Luuka 23
23
ɄYeesu pitagaalila lya nʼnongozi ʉPilaato
(Mataayo 27:1-2, 11-14; Maalʉko 15:1-5; Yoohani 18:28-38)
1Ɨpo abhagoosi bhaala bhonti abha Bhayahuudi bhahɨmɨɨlɨla, bhahanʼtwala ʉYeesu hwa Pilaato, ʉnʼnongozi wa Bhaluumi. 2Bhahanda hunʼtaake bhahaga, “Tahamʼmwajile ʉmuntu ʉnʉ, ahubhateezya abhantu. Ahubhakhaana abhantu afumye ɨsonko hwa mwɨnɨ ʉnʼgoosi ʉKayisali, nantele bhasi ayiga ʉmwene yʉ Mʼfyʉli, ʉMwɨnɨ.”
3ɄPilaato ahamʼmʉzɨɨlɨzya ʉYeesu ahaga, “Aawe ʉli Mwɨnɨ wa Bhayahuudi?” ɄYeesu ahamʼmwamula ahaga, “Weewe wayanga.” 4Ɨpo ʉPilaato ahabhabhʉʉzya abhalongozi bha bhasayi bha Ngʉlʉbhɨ peeka nɨ mpʉga ya bhantu ahaga, “Saga ɨlola amalando hwa muntu ʉnʉ.” 5Abhantu bhaala bhahakhajiilizya bhahaga, “Ɨmanyizyo zyakwe zisonzya abhantu aleete ʉvwalanganu! Anyampɨɨnye ɨmanyizyo zyakwe ɨnsi ɨnɨ yonti ɨya Bhayahuudi, ahandile hu mukowa ʉgwɨ Galilaaya afishe ʉhwu.”
6ɄPilaato lwa wʉmvwa ɨgo, ahabhabhʉzɨɨlɨzya huje, “Wɨlɨ, ʉmuntu ʉnʉ wa hu Galilaaya?” 7Lwa waamanya huje, ali muntu wa hu Galilaaya afume hu wumwɨnɨ ʉwa Heloode ʉAntipa, ahanʼtwala hwa Heloode hu nongwa ya‑aje, ɨnsiku ɨzyo ʉmwɨnɨ ʉHeloode ahali papaala pa Yelusaleemu.
ɄHeloode ahumʼmʉzɨɨlɨzya ʉYeesu
8ɄHeloode ʉAntipa lwa wanʼnola ʉYeesu, ahasha tee hu nongwa ya‑aje, ahʉmvwaga ɨnongwa zyakwe. Nantele afume halɨ ahanzaga hunʼnole, pɨpo ahasʉbhɨlaga huje, ahwilolele yʉʉyo ʉYeesu lwa‑abhomba amayele. 9Ɨpo ʉHeloode ahamʼmʉzɨɨlɨzya amazwi gaminji, leelo ʉmwene saga ahaamula izwi nka limo. 10Abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhahɨmɨɨlɨla na hunʼtaake tee.
11Ɨpo ʉHeloode ʉAntipa na bhalwi bhaakwe bhahanʼkenyensya ʉYeesu na hunʼsʉfwanye. Bhahanʼkwatizya amenda agɨ mpɨɨya ɨngoosi nanshi abhamwɨnɨ sha bhakwata, na hunʼseshe. Ɨpo ʉHeloode ahamʼmwezya ʉYeesu hwa Pilaato. 12Afume isiku ɨlyo, ʉHeloode nʉ Pilaato bhahabha bhamanyani, leelo ʉhwo hwisinda bhahabhanga bhalʉgʉ.
ɄPilaato ahunʼnonga ʉYeesu huje, bhanʼgoje
(Mataayo 27:15-26; Maalʉko 15:6-15; Yoohani 18:38-19:16)
13Ɨpo ʉPilaato ahabhabhʉngaanya abhalongozi bha bhasayi bha Ngʉlʉbhɨ, abhagoosi bha Bhayahuudi peeka na bhantu abhanjɨ. 14Ahabhabhʉʉzya ahaga, “Munʼneetile ʉmuntu ʉnʉ huliinɨ, muyiga ahubhateezya abhantu. Ɨshi hwɨ‑ɨzyo zya muhunʼtaakila, namʼmʉzɨɨlɨzya pitagaalila lyenyu, leelo saga ɨndolile amalando hwa mwene. 15Wope ʉmwɨnɨ ʉHeloode ʉAntipa saga agalolile amalando nka gamo hwa mwene, sha shɨɨsho amʼmweziizye huliinɨ. Ɨshi, mumanye shinza huje, ʉmuntu ʉnʉ, saga lilɨɨho nka limo lya‑abhombile ɨlya‑aje, akhondɨɨye huje, agogwe. 16Ɨshi, ashetwe nɨ nsanzʉ, nkɨ‑ɨmʼmwigulile.” 17Gahali miiho pi‑isiku ɨlyɨ shikulukulu ɨshɨ Paasaka, ʉPilaato hubhigulile abhantu ʉnʼkʉngwe weeka.#23:17 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.
