မာကု 10
10
ယေဆု ဆာင်ဆောန် အကျံင်က်ုရ်ပဲတ်
(မဿဲ ၁၉.၁–၁၂; လုကာ ၁၆.၁၈)
1ယေဆု ဟွည်ႇယိူဝ်ႇဒိုရ်အရာပ်ဒီန်၊ ႎက်ုရ်ခါမ်လာ်ႈ အိုမ်ယော်ဒန် ရောတ်ပွံတ်ဒေ ဆဲႈပြာအိုမ်လ်ုပ်တည် တကပီုန်ကုင်ယုဒ၊ ဖုင်ဘီက်ုရ်စုဂဲ ႎီရ်လာ်ႈက်ုရ်စုဒိုည်ႇထဲင်ဒေ တအ်ုန်၊ အ်ုန်ဆာင်ဆောန်ဒဲႈတဂဲ ခိူည်ပ်ုန်ကျာင်ရ်ုရ်ဒေ။
2ဘံန်ဖာရိရှဲဂဲပ်ုရ်ဒီ ဆ်ုန်စာမ်အ်ုန် ဂဲလာ်ႈဇူ ဆ်ုရ်မွံတ်ဒါႈ၊ “ဂြည်ဘိူဝ်တယဲ၊ အီမဲအူကူအူကူ က်ုန်က်ုရ်ပဲတ်ဇောမ် ပ်ုန်လဲဒေ က်ုရ်ဖြေင်ကော ဇောမ်ဥပဒေအဲႈ။”
3ယေဆု ႎီရ်ဆ်ုရ်မွံတ်ဂဲ၊ “ခိူည်မော မောရှေဒါႈဒေ ပိင်ငျှံပ်အူန်တပဲအဲႈ။”
4ဂဲဒီန်ႎီရ်ဒါႈ၊ “မောရှေ ဒဲႈအူန်အခွါင်တယဲ က်ုန်ဆ်ုန်က်ုရ်ပဲတ်ဇောမ် ပ်ုန်လဲဒေ လိုတဲမ်ဒါဘေဲႇက်ုရ်ကာႈ ဒီဘိူန်က်ုရ်ပဲတ်။”
5ယေဆု ဒါႈတဂဲ၊ “ကောပ်မိူဝ်ႈပဲ နွံရ်ႈဖိူမ်ခေါ ဆောန်ကျူ မောရှေဘ်ုပ်ဒေတဲမ်အူန်ပိင်ငျှံပ်အီုဝ် အတွပဲ။ 6ကောည်လိုည် တန်ုဘေဲႇကျံမ်ဒါႈ၊ ‘အိုရ်ယာမ်ဖြာ စဒေဖာန်ဇာမ် ရ်ုရ်ပဲန်အီမဲဂါရ် အီပ်ုန်။’ 7ကောပ်မိူဝ်ႈခိူည်ဒီန် အီမဲဂဲအီုဝ် ဒီပဲတ်ပဲတ် ကူန်မာဒေ လာ်ႈဂွည်ရူမ် ဇောမ်ပ်ုန်လဲဒေ၊#၁၀.၇ တပံပ်ဘေဲႇပ်ုန်တဲမ် ပ်ုရ်ဒီ ကာယိူဝ်စိ က်ုရ်ပိုမ်ဇောမ် ပ်ုန်လဲဒေ။ 8ဂါရ်ဒီန်အာရ်ကူမိူဝ်ႈ ပဲန်ပွံတ်ဒေ အူယီုင်အူနှာမ်။ ကောပ်ခိူည်ဒီန် ဂါရ်ကာမိူဝ်ႈယာ့်အာရ်ကူ ပဲန်ပွံတ်အူကူ။ 9ကောပ်ခိူည်ဒီန် မာည်ဒဲႈ ဘီဂဲက်ုရ်ကာႈ က္လံင်ရကွံတ် ပ်ုန်တာင်က်ုရ်ပိုမ် ဖြာအေ့။”
