मर्कूस 4
4
सेन ताप्के मिहगी पे
(मत्ती १३:१-२३; लूक ८:४-१५)
1येशूगी येहपाराङ गालील छोगी सुहरला सुङदेन नाङज्ये छ़ूसीन। येशूगी ति-खिरे मिह मिह-माहङ जोम्दी येहकें सुङगोराङ येशू टुह-छ्युङ च्यी़ला जा़दी छोगी सुहरले फाच्चीला फार फेप्ती ज़्य़ू नाङसीन। ओहले मिहया़दी छोगी सुहरलाॱराङ तेहसीन।#लूक ५:१-३ 2ओहले येशूगी मिहया़ला पेया़ लाहमले माहङबुराङ तामया़ लोप नाङसीन। ओहले येशूगी खुङया़ला दि ल़ेहमु सुङदेन नाङसीन। 3“ङ्यिहन्दोङ, मिह च्यी़ सेन ताप्च्येला काहल्सीन दु। 4ओहले स्यिहङला सेन ताप-ताप्पा काहङला लाहला सेन लाहमला फार लेप्सीन ओहले च्यिहबीया़ ओहङदी साहसीन। 5ओहले लाहला सेनया़दी तोहरो खाला लेप्सीन दु ओहले ओ़हला सेन क्येज्येनी ग्यो़बाराङ क्येसीन यिहॱनाङ सासा माहङबु म़ेहबा सोङगोराङ 6ङ्यिहमा स्यार फान्ज्यो ओ़ह सेनगी चार्ङ्यी साला सू़ह मा़हखुबागी काम्दी स्यिसीन। 7ओहले लाहला सेनया़दी छेर्मा तोहङबो नाहङया़ला लेप्सीन दु ओहले ओ़ह छेर्मा तोहङबोया़ छार्ती ओ़ह क्येदी ओहङग्योगी च्याहङबाया़ला छर मा़हच्यु ओहले ओ़हला बुदी च्यिॱआङ माहता 8यिहॱनाङ लाहला सेन या़हबु सासा खाला लेप्सीन ओहले सेन क्येदी छार्ती ओहङसीन ओहले ओ़ह लाहमले लाहलाला बुदी दाप सुम-च्यु, लाहलाला बुदी दाप डुक्च्यु, ओहले लाहलाला बुदी दाप क्याह च्यी़ या़हसीन।” 9ओ़ह तिङले येशूगी सुङ नाङसीन, “सु ङ्याम्बु ङ्यिहन्गेन्गी नाम्ज्यो येहबा, खोगी ङ्यिहन्ज्यु।”
10येशू च्यी़राङ येहकेंमु ल़ेह-पेन च्यिङ्यी़ दाङ लेहमेन रो़हया़गी येशूगी पे ज़्या़दी सुङ नाङग्यो स्याहलगी तेहन्दाला येशूला टी़हसीन। 11ओहले येशूगी सुङ नाङसीन, “किन्ज्योगी क्याहल्सीला तिहङ-रिहङबुगी केच्याया़ ङोह स्य़े ख़ूएँगी ओङ ख्याला तेर्ती येह, यिहॱनाङ फिगी मिहया़लानी ताम थाम्ज्यीराङ पे ज़्या़देॱराङ माएँ।
12 खुङया़गी ताज्येनी ताएँ यिहॱनाङ मेहथोङगे,
ङ्यिहन्ज्येनी ङ्यिहन्गे यिहॱनाङ ह्अ मेहकोएँ,
मिहन्सीमानानी खुङया़गी सेमगी स्या़बा पेहच्ये येहकें
ओहले किन्ज्योगी खुङया़गी तिहक्पा स्या़बा नाङज्ये येहकें।” #
यशै ६:९,१०
13ओहले येशूगी स्याहप्च्यीया़ला टी़ह नाङसीन, “च्यि ख्यागी दि पेगी तेहन्दा ङोह स्य़े मा़हखु? ओ़हठी यिहन्सीमानानी ख्यागी लेहमेन पेया़ काह-ठि पेहती ङोह स्य़े ख़ूज्ये ले? 14सेन ताप्के मिहगी किन्ज्योगी सुङदेन ताप्के। 15लाहला मिहया़ लाहमला लेप्क्योगी सेन ल़ेहमुराङ यिहम्बा। खुङगी सुङदेन ङ्यिहन्ज्येनी ङ्यिहन्गे यिहॱनाङ लाहम्साङराङ ती़ह गो-छ्येवा ओहङदी खुङ सेमला ताप्क्योगी सुङदेन ती़हदी ख्येर्के। 16ओहले ओ़ह ल़ेहमुराङ तोहरो खाया़ला लेप्क्योगी सेनगी तेहन्दा च्यि यिहम्बा मासीमाना, लाहला मिहया़गी किन्ज्योगी सुङदेन ङ्यिहन्गे ओहले क़ेहनाङ पेहती लाहम्साङराङ खोगी किन्ज्योला यिह-छ्य़े पेहकें। 17यिहॱनाङ, ओ़ह सुङदेनगी खुङया़गी सेम नाहङ थुराङ चार्ङ्यी सू़ह मा़हखुबा सोङबे खुङया़गी ङ्यिहमा तोबा च्यी़राङ किन्ज्योला यिह-छ्य़े पेहकेन। ओहले ओ़ह सुङदेनला यिह छ्य़ेक्यो सोङबे च्यिरा तुहक्पु दाङ ने़-क्यालया़ ओहङलुङ म़ेहबा खुङ किन्ज्योलेगी तेहपा लो़हगे।
18 ओहले छेर्मा तोहङबोया़ नाहङला लेप्क्योगी सेनगी तेहन्दा च्यि यिहम्बा मासीमाना, लाहलागी किन्ज्योगी सुङदेन ङ्यिहन्ज्येनी ङ्यिहन्गे, 19यिहॱनाङ दि जाम्बुलीङगी तुहङाल, क्युह-नोहरगी चेवा ओहले ओ़ह ल़ेहमुराङ से़हया़ला सेम ग्युर्ती ओ़ह सुङदेन तोर्ती डोएँ ओहले बुदी च्यिॱआङ मे़हयाहएँ। 20यिहॱनाङ या़हबु सासा खाला लेप्क्योगी सेनगी तेहन्दा च्यि यिहम्बा मासीमाना, लाहलागी सुङदेन ङ्यिहन्गे ओहले यिह-छ्य़े पेहकें ओहले सेन ङ्येमा च्यी़ले लाहलाला बुदी दाप सुम-च्यु या़हएँ, लाहलाला बुदी दाप डुक्च्यु या़हएँ ओहले लाहलाला बुदी दाप क्याह च्यी़ या़हगे।”
लोगी पे
(लूक ८:१६-१८)
21ओहले येहपाराङ येशूगी सुङ नाङसीन, “सुज्यीगीॱआङ लो पार्ती पादीगी उप्ती ज़्या़गे ले? क्यि माहल्डी चो़ला पे़हदी ज़्या़गे? लो पार्तीनी ग्या़ थोम्बुला गा ज़्या़गे!#मत्ती ५:१५; लूक ११:३३ 22दि ल़ेहमुराङ, ताहन्दा पे़हदी ज़्या़क्योगी केच्या थाम्ज्यीराङ ङ्यिहमा च्यी़ छ्यिसाल-नाहङसाल थोङज्ये येह, ओहले ह्अ मा़हकेहबागी केच्या थाम्ज्यीराङ छ्यिसाल-नाहङसाल ङोह स्ये़ज्ये येह।#मत्ती १०:२६; लूक १२:२ 23सु ङ्याम्बु ङ्यिहन्गेन्गी नाम्ज्यो येहबा, खोगी ङ्यिहन्ज्यु!”
24ओहले येशूगी खुङया़ला दि ल़ेहमुॱआङ सुङ नाङसीन, “ख्यागी थे़क्यो तामला या़हबु ङ्यिहन्दी ज़्यो़! ख्यागी का़हन्दी पादीगी मिहया़ला ताहप्ती तेर्के, ओ़ह पादीगीॱराङ ख्याॱलाङ ताहप्ती तेर्च्ये येह। ओ़ह म़ेदीॱआङ माहङबु पा़हदी तेर्च्ये येह।#मत्ती ७:२; लूक ६:३८ 25च्यिबेमाना सु ङ्याम्बु येहबा, खोला तोहरोङ तेर्च्ये येह ओहले सु ङ्याम्बु म़ेहबा, खो ङ्याम्बु सिपाज्यी येहकेन्दीॱआङ फ्रो़ज्ये येह।”#मत्ती १३:१२; २५:२९; लूक १९:२६
सेन ताप्केन्गी तेहन्दाला पे ज़्या़ नाङग्यो
26ओहले येशूगी येहपाराङ सुङ नाङसीन, “किन्ज्योगी क्याहल्सी मिह च्यी़गी राहङगी स्यिहङला सेन ताप्क्यो ल़ेहमु यिहम्बा।
27 खो ङ्याहलॱनाङ ओहले लाहङॱनाङ ङ्यिहन-नुहप सेन क्येदी छार्ती ओहङगे। यिहॱनाङ काह-ठि पेहती दि सेन छार्पा म़ेदी खोला क्यी़ह मेहयोहङगे।
28 सासागीॱराङ सेनला क्ये च्य़ूगे ओहले तेन्दो या़ह च्य़ूएँ, तोहङले च्याहङबा थेन्गे ओहले छर फान्ज्यो ङ्येमा ताएँ। 29ओहले तेन्दो छ़े फान्ज्यो खोगी सोहरागी तेन्दो ङाएँ च्यिबेमाना ओहजेला तेन्दो रूगे ती़हजी काहल सिहन्ग्यो ओहङगे।” #योए ३:१३
