Luka 9
9
O Piocor ni Yis to Tosa ko Safaw a Tarokos
(Matay 10.5-15; Maroko 6.7-13)
1Nanoya, tahidangen ni Yis a misa'opo ko tosa ko safaw a tarokos. Paflien Ningra cangra to 'icel ato sakacitodong nangra a mifahfah to palafoay ato sapiadah to adadaay. 2Ta ocoren Ningra cangra a papipatnak to pakayniay i Kitakit no Kawas a ratoh, ato miadah to adadaay. 3Pasowal sa ci Yis i cangraan, <<Ano mirakat kamo to niyaro' i, aka pitatoy to maan aca. Aka pitatoy to cokor ato lofoc ato kakaenen ato payso. Aka piala to sapatisod a riko'. 4Ano talacowacowa to i, ano i cowaayto a loma' ko makahiay a mihamham i tamowanan a tamdaw, ta itira han a maro' tangasa i piliyasan namo toya niyaro'. 5O caay pihamham tamowanan a niyaro' i, tihtihen ko alafoh no saripa' namo a miliyas itira. Onini i, o sapahapinangaw i cangraan to sapapi'imer to dmak nangra,>> han ni Yis.
6Lowad sato koya tosa ko safaw a nisawawaan a mirakat to niyaroaro' a mipatnak to Nga'ayay Ratoh. Miadah cangra to adadaay.
O Rawraw no Faloco' ni Hiroti
(Matay 14.1-12; Maroko 6.14-29)
7Itiya i, matngil ni Hiroti o hongti no Kalili konini a dmak a ma^min. Rawraw sa ko faloco' ningra. Nawhani ira ko somowalay, <<Lomowadayto a ma'orip nai patay ci Yohani o Paino'ay,>> saan. 8Sowal sa ko roma a tamdaw, talahkalayto ci Iliya, o roma a tamdaw i, lomowadayto a ma'orip nai patay ko ccay a itiya:ayho a pali'ayaway to sowal no Kawas saan. 9Sowal sa ci Hiroti, <<Malili'elayto ako ci Yohani, cimaho konini a tamdaw saw? Mana matngilho ako ko pakayniay i cingraan a adihayay a dmak,>> saan cingra, saka, sapinengnengan cingra ci Yisan.
O Pipakaen ni Yis to Lima a Patek a Tamdaw
(Matay 14.13-21; Maroko 6.30-44; Yohani 6.1-14)
10Minokayto ko tarokos a paratoh i ci Yisan to nano dmak nangra a ma^min. Krid hanto ni Yis cangra, dokdok sato a tayra i Pitsayta hananay a niyaro'. 11Nikawrira, yo mafana' ko finawlan tonini i, toor sa cangra ci Yisan. Hamhamen ni Yis cangra a militmoh a pasowal to pakayniay i pikowan no Kawas. Adahen Ningra ko adadaay a tamdaw.
12I piclemanto ko cidal i, raoden no tosa ko safaw a tarokos ci Yis a somowal, <<Paliwasaken ko tamdamdaw a patayra i ngataay a niyaro' a mikilim to kakaenen ato pilafinan nangra, nawhani o kohkohan i tini,>> han nangra.
13Nikawrira pasowal sa ci Yis i cangraan, <<Kamo ko papafli to kakaenen nangra,>> han Ningra.
Sowal sa ko nisawawaan, <<Deng lima a 'aplad no ^pang ato tosa aca a foting ko nitatoyan niyam. Ano hatira i, kami ko tatayra a micakay to malokakaenen nonini a 'alomanay a tamdaw haw?>> han nangra. 14Itiya i, ma^deng lima a patek ko fa'inayan aca.
Pasowal sa ci Yis i nisawawaan Ningra, <<Mahkalimalimaen a polo' ko finawlan a pasacfacfang a pakamaro',>> han Ningra.
