂဲမိူဝ်ႈ။ ဘံန်ညာခိူည်ဒီန် ဂဲလေႈဒိုည်ႇ ဒိုရ်ကုင်ဒိုရ်ရူဒေ ခူန်လာ်ႈဇောမ်ရဒေင်ဆိုရ် ဂဲလာ်ႈရောတ်ဇံဝ်ပွံတ် ဒိုရ်ယေဆုဂါရ် တဘဲႇအ်ုန်ဂဲ။ 34#မ ၉.၃၆အခိင်ယေဆု လေႈဒိုရ်ပါင်ရိူဝ်၊ အ်ုန်ယိူဝ်ဒေငိူပ် ဖုင်ဘီက်ုရ်စုဒါင် ညာခိူည်ဆို ကာယိူဝ်ဘီထိင်။ ဘံန်ညာခိူည်ဒီန် အ်ုန်ယိူဝ်ပွံတ် နွံရ်ႈဖိူမ်က်ုရ်ႎေဂဲ ဆာင်ဆောန်ပွံတ်ဂဲ အကျံင်တွံန်နဲ။ 35ဘံန်စူန်အံပ် တဘဲႇအ်ုန်ဂဲ လာ်ႈဇူအ်ုန် ဂဲဒါႈ၊ “အရာပ်အီုဝ် မိူဝ်ႈအရာပ်ကာယိူဝ်ဘီ၊ အခိင်မိူဝ်ႈဟွည်ႇလာယာ့်။ 36ပ္လေါည်ဒဲႈဘီဂဲအီုဝ် လာ်ႈဇိူရ်ႈအူနဲအူနဲ အတွပ်ုန်ဟောမ်ဒေ တက်ုရ်ႎျံရ်ရူအီုဝ်။”
37ယေဆုႎီရ်ဒါႈတဂဲ၊ “ဒဲႈပဲဒဲႈ အတွပ်ုန်ဟောမ်ဂဲ အူနဲအူနဲ။”
အခိင်ဒီန် ဂဲႎီရ်ဒါႈ၊ “တယဲအီုဝ် ယိူဝ်ဂိူဝ်ရိူန်ဒဲင်ဂါ#၆.၃၇ ရိူန်ဒဲင်ဂါ၊ ရိူန်ဒဲင်ဂါအူပံင်အီုဝ်မိူဝ်ႈ ဘီစာင်ဒေ ရ်ုရ်ကာန်တရူတဂါင် အတွရူႈရဲင်ရ်ုရ်ကာန်ဂဲ တွံန်ဆငီ (ငိူပ်မေန် မ ၂၀.၂)။ အာရ်ပ်ုရ်ယာႈ၊ ခိူည်မောယဲဒီညာ ယဲလာ်ႈဇိူရ်ႈဒဲႈမုင် အတွပ်ုန်ဟောမ်ဂဲ။”
38ကောပ်ခိူည်ဒီန် ယေဆုဆ်ုရ်မွံတ်ဂဲ၊ “လာ်ႈငိူပ်မေန်၊ တပဲယိူဝ်မုင် ဒါင်ပံင်အဲႈ၊”
ဘံန်ဂဲဟွည်ႇလာ်ႈငိူပ်၊ ဂဲႎီရ်ဒါႈတအ်ုန်၊ “ယိူဝ်ဂိူဝ်မုင်ဖံန်ပံင်ဂါရ် ကာအာရ်တို။”
39ဟွည်ႇဒီန် ယေဆုဆူတ် တဘဲႇဒေဂဲ ဒဲႈဘီဂဲမာ့် တပါင်ကီုရ်ဘာန်ငျံရ် ပေန်က်ုရ်စု ပေန်က်ုရ်စု။ 40ဘံန်ညာခိူည်ဒီန် ဘီဂဲမာ့်က်ုရ်တျံရ်ဒေ အူပ်ုရ်ယာႈက်ုရ်စု၊ ဖံန်ကိူရ်က်ုရ်စု။ 41အခိင်ဒီန် ယေဆု တိူဝ်ႈပွံတ်မုင်ဖံန်ပံင်ဂါရ် ကာအာရ်တို