राइ-सेनगी पे
(मत्ती ८:१४-१७; लूक ४:३८-४१)
30ओहले येहपाराङ येशूगी सुङ नाङसीन, “किन्ज्योगी क्याहल्सी च्यि ङ्याम्बु तुहर्च्ये? ओहले च्यि पे ज़्या़दी दिगी तेहन्दाला प्रा साल्ज्ये? 31दि ल़ेहमु यिहम्बा। राइ-सेन जाम्बुलीङगी थाम्ज्यीराङ सेनया़ म़ेदी फेमा ओहङगे। ओहले मिह च्यी़गी ओ़ह राइ-सेन स्यिहङला ताप्के। 32ओहले ओ़ह सेन छर फान्ज्यो लेहमेन ङोजेया़ नाहङला थाम्ज्यी म़ेदी तोहङबो छ्यिम्बु डोएँ। ओहले ओ़ह राई सेनगी तोहङबोला छ्यिम्बु-छ्यिम्बु याहल्गाया़ डोएँ ओहले च्याह-च्यिहवाया़ ओहङदी ओ़ह याहल्गाया़ला छाङ जे़दी तेहकें।”
33मिहया़गी किन्ज्योगी सुङदेन ङोह स्य़े ख़ूज्यु म़ेदी येशूगी दि ल़ेहमु माहङबुराङ पे ज़्या़दी खुङया़ला सुङ ख्येप्टा नाङसीन। 34मिहया़ला सुङदेन नाङगेमु येशूगी पे मा़हज्याबा जेती च्यिॱआङ सुङदेन माहनाङ। यिहॱनाङ राहङगी स्याहप्च्यीया़ च्यी़राङ येहकेमुदी येशूगी थाम्ज्यीराङ पेगी तेहन्दा प्रा साल नाङगो येहकें।
येशूगी ल्हा़बा लुङजीला छ्येबे तेह च्य़ू नाङज्ये
(मत्ती ८:२३-२७; लूक ८:२२-२५)
35ओ़ह ङ्यिहमु नाहम स़े फान्ज्यो येशूगी राहङगी स्याहप्च्यीया़ला सुङ नाङसीन, “स्यो, ओहराङ छोगी फार्केन देपला डोएँ।” 36ओहले स्याहप्च्यीया़गी मिह मिह-माहङया़ला क्युर ज़्या़दी येशू ज़्य़ू नाङग्योगी टुह-छ्युङला जा़सीन ओहले येशूला ङ्याम्बुराङ ख्येर्ती काहल्सीन, ओहले लेहमेन टुह-छ्युङया़ॱआङ खुङ फ़ेबेॱया ङ्याम्बुराङ ओहङसीन। 37ओहले याहङमे-याहङराङ ल्हा़बा लुङजी स्युक छ्यिम्बुच्यी ओहङदी छोगी पाहलाप क्याहप्ती टुह-छ्युङ छ्युगी काहङज्ये पेहसीन। 38ओहजेला येशूदी उ-ङ्ये़ च्य़ूदी टुह-छ्युङ क्याहप ङो़ले नाल जेती येहकें। ओहले स्याहप्च्यीया़गी येशूला नाल साङ च्य़ूदी स्युहसीन, “ओ़ लोबेन लाह, ओहराङनी स्यिज्येॱराङ पेहसीन, च्यि राहङगी ङ्यिहला रो़हराम जे मेहनाङगे?” 39ओहले येशू ज़्याङदी ल्हा़बा लुङजीला काप्क्येन नाङदी सुङ नाङसीन, “छ्येबे तेह! थेमे तेह!” ओ़हजेलाराङ ओ़ह ल्हा़बा लुङजी छ्येबे तेहसीन। 40ओहले येशूगी स्याहप्च्यीया़ला सुङ नाङसीन, “ख्या च्यिबे दि ल़ेहमु पेहती का क्याहल्ग्यो? के ख्यागी तेहपा?” म़ेदी टी़ह नाङसीन। 41ओहले खुङया़ याहम्जेनज्यी ने़दी ज्यी़दी राहङ नाहङदुङ दि ल़ेहमु म़ेदी ताम मामा चासीन, “मिहरो सु यिहम्बा ता़ह? ल्हा़बा लुङजी दाङ छ्यु-पाहलापया़गीॱआङ मिहरोगी काला ङ्यिहन्गु दु!”
Dewis Presennol:
मर्कूस 4: HYLM
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2023 (Active), Wycliffe Bible Translators, Inc. All rights reserved.