15Saka, haen han no nisawawaan a pakamaro' ko finawlan a ma^min. 16Itiya i, tatoy sato ci Yis toya lima a 'aplad no ^pang atoya tosa a foting. Ca'ngaw sa Cingra a pasikakarayan a mikansiya to Kawas. Ta pcih sa Cingra to ^pang a papipakilac to nisawawaan i finawlan. 17Mafcol cangra a ma^min a komaen. Sa'opo han nangra ko kinapcih a 'osaw a ^pang i, matomes ko tosa ko safaw a fakar.
O Pipatalahkal ni Pitiro ci Yisan o Kristo
(Matay 16.13-19; Maroko 8.27-29)
18Yo ccay a romi'ad, ccay ci Yis a mitolon. Ira a miraod ko nisawawaan Ningra. Itiya i, licayen Ningra cangra, <<Pakocima ko kalotamdamdaw i Takowanan saw?>> han Ningra.
19Paca'of sa cangra, <<Ci Yohani o Paino'ay, ira ko sanay. Ci Iliya, ira ko sanay. O lomowaday a ma'orip nai patay a ccay no iti:yaayho a pali'ayaway to sowal no Kawas, ira ko sanay,>> han nangra.
20Licay sa ci Yis i cangraan, <<Ano hatira i, pakocima kamo i Takowanan saw?>> han Ningra.
Paca'of sa ci Pitiro a somowal, <<O nipatirengan no Kawas a Kristo Kiso,>> han ningra.
O Pipali'ayaw ni Yis a Somowal to Pakayniay i Patay Ningra
(Matay 16.20-28; Maroko 8.30--9.1)
21Itiya i, palimo'ot hanto ni Yis cangra, <<Aka pasowal i cimacimaan tonini a dmak,>> han Ningra. 22Ta pasowal haca Cingra, <<Caay ka ^ca, o mamapasemsem ko Wawa no Tamdaw to masamaamaanay a pades. O fafalahen no kalas no niyaro' ato kakridan no citodongay to ta'ong ato pasifana'ay to Rikec, o papatayen nangra, ta sakatolo a romi'ad i, o lalomowad a ma'orip nai patay,>> han Ningra.
23Pasowal haca ci Yis i cangraan, <<Ano cima ko sapitoorananay i Takowanan i, falahen ko no tireng a harateng, 'orongen to romi'ami'ad ko ciwcika no tireng, tooren Kako. 24O limlaay to 'orip no tireng a tamdaw i, o mamafalah ningra ko 'orip ningra. Nikawrira, ano saki Takowanan ko pikinafalah no tamdaw to 'orip ningra i, o mamilayap to 'orip cingra. 25Ano ci^ta^tan ko cima a tamdaw to polong no hkal i, nikawrira, ano sakatkop ningra ano ^ca i, ano sakasipon no 'orip no tireng i, o maan ko ^poc saw? 26Ano cima ko pakangodoananay i Takowanan ato sowal Ako i, o mamapakangodo Ako cingra, itiya yo malahaklong to koya Wawa no Tamdaw i 'dil no niyah ato i 'dil no Wama Ningra ato fangcalay a coyoh a tayni. 27So'linen Ako a somowal kamo, ira i tini ko papakatakop a paka'araw to pikowan no Kawas i 'ayaw no nika patay nangra,>> han Ningra.
O Nika Falic no Tireng ni Yis
(Matay 17.1-8; Maroko 9.2-8)
28I ikor no nika somowal ni Yis tonini to falo a romi'ad i, kriden ni Yis ci Pitiro aci Yohani aci Yakop a macokacok a tayra i lotok a mitolon. 29Yo mitolon ci Yis i, mafalic ko pising Ningra, haloriko' Ningra a tomli' a matdi. 30Fahal sa a ira ko tatosa a tamdaw a masasowal ato Cingra. Onini a tatosaay a tamdaw i, ci Mosi aci Iliya. 31Ci'dil cangra a talahkal. Masasowasowal cangra aci Yis to pakayniay i lalahcien ni Yis a dmak a mapatay i Yirusalim. 32Marda' a mafoti' ci Pitiro ato kapot ningra. Nikawrira, yo mapalalto cangra i, ma'araw nangra ko 'dil ni Yis atoya tatosaay a mikapotay ci Yisan a tomireng. 33Yo sapiliyasan i ci Yisan koya tatosaay i, pasowal ci Pitiro ci Yisan, <<Singsiaw, tadanga'ay ko nika i tini ita. Sanga'en niyam ko tolo a talo'an. O ccay i, o malomiso, o ccay i, o malo ni Mosi, o ccay i, o malo ni Iliya,>> han ningra. Onini i, o pipatdo ni Pitiro a somowal.
