Luka 19
19
Ci Yis aci Cakay
1Nanoya, micomod ci Yis i Yiriko. Pakayra cingra a romakat. 2Ira itira ko ccay a kakridan no milisataay ci Cakay hananay a tamdaw. O cidafongay cingra. 3Sapinengnengan cingra to nika masamaanay a tamdaw ci Yis. Nikawrira, po^ner cingra. Saka, caay paka'araw ci Yisan, nawhani ma'ading no finawlan cingra. 4Cikay sa cingra a tala'ayaw a mikalic i calamay a kilang to sapinengnengaw i ci Yisan. Nawhani o papakayra ci Yis a mita'lif. 5Yo tahira ci Yis itira i, pasifaed sa a minengneng. Sowal sa cingraan, <<Cakayaw, kalamkamen a ma^pod, nawhani o mamilafin Kako anini i loma' iso,>> han Ningra.
6Sakalamkam sato ci Cakay a ma^pod. Salipahak sa cingra a mihamham ci Yisan. 7Manengneng no tamdamdaw konini i, ngaliwngiw sa a somowal, <<Micomod i loma' no ciraraway a tamdaw a malalafang kora tamdaw,>> saan cangra.
8Tireng sa ci Cakay a somowal i Tapang, <<Tapangaw, paflien ako ko pakoyocay a tamdaw to latosa no dafong ako. Ano cima ko nisafana'an ako a miala to maan i, spatento ako a patiko i cingraan,>> saan cingra.
9Pasowal sa ci Yis i cingraan, <<Mapa'orip no Kawas anini konini a loma', nawhani halonini a tamdaw a o tloc ni Apraham. 10O sakatayni no Wawa no Tamdaw i, o mikilimay, o mipa'oripay to moraraway a tamdaw,>> han Ningra.
O Tinako to Koli ato Mina
(Matay 25.14-30)
11Yo mitngilho ko 'alomanay tonini a sowal i, patoor han ni Yis a somowal to ccay a tinako. Itiya i, mangatato ni Yis ko Yirusalim, o tatangsol a talahkal ko pikowan no Kawas saan ko harateng nangra. 12Sowal sa, <<Ira ko ccay a tadamaanay a tamdaw. O tatayra cingra i maraayay a kitakit to sakalahongtiaw ta minokay. 13Saka, tahidang han ningra ko mamo^tepay a koli ningra a patorod i cangraan to alaccay no mina#19.13 mina -- o no Krisiya a sowal, ccay a mina i, o lifon no smo'otay a romi'ad. hananay a payso. Pasowal sa i cangraan, <Sapipatiyamen konini tangasa i pinokayan ako,> han ningra. Ta tayra sato cingra. 14Nikawrira, ci'intel ko finawlan ningra i cingraan. Saka, ocor han nangra ko pakarongay a papitoor cingraan a papipasowal, <Caay ka olah kami a malahongti niyam kiso,> saan han a pasowal, han nangra.
15<<Nanoya, yo minokayto cingra tona malahongti i, papitahidang han ningra ko tamdaw toya nipatorodan ningra to payso a kolikoli. Onini i, o sapihapinangaw ningra to nika hakowato ko ni^tanan nangra. 16Sowal sa koya sa'ayaway a miraod a koli, <Tawkiaw, sapipatiyamen ako koya nipaflian iso a mina, ta ci^tanto kako to mo^tep a mina,> han ningra. 17Pasowal sa ko tawki, <Tadanga'ayay! O karahkeran a koli kiso. Tona malalok kiso i mamangay a dmak saka, patoroden papikowanen ako kiso to mo^tepay a niyaro',> han ningra. 18Sowal sa koya sakatosa a miraoday a koli, <Tawkiaw, sapipatiyamen ako koya nipaflian iso a mina, ta ci^tanto kako to lima a mina,> han ningra. 19Sowal sa koya tawki i cingraan, <Kiso ko roma, o mamikowan kiso to lima a niyaro',> han ningra.
20<<Tayra sa ko roma a koli a somowal, <Tawkiaw, ini koya ccay a mina iso. Tafoen ako to sasifin a mina'ang. 21Matalaw kako i tisowanan, nawhani o ca^desay a tamdaw kiso. O caayay ko no tireng i, miala kiso. O caayay ko nipalomaan iso i, militod kiso,> han ningra. 22Sowal sa koya tawki i koli ningra, <O tatiihay a koli kiso. Pakaynien ako i sowal iso ko nipipastek i raraw tisowanan. O ca^desay a tamdaw cingra. O caayay ko no tireng i, miala cingra. O caayay ko nipalomaan ningra i, militod cingra. 23Ano saan ko nika fana' iso to pakayniay i takowanan i, nawiro caay na'angen iso i kingko ko payso ako saw? Ta tangasa i pinokay ako i, ciwawato koya payso ako a mapatiko i takowanan,> han ningra koya koli.
