PALABURU 13
13
Pogaʼa i Burahima pai Loʼoti
13:1-13
1Napalaika i Burahima tana Masiri, malai siʼa njoʼu ri tondo utara, natotoka tondo selata ntana Kanaʼa, sangkani pai rongonya pai waʼa aga-aganya, njoʼu woʼu pai Loʼoti. 2I Burahima koreʼemo kojo; siʼa mampotumpu bimba, mbula, japi, ewanceʼe seʼe salaka pai wuyawa. 3Palainya seʼe bareʼe rodo sambaka-mbaka pai melimba-limba natotoka Beteli. Rata siʼa ri daera ri oyo Beteli pai Ai, kareʼe anu moʼanitu kareʼe mpawangunya kema owi 4pai pawangunya lampaʼani. Njairia panyombanya ri Pue.
5I Loʼoti woʼu mampotumpu sombori pai waʼa anamayunu, bimba, mbula pai japi. 6Inceʼe puʼunya painaka tana nyairia bareʼemo gana padanya da napeari ntau seʼe radua ncombori maka pinatuwu ntau seʼe maria gaga. 7Painaka mewali popaiso waʼa ntopongkambi i Burahima pai waʼa ntopongkambi i Loʼoti. (Ri tempo setu to Kanaʼa pai to Perisi ntongo mampeari tana setu).
8Natoʼo i Burahima ri Loʼoti, “Kita seʼi tau mokasangkompo, bareʼe madago ane waʼa ntauku pai waʼa ntaumu da mopaiso. 9Inceʼe painaka moruana kita da mogaʼa. Mewali, pilisimo anu tondo mbeʼi anu nupokono. Ane siko malai tondo ireʼi, yaku da malai njoʼu ri tampa ntaninya.”
10 #
Pal. 2:10
Napapowawo i Loʼoti sape-sape nakita samalele rato ri wingke ngkoro Yarade, rata ri kota Soari gana-gana uenya, ewa bonde i mPue bara ewa tana Masiri. (Ewanceʼe katedikanakanya ri kabareʼepa ndagero i mPue kota Sodomo pai Gumora). 11Kabotunya i Loʼoti mampilisi samalele rato ri wingke ngkoro Yarade setu, malai siʼa ri tondo pebetea. Ewanceʼemo pogaʼa-gaʼa ntau radua setu. 12I Burahima maroo-roo ri tana Kanaʼa, paikanya i Loʼoti mawangu kemanya ri waʼa ngkota ri rato anu mosu pai Sodomo. 13Kota Sodomo napeari waʼa ntau anu maʼai ngkajaʼa poʼengkonya pai masalaa ri Pue.
Pelimba i Burahima ri Heberoni
13:14-18
14Butu payamo i Loʼoti, ndatoʼo i mPue ri Burahima, “Ungka ri kareʼe mpekakoremu setu, papowawo mpodago tana seʼi juku-juku; 15#Pwn. 7:5 Yaku da mangawaika siko pai waʼa mulimu samalele tana anu nukita da nupopanta rantani masae-sae. 16Yaku da mangawaika siko mulimu anu maʼai ngkasondo, painaka bereʼe mau sambaʼa tau anu mangkoto mangaimba gori ngkasondonya. Ewambeʼi kabareʼenya nakoto ntau mangaimba awu ntana, ewanceʼemo mulimu bareʼe ndakoto mangaimba. 17Mewali seʼi-seʼi, linjakimo samalele ntana seʼi, maka tana seʼi da kuwaika siko.” 18Ungka lairia nalimba i Burahima kareʼe mpokemanya nepa maroo-roo siʼa mosu ri waʼa nunu kareʼe mpanyomba ri Mamire mosu Heberoni, pai njairia nawangu lampaʼani mpanyomba ri Pue.
Dewis Presennol:
PALABURU 13: LAIPMF
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda