約翰福音 11
11
拉撒路的死
1有一個人叫做拉撒路，破病，住佇伯大尼，就是馬利亞及伊的阿姊馬大住的庄社。 2此個馬利亞曾用芳油抹主，閣用頭毛拭伊的腳；伊的小弟拉撒路破病。 3此兩個姊妹差人去見耶穌，講：「主啊，你所疼的人啲破病。」
4耶穌聽著就講：「此個病𣍐致到死；是欲顯明上帝的榮光，通互上帝的子對此項代誌得著榮光。」
5耶穌真疼馬大及伊的小妹，以及拉撒路。 6伊聽著拉撒路破病，繼續佇彼所在住兩日。 7後來，伊給門徒講：「咱閣來去猶太。」
8門徒應講：「拉比，猶太人抵仔才啲尋機會欲用石頭給你抌，你豈欲閣去遐？」
9耶穌講：「日時豈毋是有十二點鐘？人若佇日時行就𣍐跋倒，因為有看見此世界的光。 10人若佇暗時行會跋倒，因為伊無光。」 11耶穌講諸個話了，閣給𪜶講：「咱的朋友拉撒路睏去啦，我欲來去給伊叫醒。」
12門徒講：「主啊，伊若是睏去就會好起來。」
13耶穌是講拉撒路已經死去，毋拘𪜶想做伊真正啲睏。 14所以耶穌明明給𪜶講：「拉撒路死去啦。 15為著欲互恁信我，我無佇遐顛倒好。今，咱來去伊遐。」
16彼個叫做雙生仔的多馬給門徒伴講：「咱嘛來去及伊做夥死！」
耶穌是閣活，是活命
17耶穌到伯大尼的時才知拉撒路已經葬佇墓內四日。 18伯大尼離耶路撒冷差不多三公里； 19有真多猶太人因為馬大及馬利亞小弟的代誌來安慰𪜶。
20 馬大聽著耶穌到位就出去給伊迎接；馬利亞猶原坐佇厝內。 21馬大給耶穌講：「主啊，你若有佇遮，我的小弟就𣍐死。 22甚至現在，我知你無論對上帝求什麼，伊攏會互你！」
23耶穌給伊講：「你的小弟會閣活起來。」
24 馬大應講：「我知佇末日閣活的時，伊會閣活。」
25耶穌給伊講：「我是閣活，是活命；信我的人雖然死，猶久會活。 26所有現在啲活來信我的人永遠𣍐死。你有信無？」
27 馬大應講：「主啊，我信你是基督，是彼位啲欲來世間的上帝的子。」
耶穌流目屎
28 馬大講諸個話了後就轉去，叫伊的小妹馬利亞來，私下給伊講：「老師來啦，伊啲叫你。」 29馬利亞一下聽著，趕緊起來，去耶穌遐。 30彼時耶穌猶未到庄內，猶佇馬大去迎接伊的所在。 31佇厝內啲安慰馬利亞的猶太人，看著馬利亞趕緊𬦰起來閣走出去，就隨伊去，想講伊欲去墓遐哭。
32 馬利亞到耶穌遐，看著伊，就仆落去伊的腳前，對伊講：「主啊，你若有佇遮，我的小弟就𣍐死。」
33耶穌看著伊啲哭，閣看著及伊做夥來許個猶太人嘛啲哭，心真悲傷激動， 34問𪜶講：「恁給伊葬佇叨位？」
𪜶應講：「主啊，來去看。」
35耶穌流目屎。 36猶太人講：「你看，伊赫呢疼伊！」
37𪜶中間有一寡人講：「伊曾互失明的人會看見，豈𣍐當互此個人無死？」
耶穌互拉撒路閣活
38耶穌又閣真悲傷，來到墓遐；彼個墓是一個洞穴，有一塊石塞啲。 39耶穌命令，講：「給彼塊石徙開！」
死去彼個人的阿姊馬大給耶穌講：「主啊，伊死四日啦，已經臭啊。」
40耶穌給伊講：「我豈無給你講，你若信，會看見上帝的榮光？」 41𪜶就將彼塊石徙開。耶穌攑目向天講：「父啊，我感謝你，因為你已經有聽我的祈禱。 42我知你不時攏有啲聽我的祈禱，毋拘我按呢講是為著徛佇周圍的群眾，通互𪜶信你有差我。」 43講煞，耶穌大聲喝：「拉撒路，出來！」 44彼個死去的人就出來；伊的腳手紮布，面用巾仔包啲。耶穌給𪜶講：「給伊解開，互伊行！」
害死耶穌的陰謀
(太 26.1-5；可 14.1-2；路 22.1-2)
45來探馬利亞的猶太人，有真多人看著耶穌的所做就信伊。 46有一寡人去尋法利賽派的人，給𪜶報告耶穌所做的代誌。 47因為按呢，許個祭司長及法利賽人召開議會，講：「此個人行即呢多神跡，咱欲按怎對付？ 48咱若放伊繼續按呢做，大家攏會去信伊，羅馬人會來毀壞咱的聖殿，閣毀滅咱的民族。」
49其中有一個人叫做該亞法，是彼年的大祭司，伊給𪜶講：「恁毋識半項。 50恁𣍐曉想，寧可互一個人替眾人死，才免互全民族滅亡，按呢對恁是較好。」 51伊按呢講毋是家己的意思，是伊做彼年的大祭司啲預言耶穌啲欲為著此個民族來死； 52毋若為著此個民族，嘛欲將上帝四散的子兒聚集做一個。
53對彼日起，猶太教的領袖計謀欲刣耶穌。 54因為按呢，耶穌無閣公然佇猶太人的中間出入；伊離開遐，去倚近曠野的所在，到一個叫做以法蓮的城，及伊的門徒佇遐住。
55 猶太人的𨃟過節啲欲到。節期前，有真多人對鄉村來到耶路撒冷欲守潔淨禮。 56𪜶啲尋耶穌，徛佇聖殿內互相問講：「恁想按怎？伊一定𣍐來過節乎？」 57因為許個祭司長及法利賽人有發命令，若有人知耶穌佇叨位，著來報告，互𪜶通去給伊掠。
Dewis Presennol:
約翰福音 11: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021