10ယာမ်တဘဲႇအ်ုန်ဂဲ ဂွည်ဒေတရန်ုဂါင် ဂဲႎီရ်ဆ်ုရ်မွံတ် ခိူည်အကျံင်ဒီန် တယေဆု။ 11#မ ၅.၃၂; ၁ ကော ၇.၁၀,၁၁အ်ုန်ဒါႈတဂဲ၊ “အီမဲအူကူအီုဝ် က်ုန်က်ုရ်ပဲတ်ဇောမ်ပ်ုန်လဲဒေ ႎီရ်လာ်ႈခံတ်ထဲင်ဒေ ဇောမ်အီပ်ုန်ဟံရ်၊ မိူဝ်ႈအ်ုန်ဖေါက်ပျန် တရမာဒေယာ့်။” 12“စံမ်ညာခိူည်ဒီန် အီပ်ုန်အူကူအီုဝ် က်ုန်က်ုရ်ပဲတ်ဇောမ်ရလေႈဒေ ႎီရ်လာ်ႈလေႈထဲင်ဒေ တအီမဲဟံရ်၊ မိူဝ်ႈအ်ုန်ဖေါက်ပျန် တရမာဒေယာ့်။”
ယေဆုဟိုင်ဒဲႈကျဒဲႈလ တကွံန်ကညောမ်ဂဲ
(မဿဲ ၁၉.၁၃–၁၅; လုကာ ၁၈.၁၅–၁၇)
13အခိင်ဒီန် ဘီဂဲပ်ုရ်ဒီ တောႇဒေဒိူည်လာ်ႈ ကွံန်ကညောမ်ဂဲ တယေဆု၊ အတွဂဲဆ်ုန်ဒဲႈ ယေဆု ဂံမ်တီဒေ ဟိုင်ဒဲႈကျဒဲႈလ တပါင်ဂဲ။ ကောည်လိုည် တဘဲႇအ်ုန်ဂဲ ဟီုတ်ပွံတ် ဘီဂဲဒီန်။ 14ဘံန်ယေဆု ယိူဝ်ဒေငိူပ်ခိူည်ဒီန် ဒေါဆအ်ုန်လေႈ တတဘဲႇဒေဂဲ အ်ုန်ဒါႈ၊ “ပဲတ် ကွံန်ကညောမ်ဂဲ လာ်ႈဇူအော၊ ပဲမာည်ထိင် မာည်ခြဲဂဲ၊ ကပီုန်ကုင်ဖြာအီုဝ် မိူဝ်ႈအတွ ညာခိူည် ကွံန်ကညောမ်ဂဲအီုဝ်ယာ့်။” 15#မ ၁၈.၃“အောဂြည်ညှိုႈတပဲ၊ အီအ်ုန်ကာရံပ် ကပီုန်ကုင်ဖြာ ညာခိူည် ကွံန်ကညောမ်အူကူ၊ ယာမ်မောမိူဝ်ႈ အ်ုန်ကာဘိူန်စိဒေလီပ် ကပီုန်ကုင်ဖြာ။” 16ဟွည်ႇဒီန် အ်ုန်တိူဝ်ႈဒေဇာ့်ပွံတ် ကွံန်ကညောမ်ဂဲ တပေါႇယာႇဒေ ဟိုင်ဒဲႈကျဒဲႈလပွံတ် တဂဲ။
ဘီခြ်ုမ်ဆာ
(မဿဲ ၁၉.၁၆–၃၀; လုကာ ၁၈.၁၈–၃၀)
17ယာမ်ယေဆု စွလာ်ႈတရဒေင် ဘီအူကူ ခူန်ဒေလာ်ႈမာ့်ပ်ုရ်ဒ်ုပ်ပွံတ် တရအာတ်အ်ုန်၊ အ်ုန်ဒါႈ၊ “အိူဝ် တာဆရာကျမျြံတ်၊ ခိူည်မောအောလိုရ်ုရ် အတွဘိူန် အဆာႇထာဝရ။”
18ယေဆုဒါႈတအ်ုန်၊ “ဆေညာ မီတောႇအောမိူဝ်ႈ ဘီကျမျြံတ်။ ဆဲႈဖြာအူပါ အူကူမိူဝ်ႈကာယိူဝ်စိ ဘီကျမျြံတ်။ 19မီနံပ်အေ့ ပိင်ငျှံပ်ကာမိူဝ်ႈ၊ ‘မာည်ကဝ်ရမာဘီ၊ မာည်ပျံမ်အဆာႇဘီ၊ မာည်ရာတ်ဂြူအုဇာဘီ၊ မာည်ခါမ် ဆာ့်ဆေကာမှာန်၊ မာည်လာလီတိူဝ်ႈဆီမ်အူန် အုဇာဘီ၊ ဒဲႈပဲရိုဆေ ကူန်မာဒေအေ့။’”
