मत्ती 16
16
फरीसी अर सदूकियां गी चाल
(मरकुस 8:11-13; लूका 12:54-56)
1फेर फरीसी अर सदूकी यीसू कनै आया। बे बिंगै अधिकार गो पतो लगाणो चावा। ईंखातर बां बिनै चमत्कार करण गो केयो। 2यीसू उतर दियो, “सूरज छीपज्यै जद थे केवो आज मोसम आच्छो है क्यूंकै आसमान लाल है। 3अर सूरज उगज्यै जद थे केवो आज आंधी आसी क्यूंकै खंखळ चडरी है। थे मोसम नै देखगे भेद बता सको पण टेमां गै निसान गो भेद क्यूं कोनी बता सको? 4दुस्ट अर बेबीचारी पीढी गा लोग कोई निसान देखणो चावै। पण आनै योना गै निसान गै सिवा ओर दूसरो निसान कोनी दिखाईज्यै।” फेर बो बानै छोडगे बठूं उड़ग्यो।
फरीसी अर सदूकियां गी सिक्सा गो खमीर
(मरकुस 8:14-21)
5यीसू गै चेला झील गै परली पार तो आ ग्या पण बे रोटी ल्याणी भूलग्या। 6जद यीसू बानै केयो, “फरीसियां अर सदूकियां गै खमीर ऊं चोकस रेईयो।” 7जद बे आपसरी में केण लागग्या, “के आपां रोटी सागै कोनी ल्याया?” 8झिको कीं चेला बोल्या बानै यीसू जाणग्यो अर बानै केयो, “अरै ओ कमजोर बिस्वासियो, थे रोटी गै बारै में क्यामी सोचो? 9थे अजे बी कोनी समझया कै पांच हजार लोगां नै पांच रोटियां ऊं धपाया अर फेर बी किती टोकरी बचगी। 10अर थानै याद कोनी चार हजार लोगां खातर सात रोटी ही, सारा धापग्या फेर बी किती टोकरी बची। 11थे क्यूं कोनी समझो कै मैं थानै रोटी खातर कोनी केऊं। मैं थानै फरीसियां अर सदूकियां गै खमीर ऊं बचण खातर केऊं।” 12जद बे समझग्या कै इंगो मतलब फरीसियां अर सदूकियां गी सिक्सा ऊं बचगे रेण खातर केयो।
पतरस गो यीसू नै मसी मानणो
(मरकुस 8:27-30; लूका 9:18-21)
13यीसू जद कैसरिया फिलिप्पी गै परदेस में आयो तो बण चेला नै पूछयो कै, “लोग मिनख गै बेटै नै के केवै?” 14जद चेला केयो, “केई तो यूहना बतिस्मो देण आळो, अर केई केवै एलियाह अर केई केवै यिरमयाह अर केई केवै परमेसर गी बात बताण आळा मू एक।” 15-16यीसू बानै पूछयो, “थे मनै के केवो?” पतरस बोल्यो, “तूं मसी है, परमेसर गो बेटो।” 17यीसू बिनै उतर दियो, “योना गा बेटा, तू धन्य है। तूं आ बात किनैई ना कैई। मेरै सुरगीय पिता आ बात तेरै पर प्रकट करी है। 18मैं केऊं तूं पतरस है अर तेरो बिस्वास पथर बरगो है। तेरै द्वारा भोत सारा लोग बिस्वास में आवैगा अर आं लोगां गो मोत गी सकती कीं कोनी बिगाड़ सकै। 19मैं थानै सुरग गै राज गी कुंजी देऊंगा, झिकी ऊं धरती पर तूं कीं बांधै बो परमेसर सुरग में बांधैगो। अर झिको कीं तूं धरती पर खोलै बो परमेसर सुरग ऊं खोल्दैयगो।” 20फेर बण आपगै चेला नै आग्या दी कै, “आ बात थे किनैई ना बताईयो, कै मैं मसी हूं।”
आपगी मोत गै बारै में यीसू गी बात
(मरकुस 8:31-33; लूका 9:22)
21बिं टेम बो आपगै चेला नै बताण लागरयो कै मनै यरुसलेम जाणो जरूरी है। बठै मनै यहुदी नेम सिखाण आळा अर बुडा यहुदी नेता अर महा याजक मनै दुख देगे मरवा दैयगा। फेर बो तीसरै दिन जी उठैगो। 22जद पतरस बिनै न्यारो ले जा'गे केण लागग्यो कै, “प्रभु परमेसर तेरै पर दया करै। थारै सागै इयां कदी ना होवै।” 23फेर यीसू बिं कानी मुड़गे बोल्यो, “पतरस मेरै रा ऊं परनै होज्या। सैतान तूं मेरै रा नै रोकणो चावै। तूं परमेसर गी तरियां कोनी सोचै। पण तूं आदमियां गी तरियां सोचै।” 24फेर बण आपगै चेला नै केयो, “झिको मेरै लारै आणो चावै बो अपणै आपनै भूलज्यै अर आपगो करूस चक'गे मेरै लारै होज्यै।”
यीसू गै लारै चालण गो अरथ
(मरकुस 8:34–9:1; लूका 9:23-27)
25झिको आपगी जान बचाणी चावै बो बिनै खोवैगो। पण झिको आपगी जान मेरै खातर खोवैगो बो आपगी जान नै बचा ल्यैगो। 26जे कोई आपगी जान गमागे सारी चिजां भेळी कर ल्यै तो बिनै के फायदो? आपगी जान ऊं कोई चीज मेंगी है के? 27मिनख गो बेटो सुरगदूतां सागै परम पिता गी मेमा सागै आण आळो है झिको हर एक गै करमां गो फळ दयैगो। 28मैं थानै साची केऊं, “अठै हिस्या बी है झिका जद तांई कोनी मरैगा जद तांई मिनख गै बेटै नै आवंता ना देखै।”
Dewis Presennol:
मत्ती 16: BGQ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2023 (Active), Wycliffe Bible Translators, Inc. All rights reserved. © WIn Publishing Trust