မာကု 2
2
ယေဆု ဒဲႈဘီဘ်ုပ်တီဇိူင်ဇ်ုမ် ချံမ်ဆာ
(မဿဲ ၉.၁–၈; လုကာ ၅.၁၇–၂၆)
1ဟွည်ႇဇီုဝ့်အူႎံင် ယေဆု ႎီရ်လီပ်ဒေ တကုင်ကပေရနောင်၊ ဘီဂဲယိူဝ်ဒေဆတီုင် ဆဒါင် အ်ုန်ဒါ့်ဂွည်ဒေတဂါင်။ 2ဘီဘာ့်ဘာ့်ဘိူဝ်ဘိူဝ်ဂဲ လာ်ႈက်ုရ်စုဒိုည်ႇဒေ တရအာတ် ဘာင်ဘိုႈဂါင် မောဂိူပ်ကာယိူဝ်ရဂွည်၊ ယေဆု ဒါ့်ဟောဂြည် ဒဲႈဂဲဆတီုင် ငဲတရာ။ 3ယာမ်ဒီန် ဘီဖိုန်ကူဂဲ က်ုရ်ကွံက်ဒေဒိူည်လာ်ႈ ဘီဘ်ုပ်တီဇိူင်ဇ်ုမ် အူကူ ပေါတယေဆု။ 4ကောပ်ဘီက်ုရ်စု ကီုန်လူတ်လာည်၊ ဘံန်ဂဲကာဘိူန်ဒေဒိူည်လာ်ႈ တအ်ုန်၊ ဂဲဟာ့်ပွံတ်တကြောင်ဂါင် တက်ုရ်ႎိူည်ယေဆု။ ဘံန်ဂဲဟွည်ႇစာ်ႈ လျှပိူဝ်ႈက်ုရ်ဘာ့်ဂါင်၊ ပျာ်ႈတခြုံရ်လေႈပွံတ် ဘီဘ်ုပ်တီဇိူင်ဇ်ုမ်ဂါရ် ပေရ်ရအီတ်အ်ုန်။ 5ဘံန်ယေဆုယိူဝ်ဒေငိူပ် ဖိူမ်ညှိုမ်ဂဲ၊ အ်ုန်ဒါႈ တဘီဘ်ုပ်တီဇိူင်ဇ်ုမ်ဒီန်၊ “အိူဝ် ကွံန်အီမဲအော၊ ပ္လိုတ်ခွါင်ဒဲႈ အပေတ်ပ်ုန်လူတ်မီယာ့်။”
6ကောည်လိုည် တာဆရာနံပ်ဘေဲႇကျံမ်ပ်ုရ်ဒီဂဲ မာ့်အရာပ်ဒီန် ဒါ့်စေ့ကူရာင်ကွည်ဒေ တန်ုဖိူမ်၊ 7“အီကူအီုဝ် ကောပ်ဆေ အ်ုန်ယာႇဂြည်ငဲ ခိူည်အီုဝ်။ အ်ုန်အီုဝ် မိူဝ်ႈဂြည်ငဲ ပ်ုန်ဘဝ်ဖြာ။ ဆဲႈဖြာအူပါ အဆေဘဲဒေ ပ္လိုတ်ခွါင်ဒဲႈ အပေတ်ပ်ုန်လူတ်အီုဝ်။”
8ခိူည်မောဂဲ စေ့ကူဆာင်ချာင်တန်ုဖိူမ်ဒေ ယေဆု နံပ်ပွံတ် အူဒီန်တောအူဒီန်၊ အ်ုန်ဒါႈတဂဲ၊ “ကောပ်ဆေ ပဲစေ့ကူဆာင်ချာင် တန်ုဖိူမ်ပဲ ညာခိူည်ဒီန်။ 9ငဲခိူည်မောငှိူည်တဒါႈ တဘီဘ်ုပ်တီဇိူင်ဇ်ုမ်အီုဝ်၊ ငှိူည်တဒါႈ၊ ‘ပ္လိုတ်ခွါင်ဒဲႈ အပေတ်ပ်ုန်က်ုရ်လူတ်မီ’ က်ုန်ကာမိူဝ်ႈ ‘ယိူဝ်ႇဇံင်၊ ဒေါပေရ်ရအီတ်မီ လာ်ႈပွံတ်အဲႈ။’ 10အောဒီပျဆာ့်ဆေ ဒဲႈပဲနံပ်၊ ခိူည်မောကွံန်ဘီအီုဝ် ယိူဝ်အခွါင်အာဏာ ပ္လိုတ်ခွါင်ဒဲႈ အပေတ်ပ်ုန်လူတ်ဘီ တပါင်ကံမ်ဖာအီုဝ်။” ဘံန်ညာခိူည်ဒီန် အ်ုန်ဒါႈတဘီဘ်ုပ်တီဇိူင်ဇ်ုမ်ဒီန်၊ 11“အောဂြည်တမီ၊ ယိူဝ်ႇဇံင်၊ ဒေါပေရ်ရအီတ်မီ ႎေင်ပွံတ်တဂါင်။”
12အခိင်ဒီန် ဘီဘ်ုပ်တီဇိူင်ဇ်ုမ်ဒီန်မိူဝ်ႈ၊ ယိူဝ်ႇဇံင် တိူဝ်ႈပွံတ်ပေရ်ရအီတ်ဒေ၊ လာ်ႈဖာည်ဖာည်ပွံတ် တဟာရဆငါည်။ ဂဲညာအာမ်ဒိုည်ႇပွံတ်ဒေ၊ ဂဲဒါႈ၊ “ညာခိူည်ပ်ုန်ပဲန်အ်ုန်အီုဝ် အူလိူဝ်ႈမိူဝ်ႈ အယ်ကာကျာင်ယိူဝ်စိ အယ်ငိူပ်။” ဟွည်ႇဒီန် ဂဲဟိုင်တာင်ပွံတ်ဂုင်ဖြာ။
ယေဆု တောႇလေဝိ
(မဿဲ ၉.၉–၁၃; လုကာ ၅.၂၇–၃၂)
13ယေဆု ႎီရ်လာ်ႈထဲင် တပြါအိုမ်ဆက္လုင်ဂါလိလဲ။ ဘံန်ဘီက်ုရ်စုဂဲဒီန် လာ်ႈရောတ် တအ်ုန်၊ အ်ုန်ဆာင်ဆောန်ပွံတ်ဂဲ။ 14ယာမ်ယေဆုစွလာ်ႈ ရာင်ကွည်ဒေ၊ အ်ုန်ယိူဝ်ဒေငိူပ် ကွံန်အီမဲအာလဖဲ လေဝိ၊ ဒါ့်မာ့်ဒေ တလူမ်ကာ့်အခူန်။ ယေဆုဒါႈတအ်ုန်၊ “ဇောမ်လာ်ႈ ရဘံန်အော။” လေဝိဒီန်မိူဝ်ႈ ယိူဝ်ႇဇောမ်လာ်ႈပွံတ် ရဘံန်အ်ုန်။
15ယာမ်ယေဆု လီပ်မာ့်ဟောမ်မှိူဝ် တန်ုဂါင်လေဝိ။#၂.၁၅ တန်ုဂါင်လေဝိ၊ က်ုန်ကာမိူဝ်ႈ တအ်ုန် (အ်ုန်ဒီန် မိူဝ်ႈယေဆု) ဂါင်။ အီအ်ုန်ကာ့်အခူန်ဂဲဂါရ် အီအ်ုန်ယိူဝ်အပေတ်ဂဲဒီန် လာ်ႈက်ုရ်စုဒေဟောမ် ဇောမ်ယေဆုဂါရ် တဘဲႇအ်ုန်ဂဲ တဘွည်။ 16အခိင်ဒီန် အီအ်ုန်မိူဝ်ႈ ဖာရိရှဲ တာဆရာနံပ်ဘေဲႇကျံမ်ပ်ုရ်ဒီဂဲ၊ ဘံန်ယိူဝ်ဒေငိူပ် ယေဆု ဒါ့်တျံင်ဟောမ်ရူမ် ဇောမ်အီအ်ုန်ယိူဝ်အပေတ်ဂါရ် အီအ်ုန်ကာ့်အခူန်ဂဲဒီန်၊ ဂဲဆ်ုရ်မွံတ်ပွံတ် တဘဲႇအ်ုန်ဂဲ၊ “ကောပ်ဆေ အ်ုန်တျံင်ရူမ်ဟောမ်ရူမ် ဇောမ်ဘီဂဲ ညာခိူည်အီုဝ်။”
