Maroko 5
5
O Piadah ni Yis to Maaro'ay no Kaackan a 'Adingo
(Matay 8.28-34; Luka 8.26-39)
1Ta tahira sato ca Yis i ti:raw a lawac no Kalili a fanaw i Kirasa a pala. 2Yo ma^pod ci Yis nai tamina i, ira a militmoh ci Yisan ko ccay a nai tademay a maaro'ay no kaackan a 'adingo. 3Kalaloma' han noya tamdaw ko dihif a tadem. Awaay ko pakapalitay i cingraan. Caay ka filo a paliten to lonayi', 4nawhani nano nipalitan cingra to kinapinapi:na a mipakadang ko kamay ato wa'ay. Nikawrira, lafolafot han ningra ko lonayi'. Pelpelen ningra ko kadang no wa'ay ningra. Saka, awaay ko pakafo'otay i cingraan. 5Rarid saan cingra to romi'ad to dadaya a milkal i tadem ano ^ca i, i lotok. Ri'angen ningra a midoka' ko tireng ningra to fokloh.
6Yo ma'araw noya tamdaw ci Yis i ra:ay i, cikay saan a miraod i ci Yisan. Pitosor sa cingra a mita'ong i ka'ayaw ni Yis. 7Cli' sa cingra a somowal, <<O Wawa no Isatakaraway a Kawas Yisaw, nawiro tayni Kiso a mirawraw i takowanan saw? Pakaynien ako i ngangan no Kawas ko nipingitangit i Tisowanan, aka pasemsemen kako!>> saan. 8(O sakasaan nira i, o nano nisowalanto ni Yis ciira to, <<O kaackan a 'adingo, kasadak tonini a tamdaw!>> sanay.)
9Saka, licayen ni Yis ciira, <<Cima ko ngangan iso?>> han Ningra.
<<Ci Likiyon#5.9 Likiyon -- o no Krisiya a sowal, 'alomanay o sanay, ma^deng tosa tolo a patek ko sofitay. ko ngangan ako, nawhani 'alomanay kami,>> saan ciira a paca'of. 10Misaliyaliyaw a mingitangit ciira i ci Yisan to saka aka fahfahen cangra a paliyas nanitini tona pala.
11Ira i ngata noya taporo ko 'alomanay a masaflaway a komaenay a fafoy. 12Ngitangiten noya kaackan a 'adingo ci Yis a somowal, <<Ocoren kami a papicomod tora masaflaway a fafoy, haydaen kami a maro' i laloma' no fafofafoyan,>> han nanira. 13Hayda hanto ni Yis koya kaackan a 'adingo. Saka, sadak sato koya kaackan a 'adingo a miliyas toya tamdaw a micomod toya fafoy. Ta cikay sato koya masaflaway a fafoy a maloklon i tono' a mihitfo i fanaw a ma'alol a mapatayto. Ma^deng tosa a patek (2,000) koya fafoy.
14Laliw sato koya pakaenay to fafoy a tamdamdaw, tayra cangra a paratoh to i niyaro'ay ato i omahay. Saka, tayra sato ko 'alomanay a minengneng to nika o maan ko iraay a dmak. 15Yo tahira cangra i ci Yisan i, ma'araw nangra koya namaaro'ay no 'alomanay a palafoay. Ciriko'to cingra a masatamdaw a maro'. Saka, matalaw cangra. 16Oya napaka'araway a tamdaw tonini a dmak i, pasowal i tamdamdaw to pakayniay toya namaaro'ay no kalaha'ay#5.16 kalaha'ay -- Malcaday to palafoay, kaackan a 'adingo. ato pakayniay toya masaflaway a fafoy a dmak.
17Orasaka, ngitangiten nangra ci Yis a papiliyas to pala nangra.
18Yo midakaw ci Yis to tamina i, <<Mihaklong kako,>> saan a mingitangit i ci Yisan koya namaaro'ay no palafoay a tamdaw.
19Nikawrira, caay haydaen ni Yis, sowal sa i cingraan, <<Pinokay i loma' a tayra i malininaay iso a pasowal i cangraan to nika masamaan ko dmak no Tapang ato hakowa ko sini'ada Ningra i tisowanan,>> han Ningra. 20Saka, tayra sato cingra i Tikapolis a pala a palosiyang itira to nano dmak ni Yis i cingraan. Safahka' sa a ma^min ko tamdamdaw a mitngil.
O Fafahiyan a Wawa ni Yayrus ato Maleslesay ko Rmes a Fafahiyan
(Matay 9.18-26; Luka 8.40-56)
21Yo pakatamina haca ci Yis a milacal a tayra i ti:raw a lawac no fanaw i, tihlom sa ko 'alomanay a finawlan i Cingraan itira i lawac no fanaw. 22Ira itira ko ccay a citodongay to kasa'opoan a kakridan ci Yayrus hananay, ira a tayra a miraod. Yo paka'araw cingra ci Yisan i, hinokop sa cingra i ka'ayaw ni Yis. 23Sa'icel sa cingra a mingitangit i ci Yisan, <<Sakapatayanto ko fafahiyan a wawa ako. Nanay tayniho Kiso a mikapa i cingraan, adahen cingra, pa'oripen cingra,>> han ningra a somowal.