ဆိူန်ဂိူဝ်ႈပွံတ်တပ္လေင်၊ ဟွည်ႇတာင်ဂုင်ကေစူဖြာ။ အ်ုန်က်ုရ်ပ္လဲႈပွံတ်မုင် ဒဲႈတဘဲႇဒေဂဲ က်ုရ်ဆာင်တဘီဂဲ။ စံမ်ညာခိူည်ဒီန် အ်ုန်က်ုရ်ဆာင်ဒဲႈပွံတ် ကာအာရ်တိုဒီန် တဘီဂဲဒိုည်ႇဒိုည်ႇ။ 42ဘီဒိုည်ႇဒိုည်ႇဂဲဒီန် ဟွည်ႇဟောမ်ဟိူဝ့်။ 43ဟွည်ႇဒီန် တဘဲႇအ်ုန်ဂဲ ထွံရ်အူန်ပ်ုန်ကီုတ် မုင်ဂါရ် ကာ က်ုရ်ပူက်ုရ်ပိုတ်ဒီန် ဘိူန်ပွံတ်ဂုဒါင် အူကိူရ်အာရ်ဂုနာ့်နာ့်။ 44ဘ်ုရ်ဂွည် အီအ်ုန်ဟောမ်မုင်ဒီန် မိူဝ်ႈဂိူဝ်အီမဲဒါင်ဂဲ လာပ်လာပ် ယိူဝ်ဖံန်ဟြဲင်။
ယေဆု လာ်ႈပါင်အိုမ်
(မဿဲ ၁၄.၂၂–၃၃; ယောဟန် ၆.၁၅–၂၁)
45ယာမ်ယေဆု ဒဲႈဖုင်ဘီက်ုရ်စုဂဲႎေင် အ်ုန်ဆူတ်ပွံတ်တဘဲႇဒေဂဲ ဟာ့်တပါင်ရိူဝ်၊ ဒဲႈဂဲႎါည်လာ်ႈပွံတ်ရအာတ် ဆဲႈပြါအိုမ်ဆက္လုင် လ်ုပ်တည် ကုင်ဗက်ဇဲဒ အူဒီန်တောအူဒီန်။ 46ဟွည်ႇဒီန် အ်ုန်ငဲက်ုရ်ကာႈ တဘီဂဲ၊ အ်ုန်စွဟာ့်ပွံတ်ဒေ တပါင်ဆိုရ် အတွဆုတောင်။ 47ရောတ်အခိင်ရမှိူဝ် ရိူဝ်ဂဲဒီန် ဂွည်ပဲတ်ဒေ တက်ုန်ဒီအိုမ်ဆက္လုင်။ ယာမ်ဒီန် ကီုတ်ဂိူဝ်ယေဆု ဒါ့်ဂွည်ပဲတ်ဒေ တပြါအိုမ်။ 48အ်ုန်ယိူဝ်ဒေငိူပ် တဘဲႇဒေဂဲ ဒါလာႇဒါ့်ႎါည်အိုမ် ကောပ်ခူရ်တာ်ႈကာက်ုရ်တော ဂဲအိူရ်ဒိုည်ႇဒေ၊ ဘံန်ညာခိူည်ဒီန် ရႎါရ်ႈစူန်ပ္လါင် အ်ုန်လာ်ႈပွံတ်ပါင်အိုမ် ရဲန်ဒေက်ုရ်ခါမ်#၆.၄၈ က်ုရ်ခါမ်၊ က်ုန်ကာမိူဝ်ႈ က်ုရ်ပိုမ်ဇောမ်ဂဲ။ လာ်ႈပြောဂဲ။ 49ဘံန်တဘဲႇအ်ုန်ဂဲယိူဝ်ဒေငိူပ် အ်ုန်လာ်ႈပါင်အိုမ် ညာခိူည်ဒီန် ဂဲထာင်အ်ုန်မိူဝ်ႈကီုရ်ဘူ ဂဲပြိုႈဒိုည်ႇဒေရျံင်။ 50ဘံန်ဂဲ ယိူဝ်ဒေငိူပ်အ်ုန် ဂဲယောလူတ်လာည် ယူႈယူႈယ်ုရ်ယ်ုရ်ဒိုည်ႇဒေ။
