Luka 16
16
O Tinako to Mackiday a Misimaway to Loma'
1Pasowal sa ci Yis i nisawawaan Ningra, <<Ira ko ccay a misimaway to loma' no cidofangay a tawki. Pakokoten no tao ko dmak noya misimaway, sowal sa toya tawki, mala'om noya misimaway to loma' ko dafong iso saan. 2Saka, tahidang hanto noya tawki cingra a somowal, <Ira ko matngilay ako to nano dmak iso. Masamaanay kora dmak iso saw? Pasadaken a pakafana' i takowanan ko pakapaysoay a sa'osi iso a ma^min. Nawhani caayto papisimawen ako kiso to dafong ako,> han ningra. 3Harateng sa koya a misimaway to loma', <O mamasawad no tawki kako tonini a tayal. Saka, samaanen ako hakini? Ano misakoli kako i, awaay ko 'icel ako. Ano miki'a'am kako i, mangodo kako. 4Mafana'to kako, ano mapasawasawad kako tonini a tayal i, o sasanga'en ako ko widang to mamihamham i takowanan,> saan cingra.
5<<Saka, tahidangen ningra ko citadatadahay i tawki ningra a tamdaw. Sowal sa toya sa'ayaway a tamdaw, <Pina ko tadah iso i tawki ako saw?> han ningra a milicay. 6<Smo'ot a konoy#16.6 konoy -- o no Ripon a sowal i, o talo han. ko simal no olif,> han ningra a paca'of. Sowal sa koya misimaway to loma', <Ini ko nitilidan ako to nicaliwan iso. Dadada, kamaro'. Lima a polo' han ita a miliyaw a mitilid,> han ningra. 7Ta pasowal sa cingra to roma a tamdaw, <Pina ko tadah iso?> han ningra a milicay. <Smo'ot a pawti ko ^mi,> han ningra a paca'of. Sowal sa koya misimaway to loma', <Ini ko nitilidan ako to nicaliwan iso. Falo a polo' han ita a miliyaw a mitilid,> han ningra.
8<<Mahmek ko tawki to nika ckid nonini a caay ka mo^cel ko dmak a misimaway to loma' a misafana'. Nawhani ikaka no taneng no i ta^ngaday tamdaw ko taneng no tamdaw nonini a hkal to saki kapot nangra.
9<<Onini a sowal Ako i, ka o dafong no hkal ko sapisawidang namo, ta ano awaayto koya dafong i, oya widang ko mamihamham tamowanan a pacomod i mida'ocay a kamaro'an, o sanay Ako saw? 10Caay. O misamangahay i mamangay a dmak i, o misamangahay i tata'angay a dmak. O so'linay ko faloco' i mamangay a dmak i, o so'linay ko faloco' i tata'angay a dmak. 11Orasaka, ano caay ka so'lin ko faloco' namo to pakayniay i dafong no hkal i, caay ko papatoroden no Kawas kamo to so'linay a dafong. 12Ano caay ka so'lin ko faloco' namo a misimaw to dafong no tao i, caay ko papaflien no Kawas kamo to dafong no tireng.
13<<Caay ka nga'ay a tosa ko tapang no ccay a matayalay a koli. Nawhani ano haenen ningra i, ka'osien ningra ko ccay, kaolahen ningra ko ccay. Ano ^ca i, kangodoen ningra ko ccay, ^pecen ningra ko ccay. Orasaka, ano palcaden namo ko harateng to saki Kawas ato saki dafong i, caay ka nga'ay,>> han ni Yis.
O Pinapina a Sowal ni Yis
(Matay 5.31-32; 11.12-13; Maroko 10.11-12)
14Matawa ko ma'anofay to payso a Farisay a tamdamdaw a mitngil to sowal ni Yis a ma^min. 15Pasowal sa ci Yis i cangraan, <<O mipalafangcalay kamo to tireng i ka'ayaw no tamdamdaw, nikawrira, mafana' ko Kawas to faloco' namo. O tadamaanay hananay no tamdamdaw i, o awaay ko ^poc han no Kawas.
