မဿဲ 9
9
လေဖြတ်နေဟှူသူဟှို ကျန်းမာစေဟှူကြောန်း
(မာကု ၂.၁–၁၂; လုကာ ၅.၁၇–၂၆)
1ယေရှုဟှာ လှေနပ္လန်ကူးဘီးဟှာ သူ့ရဲ့ နေရပ်ဗြို့#၉.၁ သူ့ရဲ့ နေရပ်ဗြို့၊ ကပေရနောင်ဗြို့ (ရှု ၄.၁၃)။ဟှို ကြွတော်မူလေဟှယ်၊ 2အယ်နေရာမာ လေဖြတ်နေဟှူ လူတယော့‑က်ဟှို ထမ်းစင်ထတ်မာ တန်ဘီးဟှာ ကိုယ်တော်နားဟှို ထမ်းလာဂေ့လေဟှယ်။ ယေရှုဟှာ အယ်သူလေရဲ့ ယောင်ကြည်ရှင်းဟှို ဗြင်ရဟှူ ခီမာ လေဖြတ်နေဟှူသူဟှို “ငါ့သား၊ စိုးရိမ်န! နန့်ရဲ့ ပြစ်ဟှို ငါလွတ်စေဘီ” ဆိုဘီး မိန့်တော်မူလေဟှယ်။
3ကျမ်းပြုဆရာတချို့ဟှ “အယ်သူဟှာ ဘုရားသခင်ဟှို ပြစ်မှားစော်ကားဘီး ပြောနေဟှယ်!” ဆိုဘီးဟှာ သူးနို့ရှင်းရှင်း ပြောနေဂေ့ဟှယ်။
4ယေရှုဟှာ အယ်သူလေရဲ့ စိဟှို သိနေကြောန့် “နန်းနို့လေ ဖြားဖြစ်ကြောန့် ကောန်းဘဲဟှူဇာလေဟှို စဉ်းစားနေဂေ့နူး။ 5‘နန့်ရဲ့ ပြစ်ဟှို လွတ်စေဘီ’ အယ်မျိုးမှုဘဲနေဟှာ ‘နန်ထဘီးဟှာ လမ်းသွားဝေါ့’ ဆိုဘီး ပြောဟှို့ပိုလွယ်ကြောန့်လော။ 6လူ့ရဲ့သားဟှာ အယ်လောကမာ ပြစ်ဖြေလွှတ်ဟှို့ ခွမ့်အာဏာရှိဟှယ် ဆိုဇာဟှို နန်းနို့လေသိရအောန်” လေဖြတ်နေသူဟှို “ထဒန်၊ ထမ်းစင်ဟှို ကော့‑က်ဘီး နန့်အီဟှို သွားဝေါ့!” ဆိုဘီး မိန့်တော်မူလေဟှယ်။
7အယ်သူဟှာ ထဘီး သူ့အီဟှို သွားလေဟှယ်။ 8အယ်မူဇာလေဟှို ကေ့နေဂေ့ဟှူ လူအောက်ဂီးဟှာ ရရာတိုင်း ကြော့‑က်ရွံ့ဘီးဟှာ လူလေဟှို အယ်မျိုးခွမ့်အာဏာဟှို ပေးတော်မူဟှူ ဘုရားသခင်ရဲ့ ဂေါင်တော်ဟှို ချီးမွမ်းဂေ့လေဟှယ်။
မဿဲဟှို ခေါ်ဟှူကြောန်း
(မာကု ၂.၁၃–၁၇; လုကာ ၅.၂၇–၃၂)
9ယေရှုဟှာ အယ်နေရာဟှနေဘီး ထွပ်ကြွလာဟှူ ခီမာ မဿဲ ဆိုဘီး နာမယ်ခေါ်ဟှူ လူတယော့‑က်ဟှို ခွန်ရောင်းမာ ထိုင်နေဇာဟှို ဗြင်တော်မူလေဟှယ်။ ကိုယ်တော်ဟှ “ငါ့နော့‑က်ဟှိုလိုက်ပါ” ဆိုဘီး မိန့်တော်မူဟှယ်။ မဿဲဟှာ ထဘီး နော့‑က်ဟှိုလိုက်လေဟှယ်။
10 #
လု ၁၅.၁,၂ ယေရှုဟှာ မဿဲရဲ့အီမာ#၉.၁၀ မဿဲရဲ့အီမာ၊ အယ်မျိုးမှုဘဲနေဟှာ သူ့ရဲ့ အီမာ။ ညဉ့်ခန်းဇာစားနေခီမာ ခွန်ကော့‑က်မားလေန ပြစ်သားလေဟှာ ကိုယ်တော်နားဟှို လာဘီး တဗဲ့တော်လေနတူးဒူ မှန်းဗွဲမာ ဝမ်ထိုင်ဂေ့ဟှယ်။ 11အယ်ဇာဟှို ဖာရိရှဲလေ တချို့ဟှ ဗြင်ဟှားဘီး တဗဲ့တော်လေဟှို “ဖြားဖြစ်ကြောန့် နန်းနို့ဆရာဟှာ ခွန်ကော့‑က်မားလေ၊ ပြစ်သားလေနတူးဒူ စားနေနူး” ဆိုဘီး မေးဂေ့ဟှယ်။
