लूका 11
11
ईसू पराथना करे बर सीखाथे
(मत्ती 6:9-13)
1एक दिन ईसू कोनो जघा में पराथना करत रहीस, जे घनी ओ पराथना कएर दारीस, त ओकर चेला मन ले एक झन हर कहीस, “ए परभू, जेकस यूहन्ना हर अपन चेला मन ला, पराथना करे बर सिखाईस, ओही कस तंए हमू मन ला सिखाए दे।” 2ईसू हर ओमन ला कहीस, “तुमन एकस पराथना करीहा,”
ए दाऊ,
तोर नांव पबितर मानल जाए,
तोर राएज आए।
3सगर दिन कर खाना हमन ला देहत रह,
4अऊ हमर पाप ला छमा कएर दे,
जेकस हमन अपन बिरोधी मन ला छमा करथन,
अऊ हमन ला पाप में गिरे झईन दे।#11:4 तनिक हाथ ले लिखल किताब मन में अईसनोच लिखल हवे; कि “परमेस्वर हमन ला दुस्ट ले बचाए ले।”
पराथना कर बारे में ईसू कर सिक्छा
(मत्ती 7:7-11)
5तेकर पराथना करे कर बारे में, अऊ कांही सिखाए बर ईसू हर, एगोट उदाहरन देके ओमन ला कहीस, “माएन लेआ, कि तुमन कर एगोट संगता हवे, अऊ तुमन आधा राती जाए के ओकर जग कईहा, ‘ए संगता, मोके तीन गोट रोटी दे। 6काबरकि मोर घरे, कहों जवईया एगोट संगता आईस हवे, अऊ मोर जग ओके ला खवाए बर कांही नईए।’ 7त तोर संगता हर भीतरी ले जबाब देही, कि मोके परेसान झईन कर, अब तो दुरा हर ढकाए गईस हे, अऊ मोर लईका मन मोर संगे सूतत हवें, एकरे बर मंए उईठ के तोके ला देहे नई सकों? 8मंए तुमन ला फूरोंच कहथों, कि ओहर तुमन कर संगतोच होए के, उईठ के देहो बर नई सकीस, तबो ले तुमन अपन लाज ला छोंएड़ के ओकर जग कईयो दाएर मांगे कर चलते, ओहर उईठ के जेतना तुमन कर जरूरत हवे, ओतनेच देही। 9अऊ मंए तुमन ला फूरोंच कहथों, कि परमेस्वर जग मांगते रईहा, त तुमन ला देही, खोजते रईहा, त तुमन पईहा, खटखटात रईहा, त तुमन बर दुरा हर उघरही। 10काबरकि जे कोनो हर, परमेस्वर जग मांगथे, ओके मिलथे, अऊ जेहर खोजथे ओहर पाथे, अऊ जेहर खटखटाथे ओकर बर दुरा हर उघेर जाही। 11तुमन में ले कोनोच अईसना दाऊ नई होही, जे घनी ओकर बेटा हर, ओकर जग रोटी मांगही, त ओके ला पखना देही, अऊ मछरी मांगही, त मछरी कर पलटा में ओके सांप देही। 12चाहे अंडा मांगही, त ओके बिछी देही। 13जब तुमन पापी होए के भी, अपन लईका मन ला बढ़िहां चीज देहे बर जानथा, त तुमन कर सरग कर दाऊ हर, अपन मंगोईया मन ला पबितर आत्मा काबर नई देही?”
ईसू परमेस्वर कर सामर्थ ले सैतान ला हरवाथे
(मत्ती 12:22-30; मरकुस 3:20-27)
14एक झन आदमी ला कोंदा बनोईया, दुस्टआत्मा हर धरे रहीस। एक दिन ईसू हर ओ आदमी ले दुस्टआत्मा ला निकालीस, त ओ आदमी हर गोठियाए लागीस, अऊ ओला देख के मईनसे मन अकचकाए गईन। 15बकिन ओमन में ले तनिक झेमन कहीन, “एहर तो सैतान, जेहर दुस्टआत्मा मन कर मुखिया हवे, ओकर सक्ति ले दुस्टआत्मा मन ला निकालथे।”#11:15 युनानी भासा में बचन कर ए भाग में, सैतान ला बालजबूल नांव देहीसे, एहर गैर यहूदी मन कर देंवता कर नांव लागे। 16परमेस्वर कर सक्ति ले ईसू हर चमत्कार करथे, एकर सबूत देखाए बर तनिक दूसर झेमन ईसू ला कहीन, “तंए एगोट चमत्कार कएर के देखाओ।” 17बकिन ईसू हर ओमन कर मन कर बिचार ला जाएन के, ओमन ला कहीस, “जे-जे राएज कर मईनसे मन अपने-अपन में लड़थें, त ओ राएज हर उजेर जाथे; अऊ जे घर कर मईनसे मन अपने-अपन में झगरा बाजथें, त ओमन अलग-अलग होए जाथें।” 18तुमन तो मोर बारे में कहथा कि एहर दुस्टआत्मा मन कर मुखिया कर सक्ति ले, दुस्टआत्मा मन ला निकालथे। बकिन अगर सैतान हर अपनेच बिरोध में होए जाही, त ओकर राएज कईसे बने रही? 19अगर मंए दुस्टआत्मा मन कर मुखिया कर सक्ति ले दुस्टआत्मा ला निकालथों, त तुमन कर लईका मन#11:19 लईका मन कर मतलब ओमन लागें, जेमन यहूदी मन कर मझारे दुस्टआत्मा ला निकालथें। काकर सक्ति ले निकालथें? तेकर ले ओही मन साबित करहीं कि जेला तुमन कहथा ओहर गलत हवे। 20बकिन अगर मंए, परमेस्वर कर सक्ति ले दुस्टआत्मा मन ला निकालथों, त समझ लेआ कि परमेस्वर कर राएज हर, तुमन कर ठांवें आए पहुंचीस हवे।
21जब एगोट बलवान मईनसे हर, सबेच हथियार कर संगे अपन घर कर पहरा करथे, त ओकर धन संपती बांचे रथे। 22बकिन जब ओकर ले कोनो बलवान मईनसे हर, ओकर ऊपरे लड़ाई कएर के जीत जाथे, त ओकर ओ हथियार ला लूईट लेथे, जेकर ऊपरे ओकर भरोसा रहीस, अऊ ओकर धन संपती ला लुईट के आपस में बांएट लेथें। 23जेहर मोर संगे नईए, ओहर मोर बिरोध में हवे, अऊ जेहर मोर संगे काम नई करथे, ओहर फूरोंच में मोर बिरोध में काम करथे।
24“जे घनी दुस्टआत्मा हर, एगोट मईनसे में ले निकेल जाथे, त झुरा जघा ला बिसोए बर खोजथे, अऊ जब नई भेंटे, त कथे, ‘मंए ओही मईनसे में लहूट जाहूं, जेमे ले निकले रहें।’ 25अऊ वापिस आए के, ओ मईनसे ला बहारल-बटोरल अऊ सफा एगोट घर कस पाथे। 26तेकर ओहर जाए के, अपन ले अऊ घिनक सात गोट, दुस्टआत्मा ला, अपन संगे ले लानथे, अऊ ओमन ओ मईनसे में समाए के रहे लागथें, अऊ ओ मईनसे कर हालत हर, आगू कर जिनगी ले अऊ ढेरेच खराब होए जाथे।” 27जे घनी ईसू हर ए गोएठ ला कहत रहीस, त भीड़ कर एगोट सवांगीन हर, किरलाए के ईसू ला कहीस, “धन्य हवे ओ महतारी, जेहर तोके जनम देहीस, अऊ तोके अपन दूध ला पीयाईस।” 28फेर ईसू हर कहीस, “हवो, ओहर तो धन्य हवे, बकिन जेमन परमेस्वर कर बचन ला सुनथें अऊ मानथें, ओमन ढेरेच धन्य हवें।”
योना कर संगे होवल चमत्कार
(मत्ती 12:38-42)
29जे घनी भीड़ हर बईड़ जात रहीस, त ईसू हर कहे लागीस, “ए जुग कर मईनसे मन कसरीहा हवें, ओमन बार-बार चमत्कार ला खोजथें, बकिन योना अगमजानी कर संगे होवल चमत्कार कर छोंएड़, कोनो अऊ चमत्कार ओमन ला देहल नई जाही।#11:29 योना अगमजानी हर ईसा. पू. करीब 760 साल में, तीन दिन ले बड़खा मछरी कर पेट में रहे कर पाछू, बाहरी जिंदा आए रहीस। ईसू एजग कहथे कि ओहू के एही कस होए बर हवे, जेमे लोग मन समझ पाएं कि परभू ईसू फूरोंच में परमेस्वर द्वारा भेजल हवे। 30जेकस कि योना कर जिनगी में होवल चमत्कार हर, नीनवे सहर कर मईनसे मन बर एगोट चिन्हा ठहरीस, ओही कस मईनसे कर बेटा कर, जिनगी में होवईया चमत्कार हर, ए जुग कर मईनसे मन बर चिन्हा ठहरही, कि मंए परमेस्वर कती ले भेजल गए हों। 31दखिन देस कर सीबा रानी#1 राजा मन 10:1-13 हर, परमेस्वर कर नियाओ करे कर दिन में, ए जुग कर मईनसे मन कर संगे ठड़होए के, ओमन ला दोसी ठहराही, काबरकि ओहर सुलेमान राजा कर गियान ला, सुने बर ढेरेच दुरीहां ले आईस। अऊ सुना, एजग ओहर हवे, जेहर सूलेमानोच ले बड़खा हवे। 32नीनवे सहर कर मईनसे मन, नियाओ कर दिन में, ए जुग कर मईनसे मन कर संगे ठड़होए के, ओमन ला दोसी ठहराहीं, काबरकि ओमन योना कर परचार ला सुईन के अपन पाप ले मन फिराईन, अऊ सुना, एजग ओहर हवे, जेहर योनोच ले बड़खा हवे।#11:32 सीबा (दखिन कर देस) आएज कर एतियोपिया देस कर समूंदर कर धरी में बसे रहीस। उहां कर रानी, बादसाह सुलेमान (करीब ईसा पु; 900) कर गियान ला सुने बर ढेरेच दुरीहां ले आए रहीस। (देखा 1 राजा मन 10:1-13, अऊ 2 इतिहास 9:1-12, 32) नीनवे सहर कर निवासी अऊ सीबा देस कर रानी, ए दुनो ला यहूदी मन गैर यहूदी (परमेस्वर ले दुरीहां) कर मईनसे गनत रहीन। ”
तुमन जिनगी में इंजोर ला पईहा
(मत्ती 5:15; 6:22-23)
33“कोनो मईनसे हर दिया ला बाएर के, ओला भांड़ा में नई ढांपे, अऊ ओला लुकाए के नई राखे, बलकि ओला अवंठा में मढ़ाथे, तेमेकि भीतरी अवईया मन ला इंजोर दिखे। 34तोर देंह कर दिया तोर आंएख हर हवे, एकर बर जब तोर आंएख हर बढ़िहां हवे, त तोर सबेच देंह हर इंजोर हवे, अऊ अगर ओहर बुरा हवे, त तोर सब देहोंच हर अंधार हवे। 35एकरले धियान करीहा, कि जे इंजोर हर तुमन में हवे, ओहर कहों अंधार झईन होए जाए। 36एकरले अगर तोर सब देंह हर इंजोर रही, अऊ ओकर कोनोच धरी हर अंधार नई रही, त तोर समुचा देंह हर अईसना इंजोर होही, जेहर ओ घनी होथे, जे घनी ढेबरी हर अपन चमक ले, तोके इंजोर देथे।”
ईसू अऊ कानहूंन कर सिखोईया
(मत्ती 23:1-36; मरकुस 12:38-40)
37जे घनी ईसू हर गोठियात रहीस, त कोनो फरीसी मईनसे हर ओकर जग बिनती करीस अऊ कहीस, तंए मोर घरे खाए बर चल, तेकर ईसू हर भीतरी जाए के खाए बर बईठीस। 38ओ फरीसी हर एला देख के अचमहों होईस, कि ईसू हर यहूदी मन कर रीती-रीवाज कर अनुसार, खाए कर आगू हाथ ला नई धोईस। 39परभू हर ओके ला कहीस, “ए फरीसी मन, तुमन कटोरा अऊ छिपा कर ऊपरे-ऊपर ला तो मांजे बर अड़बड़ धियान देथा, बकिन तुमन कर भीतरी में लालच, अऊ बुराई भरीसे। 40ए बोया मन, जे परमेस्वर हर बाहरी ला बनाईस हवे, का ओहर भीतरी ला नई बनाईसे? 41बकिन अपन मन ला सुद्ध कएर के गरीब मन ला दान देआ। त तुमन बर सब जाएत हर सुद्ध होए जाही।”
42“बकिन ए फरीसी मन, तुमन ऊपरे हाय! काबरकि तुमन तो पूदेना अऊ सूदाब कर, अऊ सब मधे कर साग-पान कर दसवां हिसा देथा, बकिन नियाओ ला अऊ परमेस्वर कर मया ला टाएल देथा। तुमन दसवां हिसा ला देथा, ओहर तो बढ़िहां हवे अऊ ओकर संगे नियाओ, अऊ परमेस्वर कर मया ला भी झईन छोंड़ीहा। 43ए फरीसी मन, तुमन ऊपरे हाय! काबरकि तुमन तो धरम सभा कर घर में, मुख-मुख जघा चाहथा, अऊ बजार में रेंगे घनी जोहार चाहथा। 44तुमन ऊपरे हाय! काबरकि तुमन ओ मठ कस हवा, जेहर नई दिखे अऊ जेकर ऊपरे मईनसे मन रेंगथें, बकिन नई जानें कि ओकर भीतरी में का हवे।”#11:44 यहूदी कानहूंन के अनुसार कहों कोनो मरघट ला छुथे, त ओहर असुध होए जाथे, एकर बर मरघट ला उजर चुना ले लिपे रथें कि मईनसे मन देख के जाएन जाएं।
45तब एगोट यहूदी कानहूंन कर सिखोईया हर जबाब देहीस, “ए गुरूजी, ए बात ला गोठियाए के, तंए हमर निंदा करथस।” 46ईसू हर कहीस, “ए कानहूंन कर सिखोईया मन, तुमन ऊपरे हाय! काबरकि तुमन अईसना बोझ, जेला उठाए में ढेरेच मुसकील हवे, ओला मईनसे मन कर ऊपरे लाएद देथा,#11:46 “तुमन अईसना बोझ, जेला उठाए में ढेरेच कठिन हवे, ओला मईनसे मन कर ऊपरे लाएद देथा” एजग “बोझ” कर मतलब, ए हवे कि यहूदी मन कर कानहूंन, जेला मईनसे मन ला माने में ढेरे मुसकिल हवे। बकिन तुमन खुद ओ बोझा ला, अपन एगोट अंगठीयो ले ऊठाए बर नई करा। 47तुमन ऊपरे हाय! काबरकि तुमन ओ अगमजानी मन कर मठ बनाथा, जेमन ला तुमन कर दाऊ-ददा मन, माएर देहे रहीन। 48एही ले तुमन एकर गवाह हवा, अऊ अपन दाऊ-ददा मन कर काम में सझीयारा हवा, काबरकि ओमन ओ अगमजानी मन ला माएर दारीन, अऊ तुमन ओमन कर मठ बनाथा। 49एकरले परमेस्वर हर अपन गियान ले कहीसे; ‘मंए ओमन जग अगमजानी मन ला अऊ परेरीत मन ला भेजहूं, अऊ ओमन में ले तनिक झेमन ला, ओमन माएर दारहीं, अऊ तनिक झेमन ला सताहीं।’ 50तेमेकि जेतना अगमजानी मन कर लहू, संसार कर सुरू ले बहावल गईसे, ओ सब कर लेखा, ए पीढ़ी कर मईनसे मन ले लेहल जाही।”
51“मंए तुमन ला फूरोंच कहथों, कि हाबील कर लहू ले लेके, जकरयाह#11:51 परमेस्वर कर किताब जेहर यहूदी मन कर संगे रहीस, ओमे 39 किताब मन ला दूसर सूची में लिखल हवे, जेहर अभीन कर जूनहा नियम कर सूची ले ढेरेच अलगे हवे। ओमे 2 इतिहास कर किताब हर सबले आखरी किताब हवे। जकरयाह ला सबले पाछू जान ले मारीन, ओहर 2 इतिहास 24:20-22 में लिखल हवे। कर लहू तक, जेके ला बेदी अऊ मंदिर कर मझारे जान ले मारे रहीन, ओमन कर लहू कर लेखा, एही जुग कर मईनसे मन जग लेहल जाही। 52ए कानहूंन कर सिखोईया मन, तुमन ऊपरे हाय! काबरकि तुमन गियान कर चाभी ला तो ले लेहे हवा, बकिन तुमन खुद ओमे नई ढूकेहा, अऊ ढूकोईयोच मन ला ढूके नई देहा।” #11:52 एजग परमेस्वर कर गियान ला, एगोट चाभी ले बांधल घर कर संगे तुलना करथे। कानहूंन कर सिखोईया मन ओ घर ला ताला लगाए के, चाभी अपन हाथ में धरीन हवें, ओमन मईनसे मन ला भितरी ढुके बर (परमेस्वर ला जाने बर) नई दें अऊ खुद ओमन नई ढुके। 53जे घनी ईसू हर उहां ले निकलीस, त ओही घनी ले कानहूंन कर सिखोईया मन अऊ फरीसी मन, ओकर पाछू पएर गईन, अऊ ओकर जग ढेरेच सवाल-जबाब कएर के, ओकर बिरोध करे लागीन, 54अऊ ओमन ईसू कर गोएठ कर ताक में लगे रहीन, कि ओकर कोनोच गोएठ में, ओके ला फंसाई।
Dewis Presennol:
लूका 11: SGJ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active) Wycliffe Bible Translators, Inc. All rights reserved.