မာကု 13
13
ယေဆုဂြည် အကျံင်ကျောင်ဗိမာန် ဒီလူ
(မဿဲ ၂၄.၁–၂; လုကာ ၂၁.၅–၆)
1ယာမ်ယေဆု လေႈဒိုရ်ကျောင်ဗိမာန်၊ န်ုတဘဲႇအ်ုန်ဂဲအူကူ ဒါႈတအ်ုန်၊ “ငိူပ်ဘိူဝ် တာဆရာ၊ က်ုန်လူမ်မိုဒါင်ဂါရ် ဂါင်ခီုဝ့်ဂါင်ဒါင် ဘ္လံမ်ညှိုႈအာ်။”
2ယေဆု ႎီရ်ဒါႈ၊ “မီယိူဝ်ဂိူဝ်ဒေငိူပ် ခိူည်ဂါင်ခီုဝ့်ဂါင်ဒါင်ညှိုႈအီုဝ် ကာမိူဝ်ႈ။ အရာပ်အီုဝ် က်ုန်လူမ်မိုဒိုည်ႇဒိုည်ႇ ဒီဘ်ုပ်က်ုရ်တူႈယာႈဒိုည်ႇ၊ က်ုန်လူမ်မိုအူပံင်လိုည် ကာဒါ့်ကီုတ်ယာ့်ဒေ။”
ဒုခနာ့်နွံရ်ႈဂါရ် ဆဂေလာလီညာ
(မဿဲ ၂၄.၃–၁၄; လုကာ ၂၁.၇–၁၉)
3ဟွည်ႇဒီန် ယေဆုဟာ့်မာ့်ဒေ တပါင်ဆိုရ်တာန်လူန်၊ က်ုရ်ပံတ်ငါည်ဒေ လ်ုပ်ကျောင်ဗိမာန်၊ ယာမ်အ်ုန်ဂွည်ရာင်ကောည်ဒေ ပေတရု၊ ယာကုပ်၊ ယောဟန်ဂါရ် အန္ဒြေ လာ်ႈဇူဒိုည်ႇဒေဆ်ုရ်မွံတ်အ်ုန်။ 4ဂဲဒါႈ၊ “ခိူည်ပ်ုန်ဒီပဲန်လာ်ႈဒိုည်ႇဒိုည်ႇအီုဝ် ဘံန်မောအ်ုန်ဒီပဲန်ဂါရ် အကျံင်နမိလက္ခဏာအီုဝ် ဘံန်မောအ်ုန်ဒီဇာ်ႈရောတ် ဂြည်ဘိူဝ်တယဲစိ။” 5ယေဆုဒါႈ တဂဲ၊ “မာည်ဒဲႈအဆေ ဘိူန်ဒေချှောႇကဝ်ပဲ အူန်ဒိုည်ႇဆဒိအေ့။ 6ဘီဘာ့်ဘာ့်ဘိူဝ်ဘိူဝ်ဂဲဒီန်၊ ဒီတိူဝ်ႈဒေဒါဇီုဝ်အော ရောတ်ပေါဒေဒါႈ၊ ‘အောမိူဝ်ႈ အ်ုန်ယာ့်၊’ ဟွည်ႇဒါႈခိူည်ဒီန် ဒီချှောႇကဝ်ဒိုည်ႇဘီဂဲ။ 7အခိင်ပဲယိူဝ်ဒေဆတီုင် ဆဒါင်က်ုရ်တီုဝ့်ဆီုဝ့်ဂါရ် ဆဒါင်ဘီဂဲရဲန်ဒေက်ုရ်တီုဝ့်ဒီန် ပဲမာည်အူန်နွံရ်ႈဖိူမ်ဒေယော။ ခိူည်အကျံင်ဒီန် ဒီဘ်ုပ်ပဲန်ညှိုႈ၊ ကောည်လိုည် ညှံမ်ရောတ်စိ တဟာတိူဝ်ႇဟာဆူတ်။ 8ခြိူဝ်မျိုဘီ အူမျိုတော အူမျိုဂါရ် ကပီုန်ကုင် အူကုင်တော အူကုင် ဒီက်ုရ်ရာန်ဒိုည်ႇဒေ၊ တအရာပ်တွံန်တီမိူဝ်ႈ အီမ်ယာဒီယူႈ၊ ဒီက်ုရ်တူႈရာႇဟောမ်ရာႇဒါ။ အီအီုဝ်မိူဝ်ႈ ႎိုည်ဒနာ စဒေတဲကိူတ်ႎါ။
9 #