18Leelo abhantu bhaala bhonti bhahabwaga ibwago peeka bhahaga, “Nʼgoje ʉmuntu ʉyo! Tihwanza ʉmʼmwigulile ʉBalaaba!” 19ɄBalaaba ahakʉngwɨlwe mu hoobhe hu nongwa ya‑aje, ahabhombile ʉvwalanganu nʉ goji mwi‑ibooma.
20ɄPilaato ahayanga nabho ʉlwa bhɨɨlɨ, pɨpo ahanzaga humʼmwigulile ʉYeesu. 21Leelo abheene bhahonjela abwaje ibwago bhahagaga, “Nʼkhomeele pa shikhobheehanyo! Nʼkhomeele pa shikhobheehanyo!”
22ɄPilaato ahayanga nabho ʉlwa taatu ahaga, “Akhomeelwe hu nongwa yeenu? Ʉmuntu ʉnʉ ananjile nshi? Anɨ saga ɨndolile amalando hwa mwene ga gakhondɨɨye huje, agogwe! Ɨshi, ashetwe nɨ nsanzʉ, nkɨ‑ɨmʼmwigulile.” 23Leelo abhantu bhaala bhahonjela abwaje ibwago tee, bhahanzaga aje, ʉYeesu akhomeelwe pa shikhobheehanyo. Hu malishilo, ibwago lyabho lyahabhomba aje, bhɨtɨshɨlwe.
24Ɨpo ʉPilaato ahaamula abhombe nanshi sha bhahanzaga. 25Ahabhigulila ʉBalaaba. Ʉmuntu ʉla wa bhahamʼmwanzaga hwope na‑aje, ahakʉngwɨlwe hu nongwa yɨ vwalanganu nʉ goji. Ɨpo ahamʼfumya ʉYeesu hwa bhalwi huje, bhabhombe nanshi abhantu sha bhahwanza.
Bhahunʼkhomeela ʉYeesu pa shikhobheehanyo
(Mataayo 27:32-44; Maalʉko 15:21-32; Yoohani 19:17-27)
26Abhalwi lwa bhahunʼtwala ʉYeesu, bhahakhomaana nʉ muntu ʉmo wa bhahagaga Siimoni ʉwa hwi‑ibooma ɨlyɨ Kileene. Ʉmuntu ʉyo ahashilaga afume hu shipanga. Bhahanʼkhata, bhahamʼbijiilizya huje, abhʉʉsye ɨshikhobheehanyo sha Yeesu. Ɨpo ahashibhʉʉsya na humʼmɨnjɨɨlɨle ʉYeesu hwisinda.
27Yope ɨmpʉga ɨngoosi ɨya bhantu yahamʼmɨnjɨlɨzyaga ʉYeesu. Muuhati yaabho bhahali abhashɨ bha bhahalilaga na‑azugumile hu nongwa ya Yeesu. 28ɄYeesu ahabhagalushila, ahabhabhʉʉzya ahaga, “Amwɨ mubhashɨ bha hu Yelusaleemu! Leshi hundilile anɨ! Lyoli, lilaji hu nongwa yɨ wʉʉmi weenyu na bhaana bheenyu! 29Mumanye shinza huje, ɨnsiku zya zihwɨnza abhantu bhahayiga, ‘Bhasayiiwe abhashɨ bha saga bhapaapa, bha saga bhapɨɨpe na hwonsye abhaana!’ 30Hu habhaazyo ɨho,
‘Abhantu bhahayihugabhʉʉzya amagamba huje, “Mutigwɨle!”
Nantele bhahayihutubhʉʉzya ʉtugamba huje, “Mutisyɨle!” ’#Bhaazya Hoseya 10:8.
31Nkashele bhabhomba ɨshi hwi‑ikwi ɨlyolo ɨlinza, ɨshi, zyahayibha wɨlɨ hwi‑ikwi ɨlyʉmu?”#23:31 Ɨnjango ɨnɨ hwa huje, Nkashele abhantu bhambombela ɨshi anɨ nɨnʼgolosu, ɨshi, zyahayibha wɨlɨ hwa bhabhomba mbiibhi?