20အီကူဒီန်ဒါႈ၊ “အိူဝ် တာဆရာ၊ ပိင်ငျှံပ် ပ်ုန်ဒါႈမီဒိုည်ႇဒိုည်ႇဒီန် အောဟွည်ႇထိင်အူန်အောဒိူည် အိုရ်ယာမ်အောဒျံတ်ဒျံတ်။”
21ယေဆု ပ်ုန်ရိူဝ်ငိူပ်ပွံတ်အ်ုန် ယိူဝ်ဖိူမ်ရံက်က်ုရ်ႎေ ဒါႈတအ်ုန်၊ “တမီဒီန် လိုဂိူဝ်အူနဲ။ လာ်ႈ၊ မီက်ုန်ဟွည်ႇယံင်ပဲတ် ဘ်ုရ်ယိူဝ်အုဇာဒေ စာဂဒဲႈဒိုည်ႇတဘီဖ္လာန်ဂဲ။ က်ုန်ညာခိူည်ဒီန် မီဒီဘိူန်အုဇာဘဏ္ဍာ တန်ုပ္လေင်အေ့၊ ဟွည်ႇဒီန် မီတဇောမ်လာ်ႈ ရဘံန်အော။” 22အ်ုန်မေန်မိူဝ်ႈဘီခြ်ုမ်ဆာ အုဇာဂြူဂြိူမ်ဘ္လံမ် ဘံန်အ်ုန်ယိူဝ်ဒေဆတီုင် ငဲပ်ုန်ဒါႈအ်ုန်ဒီန် ငါည်အ်ုန်ငှဝ်နွံရ်ႈကာပျော လေႈလာ်ႈပွံတ်ဒေ။
23အခိင်ဒီန် ယေဆုငိူပ်ပွံတ် က်ုရ်ႎျံရ်ဒေ အ်ုန်ဒါႈတတဘဲႇဒေဂဲ၊ “ဘီခြ်ုမ်ဆာဂဲအီုဝ် ကျူညှိုႈတလီပ် တန်ုကပီုန်ကုင်ဖြာ။”
24ဘံန်တဘဲႇအ်ုန်ဂဲ ယိူဝ်ဒေဆတီုင်ငဲဒီန်၊ ဂဲညာအာမ်ဒိုည်ႇပွံတ်ဒေ။ ကောည်လိုည် ယေဆု ႎီရ်ဒါႈထဲင်တဂဲ၊ “အိူဝ် ကွံန်အောပဲ၊ ကျူညှိုႈတလီပ် တန်ုကပီုန်ကုင် ဖြာအာ်။ 25ကလာအုအီုဝ် ငှိူည်ဘိူဝ်တပ္လီပ်လီပ် တန်ုဘီုင်ဟျာ့်ပ်ုန်လဲ့၊ က်ုန်မိူဝ်ႈ ဘီခြ်ုမ်ဆာဂဲအီုဝ် ကျူညှိုႈတလီပ် တန်ုကပီုန်ကုင် ဖြာ။”
26အခိင်ဒီန် တဘဲႇအ်ုန်ဂဲညာအာမ်ပွံတ်ဒေ ဂဲက်ုရ်ဆ်ုရ်မွံတ်တဒေ အူကူတောအူကူ၊ “က်ုန်ဒါႈခိူည်ဒီန်၊ အဆေဒီဘိူန် ပ်ုန်လောတ်အဲႈ။”
27ယေဆု ပ်ုန်ရိူဝ်ငိူပ်ပွံတ်ဂဲ အ်ုန်ဒါႈ၊ “အီအီုဝ် အတွဘီဂဲ ဘိူည်ကာဘဲဂံတ်ဒေပဲန် က်ုန်မိူဝ်ႈ အတွဖြာ ကာမိူဝ်ႈစိခိူည်ဒီန်၊ အတွဖြာ ဘဲဒေပဲန်ဒိုည်ႇတွံန်နဲ။”
28အခိင်ဒီန် ပေတရု ဒါႈတအ်ုန်၊ “ငိူပ်ဘိူဝ်၊ ယဲပဲတ်ဒိုည်ႇပဲတ် ဘ်ုရ်ပ်ုန်ယိူဝ်ယဲ ဇောမ်လာ်ႈဒိုည်ႇရဘံန်မီယာ့်။”