24<<Sowal sa koya tawki to tomirengay i tatihi a tamdaw, <Alaen nai cingraan ko mina ningra a pafli i mitatoyay to mo^tep a mina,> han ningra. 25Sowal sa cangra, <Tapangaw, mitatoyay koya tamdaw to mo^tep a mina a payso,> han nangra. 26Pasowal sa koya tawki, <Sowalen ako kamo, o iraay ko nitatoyan i, matongal a matongal a mapafli. O awaay ko nitatoyan i, halonitatoyan ningra a ma'afas. 27Oya caay ka olah a 'ada to nika lahongti ako i, kriden a patayni, ta patayen cangra i ka'ayaw ako saan,> >> han ni Yis.
O Kacihrang ni Yis a Micomod i Yirusalim
(Matay 21.1-11; Maroko 11.1-11; Yohani 12.12-19)
28Mahrek ci Yis a somowal tonini i, malasa'ayaway Cingra a macokacok a tayra i Yirusalim. 29Yo mangata nangra ko Pitifaci ato Pitani a niyaro' itira i Olif hananay a lotok i, sowalen ni Yis ko tatosa a nisawawaan Ningra a miocor. 30<<Katayra kamo to:ra niyaro'. Ano micomod kamo itira i, ma'araw namo ko mapaktingay a toforho a lofa to caayho ka dakawen no nimanima. Tdalen namo caira a mikiting a patayni i Takowanan. 31<Nawiro tdalen namo konini a tofor a lofa saw?> ano saan ko cima a milicay i tamowanan i, <O papakatayalen no Tapang#19.31 Tapang -- ano ^ca i, o tapang nanira. ciira,> han ko pipasowal,>> han Ningra.
32Tayra sato cangra i, mado^do ko sowal ni Yis to manengnengay nangra. 33Yo mitdal cangra toya tofor a lofa i, <<Nawiro tdalen namo kora tofor a lofa saw?>> saan ko cilofaay a tamdaw a milicay.
34Paca'of han nangra, <<O papakatayalen no Tapang ciira,>> han nangra. 35Ta kiting hanto nangra koya lofa a patayra i ka'ayaw ni Yis. Clak hanto nangra ko kafafang nangra i koror noya lofa, damaen nangra ci Yis a padakaw. 36Yo tala'ayaw ci Yis i, pasaksaken no tamdamdaw i lalan ko kafafang no tireng.
37Yo tahira ci Yis i saliklon a lalan no Olif a lotok i ngata no Yirusalim i, salipahak sa ko 'alomanay a nisawawaan ni Yis a micli' a pahmek to Kawas to pakayniay i nano ninengnengan nangra a kafahka'an a dmak ni Yis a ma^min. 38Sowal sa, <<Nanay mapakalmed no Kawas ko niocoran no Tapang pakayni i ngangan Ningra a hongti. Nanay ira ko rihaday i kakarayan. Nanay mapa'dil ko Isatakaraway a Kawas,>> saan.
39Itiya i, sowal sa i ci Yisan ko mikapotay to finawlan a papinapina a Farisay a tamdaw, <<Singsiaw, lalangen ko nisawawaan iso,>> han nangra.
40Paca'of sa ci Yis, <<Sowalen Ako kamo, ano tomrep cangra i, cli' asa ko fokloh,>> han Ningra.
O Tangic ni Yis to Pakayniay i Yirusalim
41Yo mangatato ni Yis ko Yirusalim i, tangic sa Cingra a minengneng toya niyaro'. 42Sowal sa, <<Ano mafana'ay kiso to nika ira ko sakarihaday iso anini i, kona manga'ay. Nikawrira, caay pakahapinang kiso tonini. 43Yo mamaraod ko romi'ad, itiya a o mama'adipel no 'ada ko taliyok iso a milikot a mico^co i tisowanan. 44Ta plengen nangra kiso ato i laloma'ay iso a finawlan. O a awato ko ccaccay a fokloh i kafkang no roma a fokloh. Nawhani caay ka hapinang iso ko pipa'oripan no Kawas a romi'ad,>> saan Cingra.
O Pikorac ni Yis to Fangcalay Pita'ongan
(Matay 21.12-17; Maroko 11.15-19; Yohani 2.13-22)
45Nanoya, micomod ci Yis i Fangcalay Pita'ongan. Fahfahen Ningra a pasadak ko malali'acaay a tamdaw. 46Sowal sa i cangraan, << <O pitolonan ko Fangcalay Pita'ongan Ako> saan ko sowal a matilid i Fangcalay Cudad. 'Arawhani, kaladihif han namo konini a loma' a palapilimekan no mitakaway,>> han Ningra.
47Mararid to romi'ami'ad ci Yis a pasifana' i Fangcalay Pita'ongan. Misa'imer to sapipatayaw ci Yisan ko kakridan no citodongay to ta'ong ato pasifana'ay to Rikec ato kakrikridan no niyaro'. 48Nikawrira, awaay ko pakayraan nangra a mipatay ci Yisan, nawhani pasayra i ci Yisan ko faloco' no finawlan a ma^min a mitngil.
Dewis Presennol:
Luka 19: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019