Matay 28
28
O Kalomowad ni Yis a Ma'orip nai Patay
(Maroko 16.1-10; Luka 24.1-12; Yohani 20.1-10)
1Cila no Pasla'an a Romi'ad kaniharan no sa'ayaway a romi'ad no fa^lohay a lipay i, tayra i tadem a minengneng ci Mariya no Maktala ato roma a Mariya. 2Itiya i, fahal sa ira ko tata'angay a lonen, maloklon nai kakarayan ko coyoh no Tapang a tayra a miwalin to fokloh, ta aro' sa koya coyoh i fafaed noya fokloh. 3Matiya o kalapiyat a matdi ko pising ningra. Matiya o so^da ko nika tomli' no riko' ningra. 4Mirmir sa a matalaw cingraan koya misimaway a sofitafitay. Samatiya sato o mapatayay cangra.
5Pasowal sa koya coyoh toya fafahifahiyan, <<Aka ka talaw! Mafana' kako to nika o mikilimay kamo ci Yisan oya nipacekan i ciwcika. 6Awaayto i tini Cingra. Mato sowal Ningra i 'ayaw, lomowadayto Cingra a ma'orip nai patay! Katayni kamo, nengnengen ko nano pitlian i Cingraan. 7Kalamkamen a tayra i nisawawaan Ningra a pasowal, <O lomowadayto a ma'orip nai patay Cingra. I 'ayaw to namo Cingra a tayra i Kalili. O mama'araw namo Cingra itira!> Aka ka pawan to nipasowalan ako i tamowanan,>> saan.
8Talacowa matalaw koya fafahiyan, nikawrira, tata'ang ko lipahak nangra. Saka, kalah sa cangra a miliyas toya tadem a comikay a tayra i nisawawaan a paratoh tonini a dmak.
9Itiya i, fahal sa a ira ci Yis a militmoh i cangraan. <<Nga'ayho,>> saan Cingra. Raod sa cangra i ci Yisan a mitakec to wa'ay Ningra a mita'ong. 10Itiya i, pasowal sa ci Yis i cangraan, <<Aka ka talaw. Olili. Pasowalen ko salikaka Ako, o sowal ni Yis i, Katayra i Kalili. O mama'araw namo Kako itira, saan ci Yis han a pasowal,>> han Ningra.
O Piparatoh no Misimaway a Sofitay
11Yo caho ka tahira koya fafahiyan i, tayra i niyaro' ko papinapina noya misimaway to tadem a sofitay a paratoh i kakridan no citodongay to ta'ong to nano dmak a ma^min. 12Itiyasato, masa'opo a masasowasowal koya kakridan no citodongay to ta'ong ato kalas no niyaro' to saka^caaw ka losiyang nonini a dmak. Saka, paflien nangra to adihayay a payso koya sofitay 13a somowal, <<Yo mafoti' kami to lafii i, ira ko nisawawaan Ningra a mitakaw a pasadak ci Yisan, han ko sowal. 14Ano matngitngil no mikomoday konini a sowal i, kami sato ko mafana'ay a somowal, ta awaay ko maan namo,>> han nangra.
15Saka, ala hanto noya sofitay koya payso a mido^do to nano sowal nangra i cangraan. Tahanini a matnak i Yutaya a tamdamdaw konini a sowal.
O Pipatorod ni Yis to Nisawawaan Ningra
(Maroko 16.14-18; Luka 24.36-49; Yohani 20.19-23; Dmak 1.6-8)
16Nanoya, tayra i Kalili koya ccay ko safaw a nisawawaan a macokacok i nisowalan ni Yis a lotok. 17Yo ma'araw nangra ci Yis i, mita'ong cangra. Nikawrira, ira ko hinapecay a tamdaw. 18Raod sa ci Yis i cangraan a pasowal, <<Mapatorodayto i Takowanan ko polong no sapikowan to kakarayan ato hkal a 'icel. 19Orasaka, katayra kamo a palanisawawaan Ako to polong no kasakitakit ato kasafinawlan. Ta pakaynien i ngangan no Wama ato Wawa ato Fangcalay 'Adingo ko nipipaino' i cangraan. 20O romasato, pasifana'en cangra a papi'imer toya nipalimo'otan Ako i tamowanan a ma^min. Haratengen! O mamararid Kako a mikapot i tamowanan, tangasa i pahrekan no hkal,>> han ni Yis.
Dewis Presennol:
Matay 28: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019