29ယေဆုဒါႈတဂဲ၊ “မိူဝ်ႈအေ့၊ အောဂြည်ညှိုႈတပဲ အဆေမိူဝ်ႈဟွည်ႇ ကောပ်အောဂါရ် ကောပ်ဆဒါင်ကျ က်ုန်ပဲတ် ဂါင်၊ နာ၊ ႎါႎည်၊ ႎါရပျာ၊ ကူန်မာ၊ ကွံန်၊ ႎါ ဘူရမာဒေ အူနဲအူနဲ၊” 30အီကူဒီန် ခိူည်မိူဝ်ႈအကျိုပူန်အူပ်ုန်ယာႈ ဂါင်၊ နာ၊ ႎါရပျာ၊ ႎါည်အီမဲ၊ ကူန်မာ၊ ကွံန်ႎါဒေဂဲဂါရ် ဆဂေလာလီညာ ဒီဘ်ုပ်ဒေခါမ်ဇာ တန်ုဇာတ်အီုဝ်၊ အ်ုန်ဒီဘိူန် အဆာႇထာဝရ တဇာတ်ဘံန်။ 31#မ ၂၀.၁၆; လု ၁၃.၃၀“ကောည်လိုည် အီအ်ုန်ရောတ် လ်ုပ်ရအာတ်ဒီန် ဒီဘ်ုပ်ဒေရောတ် လ်ုပ်ရဘံန်၊ အီအ်ုန်ရောတ် လ်ုပ်ရဘံန်ဒီန် ဒီဘ်ုပ်ဒေရောတ် လ်ုပ်ရအာတ်။”
ယေဆုဂြည် အကျံင်ဒေယံမ် လိူဝ်ႈအွည်
(မဿဲ ၂၀.၁၇–၁၉; လုကာ ၁၈.၃၁–၃၄)
32ယာမ်ယေဆုဂါရ် တဘဲႇအ်ုန်ဂဲ လာ်ႈဟာ့်ဇောမ်ဒေင် တကုင်ယေရုရှလင်၊ ယေဆု ပည်ပြိုႈဟိုရ်ဂြည် အွံရ်လာ်ႈ တဘဲႇဒေဂဲ၊ အီအ်ုန်လာ်ႈဇောမ်ရဘံန်ဂဲဒီန် ယောဒိုည်ႇပွံတ်ဒေ။ အခိင်ဒီန် ယေဆုႎီရ်တောႇထဲင် တဘဲႇကိူရ်အာရ်ကူ၊ အ်ုန်ဂြည်ပျတဂဲ ခိူည်မောဒီပဲန် တအ်ုန်။ 33အ်ုန်ဒါႈတဂဲ၊ “ဆတီုင်ဘိူဝ်၊ အယ်လာ်ႈ တကုင်ယေရုရှလင် အူဒီန်၊ ကွံန်ဘီအီုဝ် ဒီဘ်ုပ်က်ုရ်တူႈ အာပ်တတီ ယဇ်ပုရောဟိတ်ဒါင်ဂဲဂါရ် တာဆရာနံပ်ဘေဲႇကျံမ်ဂဲ။ ဂဲဒီန် ဒီပ်ုန်ဘဝ် ဟွည်ႇဂ်ုမ်တာမ်ယံမ်တအ်ုန်၊ အာပ်ဒဲႈပွံတ် တတီခြိူဝ်မျိုဟံရ်။” 34“ခြိူဝ်မျိုဟံရ်ဂဲဒီန် ဒီပ်ုန်ဘဝ်၊ ဘဲႇအိုမ်ဘဲႇဒေတအ်ုန်၊ ဂဲဟွည်ႇဒဲႈတာမ်လ်ုရ်ႈ၊ ပျံမ်ယံမ်ပဲတ်အ်ုန်။ ကောည်လိုည် က်ုန်ဟွည်ႇဘိူန်အွည်ဆငီ အ်ုန်ဒီႎီရ်ယိူဝ်ႇအီမ်ဒေ။”
ပ်ုန်မှာန်ယာကုပ်ဂါရ် ယောဟန်
(မဿဲ ၂၀.၂၀–၂၈)
35အခိင်ဒီန် ကွံန်အီမဲဇေဗေဒဲ ယာကုပ်ဂါရ် ယောဟန် လာ်ႈဇူ တယေဆု။ ဂါရ်ဒါႈတအ်ုန်၊ “အိူဝ် တာဆရာ၊ ယာရ်ဆ်ုန်ဒဲႈမီရ်ုရ်ဒဲႈ ဘ်ုရ်ပ်ုန်မှာန်ယာရ်။”