မ ၁၀.၁၇–၂၀; လု ၁၂.၁၁,၁၂ “ဒဲႈပဲအူန်ဆဒိ တတိုဒေ။ ဘီဂဲ ဒီအာပ်ဒိုည်ႇပဲ တလူမ်တရာ။ ပဲဒီဘ်ုပ်ဒေက်ုရ်တူႈ ဘီဂဲလ်ုရ်ႈဒိုည်ႇဒေ တကျောင်ရဆောန်ဒဲႈတရာ၊ ကောပ်ပဲဂြည်ဆဒါင်ကျ ပဲန်ဆာ့်ဆေအတွအော ပဲဒီဘ်ုပ်ဒေဇံင် တရအာတ်ဘီအူပ်ဘြောင်ဂါရ် တရအာတ်ခူန်ဟောခံမ်။ 10ဟွည်ႇဒီန် ဒီဘ်ုပ်ဟောဂြည်ဇံဝ် ဆဒါင်ကျအီုဝ် တခြိူဝ်မျိုဘီဂဲ ဒိုည်ႇဒိုည်ႇ။ 11အခိင်ဘီဂဲတောႇဒေဒိူည် လာ်ႈအာပ်ဒိုည်ႇပဲ တလူမ်၊ ခိူည်မောပဲ ဒီညာဒေဂြည် ပဲမာည်ယိူဝ်နွံရ်ႈဟဇံဝ်၊ အခိင်ဒီန် ကာမိူဝ်ႈစိတိုပဲ ဂြည်၊ မိူဝ်ႈႎိငျံန်ဆပဲ ဒီဂြည်။ 12ခိင်ခါဝ်ဒီန် အူႎါႎည် အူကူတောအူကူ ဒီက်ုရ်အာပ်ဒိုည်ႇဒေ တယံမ်၊ စံမ်ညာခိူည်ဒီန် ကူန်မိူဝ်ႈ ဒီအာပ်ဒိုည်ႇကွံန်ႎါဒေ တယံမ်။ ကွံန်ႎါဂဲမိူဝ်ႈ ဒီရာန်ကူန်မာဒေ အာပ်ဒဲႈဒိုည်ႇဂဲတယံမ်။ 13#မ ၁၀.၂၂ ကောပ်ဇီုဝ်အော ဘီဂဲတွံန်ကူ ဒီရအီရ်ႈဒိုည်ႇပဲ။ ကောည်လိုည် အဆေမိူဝ်ႈဟွည်ႇ က်ုန်ယိူဝ်ဆတ်စာ မောဂိူပ်ပေါ တဟာတိူဝ်ႇဟာဆူတ် ဒီဘိူန်ပ်ုန်လောတ်။”
ခံင်မှိူမ်ရအီရ်ႈမှိူမ်ယော
(မဿဲ ၂၄.၁၅–၂၈; လုကာ ၂၁.၂၀–၂၄)
14“ပဲဒီယိူဝ်ဒေငိူပ် ‘ခံင်မှိူမ်ရအီရ်ႈမှိူမ်ယော’ ဒါ့်ဇံင်ဒေ တအရာပ်ကာမှိူမ်ဇံင်ဒီန်။” (အီအ်ုန်ဒီရ်ႈဘေဲႇ၊ ဒဲႈအ်ုန်နံပ်အိုမ်ငဲ ပ်ုန်ဒါႈအ်ုန်)။ ဟွည်ႇဒီန် အီအ်ုန်ဂွည် တကပီုန်ကုင်ယုဒ ဒဲႈဂဲဒူဟာ့်ဒိုည်ႇဒေ တပါင်ဆိုရ်။ 15#လု ၁၇.၃၁အီအ်ုန်ဂွည်ဒေ တပါင်ကြောင်ဂါင် ဆံင်မှာ်ႈမိူဝ်ႈမာည်ဒဲႈအ်ုန်ႎီရ်လေႈတိူဝ်ႈ တရန်ုဂါင်။ 16အီအ်ုန်ဂွည်တနာ မာည်ဒဲႈအ်ုန် ႎီရ်ႎေင်တိူဝ်ႈဆဒေါဒါင်ဒေ တဂါင်။ 17တန်ုဆငီဒီန် အီပ်ုန်ဂွည်တတိုဒေဂါရ် အီပ်ုန်ယိူဝ်ႎါဒါ့်ဘူတဒေဒီန် ဒီပဲန်ဒုခနာ့်နွံရ်ႈ ကျူညှိုႈအတွဂဲ။ 18ဒဲႈပဲဆုတောင် တဖြာ အခိင်ဒီန် မာည်ဒဲႈအ်ုန် ရောတ်ခိင်ခါဝ်ကံတ်။ 19#ဗျာ ၇.