Luc 5
5
Sesu anenge bebingitsi berege
1Wisi mosi, Sesu ayibange ve mbeke gidibe gi Genesarete. Vane, mbili batu bekumubakigange mbare berondange gulu musamu Nyambi. 2Negulabe ve gisyeni matu mebeyi me belobitsi mba mbe basunde gu gugunge miviye mi awu. 3Bwatu bumosi bubange bu Simu. Sesu negunangeme gu bwatu bune. Negwambile re: «Yusuge ve mbeke dute mwepesu gu time nonge batu botsu bekunyene, bekunyulu dikengi.» Negutsagene, akunenzange batu yandi gu gari bwatu bune.
4Negumane gwambile bumongu, akwambile Simu re: «Yendanu gu time gidibe ndyayu ne bembatsi bagu. Gimbanu miviye mi enu nonge nukulobe bisonzi.» 5Simu negumwagule re: «Fumu, dusedyanze dibeti dyotsu dusadenge nesi gimosi. Nevu ndyabeni wa duvage re putiganu miviye dugugimbe miviye.» 6Negugimbe miviye, bekulobe mbili bisonzi miviye beli gupasige. 7Negusove bembatsi babange gu bwatu bubange ve gisyeni ne dikake, neguruge, yawu botsu be base matu motsu mabeyi ne bisonzi. Matu negubase veveni ne bisonzi beli gusyegeme. 8Simu Pyere negulabe di Sesu sevage, akuteme ve wusu andi. Negwambile re: «Fumu rageme nami mba ni muvagitsi mabi.» 9Simu ayambile nana mba mbe bagangu ne wome, yandi ne bembatsi bandi gukyelu mbili bisonzi bibeselobe. 10Simu ayibange ne mbatsi beyi Sake ne San tayawu Sebede. Sesu negwambile Simu re: «Wuyadume, wagwiku ka ne gulobe bisonzi, tumbe pakile ne kyawu, gidyanzu gi agu gundengile batu begumbinge.» 11Kavane, belobitsi beduke matu ve gisyeni besise byotsu bebinge Sesu.
Sesu abeluse mutu wubange ne bwatsi
12Sesu ayibange gu yadi yi mosi yi Galile. Vane, gubange mutu wubelange bwatsi. Negulabe Sesu, ayise mukutemine mbami vetsi. Negwambile re: «Fumu, mbelusi. Nyayabi re wubenze mbeluse gere warondi.» 13Sesu negumutsabige dikake, negumwambile re: «Nyasinge, wabeluge.» Vane ne vane, mutu wune negubeluge. 14Vane, Sesu negumuvege mugage re: «Wuyagwambile mutu re wabeluge. Yende gwekwekurigitse gu bevegitsi be pagu sige wukuvege Nyambi pagu yi dubelusu du agu nevu direndilu mu mugage Moyise, nonge batu botsu be kuyabange re wabeluge.» 15Didume di andi dikwene lalegene, mbili batu bekurugange guse gulu me Sesu yambilange ne guse belusu. 16Tumbe Sesu ayende gumbure yi sane batu gwe lembe.
Sesu abeluse mutu wune membogelotu
17Gube wisi, Farisi ne benenzitsi be migage mi Moyise berambugile gu mimbu me misyengi mi Galile ne Sudé, ne yadi yi Serisalem. Betsagene ve mbeke Sesu ve yandi nenzange ne gubeluse bibedu ne ngudu Fumu.
18Kavane batu bekuruge ne gibedu gi membogelotu mu gipoyu mbeberonde mwingise gu gari ndagu ne guse musunze ve wusu Sesu. 19Beserungule mbare gube mbili batu, negubonge gibedu ne gipoyu gyotsu bepande gu yulumwanze wale, betobe divulu, besunze mutu wune ne gipoyu gi andi kwangene gubange Sesu, vegari batu.
20Sesu negulabe gitu gi awu, akubambile re: «Mbatsi ami, bitsimbu bi agu byotsu bi mabunzulu.» 21Bivunde bi migage mi Moyise ne Farisi bekubange ne pikile mu mirime mi awu «Labanu mutu wa syengi Nyambi! Vesa mutu benzi bunzule bitsimbu ka Nyambi vike!» 22Sesu neguyabe pikile tsi awu akubambile re: «Agye nwapikilili nane? 23Agye givyagunu gi gwambile mutu “Bitsimbu bi agu byabunzulu” avo “Rambuge yende?” 24Nonge nukuyabange re Mwane mutu ane dinyange di gubunzule bitsimbu mu butambe bwotsu.» Sesu negwambile membogelotu: «Rambuge, bonge gipoyu gi agu, yende gumbu gi agu!» 25Vane ne vane membogelotu negurambuge ve misu me batu botsu. Negubonge gipoyu gi andi negwende gu ndagu andi negwene dumisange dine di Nyambi. 26Batu besutu vane, negulabe, bekusutu minu mwasi, bekudume Nyambi. Bekudumisange Nyambi bekwambilange re: «Mambu me dwalabe nemuni, bimage.»
Sesu agarombi Levi
27Sesu negurambuge gu yadi, vekodu gitsagu gubange mutu wanengu re Levi metsagene ve mbure yandi dyanzilange vabolilu lepu. Sesu negumwene, akumwambile re: «Mbingi.» 28Levi negurambuge, asise byotsu amubinge. 29Vane Levi negulambe gu ndagu andi mulambu neni gukyelu Sesu. Gube mbili batu bebolitsi be lepu ne batu be nzusu bayange nawu ve tavuli. 30Tumbe Farisi ne bivunde bi migage bekugelange Sesu. Bekwambilange batu be bingange Sesu re: «Gye nugayilili ne gunu mbure mosi ne bebolitsi be lepu ne batu bene monyu yibi?» 31Sesu negubagule re: «Sa batu be polu bakebi mubugitsi tumbe bibedu re bakebi mubugitsi wugu bebeluse. 32Nzaruge gu bulongu guserombe batu be sungeme tumbe bevagitsi be mabi nonge bekusanze mutsageninu.»
Sesu gagwambile dyambu di gusindile nzale
33Batu be mosi bambile Sesu re: «Bebingitsi be San ne bebingitsi be Farisi basindili nzale ne gulembe gigumbi gyotsu. Tumbe bebingitsi bagu, gye besasindili nzale? Begaye, beganu.» 34Sesu ne gwagule re: «Wisi mumengu dyonge nubenze gandise bembatsi be mutu wagongi guya? Dwavage re vyage. 35Tumbe gu gube gigumbi gi mulumi agusise bembatsi tsi andi tsufu tsine begusindile nzale.» 36Dyambu dine neguvyoge, Sesu kubeverile kugu: «Pasi dwarondi londe gidwaru gigulu, dusabenze bonge girini gi tsande yone dukuginamige mu gidwaru gigulu. Mbare tsande yone yisagongene ne gigulu. 37Munongumosi, gusa mutu wa gwitili melamu mekaluge gu putise yigulu. Pasi dwasobegene melamu mone ne megulu ve me gupandile megubule putise, melamu motsu la memagwitige vetsi. 38Tumbe melamu mone maveru kagu putise tsyone. 39Negungenze gusandi mutu pasi amanu melamu me gi kumbi abenze kunde ronde gunu melamu mesekaluge. Mbare akwambile re: “Melamu megulu me meboti.”»
Dewis Presennol:
Luc 5: SWJ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