36ယေဆုဆ်ုရ်မွံတ်ဂါရ်၊ “ဆေပါရ်ဆ်ုန်ဒဲႈ အောရ်ုရ် အတွဒေ၊”
37ဂါရ်ဒီန် ႎီရ်ဒါႈတအ်ုန်၊ “အခိင်မီမာ့် တပါင်ရာဇပလာင်ဒေ တကပီုန်ကုင် ယိူဝ်အဖုင်တီုင်ဂို ဒဲႈယာရ်ဘိူန်အခွါင် မာ့်လ်ုပ်ခေါန်ညှိုႈမီအူကူ၊ လ်ုပ်ခေါန်ကာတ်မီအူကူ။”
38 #
လု ၁၂.၅၀
ယေဆု ဒါႈဒေဆ်ုရ်မွံတ်တဂါရ်၊ “ဆေပါရ်အာရ်ကူမှာန် ပါရ်ကာနံပ်။ ဆလော့ဒုခ ပ်ုန်ဒီတျံင်အော ပါရ်ဘဲကောဒေတျံင် က်ုန်ကာမိူဝ်ႈ ဗတ္တိဇံ ပ်ုန်ဒီဘ်ုပ်ခါမ်အောအီုဝ် ပါရ်ဘဲကောဒေခါမ်အဲႈ။”
39ဂါရ်ႎီရ်ဒါႈတအ်ုန်၊ “ယာရ်ဘဲအေ့။”
ယေဆုဒါႈတဂါရ် “ဆလော့ပ်ုန်တျံင်အော ပါရ်ဒီဘ်ုပ်တျံင်၊ ဗတ္တိဇံ ပ်ုန်ခါမ်အော ပါရ်ဒီဘ်ုပ်ခါမ်။” 40“ကောည်လိုည် လ်ုပ်တီခေါန်ညှိုႈအောဂါရ် လ်ုပ်တီခေါန်ကာတ်ဒီန် အောကာယိူဝ်စိ အခွါင်ရံရ်ႈဒဲႈ အဆေမာ့်။ က်ုန်မိူဝ်ႈအရာပ်ဒီန် ဖြာ ရဲန်အူန်ဂိူဝ် အတွဘီဂဲ။”
41အခိင်ဒီန် ဘံန်တဘဲႇဟံရ်အူကိူရ်ကူဂဲ ယိူဝ်ဒေဆတီုင် အကျံင်ဒီန် ဂဲရဝ်ဒိုည်ႇ တယောဟန်ဂါရ် ယာကုပ်။ 42#လု ၂၂.၂၅,၂၆ ဘံန်ညာခိူည်ဒီန် ယေဆု တောႇဒိုည်ႇဒေဒါႈ တဂဲ၊ “ပဲဟွည်ႇနံပ်ဒိုည်ႇ၊ န်ုခြိူဝ်မျိုဟံရ်ဂဲ အီအ်ုန်ဘိူန်ဒေဘြောင် ကုင်အီုဝ် ဆမာဒါအာဏာဒေ အူပ်ဘြောင်ဆာင်ဒိုည်ႇ တပါင်ဘီကုင်ဘီရူဂဲ၊ အီအ်ုန်မိူဝ်ႈ ဘီအွရ်ကိင်ဂဲအီုဝ် ဆမာဒါအာဏာဒေ ရ်ုရ်ဒိုည်ႇတပါင်ဂဲ။ 43#မ ၂၃.၁၁; မာ ၉.၃၅; လု ၂၂.၂၆ ကောည်လိုည် က်ုန်မိူဝ်ႈတရန်ုပဲ ကာဘိူန်စိ ညာခိူည်ဒီန်။ တရန်ုပဲ အီအ်ုန်ဆ်ုန်ပဲန်ဘီအွံရ်ကိင်ဒီန် ဒီဘ်ုပ်ဒေပဲန်ဘိူဝ်မှာည်ပဲ။ 44အီအ်ုန်ဆ်ုန်ပဲန် ဘီဇူႈအူအီုဝ် ဒီဘ်ုပ်ဒေပဲန် ဒိုည်ႇမှာည်ဘီ။ 45အကျံင်အ်ုန်မိူဝ်ႈ ကွံန်ဘီအီုဝ် ကာမိူဝ်ႈစိ အ်ုန်လာ်ႈပေါ အတွဒဲႈဘီဂဲဟျံင်လူမ်လာဒေ၊ မိူဝ်ႈအတွရံရ်ႈအဆာႇဘီ ဘာ့်ဘာ့်ဘိူဝ်ဘိူဝ်ဂဲ လာ်ႈပေါဒေ စူန်အဆာႇဒေ။”