ကောည်လိုည် ယေဆုငဲပွံတ်တဂဲ အူဒီန်တောအူဒီန်၊ “ဒဲႈနွံရ်ႈဖိူမ်ပဲညီမ်၊ မိူဝ်ႈအောမိူဝ်ႈ၊ ပဲမာည်ယော။” 51ဟွည်ႇဒီန် အ်ုန်ဟာ့်ဇူပွံတ်ဂဲ တပါင်ရိူဝ်၊ ခူရ်ဒါင်မိူဝ်ႈ ညီမ်ပွံတ်ဒေ၊ ဘံန်ညာခိူည်ဒီန် တဘဲႇအ်ုန်ဂဲ ညာအာမ်ဒိုည်ႇပွံတ်ဒေ။ 52ကောပ်မိူဝ်ႈနွံရ်ႈဖိူမ်ဂဲ ခေါလူတ်လာည် ဂဲကာနံပ်ပဲတ်အိုမ်ငဲ အကျံင်အ်ုန်ဟျံင်ဘီဖံန်ဟြဲင် ဟောမ်မုင်။
ယေဆု ဒဲႈဘီဆူဖိူဝ် န်ုကုင်ဂင်္နေသရက်ဂဲချံမ်ဆာ
(မဿဲ ၁၄.၃၄–၃၆)
53ဟွည်ႇဒီန် ဂဲႎါည်က်ုရ်ခါမ်လာ်ႈ အိုမ်ဆက္လုင် ဘံန်ဂဲရောတ် ဆဲႈပြါအိုမ် တကုင်ဂင်္နေသရက်၊ ဂဲဒါ့်ပွံတ်ရိူဝ်ဒေ။ 54အခိင်ဂဲလေႈ ဒိုရ်ရိူဝ်၊ ဘံန်ဘီဂဲတံင်ပွံတ်ယေဆု အူဒီန်တောအူဒီန်၊ 55ဘံန်ညာခိူည်ဒီန် ဂဲခူန်လာ်ႈပွံတ် တအရာပ်တွံန်တီ၊ ဟွည်ႇဒီန် ဂဲဒေါဒေဒိူည်လာ်ႈပွံတ် ဘီဆူဖိူဝ်ဂါရ် ရအီတ်ဂဲ တအရာပ် ယိူဝ်ဒေဆတီုင် ဟာရဂွည် ယေဆု။ 56အရာပ်ရစွလာ်ႈ ယေဆုတွံန်တီ၊ တကုင်မိူဝ်ႈဟွည်ႇ၊ တရူမိူဝ်ႈဟွည်ႇ က်ုန်ကာမိူဝ်ႈ တနာမိူဝ်ႈဟွည်ႇ ဘီဂဲဒီန် ဒေါဒေဒိူည် ဘီဆူဖိူဝ်ဂဲ လာ်ႈချအူန်ပဲတ်ဂဲ တအရာပ်တကာတ်၊ ဂဲမှာန်အခွါင်တအ်ုန် ဒဲႈဂဲဘိူန်ဒေဒါတီ ထိကဆိုည်ဆဒေါအ်ုန်။ ဘ်ုရ်ယိူဝ်ဘီဂဲဘိူန်ဒေထိဒိုည်ႇ ကဆိုည်ဆဒေါအ်ုန်ဒီန် ဂဲဘိူန်ဒိုည်ႇဒေချံမ်ဆာ။
Dewis Presennol:
မာကု 6: SPBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Word for the World International and The Shwe Palaung Bible Translation Reviewer Committee.