12ယေရှုကြားဟှူ ခီမာ “ကျန်းမာဟှူသူလေဟှာ ဆေးဆရာဟှို လိုဂေ့ဟှ။ ဖျားနာဟှူသူလေဟှဘဲ့ လိုဂေ့ဟှယ်။ 13#မ ၁၂.၇‘ငါဟှာ ယဇ်ပူဇော်ဇာထတ် သနားကြင်နာရှင်းဟှို ပိုဘီးနှစ်သက်ဟှယ်’ ဆိုဘီး ပြောဟှားဟှူကျမ်းစကားဟှို နားလည်ဟှို့ သွားဘီးသန်ယူဂေ့ပါ။ ဖြောန့်မတ်ဟှူသူလေဟှို ကယ်ဟှို့တွပ် ငါလာဇာ မှုဟှ။ ဆိုးဟှူလူလေဟှို ကယ်ဟှို့တွပ် ငါလာဟှယ်” ဆိုဘီး မိန့်တော်မူလေဟှယ်။
စာရှောန်ဇာန ဆိုင်ဟှူမေးခွန်းကြောန်း
(မာကု ၂.၁၈–၂၂; လုကာ ၅.၃၃–၃၉)
14အယ်ခီမာ ယောဟန်ရဲ့ တဗဲ့လေဟှာ ယေရှုနားဟှို ရော့‑က်လာဘီးဟှာ “ကျွန်တော်ဟှားလေန ဖာရိရှဲလေဟှာ မကြာမကြာ စာရှောန်ဂေ့ဟှယ်။ ကိုယ်တော်ရဲ့တဗဲ့လေဟှာ ဖြားဖြစ်ကြောန့် စာရှောန်ဂေ့ဟှနူး” ဆိုဘီး မေးလျှော့‑က်ဂေ့ဟှယ်။
15ယေရှုဟှ “အီတတ်ပွဲမာ ဒို့သားနတူးဒူ ရှိနေဟှူ ပေါန်းသင်းလေဟှာ ဒို့သားနတူးဒူ ရှိနေခီမာ ဝန်းနဲပူဆွေးဂေ့ဘဲ့လော မင်္ဂလာဆောန်ဒို့သားန သူ့ပေါန်းသင်းလေဟှာ ခွဲခွာရဟှို့ခီ ရော့‑က်လာလေ့မယ် အယ်ဆိုဟှာ သူးနို့လေဟှာ စာရှောန်ဂေ့လေ့မယ်။”
16“ဖယ်သူလည်း အန်းဂီဟောန်းဟှို ပိစသစ်န ဖာလေ့ မှေ့ဟှ။ ဖြားဖြစ်ကြောန့်နူးဆိုဟှာ ဖာဟှားဟှူ ပိစသစ်ဟှ အန်းဂီဟောန်းဟှို စုဖ္လဲဘီးဟှာ ပိုဆိုးဟှားလေ့မယ်။ 17အယ်မျိုးဘဲ့ ဝိုင်သစ်ဟှို သားရေဖူးဟောန်းထဲမာ ထဲ့လေ့ မှေ့ဟှ။ ထဲ့မယ် ဆိုဟှာ ဝိုင်သစ်ဟှ သားရေဖူးဟောန်းဟှို ပေါ့‑က်ပ္လဲစေဘီး ဝိုင်န သားရေဖူး နှေ့ခုလောင်းဟှာ ပျစ်စီးဟှားလေ့မယ်။ အယ်ဘီးဟှာ သရေဖူးလည်း ပျစ်စီးဟှားလေ့မယ်။ အယ်မျိုး ဖြစ်ဘဲနေအောန် ဝိုင်သစ်ဟှို သားရေဖူးသစ်ထဲဟှို ထည့်ရဟှယ်။ အယ်ဆိုဟှာ နှေ့ခုလောင်းဟှာ ကြာဂီးခံလေ့မယ်” ဆိုဘီး မိန့်တော်မူလေဟှယ်။
ယာဣရုရဲ့ သမီးန ဝတ်လောင်တော်ဟှိုတို့ဟှူ မီးမကြောန်း
(မာကု ၅.၂၁–၄၃; လုကာ ၈.၄၀–၅၆)