ယေဆု ဒဲႈအီငါည်အံပ်ဗာတိမဲ ချံမ်ဆာ
(မဿဲ ၂၀.၂၉–၃၄; လုကာ ၁၈.၃၅–၄၃)
46ဂဲလာ်ႈရောတ်ဒိုည်ႇ တကုင်ယေရိခေါ၊ ဟွည်ႇဒီန် ယေဆုဂါရ် တဘဲႇအ်ုန်ဂဲဒိုည်ႇဒိုည်ႇ ပါပည်ဖုင်ဘီက်ုရ်စုဂဲ ယာမ်ဂဲလေႈရူမ်ဒိုည်ႇ ဒိုရ်ကုင်ယေရိခေါ၊ ယိူဝ်အီငါည်အံပ်အူကူ ဇီုဝ်ဗာတိမဲ၊ (အ်ုန်မိူဝ်ႈ၊ ကွံန်တီမဲ) ဒါ့်မာ့်မှာန်ဒေဟောမ် တပြောရဒေင်။ 47ဘံန်အ်ုန်ယိူဝ်ဒေဆတီုင် မိူဝ်ႈနာဇရက်ယေဆု၊ အ်ုန်ပြိုႈဒေဒါႈ၊ “အိူဝ် ကွံန်ဒါဝိဒ်၊ ယေဆု၊ က်ုရ်ႎေဘိူဝ်အောစိ။”
48ဘီဘာ့်ဘာ့်ဘိူဝ်ဘိူဝ်ဂဲ ဟီုတ်ပွံတ်အ်ုန် ဆူတ်အ်ုန်ဂွည်ညီမ်ညီမ်ဒေ။ ကောည်လိုည် အ်ုန်ႎရပြိုႈထဲင်ဒေဒါႈ၊ “အိူဝ် ကွံန်ဒါဝိဒ်၊ က်ုရ်ႎေဘိူဝ်အောစိ။”
49အခိင်ဒီန် ယေဆု ဒါ့်ပွံတ်ဒေ၊ အ်ုန်ဒါႈ၊ “တောႇပဲဒိူည်အ်ုန်။”
ဘံန်ညာခိူည်ဒီန် ဘီဂဲတောႇပွံတ်အီငါည်အံပ်ဒီန် ဂဲဒါႈတအ်ုန်၊ “မာည်အူန်ဖိူမ်ဒေဒျံတ်၊ ယိူဝ်ႇပွံတ်၊ အ်ုန်တောႇမီယာ့်။”
50ဘံန်ညာခိူည်ဒီန် အ်ုန်ဘေည်ပဲတ် ဆဒေါဒါင်ဒေ၊ ယိူဝ်ႇစာ့်တဲႇလာ်ႈဇူပွံတ် ယေဆု။
51ယေဆုဆ်ုရ်မွံတ်အ်ုန်၊ “ဆေမီဆ်ုန်ဒဲႈ အောရ်ုရ် တဒေအဲႈ။”
အီငါည်အံပ်ဒီန်ဒါႈ၊ “အိူဝ် တာဆရာ၊ အောဆ်ုန်ႎီရ်ယိူဝ်ထဲင်အောငိူပ်။”
52ယေဆုဒါႈတအ်ုန်၊ “လာ်ႈပွံတ်၊ ဖိူမ်ပ်ုန်ညှိုမ်မီဒီန် ဒဲႈမီချံမ်ဆာယာ့်။”
ဒံင်အူကပြေ့ ငါည်အ်ုန်ႎီရ်ယိူဝ်ပွံတ်ဒေငိူပ်၊ ဟွည်ႇဒီန် အ်ုန်ဇောမ်ပွံတ် ရဘံန်ဒေင်လာ်ႈ ယေဆု။
Dewis Presennol:
မာကု 10: SPBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Word for the World International and The Shwe Palaung Bible Translation Reviewer Committee.