32Ahabhaazyo hɨnɨɨho, abhalwi bhahabhatwalaga abhabhomba mbiibhi bhabhɨɨlɨ peeka nʉ Yeesu hubhakhomeele pa shikhobheehanyo. 33Lwa bhaafiha pa bhahagaga Pi‑Ifupa li‑Itwe, bhahanʼkhomeela ʉYeesu pa shikhobheehanyo.#23:33 Enya Mataayo 27:35, ɨshifwani ɨsha Yeesu pa shikhobheehanyo. Bhope abhabhomba mbiibhi bhaala bhabhɨɨlɨ bhahabhakhomeela mu vikhobheehanyo vyabho, weeka hu lubhazu ʉlwa hu lɨɨlo ʉlwa Yeesu, nʉ wamwabho hu lubhazu ʉlwa hu mongo. 34ɄYeesu ahaga, “Wee Daada! Ʉbhakhobhoshele hu nongwa ya‑aje, saga bhamɨɨnye zya bhabhomba.” Abhalwi bhaala bhahagabhana amenda ga Yeesu,#23:34 bhahagabhana amenda ga Yeesu Bhahabhombile ɨsho alɨngaane na miiho gaabho agɨ Shiluumi huje, abhalwi bha bhahunʼkhomeela pa shikhobheehanyo ʉmʼmomba mbiibhi, bheegaje amenda gaakwe. hwi‑idala ɨlya‑aduunye ɨnduunya.#23:34 hwi‑idala ɨlya‑aduunye ɨnduunya Lumo abhalwi bhaala bhahabhɨɨshɨle ʉtusanzʉ twa tuli nɨ vimanyishizyo awe amawe ga gali na mataawa mu shɨlɨɨlo. Bhahabhombile ɨsho huje, weenu mu bheene ayeeje hantu heenu. #Bhaazya ɨNsalifyo 22:18. 35Abhantu bhahɨmɨlɨɨye pa pɨɨpɨ na paala, bhahenyaaga.
Abhagoosi bha Bhayahuudi bhahanʼsʉfwanyaaga ʉYeesu bhahagaga, “Bhaya, abhanjɨ ahabhafyʉlaga, ɨshi, ahwifyʉle yʉʉyo, nkashele ʉmwene yʉ Mʼfyʉli ʉyo ahasaluliilwe nʉ Ngʉlʉbhɨ!” 36Abhalwi bhope bhahanʼsyonshela. Bhahabhalaga na humʼpeele ɨdivaayi ɨndozu, 37bhahamʼmʉzyaga bhahagaga, “Oogo! Aawe nkashele ʉli Mwɨnɨ wa Bhayahuudi, ʉhwifyʉle weewe!”
38Pa mwanya pa shikhobheehanyo pahali nɨ nsimbo zya zyahagaga,
Ʉnʉ yʉ Mwɨnɨ wa Bhayahuudi
39Weeka mwa bhabhomba mbiibhi bhaala bhabhɨɨlɨ ahanda hunʼnije ʉYeesu ahaga, “Aawe saga we Mʼfyʉli? Ʉhwifyʉle weewe, naatɨ!” 40Leelo ʉmʼmomba mbiibhi ʉwamwabho ahanʼdaamila ahaga, “We! Saga ʉhumʼmwogopa ʉNgʉlʉbhɨ? Tenti tilongwilwe afwe nanshi ʉmwene. 41Atɨ tikhondɨɨye ahwambɨɨlɨle ʉlufundo ʉlwu hu nongwa ya‑aje, tilongwilwe hu mbiibhi zya tizibhombile. Leelo ʉnʉ, saga abhombile ibhiibhi nka limo.” 42Ɨpo ahaga, “Wee Yeesu! Ɨhulaabha ʉnizuhaje lwʉ‑ʉtʉʉha mu wumwɨnɨ waaho!” 43ɄYeesu ahamʼmwamula ahaga, “Lyoli ɨhubhʉʉzya huje, ɨleelo ɨli ʉnza‑abhe peeka naanɨ hu Paladiiso.”#23:43 Paladiiso Abhantu abhasangalusu ɨbho bhafwiye bhatʉʉya ɨpa.
Afwe hwa Yeesu
(Mataayo 27:45-56; Maalʉko 15:33-41; Yoohani 19:28-30)
44-45Ahwande mu saala nʼtanda ɨshi pasanya afishe mu saala ɨya fundihandwɨmo (9), isanya lyahazima, hwahabha hiisi mu nsi yonti. Mu nyumba ɨmfinjile ɨya Ngʉlʉbhɨ ʉwiizigo ʉwi‑igolole#23:44-45 Igolole ɨlyo lyahazigaga abhantu bhasahatʉʉhaje aPafinjile pa Pafinjile, pa‑akhala ʉNgʉlʉbhɨ. Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. wahazembuha pabhɨɨlɨ.#23:44-45 Enya Maalʉko 15:38, ɨshifwani ɨshɨ wiizigo ʉwi‑igolole sha wahazembuha pabhɨɨlɨ.
