PALABURU 23
23
Kamatemo i Sara pai paoli i Burahima tana mpopadayo
23:1-20
1Ganamo 127 ntaʼu tinuwu i Sara, 2mate siʼa ri Heberoni tana Kanaʼa. Mapari raya i Burahima nakukuousi kapate ndongonya setu.
3Ungka lairia napalaika i Burahima watangkoro ndongonya, nepa njoʼu siʼa i waʼa nto Heti anu mampeari tana setu. Natoʼo, 4#Pwn. 7:16, Ib. 11:9, 13 “Yaku seʼi podo tau mencua anu maroo-roo ri oyomi ee waʼa ngkasangkompo; mbolimo da ndiwai yaku mangaoli tana da kupangadayo wata ngkoro ndongoku.”
5-6Mesono tau seʼe natoʼo, “Kami mangantubunaka komi ewa sambaʼa tadulako anu maroso ri oyo mami, mewali ndidayomo rongomi setu ri dayo anu maʼai ngkadagonya ri popadayo mami. Kami pura-pura mawongko raya mami da mampatokaka komi dayo ndongomi setu.”
7Ungka lairia metutu mambukotu i Burahima ri suara ntau seʼe, 8nepa natoʼo, “Ane monco kojo kabuya ndayami ee waʼa ngkasangkompo, da kupadayo wata ngkoro ndongoku ireʼi, tulungi yaku ndiperapi kaku ri Eperoni ana tuama i Sohari, 9da naka napobalu ri yaku Wayau mbatu Mapela anu njau ri sori bondenya. Mbalimo napobalu tananya setu ireʼi, da naka komi anu mewali sabi. Sangkuja ntano olinya da kubayari pura-pura, da naka tana setu yakumo tumpunya.”
10Sindara setu i Eperoni njau motunda-tunda pai waʼa nto Heti ri kareʼe mpogombo ri baa-baa ngkota. Mewali nasabi ntau pura-pura anu njau njairia pesononya, 11Natoʼo bancaku ngkalioku anu mewali sabi, kono bonde sangkani pai wayau setu kupepombaika ri komi da ndipangadayo watangkoro ndongomi setu.”
12Inceʼe painaka metutu mombukotu i Burahima ri suara waʼa nto Heti setu, 13nadonge-donge ntau pura-pura anu njau njairi pompaunya ri Eperoni, “Kuperapi da ndipedongeka pauku seʼi. Da rayaku mangaoli pura-pura bonde setu. Tarimamo olinya, da naka kudayo rongoku njairia.”
14-15Mesono i Eperoni, “Sambaka tana anu olinya podo aopo atu doi salaka – nunjaamo posokinya ri kita radua? Ndidayomo rongomi njairia.” 16Nasintuwunaka i Burahima oli ntana setu. Naimbamo doi salaka silulu pai anu natoʼo i Eperoni, aopo atu ngkomba doi salaka ewa anu napake ntopobalu-balu. Nepa nawaika i Eperoni, ri suara pura-pura to Heti anu njau njairia.
17Ewanceʼemo bonde i Eperoni anu njau ri Mapela ri tondo mpebetea Mamire, napotumpu i Burahima. Ri tana setu njau bonde pai wayaunya sangkani pai pura-pura puʼu ngkaju tesuamo pai puʼu ngkaju anu reʼe ri tida ntana. 18Tana setu ndaʼaku i Burahimamo tumpunya pai pura-pura to Heti anu njau ri gombo ri baa-baa ngkota setu mangaʼaku.
19Roo setu nadayomo i Burahima rongonya i Sara ri wayau Mapela ri tana Kanaʼa. 20Ewanceʼemo bonde sangkani pai wayau anu nto Heti setu, napotumpumo i Burahima mewali tana mpopadayo.
Dewis Presennol:
PALABURU 23: LAIPMF
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda