Matteyo 6
6
Ettiyenio Yesu Eram ono Esyorita
1Ihumata irrirrya ŋadi ihaniete tai ehanita hatai hun oyiji ihosyere wati jo oŋida isi omijye. Al ihaniete tai ihwania obeŋ adi Monyatai ette dou oduma itai.
2Al isyatta tai agurusi jyo alocaŋak hesyatta ihwa atulo ol ohut aforojo jo oŋida laati igonyuni inyi. Ihanie enyabak ihwo nya ihasik imojiti iko ikota jo oŋida laati itahabuye isi. Ahode eramak ni itai jo owoni isi iko edumit hosi. 3-4Ati al isyatta tai agurusi oŋida isyatta an idima jo oŋida aani ihoroŋ obeŋ omijak anyo an ihanio aani iŋet, bwo fe Monyatai al igonyu erre hun idimani oduma adi itai.
Ettiyenio Yesu Eram ono Amojo
Lk 11:2-4
5Al imojoti tai hehaniete ihwa lenyabak, nyo omunoi isi iwotyari bwo fe imojori ihasik imojiti iko ipehiti kota jo oŋida laati igonyuni isi. Ahode eramak ni itai jo owoni isi iko edumit hosi. 6Ati al imojoti tai ojiŋana ihaji, ihyanana ekat bwo omojoti jo Monyatai ol obeŋ’to oleyo, bwo fe Monyatai al igonyu’to erre hun obeŋi oleye oduma adi itai.
7Al imojoti tai hekyanati asai ekyanita arryai ta abyaŋan igigilo ihwa ikyanai paganohyen, nyo igigiloi isi jo itaniŋu adi Hollum isi ta ekyanita hosi hun olwaji. 8Hehaniete ihwa ihanie isi nyo omijak Monyatai erre hun iwahata tai hebyaŋata tai ifiyete inyi. 9Omojoti ihwa ana:
Monye hohoi ol owon idou,
Hotokwata afure hoi,
10Hetettu olobye hoi.
Hetehaniehe awahan hoi lifau ihwa ihanie lidou.
11Isyara hohoi ahana aŋiyo hohoi ottoloŋi.
12Obusak ahorosi hohoi
Ihwa an ebusaniere hohoi aati horosi hohoi.
13Heyaro hohoi jyo esusuta
Ati itahoru hohoi jyo arrohojita.
Ijara olobye hatawana, iko adwaran, iko akwatan jihoi fur.
14Kuyya ibusana tai eyyata wati hul ihanie’to on orroho jihatai, obusak adi monyatai ette dou eyyata hatai. 15Ati kuyya ibyaŋata tai ibusana ahorosi wati, obeŋ adi Monyatai obusak eyyata hatai.
Ettiyenio Yesu Eram ono Aferuna
16Al iferuna#6:16 iferunaObeŋi isi oŋiye to omuk oŋitek nyo igigiloi isi itamuno ana Hollum. tai hejiriŋati ihwa lenyabak hul itajiriŋye’to omomite hosi jo oŋida laati omijani jo oferuni isi. Ahode eramak ni itai jo owoni isi iko edumit hosi. 17Ati al iferuna tai iyyalana osi hatai bwo illillata omomite hatai, 18jo oŋida laati obeŋi omijani jo iferuna tai, ati igonyu Monyatai ol obeŋ’to oleyo itai. Bwo fe Monyatai al igonyu’to erre hun obeŋi’to oleye oduma adi itai.
Ebariti Hutte Dou
Lk 12:33-34
19Hettuniete ebariti hatai jyo afau ana nyo otuk adi eyyu iko nelarryoŋolo#6:19 nelarryoŋoloiloŋorwaji isi, kuyya bu ojiŋani adi ahahalak ihahalari isi. 20Ati ottuniete ebariti hatai idou nyo obeŋ adi eyyu kuyya bu nelarryoŋolo itatturi isi bwo fe obeŋi adi ahahalak ojiŋani ihahalari isi. 21Nyo igigiloi atajya hatai jyo amaji on ottunarik ebariti hatai.
Afaŋan ono Ahwan
Lk 11:34-36
22Ara onyek ihwa afaŋan ono ahwan tania al afaŋ inyi on oyyu ifut ifaŋan daŋ ihwan tulo. 23Ati al orroho onyek iryok adi ahwan daŋ. Tania kuyya orroho afaŋan on owon’to itwa tulo, iryok inyi ahode ’tir ’tir.
Hollum iko Ebariti
Lk 16:13
24Obeŋ tulo oremik igyamari jyo eleittaha arrihai. Nyo oliwari adi inyi olobotye bwo fe omuno olobotye, kuyya bu awak adi inyi olobotye bwo fe omyana olobotye. Ibyaŋata tai iremehina igyamari jyo Hollum bwo fe jyo ebariti.
Abyaŋan Ihawwa to Omuk Erre
Lk 12:22-31
25Tania eramak ni itai jo, hehawwati ta nesu hatai, te erre hun iŋiyete tai bwo fe hun imatati tai, ara dwo bu erre hwattek hun iyyafatyete tai. ?Obeŋ so nesu hatai agalik aŋiyo? ?Obeŋi ahwattek hatai agalihini aboŋojin? 26Ikemijyete aheny hun idarratai idou; obeŋi bu isi oyehini bwo obeŋi odeŋuni, obeŋi isi ottubani erre imugwo. Ati itaŋiyo Monyatai ette dou isi. ?Ibyaŋata so itai igalihina isi? 27?Alali tehiji hatai ol oremik’to itaboboloro ahwan honyi te ehawwa honyi? 28?Nyo ihawwati tai ta aboŋojin? Ikemijyete ayaburita isuri on oyyu. Obeŋi isi igyamai, obeŋi bwo fe isi ikaice, 29ati ajo ni jihatai jo, obeŋi nya aboŋojin Solomone ilamani ihwa ayaburita huna dwadi ilamani isi bebe. 30Kuyya ibuya Hollum ayaburita hun isuri’to ahana ifau bwo motye ibironi adi isi ihima, ?obeŋ adi inyi itiyyafak itai on oyyu agalik? Aii, itai laati hul omuta neruk. 31Tania helafuhoti bwo hegigiloti jo, ?Eŋiyo adi hohoi anyo? kuyya, ?Emata adi hohoi anyo? kuyya, ?Eyyafak adi hohoi anyo? 32Ottifyai paganohyen erre hunia daŋ. Ati omijak Monyatai ette dou jo iwahata tai erre hunia. 33Ottifyati ahosyere ekoi ono Hollum bwo ottifyati ijifatyere efahita honyi attadi Hollum fonihina erre huna daŋ jihatai.
34Tania hehawwati te erre hun ofwonni adi motye, nyo motye ofwonni adi erre omuk hun ihawwati adi itai. Oremik arrohoji ono oloŋ abotye to oloŋ ania.
Dewis Presennol:
Matteyo 6: LOT1969
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This text was originally published by the British and Foreign Bible Society in 1969.