၁၄အကျံင်အ်ုန်မိူဝ်ႈ၊ အိုရ်စတဲကံမ်ဖာ ပ်ုန်ဖာန်ဇာမ်ဖြာ မောအူဒီန်အီုဝ် ကာတိူမ်ပဲန်၊ ဘံန်ဒီန်မိူဝ်ႈ ကာနံပ်ဒေပဲန် ဒုခနာ့်နွံရ်ႈအီုဝ် ဒီဇာ်ႈရောတ်တန်ုဆငီဒီန်။ 20ကီုရ်ညာဖြာ က်ုန်ကာဒဲႈ ဆငီဒီန်ဒံတ် အဆေမိူဝ်ႈကာဘိူန်စိ ပ်ုန်လောတ်တိုဒေ။ ကောည်လိုည် က်ုန်မိူဝ်ႈ ဘီပ်ုန်ရံရ်ႈအူန်အ်ုန် တဆငီဒီန် ဒီဒဲႈဆငီဒံတ်အတွဂဲ။
21“အခိင်ဒီန် ဘီအူကူကူ က်ုန်ဒါႈတပဲ၊ ‘ငိူပ်ဘိူဝ်၊ အရာပ်အီုဝ် ယိူဝ်ခရိ၊’ က်ုန်ကာမိူဝ်ႈ ‘ငိူပ်ဘိူဝ်၊ အ်ုန်ဂွည် အရာပ်တည်’ ပဲမာည်ညှိုမ်အေ့။ 22အီအ်ုန်ယိူင်ဒေပဲန်ခရိဂါရ် အီယိူင်ဒေပဲန်ပရောဖက်ဂဲ ဒီရောတ်ပေါ။ ဂဲက်ုန်ဘဲဒေချှောႇကဝ် ဘီပ်ုန်ရံရ်ႈအူန်ဖြာ ဂဲဒီရ်ုရ်နမိလက္ခဏာ ခံင်မှိူမ်အာမ်။ 23ကောပ်ခိူည်ဒီန် ဒဲႈပဲအူန်ဆဒိအေ့၊ အောဟွည်ႇဂြည်အူန်ဇံဝ် အကျံင်ဒီန်တပဲယာ့်။”
ကွံန်ဘီအီုဝ် ႎီရ်ရောတ်ပေါ
(မဿဲ ၂၄.၂၉–၃၁; လုကာ ၂၁.၂၅–၂၈)
24 #
ဗျာ ၆.၁၂
“န်ုဆငီဒီန် ဒုခနာ့်နွံရ်ႈ က်ုန်ဟွည်ႇဇာ်ႈရောတ် ဆငီအီုဝ်ဒီအံပ်လာ်ႈပွံတ်ဒေ၊ ပ္လါင်ကျံရ်မိူဝ်ႈ ဒီကာဒဲႈယာ့်ပ္လါင်ဒေဂူႈ၊ 25#ဗျာ ၆.၁၃ဆမိင်ဂဲမိူဝ်ႈ ယိူဝ်ႇဒိုရ်တပ္လေင် ဒီဇာ်ႈလေႈဒိုည်ႇဒေ၊ ရဲင်ဒေင်နက္ခတ်မိူဝ်ႈ ဒီက်ုရ်ခြါည်ဒိုည်ႇဒေ။ 26#ဗျာ ၁.၇အခိင်ဒီန် ဘီဂဲဒီယိူဝ်ဒိုည်ႇဒေငိူပ် ကွံန်ဘီအီုဝ် ဒိူည်အဖုင်တီုင်ဂိုဂုင်ဒါင်ဒေ ဒီဘဆိုရ်အူတ်စွလေႈ။ 27ဟွည်ႇဒီန် အ်ုန်ဒီပ္လေါည် တမန်ဇ်ုဂဲတပ္လေင် လေႈတဘီပ်ုန်ရံရ်ႈအူန် ဖြာ၊ အ်ုန်ဒီက်ုရ်စုဒိုည်ႇ အရာပ်လ်ုပ်ငါည်ဖိုန်တီ ယိူဝ်ႇဒိုရ်တပါင်ကံမ်ဖာ မောဂိူဝ့်ပေါ တဟာတိူဝ်ႇဟာဆူတ် တပ္လေင်။
ပုင်တဲႇ တီုင်ပ္လေပ္လေါႇ
(မဿဲ ၂၄.၃၂–၃၅; လုကာ ၂၁.၂၉–၃၃)
28“ဒဲႈပဲပ်ုရ်နောအူန်ဒေဒါ ပုင်တဲႇ ဒိုရ်တီုင်ပ္လေပ္လေါႇအေ့၊ အခိင်ကာႇလှာညောတ်အ်ုန် က္လဲႇဒေလေႈ၊ ပဲစံမ်နံပ် အ်ုန်ဒံတ်တခါဝ်မည်။ 29စံမ်ညာခိူည်ဒီန် အခိင်ပဲယိူဝ်ဒေငိူပ် ပဲန်အကျံင်ခိူည်ဒီန်၊ ဒဲႈပဲနံပ် ကွံန်ဘီအီုဝ် ဟွည်ႇမိူဝ်ႈဒံတ်ရောတ် တဘာင်ဘိုႈယာ့်။#၁၃.၂၉ ဒဲႈပဲနံပ် ကွံန်ဘီအီုဝ် ဟွည်ႇမိူဝ်ႈဒံတ်ရောတ် တဘာင်ဘိုႈယာ့်၊ က်ုန်ကာမိူဝ်ႈ အခိင်ဟွည်ႇဒံတ် ရောတ်ပေါယာ့်။ 30အောဂြည်ညှိုႈတပဲ၊ ဘီအ်ုန်ဒါ့်အဆာႇအီမ် အူဒီန်အီုဝ် ကြိူည်ဂဲယံမ် ဒဲႈပဲတံင်အူန် အကျံင်ပ်ုန်ဒီပဲန်အီုဝ်။ 31ပ္လေင်ဂါရ် ကတဲ ဘိူည်ကာမြဲ ငဲအောကာနံပ်စိဒေဟြာည်။
အဆေကာနံပ် အခိင်ဆငီနာရီဒီန်
(မဿဲ ၂၄.၃၆–၄၄)
32 #
မ ၂၄.၃၆
“ကောည်လိုည် အခိင်ဆငီနာရီ ဒီပေါဒီန်၊ အဆေမိူဝ်ႈကာနံပ်၊ တမန်ဇ်ုဂဲတပ္လေင်မိူဝ်ႈကာနံပ်၊ ကွံန်မိူဝ်ႈကာနံပ်၊ မိူဝ်ႈဂိူဝ်ကူန်အူကူနံပ်။ 33ကောပ်ပဲကာနံပ် အခိင်ဆငီနာရီ ဒီပေါဒီန် ဒဲႈပဲဂွည်ရဲ့အူန်ဆဒိအေ့။ 34#လု ၁၂.၃၆–၃၈ပ်ုန်ဆ်ုန်ဒါႈအ်ုန်မိူဝ်ႈ ညာခိူည်ဘီအူကူ ရဲန်ဒေလေႈဒေင်၊ ယာမ်အ်ုန်ဒီလေႈ ဒိုရ်ဂါင်ဒေ အ်ုန်တံမ်အူန်မှာည်ဒေဂဲ တွံန်ကူတွံန်ကူ၊ အ်ုန်အာပ်ဒဲႈတဂဲ ကာန်ပ်ုန်လိုရ်ုရ်ဂဲဂါရ် အခွါင်အာဏာ၊ ဟွည်ႇဒီန် အ်ုန်တံမ်အူန် အီရဲ့ဘာင်ဘိုႈဒီန် ဒဲႈအ်ုန်ယိူဝ်ဆဒိ ဒါ့်ဂွည်ငိူပ်လလဘာင်ဘိုႈ။ 35စဝ်ဂါင်ဒီန် အခိင်စူန်အံပ်၊ အခိင်ရဆိူမ်၊ အခိင်အျံရ်စဒေတဂေါႇ၊ အခိင်ရႎါရ်ႈဇံဝ်ဇံဝ် ဘံန်မောအ်ုန်ဒီႎီရ်ပေါ ကောပ်ပဲကာနံပ် ဒဲႈပဲအူန်ဆဒိ ဒါ့်ရဲ့အေ့။ 36အ်ုန်က်ုန်ပေါဘြုပွံတ်တပဲ၊ မာည်ဒဲႈအ်ုန်ယိူဝ်ဒေငိူပ်ပဲ ဒါ့်အီတ်ဆငဲႈဒေ။ 37ဆေအောဂြည်အူန်တပဲအီုဝ်၊ အောဟွည်ႇဂြည်ဒိုည်ႇ တဘီတွံန်ကူယာ့်၊ ‘အူန်ဆဒိ ဒါ့်ရဲ့အေ့။’”
Dewis Presennol:
မာကု 13: SPBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Word for the World International and The Shwe Palaung Bible Translation Reviewer Committee.