24Lahaklong sato ci Yis ato cingra a tayra. 'Aloman ko tamdaw to mikotoday #5.24 mikotoday -- o roma i, miririd (ka'amis). i Cingraan a romakat, a mico^co^co i Cingraan.
25Ira itira ko ccay a malacaanay a fafahiyan to maleslesay ko rmes to tosa ko safaw a mihcaan. 26Napaisingto cingra i 'alomanay a ising, tadamapades cingra to nipisemsem no adada ningra, malasawadto ko dafong ningra a ma^min to sapaising. Nikawrira, awaay ko nanga'ayan ningra. Mangalef a mangalef ko nika tatiih no tireng ningra. 27Nano pakatngilayto cingra to dmak ni Yis saka, mokmok saan cingra to finawlan a miraod a pakaaikor ni Yis a mitfing to kafafang Ningra. 28Nawhani <<Ano matfingto ako ko kafafang ni Yis i, o mamaadah kako,>> saan ko harateng ningra.
29Tangsol sa a tomrep ko nika lesles no rmes ningra. Mahapinangto ningra ko nika adah no tireng ningra. 30Itiya i, tangsol a mahapinang ni Yis ko nika sadak no 'icel nai tireng Ningra saka, pasasiikor saan Cingra i finawlan a somowal, <<Cima ko mitfingay to riko' Ako?>> saan.
31Paca'of sa ko nisawawaan Ningra, <<Nengnengen, 'aloman ko mico^coay i Tisowanan i, nawiro cima ko mitfingay i Takowanan saan Kiso saw?>> han nangra.
32Nikawrira, o sapihapinangaw ni Yis toya cima ko mitfingay i Cingraan saka, nengneng sa Cingra to i taliyokay a tamdaw. 33Mafana' koya fafahiyan to pakayniay i tireng ningra, saka, mirmir sa cingra a miraod i ci Yisan a mihinokop a mita'ong i ka'ayaw Ningra, patalahkal han ningra a pasowal ko polong no dmak ningra a ma^min. 34Pasowal sa ci Yis i cingraan, <<Wawaaw! O nano paso'lin iso i Kawas ko sakaadah iso. Sanga'ayen ko rakat iso a minokay. O maadahayto kiso,>> han Ningra.
35Yo pasowal iho ci Yis i, ira ko papinapina a naniloma'ay no citodongay to kasa'opoan a kakridan a miraod i ci Yayrusan a somowal, <<Mapatayayto ko fafahiyan a wawa iso, o maanho ko papakalifoten to singsi saw?>> han ningra.
36Caay pikihar ci Yis#5.36 Caay pikihar ci Yis -- ano ^ca i, mitngil ci Yis. tonini a kasasowal nangra. Nikawrira, sowal sa Cingra toya citodongay to kasa'opoan a kakridan, <<Aka ka talaw, deng o nipiti'er to Kawas ko nga'ay!>> han Ningra. 37Itiya i, deng ci Pitiro aci Yakop ato safa ni Yakop ci Yohani ko nihaydaan ni Yis a mihaklong i Cingraan. Caay haydaen Ningra ko romaroma a tamdaw. 38Yo tahira cangra i loma' noya citodongay to kasa'opoan a kakridan i, ma'araw ni Yis ko nika rarawraw no 'alomanay. Matngil Ningra ko piongong no tamdaw a tomangic. 39Comod sa ci Yis i laloma' a pasowal i cangraan, <<O maan ko kararawrawan namo a tomangic saw? Caay ko mapatayay konini a wawa. O mafoti'ay cingra,>> han Ningra.
40Katawaen nangra a ma^min ci Yis, nikawrira, pasadaken Ningra cangra a ma^min i papotal. Deng o mama ato ina noya wawa ato tatoloay a nisawawaan ni Yis ko mihaklongay Cingraan a micomod i kafoti'an noya fafahiyan a wawa. 41Tengteng han ni Yis ko kamay noya wawa a somowal, <<Talita, komi,>> han Ningra. O tatodong nonini a sowal i, <<Wawaaw, pasowalen Ako kiso, kalomowad,>> o sanay.
42Saka, tangsol sato a lomowad koya wawa ta romakat. (Tosato ko safaw no mihcaan noya wawa.) Safahka' sato ko 'alomanay tonini a dmak. 43Solinga'en ni Yis a palimo'ot cangra, aka palosiyangen ko cimacima tonini a dmak, ta paflien to kakaenen konini a wawa han ni Yis.
Dewis Presennol:
Maroko 5: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019