PALABURU 32
32
Pompatoka i Yako da momberata pai Esau
32:1-21
1Napaliu i Yako pelinjanya. Pai reʼe bara tesangkuja malaeka mampomberataka siʼa. 2Ri pangkita i Yako tau seʼe, mompau siʼa natoʼo, “Inceʼe kareʼe mpokema mPue Ala,” inceʼe painaka napapotoʼoka tampa setu Mahanai.
3Roo setu napokaumo i Yako bara tesangkuja tau moriu njoʼu ri Edomi da mampomberataka tukakanya i Esau. 4Napapolako i Yako tau seʼe natoʼo, “Da nditoʼoka tukakaku i Esau ewaseʼi, ‘Yaku i Yako, anamayunumu. Sangkasae seʼi yaku maroo-roo ri Laba. 5Seʼi-seʼi reʼemo kupotumpu japi, kalide, bimba, mbula paiwaʼa anamayunu. Yaku mampakatu bambari ri pueku, pai kupomata-mata pueku da mawongko rayaa.’ ”
6Butu mewalili waʼa mpomokau setu ri Yako, natoʼo ntau seʼe, “Kami njoʼumo ri Esau, tukakami setu, pai seʼi-seʼi siʼa ntongo mpelinja da momberata pai komi. Sira maʼi pai taua aopo atu.” 7Madonge inceʼe merata eka ndaya i Yako pai ipu rayanya. Inceʼe painaka waʼa ntau anu sangkani-ngkani pai siʼa natila radua ntila, ewanceʼe waʼa bimbanya, mbulanya, pai pai untanya. 8Maka napepewoloka, “Ane karata i Esau setu da mampoʼiwalika siʼa, tau anu santila ri suara anu da naporumpa riunya, pai anu santila karadua bara da naleʼopa yau lapa.”
9Ungka lairia mekakai i Yako natoʼo, “Boo Pue Ala, anu napanyomba ngkaiku i Burahima, pai papaku i Saki, ndipedongeka pekakaiku! Komi Pue mampokaumo yaku da mewalili ri tanaku pai ri waʼa ntinaku. Pai komi Pue mojanji da mampasilolonganika yaku mpodago. 10Yaku bareʼe sintinaja da mantarima waʼa mpuru ndaya pai katodomi Pue anu ndipatongawakamo yaku. Ri tempo mpalaiku mawote Koro Yarade, bereʼe bara nunjaa-njaa anu kukeni waʼanyamo podo toko. Paikanya seʼi-seʼi yaku mewalili sangkani-ngkani anu radua ntila seʼi. 11Merapi puru yaku, ndisorepaka yaku ungka pale ntukakaku i Esau. Maeka rayaku boi siʼa rata maungku yaku pai maʼopisaka kami pura-pura, ewanceʼe seʼe weʼa pai ananggodi. 12#Pal. 22:17 Ndiendomo, komi mojanjimo Pue da mampasilolongani kaku mpodago mpengaya-ngaya pai da mangawaika yaku muli anu sondo. Bereʼe tau anu mangkoto maimba ewa kasondo bone ri wiwi ntasi.”
13-15Ri kasambengi ntau seʼe njairia, natima i Yako santila ungka waʼa mpinatuwunya da nawaika i Esau. Waʼa mpombai setu inceʼemo: radua atu mbula tina, rua mpuyu mbula laki, rua atu bimba tina, rua mpuyu bimba laki, tatogo mpuyu unta anu ntongo mampasusu ananya, sangkani pai ananya, aopo mpuyu japi tina, sampuyu japi laki, rua mpuyu kalide tina pai sampuyu kalide laki. 16Nagaʼaraka waʼa mpinatuwu setu bara tesangkuja ntila, santila-santila seʼe napepombaika ri sambaʼa anamayununya. Natoʼoka tau seʼe, “Ndiporiumo komi mampesindiuka yaku, pai da ndipakalawa oyomi santila-santila seʼe.” 17Nasongka i Yako anamayununya anu kaʼisa, “Ane momberata tukakaku i Esau pai komi, pai napeoasi, ‘Isema puemu? Ri mbeʼi da kanjoʼumi? Isema tumpu waʼa mpinatuwu anu nditaeri setu?’ 18Da ndisonomo, ‘Inceʼe anu anamayunumi i Yako. Inceʼi ndapakatu mewali pasumboʼo ri puea i Esau. Anamayunumi i Yako ngkalioa maʼi mantondaraka kami.’ ” 19-20Ri anamayununya anu karadua, katatogo pai pura-pura anu napapolako mampasilolongani waʼa mpinatuwunya setu, napatadaka songka anu siwia. Maka nanawa-nawa i Yako da naleʼo mangkanarasi i Esau pai waʼa mpesumboʼo setu, painaka ane momberatamo pai siʼa bareʼemo da majaʼa rayanya. 21Mewali waʼa mpesumboʼo setu napaporiu, pai siʼa ngkalionya ntongo sambengi ri kareʼe mpokema.
Pombeluku i Yako ri Penieli
32:22-32
22Ri wengi setu seʼe membangu i Yako nepa nawotesaka rongonya radua, rongo piaranya radua pai ananya sampuyu pai sambaʼa nawotesaka ri Koro Yabo. 23Roo nawotesaka tau seʼe, mewalili muni siʼa, nepa napokau ndawotesaka pura-pura aga-aganya. 24#Hos. 12:3-4 Paikanya siʼa maroo-roo ngkalionya njairia.
Ungkalairia ratamo sambaʼa tuama mombeluku pai Yako rantani mowinangkasi reme. 25Butu naepe ntau setu bareʼe da nakoto menangi ri pombeluku setu, painaka nawombo posuncu mbuku mpaʼa i Yako painaka malepi. 26Nepa natoʼo ntau setu, “Lapasaka yaku; da mebetemo reme.”
Mesono i Yako natoʼo, “Bareʼe da kulapa komi, sangadi ndidonco yaku.”
27Meoasi tau setu natoʼo, “Isema toʼomu?”
Mesono siʼa natoʼo, “I Yako.”
28 #
Pal. 35:10
Natoʼo ntau setu, “Toʼomu banyamo i Yako. Maka siko mombelukumo pai Pue Ala pai tolino pai tongawa siko menangi; inceʼe painaka toʼomu ndasawanika Isaraeli.”
29 #
Tdu. 13:17-18
Natoʼo i Yako, “Da nditoʼomo toʼomi.” Paikanya mesono tau setu, “Bereʼe yowenya nupeoasi isema toʼoku!” Nepa nadonco i Yako.
30Ungkalairia natoʼo i Yako, “Yaku mombesuaramo pai Pue Ala, paikanya bareʼe mate yaku.” Inceʼe painaka napapotoʼoka tampa setu Penieli. 31Butu mebetemo reme, malai i Yako ungka ri Penieli, paikanya kangkujo-ngkujomo pelinjanya maka malepimo paʼanya. 32Inceʼe painaka rantani wawaseʼi waʼa nto Isaraeli bareʼe mangkoni sanga mpinatuwu anu lau ri posuncu mbuku mpaʼanya. Maka i Yako kono ndawombo ri posuncu mbuku mpaʼanya.
Dewis Presennol:
PALABURU 32: LAIPMF
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda