परेरीत 4
4
यहूदी महा सभा कर आगू में पतरस अऊ यूहन्ना
1जब पतरस अऊ यूहन्ना मईनसे मन जग गोठियावत रहीन, तब याजक मन अऊ मंदिर कर मुखिया अऊ तनिक सदूकी दल कर मईनसे मन ओमन जग आईन। 2ओमन ढेरेच गुसा होईन, एकरले कि पतरस अऊ यूहन्ना, मईनसे मन ला सिखावत रहीन अऊ ईसू, कर मरल में ले, जी उठे कर बारे में परचार करत रहीन। 3ओमन पतरस अऊ यूहन्ना ला धएर के, दूसर दिन तक जेहल-खाना में राखीन, काबरकि सांझ होए गए रहीस। 4बकिन परचार कर सुनोईया में ले, ढेरे झेमन बिस्वास करीन अऊ ओमन कर गिनती हर पांच हजार सवांग कर करीबन होए गईन।
5दूसर दिन अईसना होईस कि ओमन कर अधिकारी, अगुवा अऊ यहूदी कानहूंन कर सिखोईया मन यरूसलेम में जूटीन, 6महायाजक हना, अऊ ओकर घराना कर काइफा, यूहन्ना, सिकंदर अऊ सबेच झन ओजग जूटे रहीन। 7त ओमन पतरस अऊ यूहन्ना ला मझारे ठड़हुवाए के पूछे लागीन, कि तुमन ए काम ला काकर सक्ति अऊ काकर नांव ले करे हवा? 8तब पतरस हर पबितर आत्मा ले भरपूर होए के, ओमन ला कहीस, “ए मईनसे मन कर मुखिया अऊ अगुवा मन, 9ए लंगड़ा मईनसे बर, जे भलाई कर काम ला हमन करे हन, एकरे बर तुमन अगर पूछताछ करत हवा कि ओहर कईसे ठीक होईस? 10त तुमन अऊ सब इसराएली मन एला जाएन लेआ, कि नासरत कर ईसू मसीह, जेला तुमन कुरूस उपरे चघाए के, माएर मरुवाया अऊ परमेस्वर हर, ओके मरल में ले जीयाईस, ओकरे नांव में ए लंगड़ा मईनसे हर तुमन कर आगू में भला चंगा ठड़होईस हवे। 11ए ईसू कर बारे में परमेस्वर कर किताब में एकस लिखल हवे,
जे पखना ला तुमन राएज मिसतिरी मन बेकार समझा,
ओही हर कोनहा कर मुख पखना बएन गईस।
12अऊ कोनो दूसर झन कर द्वारा उद्धार नई मीले, काबरकि अगास कर खालहे मईनसे में ले अऊ कोनो दूसर नांव नई देहल गईसे, जेकर द्वारा हमन उद्धार पाए सकी।”
13जे घनी पतरस अऊ यूहन्ना कर हिमेत ला ओमन देखीन, अऊ ए जानीन कि एमन अनपढ़ अऊ सधारन मईनसे हवें, त ओमन अचमहों होईन। फेर ओमन चिन गईन कि एमन ईसू कर संगे रहीन। 14ओमन पतरस अऊ यूहन्ना कर बिरोध में कुछ कहे नई सकीन, काबरकि चंगा होवल मईनसे ला ओमन कर संगे ठड़होवल देखीन। 15बकिन ओमन पतरस अऊ यूहन्ना ला, सभा ले बाहरी जाए कर अगियां देहीन, अऊ आपस में बिचार करे लागीन, 16“हमरे ए मईनसे मन कर संगे का करी? काबरकि यरूसलेम कर सबेच रहोईया मन जानत हवें कि एमन नामीक चमत्कार कर काम देखाईन हवें, अऊ हमन ओकर इनकार करे नई सकन। 17बकिन हमरे एमन ला घुड़काएन कि एमन ईसू कर नांव ले फेर, कोनो मईनसे जग झईन गोठियावें तेमेकि ए बात हर मईनसे मन में अऊ बगरा झईन फईले।” 18तेकर ओमन पतरस अऊ यूहन्ना ला बलाईन अऊ चेत चघाए के कहीन, “ईसू कर नांव में कांहीच झईन गोठियाईहा अऊ कांहीच झईन सिखईहा।” 19बकिन पतरस अऊ यूहन्ना ओमन ला जबाब देहीन, “तुंही मन बतावा कि का एहर परमेस्वर कर देख में बढ़िहां हवे कि हमन परमेस्वर कर बात ले बगरा, तुमन कर बात ला मानी? 20काबरकि जेला हमरे देखे अऊ सुने हन, ओला बिगर कहे हमरे नई रएह सकी।” 21तेकर ओमन पतरस अऊ यूहन्ना ला, अऊ धमकाए के छोंएड़ देहीन अऊ मईनसे मन कर चलते, ओमन ला दंड देहे कर कोनो मोका नई पाईन, काबरकि जे अलहन हर होए रहीस, ओकर चलते सब मईनसे मन परमेस्वर कर बड़ाई करत रहीन। 22काबरकि जे मईनसे कर ऊपरे चंगाई कर चमत्कार होए रहीस, ओहर चालीस बछर ले बगरा उमर कर रहीस।