18ယေရှုဟှာ အယ်မူမျိုး ပြောနေခီမာ ယုဒလူမျိုး ရာရှိတယော့‑က်ဟှ ရော့‑က်လာဘီးဟှာ ကိုယ်တော်ရှေ့မာ ပျပ်ဝပ်လေဟှယ်။ အယ်သူဟှလည်း “ကျွန်တော့်သမီးဟှာ သေဟှားဘီ။ အယ်ဘေမဲ့ ကိုယ်တော်ကြွဘီး သူ့ထတ်မာ လတ်တန်မယ် ဆိုဟှာ သတ်ရှင်ပါလေ့မယ်” ဆိုဘီး လျှော့‑က်လေဟှယ်။
19အယ်ကြောန့် ယေရှုဟှာ ထဘီးဟှာ တဗဲ့တော်လေနတူးဒူ အယ်သူနော့‑က်ဟှို လိုက်ဟှားလေဟှယ်။
20ဆယ့်နှေ့နှစ် လောင်းလောင်း သွီးသွန်နာစွဲနေဟှူ မီးမတယော့‑က်ဟှာ ယေရှုနော့‑က်ဟှို လိုက်ဘီး ဝတ်လောင်တော် ပန်းဗွားဟှို တို့ထိလေဟှယ်။ 21အယ်မီးမဟှာ “ငါဟှာ သူ့ရဲ့ ဝတ်လောင်တော်ဟှို တို့ထိမယ် ဆိုဟှာ ငါကျန်းမာရလေ့မယ်” ဆိုဘီးဟှာ ကိုယ့်ဇာကို ပြောနေဟှယ်။
22ယေရှုဟှ လှည့်ကေ့ခီမာ အယ်မီးမဟှို ဗြင်ဟှားဘီး “ငါ့သမီး၊ စိုးရိမ်န! နန့်ရဲ့ ယောင်ကြည်ရှင်းဟှာ နန့်ဟှို ကျန်းမာစေဘီ” ဆိုဘီး မိန့်တော်မူလေဟှယ်။ အယ်ခီမာဘဲ့ အယ်မီးမဟှာ ရောဂါပျော့‑က်ဟှားလေဟှယ်။
23အယ်ဘီးန ယေရှုဟှာ ရာရှိရဲ့အီဟှို ရော့‑က်ဟှားလေဟှယ်။ ကိုယ်တော်ဟှာ တီးမှုမားလေန မသာအီဟှို လာဟှူသူလေ အောက်အောက်သဲသဲ ဖြစ်နေဂေ့ဇာဟှို ဗြင်တော်မူဟှူ ခီမာ 24ကိုယ်တော်ဟှ “ဖယ်ဂေ့၊ မီးမငယ် သေနေဇာ မှုဟှ! အိမွိနေဇာဖြစ်ဟှယ်!” ဆိုဘီး မိန့်တော်မူလေဟှယ်။ လူလေ အားလောင်းဂူဟှာ ကိုယ်တော့်ဟှို သရော်ဂေ့လေဟှယ်။ 25လူအောက်ဂီးဟှာ ပ္လန်ဟှိုထွပ်ဟှားဘီးန ယေရှုဟှာ မီးမငယ်ရဲ့ အိခန်းထဲဟှို ဝမ်ဘီး မီးမငယ်ရဲ့လတ်ဟှို ဆွဲထူလိုက်ဟှူ ခီမာ မီးမငယ်ဟှာ ထလေဟှယ်။ 26အယ်မူဒန်းဟှာ အယ်ဒေသ တခုလောင်းဟှို ပ္လံ့နှံ့ဟှားလေဟှယ်။
မျစ်စိဗြင်ဘဲဟှူ လူနှေ့ယော့‑က်ဟှို ဗြင်စေဟှူကြောန်း
27အယ်ရပ်ဟှနေဘီး ယေရှုကြွဟှားဟှူ ခီမာ မျစ်စိဗြင်ဘဲဟှူ လူနှေ့ယော့‑က်ဟှ ကိုယ်တော်နော့‑က်ဟှိုလိုက်ဘီးဟှာ “ဒါဝိဒ်ရဲ့သားတော်! ကျွန်တော်ဟှားလေဟှို ကယ်မသနားတော်မူပါ” ဆိုဘီး အော်ဟစ်ဂေ့လေဟှယ်။
28အီတအီဟှို ဝမ်ခီမာ မျစ်စိကန်းနေသူလေဟှာ ယေရှုနားဟှို လာဂေ့လေဟှယ်။ ကိုယ်တော်ဟှလည်း “နန်းနို့မျစ်စိဟှို ငါဗြင်စေနိုင်ဟှယ် ဆိုဇာဟှို ယောင်ဘဲ့လော” ဆိုဘီး မေးလိုက်ဇာ “ယောင်ကြည်ပါဟှယ် သခင်!” ဆိုဘီး လျှော့‑က်ဂေ့လေဟှယ်။