34Yo somowalho cingra i, ira ko carofacof a mitahpo i cangraan. Yo mangata no carofacof cangra i, matalaw cangra. 35Itiya i, matngil ko ngiha' i carofacof. Sowal sa, <<O Wawa Ako, o nipili'an Ako konini. Pitngil kamo to sowal Ningra,>> saan.
36Yo tomrepto koya ngiha' i, dengto ci Yis a ccay ko itiraay. Itiya toya romi'ad i, trep sa ko nisawawaan, to pakayniay tonini a dmak, caay pasowasowal cangra i cimacimaan to manengnengay nangra a dmak.
O Piadah to Maaro'ay no Palafoay a Wawa
(Matay 17.14-18; Maroko 9.14-27)
37Cila sato a romi'ad, yo maloklon cangra nai lotok i, litmohen no 'alomanay a finawlan ci Yis. 38Itiya i, ira i finawlan ko ccay a micli'ay a tamdaw, <<Singsiaw, ngitangiten ako Kiso, pa'oripenho ko wawa ako, o dengan a wawa ako cingra! 39Ano ira a mirpet ko palafoay cingraan i, fahal sa a misaclicli' cingra, pafickot han niira i, talafolang sa ko ngoyos no wawa ako. Kari'angen niira, caay ka sapiliyasan koya palafoay to wawa ako. 40O ningitangitanto ako ko nisawawaan Iso a papifahfah a pasadak toya palafoay, nikawrira, caay pakafilo cangra,>> han ningra.
41Paca'of sa ci Yis a somowal, <<Aya: ko nika ^ca paso'lin namo o aniniay a ma'akongay ko faloco' a tamdaw. Tahacowa ko nipikapot Ako i tamowanan ato nipihadidi Ako i tamowanan saw? Pataynien koya fa'inayan a wawa iso,>> han Ningra.
42Yo miraod koya wawa ci Yisan i, polin han no palafoay cingra, ta mapafickot cingra. Saka, kakter han ni Yis koya kaackan a 'adingo, maadahto koya fa'inayan a wawa, ta patorod hanto Ningra ko mama ningra. 43Safahka' sa ko tamdaw a ma^min to nika tadamaan no 'icel no Kawas.
O Pipali'ayaw ni Yis a Somowal to Pades ato Patay Ningra
(Matay 17.22-23; Maroko 9.30-32)
Yo fahka'ho ko tamdamdaw to nano dmak ni Yis a ma^min i, sowal sa ci Yis i nisawawaan Ningra, 44<<Aka tawalen ko nisowalan Ako i tamowanan. O mamapatorod i kamay no cisakowanay a tamdaw ko Wawa no Tamdaw,>> han Ningra. 45Nikawrira, caay ka fana' cangra to tatodong nonini a sowal. Nawhani kilifen ni Yis cangra to saka^caaw ka fana' nangra to tatodong nonini a sowal, caay pakaeses cangra a milicay i Cingraan to pakayniay tonini a sowal.
Cima ko Satadamaanay?
