約翰福音 9
9
耶穌醫好出世就失明的人
1耶穌啲行路的時，看著一個出世就失明的人。 2伊的門徒給伊問：「拉比，此個人出世就失明，是啥人犯罪，是伊本身抑是伊的父母？」
3耶穌應講：「毋是因為此個人犯罪，嘛毋是伊的父母犯罪，是欲通過伊來顯明上帝的作為。 4趁猶是日時，咱著做差我彼位的工；暗時一下到，無人會當做工。 5我佇世間的時，是世間的光。」
6諸個話講了，伊呸嘴涎佇土腳，用嘴涎抄土，然後用土糊彼個人的目睭， 7給伊講：「你去西羅亞池洗。」— 西羅亞的意思是「奉差遣」— 伊就去洗，轉來的時已經會看見。
8伊的厝邊及曾看著伊以前啲做乞食的人，講：「此個豈毋是不時坐啲給人分彼個人？」
9有人講：「伊就是。」閣有人講：「毋是；是親像伊。」毋拘彼個人家己講：「我就是。」
10𪜶閣問伊：「你的目睭按怎會看見？」
11伊應講：「叫做耶穌彼個人抄土糊我的目睭，給我講：『你去西羅亞池洗』；我去，一下洗，就看見。」
12𪜶問伊：「彼個人佇叨位？」伊講：「我毋知。」
佇安歇日醫治的問題
13𪜶就導以前失明彼個人去法利賽派的人遐。 14耶穌抄土來開伊的目睭彼日是安歇日。 15所以，法利賽人閣一遍問伊是按怎會看見。伊給𪜶講：「伊用土糊我的目睭，我去洗，就有看見。」
16有一寡法利賽人講：「此個人毋是對上帝遐來的，因為伊無守安歇日。」
閣有別個人講：「一個有罪的人哪會當行此款神跡？」𪜶中間煞起分裂。
17法利賽人就問彼個失明的人：「既然伊互你的目睭有看見，你講伊是什麼人？」
伊應講：「伊是先知。」
18 猶太教的領袖一直無相信伊以前失明，現在有看見，就召伊的父母來， 19問𪜶講：「此個是恁講出世就失明彼個子是無？伊現在哪會看見？」
20伊的父母應講：「阮知伊是阮子，嘛知伊出世就失明。 21毋拘伊現在按怎會看見，阮毋知；嘛毋知什麼人互伊會看見。恁給問，伊已經大漢，家己會曉應。」 22伊的父母按呢講，是因為驚猶太教的領袖；因為𪜶已經參詳好勢，若有人承認耶穌是基督，著給伊對會堂革出。 23因為按呢，伊的父母才講：「伊已經大漢，恁給問。」
24法利賽人第二遍叫彼個出世就失明的來，給伊講：「佇上帝面前著照實講。阮知此個人是有罪的人。」
25伊應講：「伊是有罪的人抑毋是，我毋知。我只有知一項代誌，我前失明，今有看見。」
26𪜶就問伊：「伊給你做什麼？伊按怎互你會看見？」
27伊應講：「我已經給恁講啦，恁毋聽，哪欲閣聽？恁嘛想欲做伊的門徒是無？」
28𪜶就給伊罵：「你才是彼個人的門徒；阮是摩西的門徒。 29阮知上帝曾對摩西講話，毋拘此個人，伊對叨位來，阮毋知。」
30彼個人應講：「按呢有夠奇怪！伊醫好我的目睭，恁猶久毋知伊對叨位來？ 31咱知上帝無聽罪人的祈求；毋拘人若敬畏上帝，實行伊的旨意，上帝就給伊聽。 32對創世以來，猶毋曾聽見講有人互出世就失明的人會看見。 33此個人若毋是對上帝遐來，𣍐當做此款代誌。」
34𪜶就對伊講：「你出世就有罪，佇罪中大漢，閣敢欲教示阮！」𪜶就給伊革出會堂。
靈性的失明
35耶穌聽著𪜶給伊革出會堂，後來尋著伊，就給伊問：「你有信人子無？」
36伊應講：「先生，什麼人是人子，我通信伊？」
37耶穌對伊講：「你已經有看著伊；此陣啲及你講話的就是伊。」
38伊講：「主啊，我信！」就跪落去給伊拜。
39耶穌講：「我為著審判來到此世間，通互失明的看見，互目光的變做失明。」
40一寡法利賽人聽著就問耶穌：「你是講阮嘛失明噢？」
41耶穌應講：「恁若失明就無罪；毋拘恁講『阮是目光的』，按呢恁猶有罪。」
Dewis Presennol:
約翰福音 9: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021