創世記 12
12
上帝呼召亞伯蘭
1上主對亞伯蘭講：「你著離開本地、本族，恁老父的家，去我欲指示你的地。 2我欲互你成做大國，欲賜福你，互你的名受敬重，你嘛欲互人得著福氣。
3祝福你的，我欲賜福互𪜶；
咒詛你的，我欲咒詛伊；
地上萬族欲因為你得著福氣#12.3 「地上萬族欲因為你得著福氣」嘛通譯做「萬民欲向我求福氣，親像我賜福互你像款」。。」
4 亞伯蘭照上主的吩咐，就出去，羅得嘛及伊去。亞伯蘭離開哈蘭的時七十五歲。 5亞伯蘭導伊的某莎萊及伊的侄仔羅得出發，閣帶𪜶佇哈蘭所積聚的財物、得著的僕人女婢，欲去迦南地。
𪜶來到迦南地， 6亞伯蘭繼續行，來到示劍的摩利橡樹遐；彼時迦南人住佇彼個地。 7上主對亞伯蘭顯現，講：「我欲將此個地賞賜你的後代。」伊就佇遐為著對伊顯現的上主起一座祭壇。 8伊閣對遐徙到伯特利東旁的山區，搭布棚，佇遐為著上主起一座壇，求叫上主的名；彼個所在西旁是伯特利，東旁是艾。 9亞伯蘭漸漸徙去南旁的尼革夫。
亞伯蘭落去埃及
10彼個地飢荒真嚴重。亞伯蘭落去埃及，寄居佇遐。 11啲欲到埃及的時，亞伯蘭對伊的某莎萊講：「我知你是生做真媠的婦仁人； 12埃及人若看著你，會講：『此個是伊的某。』𪜶會給我刣死，互你活啲。 13拜託你講你是我的小妹，互我通因為按呢平安無事，免互人刣死。」 14亞伯蘭到埃及的時，埃及人看著彼個婦仁人有夠媠。 15法老的人臣看著伊，就佇法老的面前謳咾伊的媠。彼個婦仁人就互人帶入去法老的王宮。 16法老因為此個婦仁人好款待亞伯蘭；亞伯蘭就得著牛、羊、公的驢、母的驢、駱駝，以及僕人及女婢。
17上主因為亞伯蘭的某莎萊的緣故，降大災禍佇法老及伊的全家。 18法老就叫亞伯蘭來，講：「你哪對我做此款代誌？無給我講伊是你的某？ 19是按怎你講伊是你的小妹，煞害我給伊娶來做某？今你的某佇遮，導轉去。」 20法老就命令部下送亞伯蘭、伊的某，及伊一切所有的離開。
Dewis Presennol:
創世記 12: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021