(Matay 18.1-5; Maroko 9.33-37)
46Nanoya, ira ko kalaliyaliyang no nisawawaan to nika, <<Cima ita ko satadamaanay hakiya?>> saan. 47Mafana' ci Yis to faloco' nangra saka, kayat han Ningra ko ccay a ka^mangay a wawa a patireng i tatihi Ningra. 48Sowal sa Cingra i cangraan, <<Ano saki ngangan Ako ko nipihamham no nima to hatiniay a ka^mangay a wawa i, o mihamhamay ito cingra i Takowanan. O mihamhamay i Takowanan i, o mihamhamay to miocoray i Takowanan. Ano cima namo ko sasafaay i, orira ko satadamaanay.>>
O Pacoliay ato Mihaiay
(Maroko 9.38-40)
49Pasowal ci Yohani ci Yisan, <<Singsiaw, ma'araw niyam ko ccay a tamdaw a pakaynien ningra i ngangan Iso ko pifahfah to palafoay, lalangen niyam cingra, nawhani caay pikapot cingra i tamiyanan a mitoor i Tisowanan,>> han ningra.
50Pasowal sa ci Yis i cingraan ato romaroma a nisawawaan, <<Aka lalangen cingra, nawhani o caay pacoli i tamowanan i, o mihaiay i tamowanan,>> han Ningra.
O Nika ^ca Pihamham no Samariya i ci Yisan
51Mangatato ko romi'ad ni Yis to kakakoyan Ningra a talakakarayan saka, sarocod sa ko faloco' Ningra to sakatayraaw i Yirusalim. 52Ocoren ni Yis a paki'ayaw ko pakarongay Ningra. Tayra cangra i niyaro' no Samariya a mipatala to saki ci Yisan. 53Nikawrira, caay pihamham koya Samariya a tamdaw i ci Yisan. Nawhani mahapinang nangra ko nika o tatayra i Yirusalim ko rakat ni Yis. 54Ma'araw ni Yakop aci Yohani o nisawawaan ni Yis konini a dmak i, sowal sa, <<Tapangaw, mamaan, tahidangen niyam ko namal nai kakarayan a mitodoh a mitkop cangraan,>> han nangra.
55Nikawrira, pasayra sa ci Yis i cangraan a mikakter#9.55 cangraan a mikakter -- iraay ko katlangay a cudad, i ikor no cangraan a mikakter, citongal to sowal, Caay ka fana' kamo to nika o maan a 'adingoan ko tireng namo, nawhani, o sakatayni no Wawa no Tamdaw i, caay ko saka palasawadaw to 'orip no tamdaw, deng o sapa'oripaw i cangraan.. 56Ta tayra sato cangra i roma a niyaro'.
O Mamitoor i ci Yisan a Tamdaw
(Matay 8.19-22)
57Yo romakat cangra i lalan i, ira ko somowalay i ci Yisan, <<Ano talacowacowa Kiso i, mitoor kako i Tisowanan,>> han ningra.
58Saka, sowal sa ci Yis i cingraan, <<Ano o koyoto i, ira ko dihif nanira. Ano o ma^ferayto a 'ayam i, ira ko dipong nanira. Nikawrira, awaay ko no Wawa no Tamdaw a patatangalanan,>> han Ningra.
59Pasowal sa ci Yis to roma a tamdaw, <<Pitoor i Takowanan,>> han Ningra.
Nikawrira, sowal sa koya tamdaw, <<Tapangaw, papinokayenho kako a papitadem to mama ako,>> han ningra.
60Pasowal sa ci Yis i cingraan, <<Papitadem han ko mapatayay a tamdaw to mapatayay nangra. Kiso to i, pipatnak to pakayniay i Kitakit no Kawas,>> han Ningra.
61Pasowal ko roma a tamdaw, <<Tapangaw, o mamitoor kako i Tisowanan. Nikawrira, papinokayenho kako a papipaikor to sowal to i loma'ay ako,>> han ningra.
62Pasowal sa ci Yis i cingraan, <<Tinako sa, ano mikangkang ko tamdaw, ano pasiikor cingra a minengneng i, caay ka nga'ay. Mahaen ito ko mamicomod i Kitakit no Kawas a caay ka nga'ay a pasiikor a minengneng,>> han Ningra.
Dewis Presennol:
Luka 9: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019