बिस्वासी मन कर पराथना
23पतरस अऊ यूहन्ना उहां ले छुईट के, अपन लोग मन कती आईन, अऊ जे बात ला मुख याजक अऊ अगुवा मन, ओमन ला कहे रहीन, ओला ओमन अपन लोग मन जग सूनाईन। 24जे घनी ओमन एला सुनीन, त एक मन होए के जोर-जोर से परमेस्वर जग कहीन, “ए मालीक, तंए ओही लागस, जेहर अगास अऊ धरती अऊ समूंदर अऊ जे जाएत ओमे हवे, ओ सब ला बनाए। 25तंही पबितर आत्मा कर द्वारा, अपन सेवक हमर पूरखा दाऊद कर मूंह ले कहे,
‘गैर यहूदी मन ढेरेच गुसा काबर करीन?
अऊ देस-देस कर मईनसे मन काबर बेकार बात सोंचीन?
26परभू अऊ ओकर मसीह कर,
बिरोध में धरती कर राजा मन ठड़होईन,
अऊ मुखिया मन, एक संगे जुईट गईन।’ #भजन संहिता 2:1-2
27काबरकि फुरोंच में तोर पबितर सेवक ईसू, जेला तंए अभिसेक कएर के ठहराए हवस, ओकर बिरोध में हेरोदेस राजा अऊ राएजपाल पुंनतियुस पीलातूस अऊ गैर यहूदी मन अऊ इसराएली मन, ए सहर में जूटीन, 28बकिन जे जाएत ला ओमन करीन, ओहर आगू ले तोर सामर्थ, अऊ इछा ले ठहरावल रहीस। 29ए परभू, अझेर ओमन कर धमकी ला सुन, अऊ अपन सेवक मन ला एकस बरदान दे कि तोर बचन ला बड़े हिमेत कर संगे सुनाएं। 30चंगा करे बर, तोर हाथ ला लमाओ कि चिन्ह चमत्कार तोर पबितर सेवक ईसू कर नांव ले करें।” 31जब ओमन मन पराथना कएर दारीन, त ओ जघा हर जिहां ओमन जूटे रहीन, हील गईस अऊ ओमन सब झन पबितर आत्मा ले भरपूर होए गईन अऊ परमेस्वर कर बचन ला, हिमेत कर संगे सुनाए लागीन।
बिस्वासी मन मिल-जूईल के रथें
32सब बिस्वास करोईया मन एक मन कर रहीन, तेकर ले कोनो हर अपन संपती ला अपन नई कहत रहीस, बकिन सब संपती हर सब झन कर सझीयारा रहीस। 33अऊ परेरीत मन ढेरेच सामर्थ ले, परभू ईसू कर जी उठे कर, गवाही देहत रहीन, अऊ ओमन सब झन कर उपरे परभू कर ढेरेच किरपा रहीस। 34ओमन में ले ककरो जग कांही जाएत कर कमी घटी नई रहीस, काबरकि जेमन जग जमीन अऊ घर रहीस, ओला बेंच देहत रहीन, अऊ ओ बेंचल समान कर पईसा ला लाएन के, 35परेरीत मन कर गोड़ जग मड़हाए देहत रहीन, अऊ जेतना जेके जरूरत रहत रहीस, ओही कस ओमन ला बांएट देहत रहीन।
36लेवी गोती कर यूसुफ नांव कर एगोट मईनसे रहीस, ओहर साईपरस टापू कर रहीस, जेकर नांव परेरीत मन बरनबास राखे रहीन, एकर मतलब हवे, “उत्साह कर बेटा।” 37ओकर तनिक जमीन रहीस, तेला बेंच के पईसा लानीस, अऊ परेरीत मन कर गोड़ जग मड़हाए देहीस।
Dewis Presennol:
परेरीत 4: SGJ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active) Wycliffe Bible Translators, Inc. All rights reserved.