16<<O Rikec ni Mosi ato nitilidan no pali'ayaway to sowal no Kawas i, tangasa i ci Yohanian o Paino'ay ko ^poc nonini. Nanitiya ci Yohanian a tahanini a mapatnak ko Nga'ayay Ratoh to pakayniay i Kitakit no Kawas. Saka, alapaci^ci^ci sa ko tamdamdaw a sapicomodan to nikowanan no Kawas a kitakit. 17Nikawrira, o nika lasawad no kakarayan ato hkal ko rahodayay to nika lasawad no samimingay a konis no nitilidan a Rikec.
18<<O misawaday to fafahi a ciramod to roma a fafahiyan i, o ma'odangay. O romasato, o ciramoday to nisawadan no fa'inay a fafahiyan i, o ma'odangay ito cingra.
O Cidafongay a Tamdaw aci Lacarus
19<<Ira ko ccay a cidafongay a tamdaw. Ciriko' cingra to makapahay a riko'. Mararid to romi'ami'ad a maacang a patahtah ko 'orip ningra. 20Nikawrira, ira i ka'ayaw no fawahan ningra a matli ci Lacarus hananay a maldefay no kaliwates ko tireng a miki'a'amay to romi'ami'ad. 21Mangalay cingra a komaen to matfaday a posak i kakomaenan noya cidafongay a tamdaw. Raoden no waco cingra a minacnac to kaliwates ningra.
22<<Nanoya, mapatayto koya miki'a'amay a tamdaw. Alaen no coyoh cingra a patayra i tatihi ni Apraham. Itira cingra a marnec ko 'orip. Nanoya, mapatayto koya cidafongay a tamdaw ta matadem. 23Misemsem i kaitiraan no mapatayay koya cidafongay. Ca'ngaw sa cingra i, ma'araw ningra i ra:ay ci Apraham. Ma'araw ningra ci Lacarus itira. 24Cli' sa cingra a somowal, <Mama Aprahamaw, kasini'adaen kako. Papicdo'en ci Lacarus to tarodo' ningra i nanom, ta ocoren a papicpa' to sma ako. Nawhani tata'ang ko pisemsem ako i tini tonini a marengrengay a namal,> han ningra.
25<<Pasowal sa ci Apraham, <Wawaaw, haratengen, yo ma'oripho kiso i, mahrekto kiso a malmed ko 'orip. Ci Lacarus sa i, mahrekto cingra a misemsem. Saka, anini sato mahinomto cingra. Kiso i, ketket han iso ko semsem. 26Caay ka orira a ccay, cila'ed kita to talolongay kakahaday a tono'. Saka, caay ko mamafilo niyam a milacal a tayra i tamowanan,> han ningra. 27Sowal sa cingra, <Mamaaw, ano hatira aca i, milongoc kako i tisowanan. Ocoren ci Lacarus a patayra i loma' no mama ako. 28Nawhani iraho ko lalima a salikaka ako. Palimo'oten cangra to saka^caaw ka tayni nangra tonini a pisemseman,> han ningra.
29<<Nikawrira, pasowal sa ci Apraham, <Ira i cangraan ko sowal ni Mosi ato sowal no pali'ayaway to sowal no Kawas. O pitngil nangra tonini a sowal ko nga'ay,> han ningra. 30Sowal sa koya cidafongay a tamdaw, <Cowa, mama Aprahamaw, ano ira ko ccay a nano mapatayay a tamdaw a tayra i cangraan i, caay ka ^ca pifalic cangra to faloco',> han ningra. 31Nikawrira, pasowal sa ci Apraham, <Ano caay pitngil cangra to sowal ni Mosi ato sowal no pali'ayaway to sowal no Kawas i, ano iraira ko lomowaday a ma'orip nai patay a tamdaw i, caay pitngil cangra,> saan,>> han ni Yis.
Dewis Presennol:
Luka 16: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019