46Ɨpo ʉYeesu ahakhoola ɨhoolo ɨngoosi ahaga, “Wee Daada! Ɨhuwubhɨɨha ʉwʉʉmi waanɨ mu nyoobhe zyaho.” Lwa wayanga ɨsho, ahafwa pɨnɨɨpo.
47Ʉnʼnongozi ʉwa bhalwi lwa waalola zya zyabhombeha, ahamʼmwamiha ʉNgʉlʉbhɨ ahaga, “Lyoli, ʉmuntu ʉnʉ ahali nʼgolosu!”
48Abhantu bhonti bha bhahabhʉngɨɨne paala, lwa bhaalola zya zyabhombeha, bhahaweela humwabho ʉhwu bhahwikhoma‑khoma ɨvifubha vyabho hu zugumizu. 49Leelo bhonti bha bhahamanyɨɨne nʉ Yeesu, peeka na bhashɨ bha bhahamʼmɨnjɨlɨlaga afume hu mukowa ʉgwɨ Galilaaya, bhahɨmɨlɨɨye sha hutali ahwenye zya zyahabhombehaga paala.
Asyɨlwe hwa Yeesu
(Mataayo 27:57-61; Maalʉko 15:42-47; Yoohani 19:38-42)
50-51Hwahali nʉ muntu ʉmo wa bhahagaga Yoosefu, ʉnʼkhaaya ʉwa hwi‑ibooma ɨlyɨ Alimasaaya, mu mukowa ʉgwɨ Yudeeya. Ʉmwene ahali muntu mwinza nantele nʼgolosu wa‑ahasʉbhɨlaga ahwɨnze hu wumwɨnɨ ʉwa Ngʉlʉbhɨ. Nantele ahali palishimo mwi‑ikoloti igoosi ɨlya Bhayahuudi. Leelo saga ahɨtɨhɨɨne na bhamwabho hunʼgoje ʉYeesu.
52Ʉmuntu ʉyo ahabhala hwa Pilaato hunʼnaabhe huje, amʼmwɨtɨshɨzye abhale agweje ʉmʼvimba gwa Yeesu. 53ɄPilaato lwa wamʼmwɨtɨshɨla, ʉYoosefu ahabhala, ahiisya ʉmʼvimba pa shikhobheehanyo. Ɨpo ahaguniempeela ni‑ikɨbha ɨlyɨ mpɨɨya ɨngoosi, ahagusyɨla mu nkʉngwa ya yahabaniilwe mwi‑ilyalawe. Ɨnkʉngwa ɨyo, saga bhahasyɨlɨle ʉmʼvimba gwa muntu nalumo.#23:53 Enya Maalʉko 15:46, ɨshifwani ɨshɨ nkʉngwa ɨya Bhayahuudi. 54Isiku ɨlyo lyahali lisiku lya hwilɨngaanye hu nongwa yɨ Sabaato#23:54 ƗSabaato yahandaga isanya lwa liswa pa Shihaanu afishe lwa liswa pa Shiyeeluka. Ɨndajizyo zya Bhayahuudi saga zihwɨtɨha asyɨle ʉmuntu pi‑isiku ɨlyɨ Sabaato. ya yahali pa pɨɨpɨ ahwande.
55Abhashɨ bha bhahɨnzɨle peeka nʉ Yeesu afume hu mukowa ʉgwɨ Galilaaya, bhahabha peeka nʉ Yoosefu hu nkʉngwa. Bhahayilola ɨnkʉngwa, nantele bhahalola sha bhahagulambaliishe ʉmʼvimba. 56Pamandɨ bhahaweela hu khaaya, bhahalɨngaanya ɨnyemba ɨzyɨ waaji wuwinji zya zinunshila shinza.#23:56 Ɨnyemba ɨzyɨ waaji wuwinji zya zinunshila shinza zyahali zya‑apotozye ʉmʼvimba gwa Yeesu huje gusahaabhole. Isiku ɨlyɨ Sabaato bhahatʉʉya, nanshi ɨndajizyo zya Moose sha zyahalajiziizye.
Dewis Presennol:
Luuka 23: SBK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2022, Wycliffe Bible Translators, Inc. All rights reserved.