29ယေရှုဟှာ သူးနို့လေရဲ့ မျစ်စိဟှို တို့ဘီးဟှာ “နန်းနို့ယောင်ကြည်ဟှူတိုင်း နန်းနို့မာဖြစ်စေ!” ဆိုဘီး မိန့်တော်မူဘီးန၊ 30အယ်သူလေဟှာ မျစ်စိပွမ့်လန်းလာဘီးဟှာ ဗြင်ရဂေ့လေဟှယ်။ ယေရှုဟှ “အယ်ကြောန်းရာလေဟှို ဖယ်သူဟှိုလည်း သိစေန!” ဆိုဘီး ကြပ်ကြပ်တဲတဲဟှား ဒိပေးလေဟှယ်။
31အယ်ဘေမဲ့ သူးနို့လေ ထွပ်ဟှားဘီးဟှာ ယေရှုရဲ့ဒန်းဟှာ တပြည်လောင်းဟှို ပ္လံ့နှံ့ဟှားလေဟှယ်။
စကားအနေဟှူသူဟှို ကုသပေးဟှူကြောန်း
32အယ်သူလေထွပ်ဟှားဘီးန နတ်ဆိုးဝမ်ဘီး စကားအနေဟှူ လူတယော့‑က်ဟှို ယေရှုနားဟှို ခေါ်လာဂေ့လေဟှယ်။ 33နတ်ဆိုးဟှို နှန်ထုလိုက်ခီမာ စကားအနေဟှူသူဟှာ စကားပြောလာဘီးလူလေ အားလောင်းဂူဟှာ အံ့ဩဟှားဂေ့ဟှယ်။ “အယ်မျိုးမှုရာလေဟှို ဣသရေလလူမျိုးထဲမာ ခါလည်းဗြင်ဖူးဟှ!” ဆိုဘီး ပြောဆိုဂေ့လေဟှယ်။
34 #
မ ၁၀.၂၅; ၁၂.၂၄; မာ ၃.၂၂; လု ၁၁.၁၅ ဖာရိရှဲလေဟှလည်း “အယ်သူဟှာ နတ်ဆိုးခေါန်းဆောန် ဗေလဇေဗုလဟှို အားကိုးဘီး နတ်ဆိုးလေဟှို နှန်ထုဇာဖြစ်ဟှယ်” ဆိုဘီး ပြောဆိုဂေ့လေဟှယ်။
လူလေဟှို သနားကြင်နာဟှူကြောန်း
35 #
မ ၄.၂၃; မာ ၁.၃၉; လု ၄.၄၄ ယေရှုဟှာ ဝါလယ်ဇရပ်လေမာ ဆောင်းမဩဝါဒပေးဘီး နိုင်ငံတော်ကြောန်း ဒန်းကောန်းဟှို ကြေညာတော်မူလေဟှယ်။ လူလေခံစားနေရဟှူ ရောဂါလေဟှိုလည်း ကျန်းမာစေဘီးဟှာ ဗြို့ဝါလေဟှို လှည့်လည်တော်မူလေဟှယ်။ 36#မာ ၆.၃၄ကိုယ်တော်ဟှာ လူအောက်ဂီးဟှို ဗြင်လိုက်န သနားဟှူစိ ဖြစ်လေဟှယ်။ ဖြားဖြစ်ကြောန့်နူးဆိုဟှာ သူးနို့ဟှာ သိုးထီးမားမှေ့ဘဲဟှူ သိုးလေမျိုး ပူပန်သောကရော့က်ဘီး အားကိုးရာမှေ့ဘဲ ဖြစ်နေဂေ့ကြောန့်ဖြစ်ဟှယ်။ 37#လု ၁၀.၂အယ်ကြောန့် ကိုယ်တော်ဟှာ “ရိသီးဇာလေ ဘောင်ဂီးရှိဘေမဲ့ ရိသီးမားလေဟှာ နဲဂေ့လေဟှယ်။ 38အယ်ကြောန့် ရိသီးမားလေဟှို စေလွှတ်ပေးဟှို့တွပ် ဗားဇရှင်ဟှို ဆုတောန်းဂေ့” ဆိုဘီး တဗဲ့တော်လေဟှို မိန့်တော်မူလေဟှယ်။
Dewis Presennol:
မဿဲ 9: NTDWB24
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The New Testament in Dawei Language © The Word for the World International and The Dawei Bible Translation Committee, 2024.