17ဘံန်ယေဆု ယိူဝ်ဒေဆတီုင်၊ အ်ုန်ႎီရ်ဒါႈတဂဲ၊ “ဘီချံမ်ဆာကာယိူဝ်ရောဂါဂဲအီုဝ် ကာလိုစိ ဆရာႎူန်၊ ဘီကာချံမ်ဆာဆူဖိူဝ်ဂဲအီုဝ်ဂိူဝ် လိုဆရာႎူန်။ ကာမိူဝ်ႈစိ အောလာ်ႈပေါ အတွတောႇ ဘီရိုဆီုဝ်ဂဲ၊ မိူဝ်ႈအောလာ်ႈပေါ အတွဝောာႇ အီအ်ုန်ယိူဝ်အပေတ်ဂဲ။”
ပ်ုန်ဆ်ုရ်မွံတ် အကျံင်စံင်ႎဲႈပ်ုန်ဟောမ်
(မဿဲ ၉.၁၄–၁၇; လုကာ ၅.၃၃–၃၉)
18ယာမ်ဒီန်အူဆငီ တဘဲႇဇောမ်ရဘံန် ဗတ္တိဇံဆရာယောဟန်ဂါရ် ဖာရိရှဲဂဲဒီန် ဒါ့်စံင်ႎဲႈပ်ုန်ဟောမ်။ ဘီဂဲ ပ်ုရ်ဒီလာ်ႈရောတ်ဒေ ဆ်ုရ်မွံတ်တယေဆု၊ “တဘဲႇဗတ္တိဇံယောဟန်ဂဲဂါရ် တဘဲႇဖာရိရှဲဂဲ ဘိူည်စံင်ႎဲႈပ်ုန်ဟောမ်၊ ကောပ်ဆေ တဘဲႇမီဂဲ ကာပဲန်ဒေ စံင်ႎဲႈပ်ုန်ဟောမ်။”
19ယေဆု ႎီရ်ဒါႈ၊ “ယာမ်ခြိူဝ်မျို၊ ဘူဂေါဘူဆေ ရလျံင်ကူခံတ်ဂဲဒီန် ဂွည်ရူမ်ဇောမ်အ်ုန် ဂဲဒီပဲန်ကောဒေ စံင်ႎဲႈပ်ုန်ဟောမ်အဲႈ။ ဒံင်ဂဲဂွည်ရူမ် ဇောမ်ရလျံင်ကူခံတ်ဒီန် ဂဲကာပဲန်စိဒေ စံင်ႎဲႈပ်ုန်ဟောမ်။ 20ကောည်လိုည် ဒီရောတ်ပေါ ဆငီတောႇဒိူည်လာ်ႈ ရလျံင်ကူခံတ်ဒီန် ဒိုရ်ဂဲ၊ က်ုန်ရောတ် ခိင်ခါဝ်ဆငီဒီန် ဂဲဒီန် ဒီစံင်ႎဲႈဒိုည်ႇပ်ုန်ဟောမ်။
21“အဆေမိူဝ်ႈ ကာကျာင်စိဒေ ဒါပိဘံန်က်ုန်မဲ က်ုန်ဘာင်ဆဒေါပြီမ်၊ က်ုန်ညာခိူည်ဒီန် ပ်ုန်က်ုန်ဘာင်အူန် ပိဘံန်က်ုန်မဲပီ ဘံန်အ်ုန်ဟောမ်ဆဒေါပြီမ် ဘီုင်ဆမာႎါႈနာပွံတ်ဒေ။ 22စံမ်ညာခိူည်ဒီန် အဆေမိူဝ်ႈ ကာကျာင်လှ်ုပ်စိ အိုမ်မရာတ်က်ုန်မဲ တပေါႇဆရေပြီမ်။ က်ုန်လှ်ုပ်ညာခိူည်ဒီန် ဘံန်အိုမ်မရာတ်က်ုန်မဲ ဒဲႈပေါႇဆရေပြီမ်ဒီန် က်ုရ်ဆဲႈ ပည်အိုမ်မရာတ်၊ ပည်ပေါႇဆရေ ဒီလူပွံတ်ဒေ။ အိုမ်မရာတ်က်ုန်မဲဒီန် ဘိူန်ဂိူဝ်လှ်ုပ် တပေါႇဆရေက်ုန်မဲ။”
