約翰福音 15
15
耶穌是真的葡萄樹
1「我是真的葡萄樹，我的父是種葡萄的。 2連佇我閣無結果子的枝，伊就給伊剪起來；有結果子的枝，伊就給伊修剪，互伊結較多果子。 3我對恁講的話已經互恁清氣啦。 4恁著不時及我結連，我就不時及恁結連。枝無連佇葡萄樹，家己𣍐結果子；恁若無及我結連嘛是按呢。
5「我是葡萄樹，恁是枝。及我結連，我嘛及伊結連的，會結真多果子，因為無我，恁𣍐當做什麼。 6人若無及我結連，會親像焦去的枝互人㧒出去外面，拾歸堆，㧒落火燒。 7恁若及我結連，我的話佇恁內面，恁無論愛什麼，求就給恁實現。 8恁若結真多果子，表示恁是我的門徒，我的父會因為按呢得著榮光。 9親像父有疼我，我嘛有疼恁，恁著不時𫢶佇我的疼內面。 10恁若遵守我的命令，恁會不時𫢶佇我的疼內面，親像我有遵守我的父的命令，不時𫢶佇伊的疼內面。
11「我給恁講諸個代誌，是欲互我的歡喜佇恁內面，閣互恁的歡喜滿滿。 12親像我有疼恁，恁著相疼；這是我的命令。 13人為著朋友犧牲性命，無比這較大的疼。 14恁若遵守我的命令就是我的朋友。 15我無閣叫恁做僕人，因為僕人毋知主人啲做什麼；今我已經叫恁做朋友，因為我對我的父所聽著的攏有給恁講啦。 16毋是恁揀選我，是我揀選恁，閣任命恁，互恁去結果子，互恁的果子會當永遠保存。按呢，恁奉我的名無論對父求什麼，伊會互恁。 17這是我互恁的命令：恁著彼此相疼。」
世間人的怨恨
18「世間人若怨恨恁，著知𪜶怨恨恁以前先怨恨我啦。 19恁若屬此世間，世間人會看恁做家己的人給恁疼。不過我已經對世間給恁揀選出來，恁毋是屬此世間，因為按呢世間人怨恨恁。 20著會記得我給恁講的話：『僕人𣍐比主人較大。』世間人若迫害我，嘛會迫害恁；𪜶若遵守我的話，嘛會遵守恁的話。 21不過為著我的緣故，𪜶會對恁做諸個攏總的代誌，因為𪜶毋識差我來彼位。 22我若無來，無給𪜶講，𪜶就無罪；不過𪜶現在無法度為著家己的罪辯解。 23怨恨我的人嘛怨恨我的父。 24我佇𪜶中間若無做別人毋曾做的代誌，𪜶就無罪；現在𪜶有看著我的所做，猶久怨恨我及我的父。 25這是欲實現𪜶的律法所記載的話：『𪜶無緣無故怨恨我。』
26「我欲對父遐差一位慰助者來恁遮，伊就是對父遐來彼位啟示真理的神，伊來的時會為著我作證。 27恁嘛著為著我作證，因為恁對開始就及我做夥。」
Dewis Presennol:
約翰福音 15: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021