Yohani 17
17
O Pitolon ni Yis to Saki Nisawawaan
1Mahrek ci Yis a somowal tonini i, pasikakarayan saan Cingra a somowal, <<Wamaaw, maraodayto ko romi'ad. Pahapinangen ko nika tadamaan no Wawa Iso. Ta pahapinangen no Wawa Iso ko nika tadamaan Iso. 2Nawhani mapaflito Iso i Takowanan o Wawa ko sakacitodong a mikowan to tamdamdaw a ma^min. O romasato, mapatorodto Iso i Takowanan ko papaso'lin i Takowanan a tamdaw. Onini i, o sapafliaw Ako to mida'ocay a 'orip i cangraan. 3Pakayni i nika fana' no tamdaw i Tisowanan o dengan a so'linay a Kawas ato nika fana' nangra ci Yis Kristoan o niocoran Iso ko saka ci 'orip nangra to mida'ocay. 4Malahcito Ako ko nipatorodan Iso i Takowanan a dmak. Mapatalahkalto Ako i tini i hkal ko nika tadamaan Iso. 5Wamaaw, oya nika tadamaan Ako yo mikapot i Tisowanan i 'ayaw no nika sanga' no hkal i, patalahkalen i matini.
6<<Oya nipili'an Iso i tini i hkal a palacidek to mamalo no Mako a tamdamdaw i, mapahapinangto Ako cangra to pakayniay i Tisowanan. O no Miso cangra i, paflien Iso Kako. O mido^doay cangra to sowal Iso. 7Mafana'to cangra i matini to nika o nano Miso a ma^min koya nipatorodan Iso i Takowanan. 8Oya nipatolonan Iso i Takowanan a sowal i, mapasowalto Ako cangra. Mafana'to cangra tonini. Mafana'to cangra to nika so'linay nai Tisowananay Kako a tayni. Paso'linto cangra to nika o niocoran Iso Kako.
9<<Mitolon Kako to saki cangraan. Caay pitolon Kako to saki no hkalan a tamdamdaw. Mitolon Kako to saki nipatorodan Iso i Takowanan a tamdamdaw. Nawhani o no Miso cangra. 10O no Mako a maamaan i, o no Miso a ma^min. O no Miso a maamaan i, o no Mako a ma^min. Pakayni i cangraan a mapatalahkal ko nika tadamaan Ako. 11I ikor nonini i, caayto ka i tini i hkal Kako. Nikawrira, i tiniho i hkal cangra. Tayra Kako i Tisowanan. Fangcalay a Wama, nanay o nipaflian Iso i Takowanan a 'icel Iso ko sapidipot Iso i cangraan. Ta matiya o nika laccay Ita ko nika laccay nangra. 12Yo mikapotho Kako i cangraan i, oya nipatorodan Iso i Takowanan a 'icel ko sapidipot Ako i cangraan. Tona madipot Ako cangra saka, awaay ko ccaccay aca nangra a matkopay. Deng oya mamatkotkop aca a tamdaw ko matkopay. Onini i, o nika lahci no matiliday i Fangcalay Cudad. 13Tayra Kako i Tisowanan i matini. O sakapasowal Ako tonini i tini i hkal i, nga'ay matiya o lipahak Ako ko nika tadamaan no lipahak nangra. 14Mapasowalto Ako cangra to sowal Iso. Nikawrira, ka'intelen no hkalan a tamdaw cangra. Nawhani matiya o Ako a caay ko no hkalan cangra. 15Paliyasen cangra to hkal, caay ka saan Kako. Dipoten cangra a paliyas nai Palafoay saan ko pilongoc Ako i Tisowanan. 16Malcad Takowanan cangra a o caay ko no hkalan. 17Nanay pakaynien Iso i so'lin Iso ko sakapipacakat nangra to tireng i Tisowanan, nawhani o so'lin ko sowal Iso. 18Matiya o nipiocor Iso i Takowanan a patayni i hkal ko nipiocor Ako i cangraan a patayra i mafokilay to Kawas a tamdamdaw. 19O saki cangraan saka, pacakaten Ako ko tireng i Tisowanan, ta malasakaso'lin nangra a mipacakat to tireng i Tisowanan.
20<<Caay ka deng o saki cangraan a ccay ko nipitolon Ako. Mitolon Kako to saki paso'linay i Takowanan to nano nipatnakan nangra. 21Wamaaw, nanay matiya o nika laccay Ita ko nika laccay nangra. O romasato, nanay malaccay Kita ato cangra. Ta pakayni tonini ko sakapaso'lin no tamdamdaw to nika o niocoran no Miso Kako. 22Mapaflito Ako i cangraan ko sakatadamaan nangra a matiya o nipipalatadamaan Iso i Takowanan. Ta matiya o nika laccay Ita ko nika laccay nangra. 23O nika laccay Ako ato cangra ato nika laccay Ita i, o sakasongila'aw nangra a malaccay. Onini i, o sakafana'aw no tamdamdaw to nika o niocoran no Miso Kako ato sakafana'aw nangra to nika matiya o nika olah Iso i Takowanan ko nika olah Iso i cangraan.
24<<Wamaaw, oya nipatorodan Iso i Takowanan a tamdaw i, nanay papikapoten Iso cangra i Takowanan itira i kaitiraan Ako. Ta ma'araw nangra ko nika tadamaan Ako, oya nano nipipalatadamaan Iso i Takowanan to nano olah Iso i Takowanan i 'ayaw no nika sanga' no hkal. 25Mo^celay a Wama, caay ka fana' ko tamdaw nonini a hkal i Tisowanan. Nikawrira, mafana' Kako i Tisowanan. Mafana' konini a nipatorodan Iso i Takowanan a tamdaw to nika o niocoran no Miso Kako. 26Mapakafana'to Ako cangra to pakayniay i Tisowanan. O papakafana' haca Kako i cangraan. Ta ira i faloco' nangra ko matiyaay o olah Iso i Takowanan a olah. Ta malaccay Kita ato cangra,>> saan.
Dewis Presennol:
Yohani 17: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019