ပ်ုန်ဆ်ုရ်မွံတ် အကျံင်ဆငီဆဒါင်
(မဿဲ ၁၂.၁–၈; လုကာ ၆.၁–၅)
23တန်ုဆငီဆဒါင်၊ ယာမ်ယေဆု စွက်ုရ်ခါမ်လာ်ႈ ကီုရ်ဘူမ်ရဆ်ုမ်ငှေါ ပ်ုရ်ဒီ။ တဘဲႇအ်ုန်ဂဲ လာ်ႈရူမ်ဇောမ်အ်ုန်၊ ပ်ုတ်ပွံတ်ပ္လေငှေါ။ 24ကောပ်ခိူည်ဒီန် ဖာရိရှဲ ဂဲဒါႈ တယေဆု၊ “ငိူပ်မေန်၊ တန်ုဆငီဆဒါင်၊ ကောပ်ဆေ တဘဲႇမီဂဲ ရ်ုရ်ညာ ထုင်ပ်ုန်ကာမှိူမ်ရ်ုရ်အဲႈ။”
25ယေဆု ႎီရ်ဒါႈတဂဲ၊ “ပဲကာတိူမ်ဒီရ်ႈဂံတ်၊ အခိင်ဒါဝိဒ်ဂါရ် ဘူဂေါအ်ုန်ဂဲ ကာယိူဝ်ပ်ုန်ဟောမ် ဘံန်က်ုန်ဘြာန်လူတ်လာည်၊ ဆေဂဲရ်ုရ်ဒေဒိူည်။ 26ဘံန်ညာခိူည်ဒီန် အ်ုန်လီပ်ပွံတ် တန်ုဂါင်ဖြာ တိူဝ်ႈဒေဟောမ် မုင်ပ်ုန်လှူကာပ်ဒဲႈ တဖြာ။ အ်ုန်ရ်ုရ်ညာခိူည်ဒီန် မိူဝ်ႈယာမ်လာႇထာႇ အဗျာသာ ပဲန်တာဒါင်ယဇ်ပုရောဟိတ်။ က်ုန်မိူဝ်ႈထုင်ပိင်ငျှံပ်အယ် ဆဲႈတာယဇ်ပုရောဟိတ် အဆေမိူဝ်ႈကာယိူဝ်စိ အခွါင်ဟောမ် မုင်ပ်ုန်လှူဒီန်၊ ကောည်လိုည် ဒါဝိဒ် ဟွည်ႇဟောမ် အ်ုန်ဒဲႈ ပည်ဘူဂေါဒေဂဲ ဟောမ်။”
27ဟွည်ႇဒီန် ယေဆုႎီရ်ဒါႈထဲင်၊ “ဆငီဆဒါင်အီုဝ် မိူဝ်ႈဖာန်ဇာမ်အူန် အကျိုကျ အတွဘီ။ ကာမိူဝ်ႈစိ ဖာန်ဇာမ်ဘီ အတွဆငီဆဒါင်။” 28“ကောပ်ခိူည်ဒီန် ကွံန်ဘီအီုဝ်မိူဝ်ႈ ပည်ကီုရ်ညာ ဆငီဆဒါင်။”
Dewis Presennol:
မာကု 2: SPBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Word for the World International and The Shwe Palaung Bible Translation Reviewer Committee.