मत्ती 28
28
येशू टोहङदी तिङला सोम्बो ज़्याङ नाङग्यो
(मर्क १६:१-११; लूक २४:१-१२; यूह २०:१-१८)
1थाङ सोएँ ङ्यिहमागी नाहङबार ङ्यिहमु ङाटु क्या-ह्राबा-ह्रिबेला मरियम मग्दलिनी दाङ लेहमेन मरियम येशूला तो़ह ज़्या़क्योगी फुक्पाला ता काहल्सीन। 2ओहजे काहङला याहङमे-याहङलाराङ साङगुल स्युक छ्यिम्बुच्यी ओहङसीन च्यिबेमाना स्यिहङगामले माहर चो़वोगी स्यिहङगामगी स्याहप्च्यी च्यी़ फेप्ती फुक्पागी तोह रिल्दी ओ़ह तोह खालाराङ ज्यू़सीन। 3मिहरोगी स्याहल्दोङ चिलाम ल़ेहमुराङ येहसेर क्याहप्क्यो दाङ नाहम्सादी खावा ल़ेहमुराङ कार्पु येहकें। 4कोह सुङगेनया़दी ज्यी़सुगी ल्होक-ल्होक ताहर्ती साला रिहल्सीन ओहले स्यिक्यो मिह ल़ेहमुराङ काहल्सीन।
5यिहॱनाङ स्यिहङगामगी स्याहप्च्यीगी ओ़ह पी़हमी-पेहजाया़ला सुङ नाङसीन, “ख्याया़ मा़हन्ज्यी, क्याहङस्यीङला सेक्योगी येशूला ख्याया़ छोल ओहङग्यो यिहन म़ेदी ङाहला क्यी़ह येहबा। 6यिहॱनाङ त़ेदोङ, येशूनी देला ज़्य़ू नाङदी म़ेह। येशू राहङगी सुङ नाङग्यो ल़ेहमुराङ मिहरोनी टोहङलेगी सोम्बो ज़्याङ नाङदी येह। ओहङदी चो़वोकी कुबुर तो़ह ज़्या़क्योगी ग्या़ला ता स्यो। 7ता़ह ग्यो़बा काहल्दी येशूगी स्याहप्च्यीया़ला म़ेदोङ ‘चो़वोनी टोहङग्यो ग्या़लेगी सोम्बो ज़्याङ नाङदी येह। मिहरो ख्याया़ म़ेदीॱआङ तोहङले गालीलला फेप नाङगेराङ येहबा, ओ़ह ग्या़ला ख्याया़गी येशूला थोङज्ये येह! नाहरे ङाहगी ख्याया़ला माक्योगी दि तामया़ थाम्ज्यीराङ सेमला ज़्या़दोङ’।”
8ओ़ह पी़हमी-पेहजाया़ला ज्यी़सुॱआङ ओहङसीन ओहले क़ेहनाङॱआङ ज्यिबुराङ लाहङसीन। खुङ ग्यो़बाराङ ओ़ह फुक्पालेगी थेन्दी स्याहप्च्यीया़ला लेहङगु स्येच्येला छ्योङदी काहल्सीन।
9येशूगी खुङया़ला याहङमे-याहङलाराङ थू़दी सुङ नाङसीन, “ख्याया़ला सेम लो तेहमु ओहङज्यु!” ओहजेला खुङगी खेप्चु क्याहप्ती येशूगी स्याहपला ज़ुङदी त़ेरा फुल्सीन। 10येशूगी खुङला दि ल़ेहमु सुङ नाङसीन, “ख्याया़ मा़हन्ज्यी, ख्याया़ काहल्दी ङाहगी नो़हया़ला गालीलला सोङ म़ेदी म़े तेर। ओ़ह ग्या़लाराङ खुङगी ङाहला थू़ज्ये येह।”
माक्मीया़गी ख्योङग्योगी लेहङगु
11ओ़ह पी़हमी-पेहजाया़ लाहमला डोॱराङ येहकें ओहजेला फुक्पा सुङगेन्गी लाहला माक्मीया़ क्याहसाला काहल्दी पूजाहारी छ्यिम्बुया़ला ओ़हला च्यि च्यि काहल्बा माएँ तामया़ थाम्ज्यीराङ स्येसीन। 12ओहले पूजाहारी छ्यिम्बुया़गी लेहमेन यहूदीया़गी एल्डरया़ ङ्याम्बु डी़दी “ता़ह च्यि पेहकें?” म़ेदी टे़ह क्याहप्सीन ओहले खुङया़गी माक्मीया़ला माहङबु टाङगा तेर्ती मासीन, 13“ख्याया़गी ‘नुहङमु ङ्यिह ङ्यि लो़हक्यो ती़हजीला येशूगी स्याहप्च्यीया़ ओहङदी येशूगी कुबुर कुमेन क्याहप्ती ख्येर्सीन दु’ म़ेदोङ लो म़ेदी मासीन। 14ओहले का़हलेॱआङ दि तामया़ स्युहङ-पेन छ्यिम्बुगी क्यी़ह ज्योर्सीन मानाॱआङ ङ्यिह स्युहङ-पेन ङ्याम्बु ताम म़ेदी ख्याला चोक्पा डो मी़हच्युएँ” म़ेदी मासीन। 15ओ़ह फुक्पा सुङगे मिहया़गी टाङगा लेहन्दी पूजाहारी छ्यिम्बुया़गी लोप्क्यो ल़ेहमुराङ मासीन। दि तामदी यहूदीया़गी पाहरक्यीला नाहरे थुॱआङ फेल्दीॱराङ येहबा।
चा़ छ्यिम्बु तिङस्यो का
(मर्क १६:१४-१८; लूक २४:३६-४९; यूह २०:१९-२३; ल़ेह १:६-८)
16स्याहप्च्यी च्यू़ज्यीला येशूगी गालीलगी काहङ च्यी़ला सोङ म़ेदी सुङ नाङग्यो येहकें। ओहले खुङया़ ओ़हला काहल्सीन।#मत्ती २६:३२; मर्क १४:२८ 17येशूला थोङ-लुहङ मे़हबाराङ खुङया़ येशूगी दिनला खेप्चु क्याहप्ती त़ेरा फुल्सीन। यिहॱनाङ खुङया़ नाहङला लाहला स्याहप्च्यीया़लानी “येशूॱराङ यिहम्बानी मिहम्बा” म़ेदी थेचुम पेहसीन। 18ओहजेला येशू खुङया़ पोहला फेप्ती सुङ नाङसीन, “त़ेदोङ, स्यिहङगाम दाङ जाम्बुलीङगी थाम्ज्यीराङ ओङ ङाहला नाङदी येह। 19ओ़ह सोङबे ता़ह ख्याया़ काहल्दी थाम्ज्यीराङ क्यिहपाया़ला स्याहप्च्यी जे़दोङ। खुङया़ला किन्ज्यो याहप, स़ेबु दाङ नाम्पार-ताहक्पा थुगी छेनला बप्तिस्मा तेर,#ल़ेह १:८ 20ङाहगी ख्याया़ला तेरक्योगी काया़ थाम्ज्यीराङ ची़ज्येला खुङया़ला लोप्तोङ। ओहले त़ेदोङ, ङाह नाहम माॱनाङ, जाम्बुलीङकी ज्युक्स्योलगी ती़हजी थुराङ ख्याया़ ङ्याम्बु ओहङज्ये येह” म़ेदी येशूगी सुङ नाङसीन।
Dewis Presennol:
मत्ती 28: HYLM
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2023 (Active), Wycliffe Bible Translators, Inc. All rights reserved.